Kunngerð nr. 111 frá 19. november 2012 um broyting í kunngerð um sjúkufyribyrgjandi rakstur av alibrúkum

19. november 2012Nr. 111

Kunngerð um broyting í kunngerð um sjúkufyribyrgjandi rakstur av alibrúkum

§ 1

Í kunngerð nr. 134 frá 16. oktober 2009 um sjúkufyribyrgjandi rakstur av alibrúkum, sum seinast broytt við kunngerð nr. 78 frá 17. juni 2010, verða gjørdar hesar broytingar:

1)   § 2 verður orðað soleiðis:
”§ 2. Í hesi kunngerð merkir:
1)     Akvakulturdýr: Djór á øllum menningarstigum, sum liva í vatni (havsúgdjór undantikin) og sum eru í alibrúki ella eru ætlað til at hava í alibrúki.
2)     Biomassi: Samlaða nøgdin av livandi fiski.
3)     Anadromur fiskur: Fiskur, sum fer úr sjógvi í vatn at gýta.
4)     Katadromur fiskur: Fiskur, sum fer úr vatni í sjógv at gýta.
5)     Marinur fiskur: Fiskur, sum altíð er í sjónum.
6)     Vatn: Náttúrligt ella mannagjørt vatn, herundir eisini byrging.
7)     Fiskaárgangur:
a)     fiskur úr rognum, sum eru strokin og klekt um somu tíð, ella
b)     fiskur, sum er fluttur frá smoltstøð til alistøð í einum tíðarskeiði, ið ikki má vera longri enn 4 mánaðir.
8)     Fiskaeind: Fiskur av sama aldri og uppruna, sum verður aldur í somu alieind.
9)     Lívfiskur: Foreldrafiskur til nýtt ættarlið av lívfiski ella matfiski.
10)   Matfiskur: Fiskur á øllum menningarstigum, sum verður aldur á smoltstøð ella alistøð til slátur.
11)   Deyður fiskur: Sjálvdeyður fiskur og avlívaður fiskur, t.d. í sambandi við sýnistøku.
12)   Alibrúk: Lívfiskastøð, smoltstøð, alistøð ella onnur støð, har fiskur verður aldur.
13)   Lívfiskastøð: Støð á landi ella á sjónum, har lívfiskur verður aldur.
14)   Lívfiskastøð á landi: Lívfiskastøð, har sil og rogn verða strokin, rogn verða klakt ella har aling av lívfiski í vatni ella sjógvi fer fram í kari, tanga ella tílíkum á landi.
15)   Lívfiskastøð á sjónum: Lívfiskastøð, har aling av lívfiski fer fram á flótandi alianleggi á sjónum.
16)   Smoltstøð: Smoltstøð á landi ella á vøtnum, har matfiskur verður aldur.
17)   Smoltstøð á landi: Smoltstøð, har rogn verða klakt ella har aling av matfiski fer fram í kari, tanga ella tílíkum á landi.
18)   Smoltstøð á vatni: Smoltstøð, har aling av matfiski fer fram á flótandi alianleggi á vøtnum.
19)   Alistøð: Alistøð á landi ella á sjónum, har matfiskur verður aldur.
20)   Alistøð á landi: Alistøð, har aling av matfiski fer fram í innpumpaðum sjógvi í kari, tanga ella tílíkum á landi.
21)   Alistøð á sjónum: Alistøð, har aling av matfiski fer fram á flótandi alianleggi á sjónum í einum ella fleiri aliøkjum, við tilhoyrandi landstøð.
22)   Royndarfjørður: Ein fjørður, ein vík, eitt sund ella annað avmarkað havøki, har royndarstøð á sjónum hevur fyribils aliloyvi til aling av djóra- ella plantusløgum innan fyri ásetingarnar í hesi kunngerð.
23)   Lívfiskafjørður: Ein fjørður, ein vík, eitt sund ella annað avmarkað sjóøki, har ein lívfiskastøð á sjónum hevur loyvi til at ala lívfisk.
24)   Lívfiskaøki: Eitt avmarkað øki á einum lívfiskafjørði, har ein lívfiskastøð á sjónum, í tráð við lívfiskaloyvið, hevur loyvi til at leggja flótandi alianlegg til aling av lívfiski.
25)   Smoltvatn: Eitt vatn, har ein smoltstøð hevur loyvi til at ala matfisk.
26)   Smoltøki: Eitt smoltvatn ella eitt avmarkað øki í einum smoltvatni, har ein smoltstøð hevur loyvi til at leggja eitt flótandi alianlegg til aling av matfiski.
27)   Alifjørður: Ein fjørður, ein vík, eitt sund ella eitt annað allýst avmarkað øki, har ein ella fleiri alistøðir á sjónum ella á landi hava loyvi til at ala matfisk.
28)   Aliøki: Eitt avmarkað øki á einum alifjørði, har ein alistøð á sjónum, í tráð við aliloyvið, hevur loyvi til at leggja flótandi alianlegg til aling av matfiski.
29)   Flótandi alianlegg: Aliringar, alibúur, fóðurflakar og tílíkt, sum verður brúkt til aling av fiski á sjónum ella á vøtnum.
30)   Alieind: Klekibakkar, klekisylindarar og tílíkt, sum verður nýtt til kleking av fiski, og kør, tangar, aliringar, alibúur og tílíkt, sum verður nýtt til fiskaaling.
31)   Rakstrareind:
a)     Lívfiskastøð, smoltstøð ella alistøð á landi við felags hølum ella felags vatnveiting, sum verður rikin við felags útgerð, ella
b)     lívfiskastøð á sjónum, smoltstøð á vatni ella alistøð á sjónum við einum ella fleiri lívfiskaøkjum, smoltøkjum ella aliøkjum, flótandi anleggum, landstøðum, fóðurbátum ella alibátum, sum verða rikin við felags útgerð og av felags manning.
32)   Framleiðsludeild: Deildir á rakstrareindini, býttar upp eftir virksemi.
33)   Sleppivatn: Natúrligt ella manngjørt vatn, har fiskur verður settur út fyri at verða veiddur til stuttleika (lystfiskeri) (eisini rópt "Put and take " vatn).
34)   Skrásetingar-/góðkenningarnummar: Ávikavist:
a)     L-nummar fyri lívfiskastøðir ella lívfiskaøki,
b)     S-nummar fyri smoltstøðir,
c)     A-nummar fyri aliøki,
d)    M-nummar fyri marina alistøð, og
e)     AS-nummar fyri alistøðir. 
35)   Virki, sum hevur við alifisk at gera: Blóðgi- og kryvjivirki, góðskingarvirki, fiskavirki, sum virkar alifisk, nótavaskivirki og tílíkt.
36)   Loyvishavari: Tann, sum hevur aliloyvið til viðkomandi alibrúk.
37)   Rakstrarleiðari: Ábyrgdarhavandi fyri rakstrinum á viðkomandi alibrúki ella virki, sum hevur við alifisk at gera.
38)   Innaneftirlit: Skipað tiltøk, sum skulu tryggja, at virksemið á alibrúkinum verður lagt til rættis, skipað, útint og viðlíkahildið í samsvari við galdandi lóg ella við krøv, heimilað í galdandi lóg.
39)   Góðkendur heilivágur: Heilivágur, sum er skrásettur av Skrásetingarráðnum til viðgerð av fiski ella øðrum akvakulturdýrum.
40)   Góðkend vaski- og sóttreinsingarevni: Evni, sum eru góðkend av Arbeiðseftirlitinum og Heilsufrøðiligu starvsstovuni til nýtslu á matvøruframleiðandi virkjum.
41)   HFS-Aliskipan: Dátugrunnurin, sum upplýsingarnar í elektronisku rakstrardagbókini skulu latast til sbrt. § 26-27.
42)   Framleiðsluumfar: Tíðarskeiðið, frá at fyrsti fiskurin verður settur í eina rakstrareind, og til síðsti fiskurin er tikin.
43)   Slúsa: Ein fysisk barriera millum tvey øki, sum tryggjar smittumessigan atskilnað.”

2)   Aftaná § 10 verður sett inn:

“Serligt um aling á royndarfirðum

§ 10 a. Fyribils aliloyvi á royndarfirðum kann bert latast fyri eitt framleiðsluumfar í senn og bert til eitt felag í senn, tá ið talan er um aling av djórasløgum.
Stk. 2. Brakklegging millum hvørt framleiðsluumfar fylgir ásetingum í hesi kunngerð, tá ið talan er um aling av djórasløgum.
Stk. 3. Fyribils aliloyvi á royndarfirðum kann bert latast einum felag fyri hvørja roynd, tá ið talan er um aling av plantusløgum.
Stk. 4. Brakklegging millum hvørt framleiðsluumfar verður ásett mest fakliga hóskandi, tá ið talan er um aling av plantsløgum.
Stk. 5. Viðvíkjandi ársgjaldi fyri fyribils aliloyvi til royndaraling eru ásetingarnar í kunngerð um gjøld fyri aliloyvi galdandi.“

3)   Í § 22, stk. 5 verður “2 kalendaraár” broytt til “2 framleiðsluumfør”.

4)   § 32 verður orðað soleiðis:
“§ 32. Rakstur á alibrúki skal vera veterinert, lívfrøðiliga, umhvørvisliga og tøkniliga ráðiligur.”

§ 2

Fylgiskjal 1 til kunngerð nr. 134 frá 16. oktober 2009 um sjúkufyribyrgjandi rakstur av alibrúkum verður orðað av nýggjum. Sí broytingarnar í hjálagda fylgiskjali til hesa kunngerð.

§ 3

Henda kunngerð kemur í gildi dagin eftir, at hon er kunngjørd.

Vinnumálaráðið, 19. november 2012

Johan Dahl (sign.)
landsstýrismaður

/ Gunnleyg Árnafjall (sign.)

Fylgiskjal

Fylgiskjal 1 verður orðað soleiðis:

“Fylgiskjal 1

Lívfiskafirðir, smoltvøtn, alifirðir og havøki

Lívfiskafirðir (sbr. pkt. A), smoltvøtn (sbr. pkt. B), alifirðir (sbr. pkt. C) og havøki (sbr. pkt. E), har loyvi kann verða givið til at ala fisk, sbrt. § 3:

A. Lívfiskafirðir, har loyvt er at ala á lívfiskastøðum á landi
A1) Skopunarfjørður, soleiðis avmarkaður: Við beinum linjum í millum hesi staðarnøvn: Trøllhøvdi, Hælurin syðst á Hesti, Kirkjubønes syðst á Streymoynni, Borðan syðst á Nólsoynni og Skálhøvdi við bygdina Skálavík á Sandoynni

B. Smoltvøtn, har loyvt er at ala á smoltstøðum á vatninum
B1) Ovara byrging í Fonsdali omanfyri Vestmanna
B2) Niðara byrging í Fonsdali omanfyri Vestmanna
B3) Byrgingin í Hagadali omanfyri Vestmanna
B4) Vatnsnesvatn omanfyri Hov

C. Alifirðir, har loyvt er at ala á alistøðum á sjónum ella á alistøðum á landi

C1) Hvannasund suður, soleiðis avmarkað: Hvannasund sunnanfyri byrgingina ímillum Viðoynna og Borðoynna. Íroknað alifjørðin Hvannasund suður er Viðvík á Viðoynni.
C2) Hvannasund norður, soleiðis avmarkað: Hvannasund norðanfyri byrgingina ímillum Viðoynna og Borðoynna
C3) Árnafjørður
C4) Borðoyarvík
C5) Haraldssund suður, soleiðis avmarkað: Haraldssund sunnanfyri byrgingina ímillum Borðoynna og Kunoynna. Íroknað alifjørðin Haraldssund suður er Kalsoyarfjørður
C6) Haraldssund norður, soleiðis avmarkað: Haraldssund norðanfyri byrgingina ímillum Borðoynna og Kunoynna
C7) Funningsfjørður og Djúpini norður, soleiðis avmarkað: Frá Risagrøv á Eysturoynni í  beinari linju móti Gásafjalli á Kalsoynni
C8) Oyndarfjørður og Djúpini suður, soleiðis avmarkað: Frá Borgini á Eysturoynni í beinari linju til bygdina Blankskáli á Kalsoynni
C9) Fuglafjørður og Leirvíksfjørður norður, soleiðis avmarkað: Frá Galvinum á Kalsoynni í beinari linju til Leiti á Borðoynni og í beinari linju til Hagaleiti (brennistøðin) í Eysturoynni
C10) Gøtuvík og Leirvíksfjørður suður
C11) Lambavík
C12) Sundini norður: Sundini norðanfyri brúnna ímillum Eysturoynna og Streymoynna
C13) Sundini suður: Sundini sunnanfyri brúnna ímillum Eysturoynna og Streymoynna
C14) Kollafjørður, Tangafjørður og økið undir Neslandinum á Eysturoynni
C15) Kaldbaksfjørður 
C16) Nólsoyarfjørður
C17) Sandsvág og Skúvoyarfjørður
C18) Vestmannasund, soleiðis avmarkað: Suðureftir til beina linju ímillum Tvillingsgjógv í Vágum og Skæling á Streymoynni
C19) Miðvágur-Sandavágur. Íroknað aliøkið Miðvágur-Sandavágur er Vágafjørður og Hestfjørður
C20) Sørvágsfjørður. Íroknað alifjørðin Sørvágsfjørður er økið Vesturi á Víkum
C21) Trongisvágsfjørður. Íroknað alifjørðin Trongisvágsfjørður er Øravík
C22) Hovsfjørður
C23) Vágsfjørður. Íroknað alifjørðin Vágsfjørður eru Lopransfjørður og Víkarfjørður

D. Alifirðir, har loyvt er at ala á alistøðum á landi
D1) Hvalbiarfjørður
D2) Sandvík
D3) Fámjin

E. Alifirðir (havøki), har loyvt er at ala uttan fyri firðir og sund
E1) Eystan fyri Nólsoynna (Við landstøð í Rituvík)

F. Sleppivatn (Put and take-vatn), ið er natúrligt ella manngjørt vatn, har fiskur verður settur út fyri at verða veiddur til stuttleika
F1) Leynará, Leynavatn og ovara og niðara Mjáuvatn
F2) Saksun og vøtn omanfyri
F3) Nesvatn, uttanfyri Nes á Eysturoynni

G. Royndarfirðir
G1) Skálafjørður til tvískeljar og tara
G2) Svínoyarvík til royndaraling, sum ikki ber til at hava í alifirðunum omanfyri, sbr. pkt. A, C, D og E”