Skrivar tú trygging verður eisini leitað eftir øðrum endingum av orðinum sum t.d. tryggingar og tryggingarvirksemi.
Skrivar tú ?trygging verður leitað eftir orðum sum t.d. lívstrygging og lívstryggingar.
Skrivar tú ”trygging” verður einans leitað eftir júst hesum sniðnum av orðinum.
15. august 2022Nr. 116
Kunngerð um yrkisútbúgving innan aling á sjógvi og landi
Við heimild í § 4, stk. 1, § 5, stk. 1, § 8, stk. 3, § 14, stk. 1 og 2, § 16, stk. 2, § 17, stk. 2 og § 18, stk. 1 og 2 í løgtingslóg nr. 94 frá 29. desember 1998 um yrkisútbúgvingar, sum broytt við løgtingslóg nr. 48 frá 26. mars 2002 og løgtingslóg nr. 52 frá 17. mai 2011, verður ásett:
Kapittul 1
Stevnumið og bygnaður
§ 1. Sett verður á stovn ein yrkisútbúgving innan fiskaaling á sjógvi og landi.
§ 2. Útbúgvingin verður skipað við skúlaundirvísing og upplæring á góðkendum læruplássi.
Stk. 2. Endamálið er at geva lærlinginum hesar yvirskipaðu førleikar:
1) At arbeiða yrkisliga við aling á sjógvi og landi.
2) At arbeiða í alibrúki á sjónum, umframt alistøðum og smoltstøðum á landi.
3) At fara undir framtíðar yrki í alivinnuni og framhaldandi útbúgving.
4) At menna tann einstaka og hjálpa viðkomandi til samfelagsliga fatan.
§ 3. Útbúgvingartíðin er 4 ár.
Stk. 2. Útbúgvingin fevnir um hesar partar:
1) Upplæring á læruplássi í 3 mánaðir.
2) 1. skúlaskeið á 20 vikur.
3) 8 mánaðir á læruplássinum.
4) 2. skúlaskeið á 20 vikur.
5) 8,5 mánaðir á læruplássinum.
6) 3. skúlaskeið á 10 vikur.
7) 10 mánaðir á læruplássinum.
8) Sveinaroyndarskeið, 10 vikur tilsamans.
9) Serskeið 10 vikur.
Stk. 3. Fyri at halda fram á 2. skúlaskeiði er treytin, at lærlingur hevur lærusáttmála við góðkent lærupláss og hevur staðið 1. skúlaskeið við nóg góðum úrsliti.
Kapittul 2
Ástøðiligt og verkligt innihald
§ 4. Skúlagongdin fevnir um almennar lærugreinir, yrkislærugreinir og vallærugreinir.
Stk. 2. Almennu lærugreinirnar og almennu vallærugreinirnar verða lýstar í námsætlan, sum landsstýrismaðurin góðkennir.
Stk. 3. Innihaldið í yrkislærugreinunum og yrkisvallærugreinunum verður lýst í námsskipan, sum Yrkisnevndin góðkennir.
§ 5. Næmingurin skal hava 5 almennar lærugreinir og 2 almennar vallærugreinir við hesum tímatali:
1) Evnafrøði C, 75 klokkutímar.
2) Lívfrøði C, 75 klokkutímar.
3) Enskt C, 75 klokkutímar.
4) Støddfrøði E, 55 klokkutímar.
5) Føroyskt E, 55 klokkutímar.
6) Almenn vallærugrein E.
7) Almenn vallærugrein E.
Stk. 2. Næmingur kann velja at fara frá føroyskum E til føroyskt C og støddfrøði E til støddfrøði C í skúlatíðini. Hetta er tó treytað av, at næmingur hevur lærusáttmála.
Stk. 3. Velur næmingur at taka føroyskt ella støddfrøði á C stigi, verður kravið um tímar til vallærugrein lækkað samsvarandi økta undirvísingartímatalinum. Leiðari útbúgvingarstovnsins skal harumframt skipa soleiðis fyri, at næmingatíð verður tillutað til skrivlig avrik umframt eftirmeting av hesum.
Stk. 4. Mentamálaráðið tekur út tvær almennar lærugreinir til próvtøku.
Stk. 5. Støðumet verður givið í teimum almennu lærugreinunum, har eingin próvtøka er.
Stk. 6. Almennu lærugreinirnar fevna um 1. og 2. skúlaskeið og er treytin fyri at halda fram á 3. skúlaskeiði, at miðaltalið fyri próvtøl og støðumet í almennum lærugreinum og vallærugreinum er í minsta lagi 02.
§ 6. Skemalagda tímatalið til yrkislærugreinir er til samans 1050 klokkutímar við hesum lærugreinum:
1) Aling av fiski.
2) Anlegg og tøkni.
3) Trygd.
4) Burðardygg framleiðsla.
5) Alibúskapur.
6) Sveinaroyndarskeiði.
§ 7. Fyri hvørt skúlaskeið skipar skúlin fyri eftirmeting í yrkislærugreinunum.
Stk. 2. Eftirmetingin og hvat skal til fyri at standa yrkislærugreinirnar verður ásett í námsskipan fyri útbúgvingina.
Stk. 3. Talan kann vera um støðumet, próvtøku ella felags próvtøkuverkætlan fyri fleiri yrkislærugreinir samstundis. Hetta verður nærri ásett í námsskipan.
Stk. 4. Treytin fyri, at næmingur kann halda fram á næsta skúlaskeiði er, at talmetini fyri yrkislærugreinirnar eru í minsta lagi 02.
§ 8. Lærlingurin skal hava hesi serskeið:
1) Góðkenda dugnaskapsroynd,
2) trygdarskeið,
3) radioskeið, og
4) fyrstuhjálparskeið frá góðkendum veitara.
Stk. 2. Skúlin hevur ábyrgdina av at samskipa luttøkuna hjá lærlingunum á hesum skeiðum, og rindar skeiðskostnaðin.
§ 9. Førleikarnir, ið lærlingurin skal hava ognað sær við útbúgvingarlok, eru, at hann dugir:
1) At útinna dagliga røkt av aliverum í øllum pørtum av framleiðslugongdini, í tráð við galdandi regluverk, herundir fyri djóravælferð og umhvørvi.
2) At taka upp, handfara og beina fyri deyðum fiski á tryggan hátt og í mun til galdandi regluverk.
3) At taka royndir av fiski og fóðri, skjalfesta rakstrarviðurskifti og umhvørvisviðurskifti, og seta í verk tiltøk, ið eru grundað á eygleiðingar og mátingar.
4) At greiða frá og brúka framleiðslustýringar.
5) At greiða frá prinsippunum í resirkuleringsanleggum.
6) At menna fóðringina og duga at nýta eina fóðurskipan.
7) At hava eftirlit við vøkstur og menningarstig hjá aliveru.
8) At viga aliverur fyri at finna miðalvektina.
9) At eyðmerkja sjúkutekin hjá aliverum.
10) At greiða frá mest vanligu smittukeldunum í sambandi við fiskasjúkur og hvussu smittuspjaðing kann fyribyrgjast.
11) At fyrireika og hjálpa við koppsetingum av aliverum.
12) At kanna fyri snultidjórum og fremja eina lúsateljing.
13) At greiða frá hættum at fyribyrgja parasittum í aliringum, og at útinna viðgerð móti parasittum.
14) At duga at handfara kóp og onnur djór, sum amast upp á alibrúk.
15) At sóttreinsa, eftirkanna og viðlíkahalda útgerð og høli eftir galdandi viðlíkahaldsætlan.
16) At eftirkanna og viðlíkahalda tekniska framleiðsluútgerð á einum alibrúki sambært forskriftunum.
17) At handfara burturkast samsvarandi galdandi reglum.
18) At brúka útgerð, at lossa, lasta og sleipa í alianleggum og á alibátum á tryggan hátt og í mun til galdandi regluverk.
19) At greiða frá, hvussu rák, alda, veður og vindur ávirka arbeiðsumstøðurnar á sjónum.
20) At brúka databløð fyri heilsu, trygd og umhørvi, og at nýta kravda verndarútgerð og trygdarútgerð, og at vera ílatin eftir umstøðunum.
21) At fremja arbeiðsuppgávur í alianleggum á ergonomiskt rættan hátt.
22) At eyðmerkja tey viðurskifti í framleiðslugongdini, sum serliga kunnu ávirka framleiðslukostnaðin.
23) At arbeiða sambært galdandi góðskuskipan, innaneftirliti sertifiseringskrøvum og standardum.
Stk. 2. Verkliga læran tekur útgangsstøði í førleikamálunum og verður ásett í námsskipanini.
Kapittul 3
Próvtøkur og sveinaroyndarskeið
§ 10. Próvtøkukrøv og próvtøkuhættir eru ásettir í námsskipan og námsætlanum fyri einstøku lærugreinirnar.
§ 11. Meðan lærlingurin er á læruplássinum, skrivar hann saman við læruplássinum eina útbúgvingarfrágreiðing, sum útgreinar, hvørji førleikamál eru rokkin tíðina á læruplássinum. Frágreiðingin er partur av grundarlagnum undir sveinaroyndini. Skúlin ger nærri reglur um útbúgvingarfrágreiðingina.
§ 12. Eftir 3. skúlaskeið skipar skúlin sambært § 3, stk. 2, nr. 8 fyri einum sveinaroyndarskeiði, ið er 10 vikur til longdar.
Stk. 2. Fyri at innskriva seg til sveinaroyndarskeiðið skal næmingurin hava staðið 1.-3. skúlaskeið sambært kunngerð um felags reglur fyri yrkisútbúgvingar og hava góðkendan lærusáttmála.
Stk. 3. Sveinaroyndarskeiðið fevnir um tveir høvuðslutir:
1) skemaløgd undirvísing í yrkislærugreinum, og
2) sveinaroynd, ið fevnir um ein ástøðiligan part og ein verkligan part, sum taka støði í førleikamálunum í útbúgvingini.
Stk. 4. Fyri at standa ástøðiliga og verkliga partin av sveinaroyndini, skal lærlingurin hava fingið í minsta lagi próvtølini 02 fyri ávikavist ástøðiliga og verkliga partin hvør sær.
Stk. 5. Sveinaroyndarskeiðið verður nærri lýst í námsskipanini.
Kapittul 4
Sveinabræv
§ 13. Við lokna útbúgving fær lærlingurin útflýggjað sveinabræv sambært reglunum um útbúgvingarskjøl í kunngerð um felagsreglur í yrkisnámi.
Stk. 2. Sveinabrævið verður skrivað við støði í úrslitinum av skúlapartinum og av verkligu upplæringini.
Kapittul 5
Gildiskoma og úrgildisseting
§ 14. Henda kunngerð kemur í gildi dagin eftir, at hon er kunngjørd, og hevur virknað frá 15. august 2022. Samstundis fer úr gildi kunngerð nr. 113 frá 3. oktober 2005 um yrkisútbúgving innan fiskavirking og aling.
Uttanríkis- og mentamálaráðið, 15. august 2022
Jenis av Rana (sign.)
landsstýrismaður
/ Poul Geert Hansen (sign.)
