Skrivar tú trygging verður eisini leitað eftir øðrum endingum av orðinum sum t.d. tryggingar og tryggingarvirksemi.
Skrivar tú ?trygging verður leitað eftir orðum sum t.d. lívstrygging og lívstryggingar.
Skrivar tú ”trygging” verður einans leitað eftir júst hesum sniðnum av orðinum.
20. desember 2023Nr. 167
Kunngerð um at rokna inntøkugrundarlag og nettoskuld sambært kommunustýrislógini
Við heimild í § 43, stk. 2 í løgtingslóg nr. 87 frá 17. mai 2000 um kommunustýri (Kommunustýrislógin), sum broytt við løgtingslóg nr. 59 frá 22 mai 2023, verður ásett:
§ 1. Inntøkugrundarlagið hjá kommununi, sum verður nýtt til at áseta skuldarmark, fevnir um hesar inntøkur:
1) Persónsskattur.
2) Skattur av eftirløn sambært løgtingslóg um eftirløn.
3) Endurgjald sambært løgtingslóg um endurgjald til kommunur vegna frádráttir og serskattaskipanir.
Stk. 2. Persónsskatturin verður roknaður við einum útrokningarskattaprosenti á 23% uttan mun til kommunuskattaprosentið í tí einstøku kommununi.
§ 2. Nettoskuldin hjá kommununi verður uppgjørd sum langfreistað skuld og stuttfreistað skuld frádrigið umsetiliga ogn.
Stk. 2. Umsetilig ogn er ogn, sum ikki er støðisogn, t.d. tøkur peningur, goymslur og áogn.
Stk. 3. Støðisogn er standardkonta 01 og 02 í kontoskipan landsins.
§ 3. Henda kunngerð kemur í gildi dagin eftir, at hon er kunngjørd. Samstundis fer kunngerð nr. 12 frá 11. februar 2003 um útrokningarskattaprosent sambært kommunustýrislógini úr gildi.
Fíggjarmálaráðið, 20. desember 2023
Ruth Vang (sign.)
landsstýriskvinna
/ Bjarni Askham Bjarnason (sign.)
