Rættarregluevni (einans høvuðslógir og galdandi lógir):
Rættarreglubólkur:
Gildisstøða:
Ár:
Felagsmál / Sermál:
Mál:
Myndugleiki:
Um rættarregluna
  • Bólkur: Kunngerð
  • Gildisstøða: Galdandi
  • Felagsmál/Sermál: Sermál
  • Myndugleiki: Heilsu- og innlendismálaráðið
  • Útgávudagur: 10-11-2017
Tilvísingar
Kunngerðablaðið
  • Kunngerðarblað 2017 A - Kunngerð 144 frá 7. november 2017
  • Rættarreglan soleiðis sum hon upprunaliga varð kunngjørd í Kunngerðablaðnum
Valmøguleikar
Tín lógalisti

7. november 2017Nr. 144

Kunngerð um sigling kring Ramsar-oyggjarnar Nólsoy, Skúvoy og Mykines

 

Við heimild í §§ 20 og 45 í løgtingslóg nr. 59 frá 17. mai 2005 um verju av havumhvørvinum, sum broytt við løgtingslóg nr. 64 frá 17. mai 2013, verður ásett:

Gildisøki

§ 1. Kunngerðin ásetir reglur um sigling kring Nólsoy, Skúvoy, Mykines og Mykineshólm, sum eru útnevnd Ramsar-øki sambært Ramsar-sáttmálanum, ið Føroyar hava tikið undir við.

Treytir fyri sigling

§ 2. Í tíðarskeiðinum 15. apríl til og við 31. august er bannað at sigla skjótari enn 8 fjórðingar um tíman nærri enn 500 metrar úr landi á teimum økjum kring Nólsoy, Skúvoy, Mykines og Mykineshólm, sum eru tilskilað í skjali 1.

Stk. 2. Í tíðarskeiðinum 15. apríl til og við 31. august er bannað at sigla við vatnskutarum nærri enn 500 metrar úr landi kring Nólsoy, Skúvoy, Mykinesi og Mykineshólm.

Stk. 3. Í tíðarskeiðinum 15. apríl til og við 31. august er bannað at halda óneyðugan gang, eitt nú frá hørðum tónleiki, nærri enn 500 metrar út landi.

§ 3. Ásetingarnar í § 2, stk. 1 eru ikki galdandi fyri skip í fastari rutusigling til Nólsoyar, Skúvoyar og Mykinesar, men hesi før skulu í størst møguligan mun lúka ásetingina.

Stk. 2. Ásetingarnar í § 2 eru ikki galdandi í førum, tá neyðugt er at bjarga lív ella tryggja trygdina umborð á skipum og bátum o.tíl.

Revsing og gildiskoma

§ 4. Brot á § 2 verður revsað við sekt.

Stk. 2. Feløg og aðrir løgfrøðiligir persónar verða revsaðir sambært reglunum í kapittul 5 í revsilógini.

§ 5. Henda kunngerð kemur í gildi dagin eftir, at hon er kunngjørd.

 

 

Heilsu- og innlendismálaráðið, 7. november 2017

 

Sirið Stenberg (sign.)

landsstýrismaður

 

/ Turid Arge (sign.)

 

 

 

 

Skjal 1

 

 

Leiðir, har siglast skal við avmarkaðari ferð kring Nólsoy, Skúvoy, Mykines

og Mykineshólm sambært § 2.

 

 

Nólsoy

 

Á eystursíðuni millum Boðan og Hásteinsgjógv

Á vestursíðuni millum Neystanes og Reyðastíð

 


 

 

Skúvoy

 

Kring alla oynna

 

 


 

 

Mykines og Mykineshólmur

 

Kring alt Mykines og allan Mykineshólm.