Skrivar tú trygging verður eisini leitað eftir øðrum endingum av orðinum sum t.d. tryggingar og tryggingarvirksemi.
Skrivar tú ?trygging verður leitað eftir orðum sum t.d. lívstrygging og lívstryggingar.
Skrivar tú ”trygging” verður einans leitað eftir júst hesum sniðnum av orðinum.
2. juli 2025Nr. 119
Kunngerð um næmingaráð og landsráð fyri næmingaráð fólkaskúlans
Við heimild í § 56, stk. 3 og § 57, stk. 3 í løgtingslóg nr. 125 frá 20. juni 1997 um fólkaskúlan verður ásett:
Endamál
§ 1. Endamálið er:
1) At næmingarnir hava eitt stað, har teir hava høvi til at viðgera mál av felags áhuga.
2) At menna samstarv og felags ábyrgd, har næmingarnir virknir taka lut og viðgera mál í eini fólkaræðisligari tilgongd sambært § 3, stk. 3 í løgtingslógini.
3) Í samstarvi við leiðslu skúlans og starvsfólk viðgera og fáa ávirkan á felags áhugamál og evni í skúlanum.
4) At tryggja, at næmingarnir verða hoyrdir í málum, har fyriskipanir verða settar í verk, ið hava ávirkan á læring, trivnað og undirvísingarumstøður í fólkaskúlanum.
Skipan
§ 2. Í skúlum, ið hava 5. flokk og eldri floksstig, stovna næmingarnir næmingaráð. Allir næmingar í 1.-10. flokki hava valrætt og valbæri til næmingaráð sambært § 3.
Stk. 2. Skúlar, ið ikki hava næmingar í 5. ella eldri floksstigi, skulu eisini sum liður í demokratisku tilgongdini sambært endamáli fólkaskúlans geva næmingunum møguleika at stovna næmingaráð.
Stk. 3. Næmingaráðið fremur sítt arbeiði undir ábyrgd skúlastjórans, sum tryggjar, at næmingaráð verða vald.
Stk. 4. Skúlastjórin tilnevnir lærara ella annað starvsfólk at verða samstarvsfólk hjá næmingaráðnum. Skúlastjórin luttekur í fyriskipanum eftir tørvi.
Stk. 5. Næmingaráðið kann umboða næmingarnar á fundi við leiðslu skúlans, skúlastýri, námsfrøðiliga ráðið, kommununa og aðrar viðkomandi partar.
Stk. 6. Skúlstjórin tryggjar, at næmingarnir verða hoyrdir í viðkomandi málum.
Val og valskipan
§ 3. Næmingaráðsval er á hvørjum ári í seinasta lagi hálvan septembur.
Stk. 2. Í seinasta lagi tvær vikur fyri valið skipa næmingaráðini fyri valfundi:
1) Greitt verður frá arbeiðinum í farna ári.
2) Kunnað verður um valskipanina, uppstilling, og hvussu valið fer fram.
Stk. 3. Næmingaráðini verða skipað í mun til skúlastødd eftir hesum meginreglum:
1) Í skúlum, sum ikki eru floksbýttir, og sum hava næmingar í 1.-6. flokki ella færri flokssstig, verður skipað eitt næmingaráð.
2) Í skúlum, sum hava næmingar í 1.-9. ella 10. flokki, og sum ikki eru fult árgangsbýttir, verða skipað tvey ella trý næmingaráð.
3) Í skúlum, sum hava næmingar í 1.-9. ella 10. flokki, og sum eru fult árgangsbýttir, verða skipað trý næmingaráð, eitt fyri hvønn undirvísingarpart, grunddeild, miðdeild og hádeild.
4) Skúlans leiðsla kann víkja frá meginreglunum um skipan av næmingaráðum, men skal samstundis tryggja, at allir næmingar skúlans hava valrætt og valbæri til eitt næmingaráð.
Stk. 4. Í skúlum, har undirvísing skúlans fer fram í skúlaeindum, sum hølisliga eru spjaddar í skúlaøkinum, skal næmingaráð verða valt fyri hvørja skúlaeind, har tað er skynsamt fyri luttøkuna hjá næmingunum.
Stk. 5. Allir næmingar skúlans, eisini næmingar, ið bera brek, hava valrætt og valbæri til næmingaráðini.
Stk. 6. Hvør flokkur velur 1 ella 2 limir í næmingaráðið og ein tiltakslim sambært hesum reglum:
1) Í seinasta lagi eina viku fyri valið verður uppstillingarfundur í hvørjum flokki, har valevnislisti verður gjørdur.
2) Limirnir verða valdir við skrivligari atkvøðugreiðslu.
3) Hvør næmingur hevur eina ella tvær atkvøður í mun til skipanina í skúlanum.
4) Flokslærarin hjálpir næmingunum at skipa fyri uppstillingarfundi, at gera valevnislista og tryggjar, at floksumboðini verða vald.
Stk. 7. Næmingaumboð kann verða afturvalt. Fer næmingaumboðið úr skúlanum, tekur tiltakslimurin við.
Næmingaráðsarbeiðið
§ 4. Skúlarnir gera við støði í kunngerðini reglugerð fyri næmingaráðsarbeiðið á staðnum. Næmingaráðini gera uppskot til innihald, sum skúlastjórin viðger og góðkennir í samstarvi við námsfrøðiliga ráðið.
Stk. 2. Nývaldu næmingaráðini umrøða reglugerðina og lata skúlastjóranum uppskot til møguligar dagføringar.
Stk. 3. Á fyrsta fundi eftir valið, sum verður hildin í seinasta lagi 1. oktober, skipar næmingaráðið seg við forfólki, næstforfólki, skrivara og kassameistara. Næstforfólkið kann eisini røkja uppgávuna sum kassameistari.
Stk. 4. Næmingaráðið eigur í minsta lagi at hava 6 fundir árliga og eigur 1-2 ferðir um árið at hoyra næmingarnar. Forfólkini í næmingaráðum skúlans eiga at hittast 1-2 ferðir um árið.
Stk. 5. Allar avgerðir verða tiknar við vanligum meiriluta. Næmingaráðið er viðtøkuført, tá ið meira enn helvtin av limunum eru møttir á fundi. Stendur á jøvnum, er forfólksins atkvøða avgerandi.
Stk. 6. Næmingaráðið leggur eina ætlan fyri næmingaráðsarbeiðið komandi skúlaárið og ásetur fundardagar, sum eisini kunnu verða lagdir fyri styttri tíðarskeið.
Stk. 7. Næmingaráðið hevur rætt til at ummæla mál, sum viðvíkja næmingunum. Talan kann vera um avgerðir, sum kommunan, skúlastýrið, skúlaleiðslan og landið taka.
Stk. 8. Hugskot um ábøtur trivnaðarliga, hølisliga og undirvísingarliga verða latin skúlastjóranum, sum tekur stig í málinum alt eftir, hvør eigur uppgávuna.
Stk. 9. Næmingaráðið kann í samráð við samstarvsfólkið og leiðslu skúlans skipa fyri ymsum átøkum at menna felagsskap og trivnað.
Stk. 10. Næmingaráðini í hádeild kunnu í samráð við leiðslu skúlans, samstarvsfólk og lærarar í samfelagsfrøði skipa fyri innanhýsis vali at menna og skilja demokratisku tilgongdirnar, sum fólkaræði byggir á.
Fígging
§ 5. Næmingaráðsarbeiðið verður goldið av fíggjarætlanini hjá skúlanum.
Stk. 2. Skúlastjórin ásetur í samráð við næmingaráðið árliga játtan til næmingaráðsarbeiðið. Skúlastjórin umsitur játtanina.
Stk. 3. Bókhald og roknskapur hjá næmingaráðnum er partur av roknskapinum hjá skúlanum.
Arbeiðsumstøður
§ 6. Skúlastjórin ávísir høli til næmingaráðsarbeiðið og tryggjar, at næmingaráðið hevur neyðug amboð og fær vegleiðing og stuðul til arbeiðið.
Stk. 2. Atlit verða tikin til, at næmingar, ið bera brek, kunnu luttaka í næmingaráðsarbeiðinum.
Stk. 3. Næmingaráðini fáa eitt stað á heimasíðu skúlans, har kunnað verður um næmingaráðsarbeiðið.
Landsnæmingaráð
§ 7. Næmingaráð fólkaskúlans kunnu stovna eitt landsnæmingaráð, sum umboðar næmingaráðini í fólkaskúlanum.
Stk. 2. Landsnæmingaráðið virkar fyri, at:
1) Menna næmingaráðsarbeiðið sum heild og rættin hjá børnum og ungum at luttaka í demokratiskum tilgongdum.
2) Arbeiðið er grundað á løgtingslógina, ST-barnarættindasáttmálan og breksáttmálan og aðrar lógir, sum viðvíkja børnum og ungum í fólkaskúlaldri.
Stk. 3. Landsnæmingaráðið verður stjórnað av eini felagsnevnd, sum ger uppskot til viðtøkur.
Stk. 4. Landsnæmingaráðið kann søkja land, kommunur og felagsskapir um stuðul.
Gildiskoma
§ 8. Kunngerðin kemur í gildi dagin eftir, at hon er kunngjørd.
Barna- og útbúgvingarmálaráðið 2. juli 2025
Djóni Nolsøe Joensen (sign.)
landsstýrismaður
/ Poul Geert Hansen (sign.)
