Kunngerð nr. 121 frá 11. november 2015 um útbúgving til skipsatstøðara, sum seinast broytt við kunngerð nr. 152 frá 7. oktober 2025

11. november 2015Nr. 121

Kunngerð um útbúgving til skipsatstøðara, sum seinast broytt við kunngerð nr. 152 frá 7. oktober 2025 ¹⁾

Við heimild í § 4, § 6, stk. 1, nr. 1-5, § 8, stk. 4 og § 11 í løgtingslóg nr. 55 frá 24. apríl 2001 um útbúgving av manning á skipum o.ø. verður ásett:

Øki

§ 1. Kunngerðin fevnir um endaskeið í útbúgving til skipsatstøðara, sbr. § 5.

Endamálið ¹⁾

§ 2. ¹⁾ Útbúgvingin til skipsatstøðara skal lúka krøvini í altjóða sáttmálanum um útbúgving av sjófólki, um sjóvinnu og um vaktarhald við seinni broytingum, STCW-sáttmálin, reglu VI/I um grundleggjandi upplæring um trygd og tey ástøðiligu evnini sambært reglu II/4 og III/4 um vaktarhald.

Stk. 2. Umframt at lúka krøvini sambært stk. 1, hevur útbúgvingin til endamáls at geva næminginum førleikar, sum lúka krøvini í STCW-sáttmálanum, kapittul II/5 og III/5.

Førleikamál

§ 3. ¹⁾ Útbúgvingin til skipsatstøðara skal geva næminginum neyðugu amboðini at menna seg í tí bindandi felagsskapi, sum neyðturviliga er í einari skipsmanning.

§ 4. ¹⁾ Førleikamálini fevna um ta vitan, tey evni og teir førleikar, sum næmingurin skal røkka í útbúgvingini til skipsatstøðara.

Stk. 2. ¹⁾ Vitanarførleikarnir eru, at skipsatstøðarin eftir lokna útbúgving hevur:

1)   kunnleika til uppbygging av skipi, innrætting, maskinarí og aðra útgerð,

2)   kunnleika til tey siglingarfrøðiligu og maskinteknisku økini umborð á skipi,

3)   fatan av týdninginum av góðari røkt umborð,

4)   kunnleika til ymsar vágar, tá arbeitt verður umborð á ymiskum skipasløgum, fyri at sleppa undan vanlukkum og arbeiðsskaðum,

5)   kunnleika til gongdir í sambandi við flutning og handfaring av last og

6)   kunnleika til grundleggjandi hugtøk og íblástur til ábøtur av verandi og menning av nýggjum mannagongdum og arbeiðsgongdum.

Stk. 3. ¹⁾ Evnisførleikarnir eru, at skipsatstøðarin eftir at hava staðið útbúgving sum skipsatstøðari kann:

1)   virkin luttaka í menning og varðveiting av einum tryggum og sunnum arbeiðsumhvørvi,

2)   útinnan av ítøkiligum viðlíkahaldsarbeiði og umvælingararbeiði umborð á skipi,

3)   nýta og viðlíkahalda bjargingarútgerð,

4)   fremja verkligt arbeiði umborð við togverki, veirum og útgerð til surring,

5)   fremja arbeiði í samsvari við ásettar normar fyri dygd,

6)   fremja verkliga eldsløkking,

7)   verða við til at bøta um fremjan og dygdina í arbeiðinum og

8)   nýta og samskifta á einum virknum enskum máli innan viðkomandi økir fyri starvið.

Stk. 4. ¹⁾ Málið fyri at nema sær førleikar er, at eftir at hava staðið útbúgving sum skipatstøðari kann viðkomandi:

1)   virkin luttaka í samstarvinum við ráðlegging av arbeiðsuppgávum,

2)   sjálvstøðugt útinna verkligar uppgávur í sambandi við vanligt skipsarbeiði, undir hesum viðlíkahaldsarbeiði, og

3)   leiða og fremja smærri flutningsuppgávur við m.a. handfaring av krana.

Stk. 5. Næmingurin skal eftir lokna útbúgving lúka krøvini í STCW-sáttmálanum í samsvari við dygdarkrøv Mentamálaráðsins viðvíkjandi:

1)   Passa ein bjargingarbát, bjargingarflaka og mann-yvir-borð bát, sambært reglu VI/2, § 1, í STCW-sáttmálanum.

2)   Dugnaskaparskeið í motorpassing.

3)   Verndartilbúgving og serstakar verndaruppgávur á skipi, sambært reglu VI/6, § 4, í STCW-sáttmálanum.

Upptøka ¹⁾

§ 5. ¹⁾ Skúlin hevur ábyrgdina av upptøku á útbúgving til skipsatstøðara og tryggjar, at umsøkjarar lúka upptøkukrøvini sambært stk. 2 og 3.

Stk. 2.^{2) 1)} Fyri at verða upptikin á útbúgving til skipsatstøðara skal umsøkjarin hava staðið grundskeið í skipsatstøðaraútbúgving ella útbúgving til dekkara.

Stk. 3. ¹⁾ Upptøka til útbúgvingina er harumframt treytað av, at umsøkjari hevur galdandi heilsuváttan fyri sjófólk.

Skipan av útbúgvingini

§ 6. ¹⁾ Skúlin ásetur í námsskipan, reglur og vegleiðingar um, hvussu útbúgvingin skal leggjast til rættis, og hvussu útbúgvingin skal fremjast í verki. Námsskipanin skal lýsa, hvussu skúlin lýkur krøvini til innihaldið sbrt. § 2.

Stk. 2. Í námsskipanini skulu eisini ásetast nærri reglur um:

1)   mál fyri útbúgvingina,

2)   bygnað og uppbygging av útbúgvingini, modulir og ECTS-stig,

3)   undirvísingarhættir og samstarvshættir,

4)   samstarv við vinnu og aðrar útbúgvingarstovnar,

5)   lestrarætlanir og

6)   avriksflutning.

Stk. 3. Námsskipanir og munandi broytingar í skipanini fáa gildi frá skeiðsbyrjan.

Stk. 4. Námsskipanir og munandi broytingar í skipanini sambært stk. 3 skulu áseta skiftisreglur.

Stk. 5. Galdandi námsskipan skal verða atkomulig á heimasíðu skúlans og skal harumframt verða skjalprógvað í dygdarskipan skúlans.

Stk. 6. ¹⁾ Námsskipanin skal vera góðkend av landsstýrisfólkinum.

Próvtøka og prógv

§ 7. Próvtøkur og eftirmetingar skulu viðgerast sambært kunngerð um próvtøkuskipan fyri maritimar útbúgvingar.

§ 8. ¹⁾ Skúlin skrivar út endaligt prógv, tá ið næmingur hevur staðið útbúgvingina til skipsatstøðara.

Undirvísingarførleiki

§ 9. Lærari, sum skal undirvísa í útbúgving til skipsatstøðara, skal í minsta lagi hava útbúgving sum skipsførari við í minsta lagi tvey ára royndum sum einastýrimaður, yvirstýrimaður ella skipari við handilsskipum ella hava útbúgving sum maskinmeistari.

Stk. 2. Fyri at verða settur í fast starv skal lærari hava lokið viðkomandi námsfrøðiliga útbúgving, sum svarar til 30 stig í European Credit Transfer System, ECTS-stig.

Aðrar ásetingar

§ 10. ¹⁾ Útbúgvingin til skipsatstøðara er ásett at vera eina lestrahálvu.

Stk. 2. Avgerðir, sum skúlin tekur sambært hesi kunngerð, kunnu kærast til landsstýrismannin.

Stk. 3. Kærur um avgerðir sambært stk. 2 skulu latast leiðara skúlans til hoyringar. Kærarin skal hava høvi at gera viðmerkingar til hoyringarsvarið frá leiðara skúlans í seinasta lagi 7 dagar frá tí degi, at leiðari skúlans skrivliga hevur fráboðað hoyringina fyri kæraranum.

Stk. 4. Leiðari skúlans sendir kæruna, hoyringarsvarið og møguligar viðmerkingar frá kæraranum til landsstýrimannin.

Stk. 5. Freistin at kæra avgerðir sambært stk. 2 er 2 vikur frá tí degi, avgerð skúlans skrivliga er fráboðað kæraranum.

Stk. 6. Kærur um próvtøkur og próvtøkuviðurskifti annars skulu viðgerast sambært kunngerð um próvtøkuskipan fyri maritimar útbúgvingar.

Stk. 7. Skúlin hevur yvirskipaðu ábyrgdina av, at grundskeiðið í útbúgvingini til skipsatstøðara verður framt sambært skjali 1 við lýsing av innihaldinum í grundskeiðnum í útbúgvingini til skipsatstøðara.

Gildiskoma

§ 11. Henda kunngerð kemur í gildi dagin eftir, at hon er kunngjørd.

Mentamálaráðið, 11. november 2015

Rigmor Dam (sign.)

landsstýriskvinna

/ Poul Geert Hansen (sign.)

¹⁾ (Skjal 1 er strikað)