Skrivar tú trygging verður eisini leitað eftir øðrum endingum av orðinum sum t.d. tryggingar og tryggingarvirksemi.
Skrivar tú ?trygging verður leitað eftir orðum sum t.d. lívstrygging og lívstryggingar.
Skrivar tú ”trygging” verður einans leitað eftir júst hesum sniðnum av orðinum.
9. juli 2019Nr. 102
Kunngerð um manningarásetan á førum minni enn 20 bruttotons í strandarsigling, sum sigla við upp í 12 ferðafólkum
Við heimild í § 4, stk. 3, § 10, stk. 1 og § 24, stk. 3 í løgtingslóg nr. 63 frá 3. juli 1998 um manning av skipum, sum broytt við løgtingslóg nr. 71 frá 30. mai 2011, og í samráð við umboð fyri reiðara- og sjómannafeløgini, verður ásett:
Øki
§ 1. Kunngerðin er galdandi fyri sigling, sum er liður í vinnuligum virksemi, við upp í 12 ferðafólkum í strandarsigling við vinnuførum og fiskiførum, træskipum og skipum, sum verða drivin uttan maskinorku, og sum eru minni enn 20 bruttotons til støddar.
Før við dimensiónstali upp á 20 ella meira
§ 2. Á førum, sum hava dimensiónstal upp á 20 ella meira, skal manningin telja minst tveir persónar.
Stk. 2. Tá ið manning og ferðafólk kunnu fáa neyðuga hjálp frá samsiglandi fari, er bara førari, sbrt. § 3, kravdur.
Stk. 3. Manningin skal vera myndug og ikki undir verjumáli eftir § 5 ella undir samverjumáli eftir § 7 í anordning om ikraftræden for Færøerne af værgemålsloven.
§ 3. Førarin á einum fari skal hava hesi prógv:
1) dugnaskaparroynd í sigling,
2) galdandi heilsuprógv fyri sjófólk uttan avmarkingar,
3) galdandi trygdarskeið fyri sjófólk, sbrt. STCW kap. A-VI/1, grein 2 um Basic Training, undantikið evnini í grein 2, nr. 1-2 og 1-4, og
4) galdandi prógv sum radiopassari innan GMDSS, samsvarandi radioútgerðini umborð.
§ 4. Persónur, ið ikki er førari, skal hava:
1) galdandi heilsuprógv fyri sjófólk uttan avmarkingar,
2) galdandi trygdarskeið fyri sjófólk, sbrt. STCW kap. A-VI/1, grein 2 um Basic Training, undantikið evnini í grein 2, nr. 1-2 og nr. 1-4,
3) upplæring í at nýta bjargingar- og eldsløkkingarútgerðina umborð, og
4) upplæring í at handfara farið.
§ 5. Er framtøkumegin á farinum 100 kW ella meira, men undir 750 kW, skal ein persónur, sum hevur dugnaskaparroynd í motorpassing, vera umborð. Tann persónurin kann vera ein av persónunum, nevndur í § 2, stk. 1.
Stk. 2. Á førum, ið nýta páhangara, er ikki krav um dugnaskaparroynd í motorpassing. Persónurin skal tó kunna skjalprógva hóskandi upplæring frá skikkaðum persóni í at handfara motorin.
Stk. 3. Er framtøkumegin á farinum meira enn 749 kW, verður manningin ásett sambært løgtingslógini.
Før við dimensiónstali undir 20
§ 6. Á førum við dimensiónstali undir 20, skal manningin telja í minsta lagi ein persón.
Stk. 2. Tá ið siglt verður sum bólkur við førum í samsigling, kann persónurin, sbrt. stk. 1, vera at meta sum manningin fyri samlaða bólkin av førum.
Stk. 3. Manningin skal vera myndug og ikki undir verjumáli eftir § 5 ella samverjumáli eftir § 7 í anordning om ikrafttræden for Færøerne af værgemålsloven.
§ 7. Førarin á einum fari ella bólki í samsigling skal hava kunnleika til:
1) altjóða sjóreglur,
2) at navigera í viðkomandi siglingarøki,
3) at fyribyrgja eldsbruna og at nýta sløkkingarútgerð, undir hesum at hava útint praktiska venjing,
4) stabilitetin á farinum,
5) trygd á sjónum,
6) havumhvørvisvernd, og
7) motorar á smærri førum.
Stk. 2. Umframt krøvini í stk. 1 skal førarin hava:
1) galdandi prógv sum radiopassari innan GMDSS, samsvarandi radioútgerðini umborð, og
2) galdandi fyrstuhjálparskeið sbrt. STCW kap. A-VI/1, grein 2 nr. 1-3 ella samsvarandi.
§ 8. Manning á einum fari, sum er umborð afturat førara, skal vera upplærd í at nýta bjargingarútgerð og sløkkingarútgerð umborð og í at handfara farið.
§ 9. Er framtøkumegin á farinum 100 kW ella meira, men undir 750 kW, skal manningin lúka krøvini í §§ 2-5.
Krav um skjalprógv
§ 10. Manningin á førum, fevnd av hesi kunngerð, skal hava skjalprógv fyri at lúka tey í §§ 3-5 ásettu krøv við sær, tá ið siglt verður.
Revsing
§ 11. Brot á §§ 2-10 verður revsað við sekt.
Stk. 2. Feløg og aðrir løgfrøðiligir persónar koma undir revsiábyrgd eftir reglunum í 5. kapitli í revsilógini.
Gildiskoma
§ 13. Henda kunngerð kemur í gildi 15. juli 2019, og samstundis fer úr gildi kunngerð nr. 69 frá 23. juni 2008 um manningarásetan á førum minni enn 20 bruttotons í strandarsigling, sum sigla við upp til 12 ferðafólkum.
Uttanríkis- og vinnumálaráðið, 9. juli 2019
Poul Michelsen (sign.)
landsstýrismaður
/ Herálvur Joensen (sign.)
