Skrivar tú trygging verður eisini leitað eftir øðrum endingum av orðinum sum t.d. tryggingar og tryggingarvirksemi.
Skrivar tú ?trygging verður leitað eftir orðum sum t.d. lívstrygging og lívstryggingar.
Skrivar tú ”trygging” verður einans leitað eftir júst hesum sniðnum av orðinum.
25. september 2025Nr. 148
Kunngerð um ókeypis koppseting ímóti ávísum smittandi sjúkum o.a., sum broytt við kunngerð nr. 163 frá 24. oktober 2025
Við heimild í § 2, stk. 1 í løgtingslóg nr. 118 frá 12. desember 2007 um ókeypis koppseting móti ávísum smittandi sjúkum, sum broytt við § 29 í løgtingslóg nr. 67 frá 28. apríl 2025 og § 4, stk. 4 og § 15, stk. 3 í løgtingslóg nr. 104 frá 5. september 1988 um apoteksverkið, sum broytt við § 28 í løgtingslóg nr. 67 frá 28. apríl 2025, verður ásett:
§ 1. Tilboð um ókeypis koppseting ímóti ávísum smittandi sjúkum verður veitt persónum, ið búgva í Føroyum.
Koppseting til børn
§ 2. Børn og ung, yngri enn 18 ár, kunnu verða koppsett ókeypis ímóti kikhosta, difteritis, stívkrampa og polio.
Stk. 2. Børn og ung, yngri enn 18 ár, kunnu verða koppsett ókeypis ímóti meslingum, fárasjúku og reydlingum. Koppsetingin verður bjóðað sum ein samansett MFR-koppseting.
Stk. 3. Børn, yngri enn 6 ár, kunnu verða koppsett ókeypis ímóti Hæmophilis influenzae, typa b, Hib.
Stk. 4. Børn, yngri enn 2 ár, kunnu verða koppsett ókeypis ímóti pneumokoksjúku.
HPV-koppseting
§ 3. Gentur og dreingir í aldrinum 12-17 ár kunnu verða koppsett ókeypis ímóti humant papillomavirus HPV.
Stk. 2. Kvinnur og menn, sum eru fødd í tíðarskeiðinum 1. januar 2006 til 31. desember 2007, kunnu verða koppsett ókeypis móti humant papillomavirus HPV í tíðarskeiðnum 1. oktober 2025 til 31. desember 2026.
Koppseting ímóti meslingum og reydlingum til vaksin
§ 4. Kvinnur, sum hava fylt 18 ár, kunnu verða koppsettar ókeypis ímóti reydlingum.
Stk. 2. Persónar, ið hava fylt 18 ár, sum ikki hava havt meslingar og ikki eru koppsettir ímóti meslingum, kunnu verða koppsettir ókeypis ímóti meslingum.
Koppseting ímóti kikhosta og RS-virus til barnakonur 1)
§ 5. Barnakonur kunnu verða koppsettar ókeypis ímóti kikhosta.
§ 5 a. 1) Barnakonur kunnu verða koppsettar ókeypis ímóti Respiratorisk syncytialvirus, tað er RS-virus, til og við 31. januar 2026.
Koppseting ímóti influensu og covid-19
§ 6. 1) Tilboð um ókeypis koppseting ímóti influensa og covid-19 verður veitt hesum persónum frá 1. oktober til og við 20. desember:
1) Persónar, ið hava fylt 65 ár í seinasta lagi 20. desember í tí ári koppsett verður.
2) Persónar, sum hava eina av hesum sjúkum, ið eru nevndar undir litra a-g:
a) Persónar, sum hava varandi lungnasjúku.
b) Persónar, sum hava hjartasjúku og æðrasjúku, undantikið hækkað blóðtrýst við ongari sjúku annars.
c) Persónar, sum hava diabetes 1 ella 2, sukursjúku.
d) Persónar, sum hava órinsbrek, immundefekt, ið antin eru viðfødd ella íkomin.
e) Persónar, har andadrátturin er ávirkaður av, at vøddamegin er niðursett.
f) Persónar, sum hava varandi livrasvigna og nýrasvigna.
g) Persónar við ovurfiti, BMI > 35.
3) Persónar, undir hesum børn eldri enn 6 mánaðir, sum hava aðra álvarsama sjúku ella støðu, har læknin metir, at heilsustøðan er av slíkum slagi, at influensa ella covid-19 hevur við sær álvarsligan heilsuvanda.
4) Barnakonur fáa tilboð um ókeypis koppseting móti influensu frá 13. barnsburðarviku. Fyri 13. barnsburðarviku kunnu barnakonur verða koppsettar ímóti influensa, um læknin metir hana verða í vanda fyri at fáa eina álvarsliga sjúkugongd orsaka av influensa.
5) Húski hjá persóni, sum hevur órinsbrek, immundefekt, ið antin eru viðfødd ella íkomin ella barni, ið er í øktum vanda fyri at fáa álvarsliga influensu ella covid-19 sambært nr. 2, litra d og nr. 3.
6) Fyritíðarpensjónistar verða koppsettir ókeypis ímóti influensa.
7) Starvsfólk innan heilsuøkið, almannaøkið og røktarøkið, sum hava tætt samband við persónar, ið eru í øktum vanda fyri álvarsligari sjúklingagongd við influensu ella covid-19 í sambandi við uppgávur innan røkt, umsorgan og viðgerð sambært nr. 1-6 og sum eru nevnd í litra a til ii:
a) Læknar.
b) Sjúkrarøktarfrøðingar.
c) Farmaseutar.
d) Kiropraktorar.
e) Tannlæknar.
f) Úrspenningarpedagogar.
g) Bandagistar.
h) Bioanalytikarar.
i) Ergoterapeutar.
j) Fysioterapeutar.
k) Ljósmøður.
l) Kliniskir dietistar.
m) Optometristar.
n) Radiografar.
o) Audiologassistentar.
p) Farmakonomar.
q) Fótterapeutar.
r) Neurofysiologassistentar.
s) Tannklinikassistentar.
t) Tannrøktarar.
u) Tanntøkningar.
v) Ítrívsvegleiðarar.
w) Pleygarar.
x) Røktarheimsassistentar.
y) Heilsurøktarar.
z) Heilsuhjálparar.
aa) Sjúkrahjálparar.
bb) Sálarfrøðingar.
cc) Læknaskrivarar.
dd) Heilsutænastuskrivarar.
ee) Portørar.
ff) Paramedisinarar.
gg) Viðgerðarar í Sjúkraflutningstænastuni.
hh) Atstøðingar í Sjúkraflutningstænastuni.
ii) Námsfrøðingar.
Stk. 2. Koppseting verður bjóðað lesandi, næmingum, hjálparfólkum í røktini, ófaklærdum o.ø., ið røkja størv svarandi til tey í § 6, stk. 1, nr. 7 nevndu yrkjum, og sum arbeiða við uppgávum innan viðgerð, røkt og umsorgan av borgarum, sum eru í serligum vanda fyri at verða álvarsliga sjúkir, um teir fáa influensu ella covid-19.
Stk. 3. Koppseting verður bjóðað køksfólkum, reingerðarfólkum og røktarvørðum, sum koma í samband við persónar nevndir í § 6. stk. 1, sum eru í serligum vanda fyri at verða álvarsliga sjúkir, um teir fáa influensu ella covid-19.
Stk. 4. 1) Koppseting ímóti influensa verður sum meginregla veitt sum ein inaktivera standard 3-valent influensakoppseting, samanber tó stk. 5.
Stk. 5. Persónar, sum hava fylt 70 ár í seinasta lagi 20. desember í tí ári koppsett verður fáa tilboð um um at verða koppsettir ímóti influensa við eini adjuveraði 3-valent influensakoppseting.
Stk. 6. Koppseting ímóti covid-19 verður veitt sum eitt mRNA-koppsetingarevni.
§ 7. 1) Tilboð um ókeypis koppseting ímóti covid-19 verður veitt hesum persónum:
1) Persónar, sum hava eina sjúkrastøðu nevnd undir litra a ella b eftir eini læknaligari meting:
a) Persónar við nógv niðursettari órinsverju, immunforsvar.
b) Persónar, sum hava fingið upprunakyknuflyting, stamcelletransplantation.
2) Børn yngri enn 5 ár eftir læknaligari meting hjá serlækna í pædiatri.
Koppseting ímóti pneumokokkum til ávísar persónar
§ 8. Tilboð um ókeypis koppseting ímóti pneumokokkum verður veitt niðanfyrinevndu persónum:
1) Persónar, sum fáa bútilboð, sum eru skipað sambært §§ 45-47 í løgtingslóg um almannatrygd og tænastur sambært § 13, stk. 2, nr. 1-3 í løgtingslóg um heimatænastu, eldrarøkt v.m.
2) Persónar, sum hava fylt 65 ár.
3) Persónar, sum hava eina av hesum varandi sjúkum, ið nevndar eru undir litra a-m:
a) Persónar uttan milt, ella har miltið ikki virkar, sum tað skal.
b) Persónar, har andadrátturin er ávirkaður av, at vøddamegin er niðursett.
c) Persónar, sum hava órinsbrek, immundefekt, ið antin er viðfødd ella íkomin.
d) Persónar við leka av heilavætu, liquor-lækage.
e) Persónar, sum hava havt invasiva pneumokoksjúku, pneumokokkbruna í blóðinum ella pneumokokk-meningitis.
f) Persónar, sum hava fingið Cochlear implantatión.
g) Persónar, sum hava fingið upprunakyknuflutning, stamcelletransplantation.
h) Persónar, sum hava fingið yrkisgagnsflutning, organtransplantation.
i) Persónar, sum hava diabetes mellitus.
j) Persónar, sum hava varandi hjartasjúku.
k) Persónar, sum hava varandi lungnasjúku.
l) Persónar, sum hava varandi nýrasjúku.
m) Persónar, sum hava varandi livrasjúku.
4) Persónar yngri enn 18 ár, sum hava sjúku ella støðu, ið hevur við sær sera stóran vanda fyri at fáa invasiva pneumokokk sjúku, ið eru nevndar undir litra a-h, eftir eini læknaligari metan:
a) Persónar, sum hava hjartasjúku, ið hevur við sær niðursetta iltmettan í blóðinum, cyanotiske hjertesygdomme.
b) Persónar, sum hava hjartaviknan, hjerteinsufficiens.
c) Persónar, sum hava fingið palliativa skurðviðgerð fyri hjartasjúku.
d) Persónar, sum hava týðandi fylgir á blóðrenslið eftir hjartaskurðviðgerð.
e) Persónar, sum hava varandi lungnalíðing, t.d. cystiska fibrosu.
f) Persónar, sum hava niðursett lungnavirkni, orsakað av veikum andadráttsvøddum, hypodynamisk respirationsinsufficiens.
g) Persónar, sum hava nefrotisk sjúkueyðkenni, nefrotisk syndrom.
h) Persónar, sum hava órinsverjubrek, immundefekter, undantikið agammaglobulinæmi og SCID.
5) Persónar, sum hava aðrar álvarsamar sjúkur ella eru í eini hættisligari støðu, sum eftir ítøkiligu meting læknans, hevur við sær sera stóran vanda fyri at fáa invasiva pneumokokksjúku.
6) Persónar, sum starvast sum sveisarar.
Stk. 2. Koppsetingin verður veitt sum ein 23-valent pneumokokk koppseting.
Stk. 3. Koppsetingin eftir stk. 1, nr. 1-6, verður veitt til persónar, sum ikki eru koppsettir við eini 23-valent pneumokokk koppseting seinastu 6 árini, ella eftir eini læknaligari meting við støði í eini andevnismáting, antistofmåling.
Koppseting ímóti hepatitis
§ 9. Innspræningar rúsevnismisnýtarar, injektiónsnarkomanar, sum ikki hava verið smittaðir við hepatitis B, kunnu verða koppsettir ókeypis ímóti hepatitis B. Koppsetingin verður veitt sum ein samantvinnað koppseting, sum eisini verjir ímóti smittu við hepatitis A. Henda koppseting verður veitt uttan so, at hon læknafakliga verður hildin at vera óhóskandi.
Stk. 2. Persónar, sum búgva saman við einum persóni við hepatitis B ígerð, og fastir kynspartnarar hjá einum persóni við varandi hepatitis B ígerð, kunnu verða koppsettir ókeypis ímóti hepatitis B. Persónar, sum eru yngri enn 18 ár, fáa eina samantvinnaða koppseting, sum samstundis verjir ímóti smittu við hepatitis A. Henda koppseting verður veitt uttan so, at hon læknafakliga verður hildin at vera óhóskandi.
Stk. 3. Persónar, sum hava fingið staðfest hepatitis C ígerð, kunnu verða koppsettir ókeypis ímóti hepatitis B. Koppsetingin verður veitt sum ein samantvinnað koppseting, sum samstundis verjir ímóti smittu við hepatitis A. Henda koppseting verður veitt uttan so, at hon læknafakliga verður hildin at vera óhóskandi.
Stk. 4. Børn á dagstovnum kunnu verða koppsett ókeypis ímóti hepatitis B, um so er, at eitt barn á stovninum hevur eina staðfesta hepatitis B ígerð. Landslæknin metir um, hvørji børn á dagstovninum skulu fáa tilboð um koppseting.
Stk. 5. Børn yngri enn 15 ár, sum koma í bústaðarøki, har tilburður av hepatitis B ígerð er staðfestur, kunnu verða koppsett ókeypis ímóti hepatitits B, um Landslæknin mælir til, at tey verða koppsett. Koppsetingin verður veitt sum ein samantvinnað koppseting, sum samstundis verjir ímóti smittu við hepatitis A. Henda koppseting verður veitt uttan so, at hon læknafakliga verður hildin at vera óhóskandi.
Stk. 6. Børn yngri enn 2 ár, sum eru fødd av kvinnu við varandi hepatitis B ígerð, kunnu verða koppsett ókeypis ímóti hepatitis B.
Koppingarevni á goymslu
§ 10. Apoteksverkið skal hava eina nøktandi mongd av koppingarevni á goymslu, ið skal nýtast til koppseting ímóti sjúkunum sambært §§ 2-9.
Heimild at koppseta
§ 11. Læknar, sum starvast á Heilsumiðstøðum kunnu koppseta ímóti sjúkunum sambært §§ 2-9.
Stk. 2. Sjúkrahúsverkið kann koppseta innlagdar sjúklingar og starvsfólk í Sjúkrahúsverkinum ímóti influensa og covid-19 sambært §§ 6 og 7.
Stk. 3. Apoteksverkið kann bjóða og skipa fyri koppseting ímóti influensa og covid-19 sambært §§ 6 og 7. Apoteksverkið ger avtalu við ella setur í starv heilsustarvsfólk at koppseta fyri Apoteksverkið.
§ 12. Koppsetingarnar verða framdar samsvarandi vegleiðingum frá heilsumyndugleika.
Gildiskoma og úrgildisseting
§ 13. Henda kunngerð kemur í gildi 1. oktober 2025. Samstundis fara úr gildi kunngerð nr. 151 frá 29. oktober 2020 um ókeypis koppseting ímóti ávísum smittandi sjúkum og kunngerð nr. 106 frá 28. september 2023 um ókeypis koppseting ímóti COVID-19.
Heilsumálaráðið, 25. september 2025
Súsanna Bertholdsen (sign.)
landsstýrisfólk
/ Bjørgfríð Ludvig (sign.)
