Kunngerð nr. 159 frá 17. desember 2009 um reglur fyri umrokning av framhaldandi árligum veitingum til eina ávísa peningaupphædd

17 desember 2009Nr. 159

Kunngerð um reglur fyri umrokning av framhaldandi árligum veitingum til eina ávísa peningaupphædd

Við heimild í § 51, stk. 2, í løgtingslóg nr. 67 frá 25. mai 2009 um trygging móti avleiðingunum av arbeiðsskaða (arbeiðsskaðatryggingarlógini) verður ásett:

§ 1. Ein framhaldandi veiting fyri mist vinnuføri, sbr. § 47 í arbeiðsskaðatryggingarlógini, verður umroknað til eina ávísa peningaupphædd við at falda ta árligu veitingina, tá umrokningin fer fram, við tí faktori í tabell G í viðlagda fylgiskjali¹⁾ , sum stendur tilskilaður við aldrinum á skadda, tá umrokningin fer fram.

§ 2. Ein framhaldandi veiting fyri miss av uppihaldara, sbr. § 64, stk. 1, í arbeiðsskaðatryggingarlógini, verður umroknað til eina ávísa peningaupphædd við at falda ta árligu veitingina, tá umrokningin fer fram, við tí faktori í tabell H og I í fylgiskjalinum¹⁾ , sum stendur tilskilaður við aldrinum á tí eftirsitandi og resttíðarskeiðnum, tá umrokningin fer fram. Um aldurin á tí eftirsitandi ella resttíðarskeiðið er millum ávikavist teimum aldrum og tey restár, sum eru tilskilaði í tabellini, verða tey samsvarandi millumliggjandi tølini nýtt.

§ 3. Tá ein eftirsitandi hevur rætt til endaligt endurgjald eftir § 66 í lógini, skal tann umroknaða ávísa peningaupphæddin, sum er roknað eftir § 2 í hesi kunngerð, hækkast við eini upphædd, sum verður roknað við at falda ta árligu veitingina við tí faktori í tabell K í fylgiskjalinum¹⁾ , sum stendur tilskilaður við aldrinum á skadda, tá umrokningin fer fram.

§ 4. Kunngerðin kemur í gildi tann 1. januar 2010.

Vinnumálaráðið, 17. desember 2009

Johan Dahl (sign.)

landsstýrismaður

/ Arne Poulsen (sign.)