Skrivar tú trygging verður eisini leitað eftir øðrum endingum av orðinum sum t.d. tryggingar og tryggingarvirksemi.
Skrivar tú ?trygging verður leitað eftir orðum sum t.d. lívstrygging og lívstryggingar.
Skrivar tú ”trygging” verður einans leitað eftir júst hesum sniðnum av orðinum.
10. juli 1997Nr. 130
Kunngerð um broyting í kunngerð um fiskiskapin við fiskiførum, sum eru skásett í Føroyum
§ 1. Í kunngerð nr. 97 frá 10. juni 1996 um fiskiskapin við fiskiførum, sum eru skásett í Føroyum, verður § 3, stk. 1 orðað soleiðis:
“Einki skip má nýta skovlváð, trol, snurriváð ella líknandi net, ið verður drigið gjøgnum sjógvin, sum í nøkrum parti hevur smærri meskar enn 145 mm. Tvørmátið á tráðnum í posanum (8 teir aftastu metrarnir av trolinum), eigur ikki at fara uppum 8 mm. Netið frammanfyri posan (millumstykkið) skal ikki vaksa í ummáti úr forkanti í afturkant, og pláturnar í yvir- og undirpartinum skulu vera eins. Posin skal vera úr rektangulerum plátum, har yvir-og undirpláturnar eru eins. Ummátið í forkanti á posanum má ikki vera víðari enn afturkantur á millumstykkinum. Tað er ikki loyvt hvørki at vaksa ella minka um víddina á posanum frammanífrá og aftureftir, tó er loyvt at sneiða 3 tær aftastu meskarnar inneftir. Meskarnir í hvørjari plátu skulu vera skornir eftir síðu og ikki í nøkrum føri eftir leggi. Tað er ikki loyvt at snøra posan ella á nakran hátt at bera so í bandi, at meskarnir ikki standa fult mát. Tó er loyvt:
a. at knýta tilfar, ið bert verður fest framman og á síðurnar, á undirsíðuna av trolposanum fyri at minka um slit,
b. at lata festið til gjørðina ganga gjøgnum spellið og møguliga vera fest í spellið, tó soleiðis at spellið ikki liggur fast at posanum av hesi orsøk.
Tað er ikki loyvt at brúka gjørðir (rundstroppar), tó er loyvt at hava eina gjørð (lyftistropp) í posanum til at býta sundur við. Gjørðin skal ikki vera stytri enn 70% av ummáli trolposans, mált við strektum meski tvørturam á posanum á tí staðnum, har gjørðin er fest til posan.
Hóast ásetingina um 145 mm verður tað loyvt trolarum at nýta annan mesk í beinleiðis veiðu eftir upsa, blálongu, langasporli, stinglaksi og kongafiski.
Í beinleiðis veiðu eftir upsa er loyvt at nýta 135 mm í posanum (8 teir aftastu metrarnir). Beinleiðis veiða eftir upsa merkir, at meira enn 50% av veiðuni er upsi.
Í beinleiðis veiðu eftir blálongu, langasporli og stinglaksi er loyvt at nýta 100 mm í posanum, ið kann verða í mesta lagi 22 metrar til longdar og 135 mm í restini av trolinum á leiðum sunnan fyri 61° 45'N og vestan fyri fyri 09° 00'V og økið sunnan og vestan fyri eina linju millum staðfestingarnar 600 30'N 07° 00'V og 60 ° 00'N og 06° 00'V. Beinleiðis veiða eftir blálongu, langasporli og stinglaksi merkir, at meira enn 50% av veiðuni er blálonga, langasporl ella stinglaksur. Ikki er loyvt at tóga á dýpi, grynri enn 500 m.
Í beinleiðis veiðu eftir kongafiski á teimum leiðum, sum eru settar út niðanfyri, er loyvt at nýta 135 mm í posanum og í restini av trolinum. Beinleiðis veiða eftir kongafiski merkir, at meira enn 50% av veiðuni er kongafiskur. Leiðirnar eru innanfyri linjur drignar millum hesar staðfestingar:
Øki I
Norðanfyri 61° 30'N
Vestanfyri 08° 50'V
og út á 200 fjórðinga sjómarkið
Øki II
62° 30'N 05° 00'V
62° 30'N 04° 20'V
62° 10'N 04° 30'V
62° 10'N 04° 10'V
Øki III
61° 00'N 05° 50'V
61° 05'N 05° 00'V
60° 50'N 05° 00'V
60° 00'N 06° 00'V
60° 30'N 07° 00'V
60° 40'N 05° 50'V
Skip, sum fiska sambært undantaksreglunum um meskavídd, skulu boða Fiskiveiðueftirlitinum frá, tá ið tey byrja og enda henda fiskiskapin.”
§ 2. Henda kunngerð kemur í gildi dagin eftir, at hon er kunngjørd.
Fiskivinnudeildin, 10. juli 1997
John Petersen (sign.)
landsstýrismaður
/ Heðin Weihe (sign.)
