Kunngerð nr. 131 frá 17. desember 2024 um ábyrgd, uppgávur og eftirlit í sambandi við, at Gjaldstovan viðger persónupplýsingar í almennu talgildu postskipanini Mínboks vegna dátuábyrgdara

17. desember 2024Nr. 131

Kunngerð um ábyrgd, uppgávur og eftirlit í sambandi við, at Gjaldstovan viðger persónupplýsingar í almennu talgildu postskipanini Mínboks vegna dátuábyrgdara

Við heimild í § 8, stk. 3 í løgtingslóg nr. 68 frá 22. mai 2023, um almennu talgildu postskipanina Mínboks verður ásett:

Virkisøki

§ 1. Hendan kunngerð ásetir, hvussu Gjaldstovan skal viðgera persónupplýsingar í almennu talgildu postskipanini Mínboks, hereftir nevnd Mínboks, vegna dátuábyrgdaran.

Dátuábyrgdari og dátuviðgeri

§ 2. Gjaldstovan veitir, við Mínboks, goymslu og flutning av persónupplýsingum, vegna almennar stovnar og løgfrøðiligar persónar. Endamálið við hesi viðgerð er at geva atgongd til at lesa og goyma móttiknar persónupplýsingar, og at senda persónupplýsingar umvegis Mínboks.

Stk. 2. Almennir stovnar og løgfrøðiligir persónar eru dátuábyrgdarar fyri viðgerð av teimum persónupplýsingum, ið hesir senda og goyma í Mínboks.

Stk. 3. Gjaldstovan er dátuviðgeri vegna dátuábyrgdaran sbrt. stk. 2.

Stk. 4. Dátuábyrgdarar, sbrt. stk. 2, hava ábyrgdina av, at øll viðgerð av persónupplýsingum, knýtt til teirra nýtslu av Mínboks, er í samsvari við dátuverndarlógina.

§ 3. Viðgerðin frá Gjaldstovuni kann fevna, um øll sløg av persónupplýsingum, undir hesum vanligar persónupplýsingar, viðkvæmar persónupplýsingar, sbrt. 11 í dátuverndarlógini, revsiverd viðurskifti sbrt. § 13 í dátuverndarlógini og persónstøl, sbrt. § 16 í dátuverndarlógini.

Dátuviðger sbrt. boðum

§ 4. Gjaldstovan kann einans viðgera persónupplýsingar eftir boðum frá dátuábyrgdaranum.

Stk. 2. Um Gjaldstovan metir, at eini boð frá dátuábyrgdaranum eru í ósamsvari við galdandi lóggávu, boðar Gjaldstovan uttan drál dátuábyrgdaranum frá hesum.

Stk. 3. Viðgerðin av persónupplýsingum frá Gjaldstovuni er ikki tíðaravmarkað, men varir til dátuábyrgdarin strikar allar persónupplýsingar í síni Mínboks goymslu.

Tagnarskylda

§ 5. Persónar, ið eru góðkendir av Gjaldstovuni til at viðgera persónupplýsingar, vegna almennar stovnar og løgfrøðiligar persónar, sbrt. § 2, stk. 3, hava tagnarskyldu og koma undir revsiábyrgd sbrt. §§ 152-152 f í revsilógini.

Viðgerðartrygd

§ 6. Gjaldstovan skal seta í verk hóskandi tøknilig og bygnaðarlig tiltøk, ið eru kravd sbrt. § 46 í dátuverndarlógini í mun til váðarnar, sum standast av viðgerðini av persónupplýsingum. Endamálið er at tryggja áhaldandi trúnað, integritet, atkomu og haldføri í Mínboks. Dátuábyrgdarin kann ikki áleggja Gjaldstovuni eyka trygdarkrøv.

Stk. 2. Gjaldstovan skal hava innanhýsis mannagongdir um verksettu tøkniligu og bygnaðarligu tiltøkini, sbrt. stk. 1. Mannagongdirnar skulu eftirhyggjast árliga umframt, at starvsfólk, ið viðgera persónupplýsingar knýttar til Mínboks, altíð eru kunnaðið um galdandi mannagongdir.

Stk. 3. Einstaki dátuábyrgdari sbrt. § 2, stk. 2, hevur ábyrgdina av at fremja hóskandi tøknilig og bygnaðarlig tiltøk, ið knýta seg til leiklutin sum dátuábyrgdari í samband við nýtslu av Mínboks.

Stk. 4. Gjaldstovan hevur ábyrgdina av, at ásetingarnar um dátuvernd ígjøgnum sniðgeving og dátuvernd ígjøgnum standardstillingar sbrt. § 38 í dátuverndarlógini, verða fylgdar í mun til menning, rasktur, viðlíkahald og fyrisiting av Mínboks.

Atgongd til persónupplýsingar

§ 7. Bert persónar, ið eru góðkendir av Gjaldstovuni, skulu hava atgongd til tær persónupplýsingar, ið verða viðgjørdar sbrt. § 2, stk. 3. Atgongd skal altíð avmarkast í mun til einstaka tørvin.

Stk. 2. Eftirlit við, um góðkendu persónarnir, sbrt. stk. 1, framvegis skulu hava atgongd, skal fremjast eftir tørvi og í minsta lagi eina ferð um árið.

Undirdátuviðgerar

§ 8. Gjaldstovan hevur alment loyvi at nýta undirdátuviðgerar. Gjaldstovan skal boða dátuábyrgdaranum frá ætlaðari broyting av undirdátuviðgera við fráboðan minst ein mánað frammanundan so, at dátuábyrgdarin kann mótmæla.

Stk. 2. Gjaldstovan skal í dátuviðgeraravtalu tryggja, at undirdátuviðgerin, sbrt. stk. 1, heldur tilsvarandi dátuverndarskyldur sum tær, ið eru ásettar Gjaldstovuni í hesi kunngerð.

Stk. 3. Dagført yvirlit yvir undirdátuviðgerar skal altíð vera tøkt á heimasíðu hjá Gjaldstovuni. Nærri kunning um einstøku undirdátuviðgerarnar, kann sendast til dátuábyrgdaran eftir skrivligari umbøn.

Stk. 4. Gjaldstovan skal hava eftirlit við, at undirdátuviðgerar halda sínar skyldur sbrt. stk. 2.

Stk. 5. Dátuábyrgdarin kann ikki hava beinleiðis eftirlit við undirdátuviðgera uttan skrivligt loyvi frá Gjaldstovuni.

Stk. 6. Um undirdátuviðgerin ikki lýkur sínar dátuverndarskyldur, verður Gjaldstovan verandi fult ábyrgdarhavandi mótvegis dátuábyrgdaranum í mun til at lúka skyldurnar álagdar í hesi kunngerð.

Flutningur til triðjalond ella millumtjóðafelagsskapir

§ 9. Gjaldstovan kann sum dátuviðgeri flyta persónupplýsingar til triðjalond ella millumtjóðafelagsskapir, ið hava eitt nøktandi verndarstøði, sbrt. § 60 í dátuverndarlógini, ella um fullgóð trygd kann veitast, sbrt. § 61 í dátuverndarlógini.

At stuðla dátuábyrgdaranum

§ 10. Gjaldstovan skal hjálpa dátuábyrgdaranum, m.a. við at veita dátuábyrgdaranum upplýsingar um tøknilig og bygnaðarlig tiltøk, sum eru sett í verk, og aðrar upplýsingar, sum eru neyðugar fyri, at dátuábyrgdarin er førur fyri at halda sínar skyldur, sbrt. §§ 46-52 í dátuverndarlógini og svara umbønum, sum skrásett seta fram sbrt. kapittul 4 í dátuverndarlógini. Hetta merkir m.a., at Gjaldstovan skal hjálpa dátuábyrgdaranum at halda:

1)   Skylduna til, uttan óneyðugt drál og um neyðugt innan 72 tímar eftir at verða vorðin varugur við eitt brot á persóndátutrygdina, at boða Dátueftirlitinum frá hesum uttan so, at tað er ósannlíkt, at brotið á persóndátutrygdina hevur við sær ein váða fyri skrásetta.

2)   Skylduna til, uttan óneyðugt drál, at boða skrásetta frá um brotið í teimum førum, tá brotið sannlíkt hevur við sær ein stóran váða fyri tann skrásetta.

3)   Skylduna at gera eina avleiðingagreining av ætlaðari viðgerð, sbrt. §§ 49 og 50 í dátuverndarlógini.

4)   Skylduna at biðja um ummæli frá Dátueftirlitinum, áðrenn viðgerð verður sett í verk, sbrt. § 52 í dátuverndarlógini.

Fráboðan um brot á persóndátutrygdina

§ 11. Gjaldstovan skal, uttan óneyðugt drál, eftir at verða vorðin kunnug við brot á persóndátutrygdina boða dátuábyrgdaranum frá hesum.

Stk. 2. Gjaldstovan skal boða dátuábyrgdaranum frá skjótast gjørligt og í seinasta lagi 36 tímar eftir, at Gjaldstovan er vorðin kunnug við brotið, so at dátuábyrgdarin kann halda sínar skyldur, sbrt. § 47 í dátuverndarlógini.

Stk. 3. Gjaldstovan kann vegna fleiri dátuábyrgdarar, fevndir av hesi kunngerð, senda eina felags fráboðan til Dátueftirlitið, um brotið á persóndátutrygdina er av slíkum slag, ið rakar ein størri skara av skrásettum upp á tvørs av dátuábyrgdarum. Dátuábyrgdarin skal kunnast um felags fráboðanina, áðrenn fráboðanin verður send Dátueftirlitinum.

At strika persónupplýsingar

§ 12. Gjaldstovan strikar ikki persónupplýsingar, tá ið hesar eru komnar í móttakarans Mínboks og tískil eru í móttakarans ræðisrætti og ognarrætti.

Stk. 2. Gjaldstovan goymir tær persónupplýsingar, ið eru komnar í móttakarans Mínboks, inntil móttakarin sjálvur velur at strika hesar.

Eftirlit

§ 13. Gjaldstovan skal geva dátuábyrgdaranum allar upplýsingar, sum eru neyðugar fyri at vísa á, at krøvini til Gjaldstovuna í hesi kunngerð verða hildin.

Stk. 2. Gjaldstovan skal á hvørjum ári útvega eina skoðanarváttan frá óheftum triðjaparti um, at Gjaldstovan lýkur krøvini í hesi kunngerð. Úrslitið av skoðanini skal vera atkomuligt fyri dátuábyrgdarum eftir umbøn.

Stk. 3. Gjaldstovan hevur ikki skyldu til at geva dátuábyrgdarnum atgongd til at fremja egið eftirlit av fysisku kørmunum, har viðgerðin av persónupplýsingunum fer fram.

Gildiskoma

§ 14. Henda kunngerð kemur í gildi dagin eftir, at hon er kunngjørd.

Fíggjarmálaráðið, 17. desember 2024

Ruth Vang (sign.)

landsstýriskvinna

/ Bjarni Askham Bjarnason (sign.)