Kunngerð nr. 172 frá 12. november 2025 um støði, viðlíkahald, rakstur, tól, amboð, innbúgv o.a. í heilsumiðstøðum

12. november 2025Nr. 172

Kunngerð um støði, viðlíkahald, rakstur, tól, amboð, innbúgv o.a. í heilsumiðstøðum

Við heimild í § 3, stk. 3, § 8, § 9, stk. 2, § 10, stk. 2 og § 15, stk. 3 í løgtingslóg nr. 66 frá 28. apríl 2025 um at skipa heilsutænastur í nærumhvørvinum hjá borgaranum verður ásett:

At byggja heilsumiðstøðir

§ 1. Heilsumiðstøðirnar skulu byggjast, umbyggjast ella útbyggjast í samsvari við kunngerð um bygningskunngerð 2017 og løgtingslóg um arbeiðsumhvørvi.

§ 2. Landsstýrisfólkið skal góðkenna allar byggiætlanir, umbyggingarætlanir, útbyggingarætlanir og leigumál, undir hesum uppskot til at innrætta hølini.

§ 3. Tá kommunurnar byggja, umbyggja ella útbyggja eina heilsumiðstøð skal atlit takast til, at heilsumiðstøðin sum frálíður skal kunna hýsa støðugt fleiri tilboðum um heilsutænastur í nærumhvørvinum.

Atkomuviðurskifti og uttandura karmar

§ 4. Allir borgarar í heilsuøkinum skulu hava ótarnaða atgongd til at koma inn í heilsumiðstøðirnar og kunna flyta seg ótarnað inni í heilsumiðstøðunum.

§ 5. Á bygningi, har heilsumiðstøðin húsast, og við innkoyring til heilsumiðstøðina, skal skelti heingjast upp við navninum á heilsumiðstøðini.

Stk. 2. Heilsutrygd ger av, hvussu skeltið sær út, og hvar skeltið verður hongt upp.

Stk. 3. Kommunurnar rinda fyri skeltið og fyri at heingja skeltið upp.

Karmarnir innandura á heilsumiðstøðum

§ 6. Heilsumiðstøðirnar skulu verða innrættaðar við:

1)   Móttøkuhøli.

2)   Barnavinarligum bíðirúmi.

3)   Vesi og vesi til rørslutarnað.

§ 7. Í heilsumiðstøðunum skulu vera hesi høli til starvsfólk:

1)   Køkur.

2)   Starvsfólkahøli, undirvísingar- og fundarhøli við útgerð til talgilt samskifti.

3)   Vesi og brúsa til starvsfólk.

4)   Hóskandi tal av viðtaluhølum til hvønn kommunulækna við starvsfólkum.

5)   Hóskandi tal av viðtaluhølum til aðrar heilsutænastur.

6)   Skolirúm og rannsóknarstova.

7)   Høli til útgerð til reingerð á hvørjari hædd.

8)   Goymslurúm.

§ 8. Hølini sambært §§ 6 og 7 skulu innrættast við atliti til:

1)   Reingerð í øllum hølum.

2)   Trygga ljóðbjálving ímillum rúmini, við atliti til krav um tagnarskyldu millum starvsfólk og borgaran.

3)   Neyðugum ljósviðurskifti.

4)   Neyðugum møguleikum fyri útlufting.

5)   At arbeiðsgongdin hjá starvsfólki ikki verður óneyðuga trupul.

6)   At borgarar og starvsfólk ikki órógva hvønn annan í ávikavist viðtaluhøli, bíðirúmi ella øðrum hølum hjá starvsfólkum.

§ 9. Kommunurnar í heilsuøkinum útvega innbúgv o.a. til heilsumiðstøðina.

Stk. 2. Kommunur í heilsuøkinum kunnu gera avtalur um býti av útreiðslum. Galdandi avtalur millum kommunur um býti av útreiðslum, verða verandi í gildi til nýggj avtala verður sett í gildi.

Stk. 3. Skjal 1 vísir, hvat innbúgv o.a. er fevnt av stk. 1.

Stk. 4. Um heilsustarvsfólk ynskja annað innbúgv enn tað, sum er nevnt í skjali 1, bera kommunurnar ikki útreiðslurnar av hesum.

§ 10. Heilsutrygd útvegar tól og amboð til heilsumiðstøðirnar. Tól og amboð skulu umvælast ella skiftast út skjótast gjørligt, tá tørvur er á tí.

Stk. 2. Tá tól og amboð verða umvæld, skal Heilsutrygd útvega heilsumiðstøðunum tól til láns, um tørvur er á tí.

Stk. 3. Skjal 2 vísir, hvørji tól og amboð eru fevnd av stk. 1 og 2.

§ 11. Heilsutrygd útvegar tól og amboð til Læknavaktina.

Stk. 2. Skjal 3 vísir, hvørji tól og amboð eru fevnd av stk. 1.

Viðlíkahald og rakstur av heilsumiðstøðunum o.a.

§ 12. Kommunurnar bera útreiðslurnar til innandura og uttandura viðlíkahald av bygninginum, sum heilsumiðstøðin húsast í, umframt økinum kring heilsumiðstøðina.

§ 13. Kommunurnar bera útreiðslurnar til at viðlíkahalda innbúgv. Innbúgv skal umvælast ella skiftast út, tá tørvur er á tí.

Stk. 2. Versna arbeiðsumstøðurnar ella arbeiðsgóðskan hjá starvsfólkunum, orsakað av, at innbúgvið ikki verður skift út ella viðlíkahildið, eigur umvæling ella útskifting at fara fram skjótast gjørligt.

§ 14. Raksturin av viðlíkahaldi og innbúgvi, ið kommunurnar bera útreiðslurnar av, fevna um:

1)   Innlegging og nýtslu av telefon.

2)   At útvega fartelefon og nýtslu av fartelefon.

3)   Innlegging og dagføring av teldum, íroknað íbinding av alneti.

4)   Samskiftisútgerð til talgildar viðtalur.

5)   Hald til talgildar skipanir, sum Heilsutrygd hevur góðkent.

6)   Hald til talgildu heilsuskipan landsins.

7)   Heimasíðuloysnir og bíleggingarskipanir, sum Heilsutrygd hevur góðkent.

8)   Innlegging og nýtslu av ravmagni.

9)   Innlegging og nýtslu av hita.

10) Reingerð í heilsumiðstøðini.

11) At vaska kitlar o.a.

§ 15. Viðlíkahald sambært §§ 12-14 fevnir eisini um at hava eftirlit við bygningi og innbúgvi.

§ 16. Heilsutrygd ber útreiðslurnar til at viðlíkahalda tól og amboð. Viðlíkahald fevnir eisini um at hava eftirlit við tólum og amboðum.

Gildiskoma o.a.

§ 17. Henda kunngerð kemur í gildi 1. desember 2025. Samstundis fer úr gildi kunngerð nr. 64 frá 29. september 2004 um støði, viðlíkahald, rakstur o.a. av viðtaluhølum hjá kommunulæknum.

Stk. 2. Kommunurnar skulu beinanvegin fylgja ásetingunum í §§ 9, 12, 13, § 14, stk. 1, nr. 1-3 og nr. 8-11 og § 15. Kommunurnar skulu í seinasta lagi 1. juni 2026 fylgja ásetingunum í §§ 5, 6, 8 og § 14, stk. 1, nr. 4-7. Tá ið heilsumiðstøðir skulu byggjast, umbyggjast ella útbyggjast skulu kommunurnar fylgja § 7. Verandi heilsumiðstøðir skulu fylgja § 7 so skjótt sum umstøður loyva tí.

Stk. 3. Heilsutrygd skal beinanvegin fylgja §§ 10, 11 og 16. Heilsutrygd skal í seinasta lagi 1. juni 2026 fylgja § 5.

 

 

Heilsumálaráðið, 12. november 2025

 

Súsanna Bertholdsen (sign.)

landsstýriskvinna

/ Bjørgfríð Ludvig (sign.)

 

 

 

Skjal 1

 

Innbúgv sum kommunan útvegar til heilsumiðstøðirnar

 

Bíðirúm

1.    Nøktandi tal av sofaborðum og stólum í bíðirúminum. Borð og stólar skulu verða haldgóð, trygg og skulu hóska til tørv og umstøður hjá t.d. eldri borgarum, borgarum við breki, bariatriskum borgarum og borgarum við varandi sjúkum. Borð og stólar skulu kunna vaskast.

2.    Leikur, barnaborð til leikur og tekning og stólar til børn.

3.    Skerm til talgilda kunning.

4.    Veggjastativ til faldarar.

5.    Atgongd til drekkivatn.

6.    Atgongd hjá sjúklingum og avvarðandi til vesi. Á vesi skal vera ruskílat, hondspritt, pusliborð, skiftilega til vaksin, lyftiskipan og skoliútgerð til eygnaskaðar. Vesi til rørslutarnað skal vera somikið rúmligt at pláss er fyri borgara í koyristóli við hjálparfólki afturat sær.

 

Móttøka

1.    Ergonomiskur stólur og borð.

2.    Telduútgerð, herundir widescreen telduskermar til hvørt starvsfólk.

3.    Ein telefon til hvørt starvsfólk við headset, við møguleika fyri umstilling.

4.    Ein eyka fartelefon (akuttelefon).

5.    Kopimaskina við skannara og printara.

6.    Skáp og skuffur, sum kunnu læsast.

7.    Makulator.

 

Køkur

1.    Borð og stólar.

2.    Køksbúnýti.

3.    Køliskáp til matna.

4.    Kaffimaskina.

5.    Ketil/kókikrani.

6.    Ovnur/mikroovnur.

 

Starvsfólkahøli og undirvísingar- og fundarhøli

1.    Borð og stólar.

2.    Útgerð til talgilt samskifti.

 

Vesi

1.    Starvsfólkavesi.

2.    Vesi við brúsu til brunaskaðar og skoliútgerð til eygnaskaðar.

 

Skolirúm og rannsóknarrúm

1.    Stálborð við vaski.

2.    Skáp til at goyma skolirúmstilfar.

3.    Autoklava til hvørja viðtalu.

 

Goymslurúm

1.    Hillar og skáp til læknaráð, sum kunnu læsast.

 

Í hvørt viðtalurúm, ið hoyrir til kommunulæknaviðtaluna

1.    Skáp og skuffur, sum kunnu læsast.

2.    Ein telefon.

3.    Streymstikk.

4.    Telefonstikk x1, netstikk x3 til teldu og tól.

5.    Ergonomiskt borð.

6.    Ergonomiskur skrivstovustólur.

7.    Telduútgerð herundir widescreen telduskerm og samskiftisútgerð, til t.d. talgildar viðtalur.

8.    Tveir haldgóðar stólar til sjúkling og avvarðandi.

9.    Ein stólur við hjólum til kanningar.

10.  Pannulampa ella standilampa.

11.  Góðar loftslampur.

12.  Ein hydraulisk lega við møguleika fyri rygghevjan, at stilla hæddir og beinhaldara til gynekologiska kanning.

13.  Ein lega til barnakanningar.

14.  Eitt rulliborð við skuffu.

 

Í hvørt viðtalurúm til onnur heilsustarvsfólk

1.    Skáp og skuffur, sum kunnu læsast.

2.    Ein telefon.

3.    Streymstikk.

4.    Telefonstikk x1, netstikk x3 til teldu og tól.

5.    Ergonomiskt borð.

6.    Ergonomiskur skrivstovustólur.

7.    Telduútgerð herundir tveir telduskermar.

8.    Tveir haldgóðar stólar til sjúkling og avvarðandi.

9.    Ein stólur við hjólum til kanningar.

10.  Góðar loftslampur.

11.  Ein kanningarlega.

 

Í heilsumiðstøðini

1.    Ein hjartastartari.

2.    Atgongd til Talgildu Heilsuskipan landsins.

3.    Nútímans telduskipan sum kann samskifta við allar partar í heilsuverkinum og borgarar á tryggari brúkaraflátu við møguleika fyri teldupostsamskifti, heimasíðutænastu og app-tænastu við m.a. tíðarbílegging, endurnýggja resept og talgildum viðtalum.

4.    Uppvørpa ella sjónvarp, um høli í heilsumiðstøðini verða brúkt sum undirvísingarhøli.

5.    Til hvørja viðtalu skal vera ein lyftiskipan, ið kann flyta borgarar úr koyristóli og yvir á kanningarlegu.

 

Í øll rúm í heilsumiðstøðunum

1.    Ruskíløt.

2.    Gardinur ella persiennur til øll vindeygu.

3.    Lyklafrí lásaskipan til allar hurðar (chip/kort system).

4.    Vask.

5.    Sápuhaldari og sápa.

6.    Pappírhaldari og pappírshandkløð.

7.    Sprittdispensarar og hondspritt.

8.    Allergitestaðar gummihandskar.

 

 

 

Skjal 2

 

Tól og amboð sum Heilsutrygd útvegar til heilsumiðstøðirnar

 

Í øllum heilsumiðstøðum skal vera:

1.    Ein kalibreringspumpa til spirometri.

2.    Bráðtaska við iltfløsku, masku og súgv.

3.    Audiometur.

4.    Eitt dermatoskop, t.d. dermaloop við møguleika fyri samskifti við húðlæknar.

5.    Eitt Woods light.

6.    Einar Bartes brillur.

7.    Ein Ishihara.

8.    Sjóntalva.

9.    Barnavekt.

10.  Vekt.

11.  Intelligent vekt, sum kann máta feitt- og vøddamassa (t.d. Tanita).

 

Til hvørja viðtalu, har kommunulækni ella kommunulæknaavloysari, sum Heilsutrygd hevur sett í starv:

1.    Átta stál GU-sett ella hóskandi nøgd av einnýtis GU-settum.

2.    Tvey stál GU-sett til spiral í metalkassa (sjálvhaldandi speculum, kúlutong, sonda, langur saksur og lang fløt piang).

3.    Átta sutursett í metalkassa.

4.    Fýra skalpelhaldarar.

5.    Tvær cerumenslyngir.

6.    Tvær neglatengur.

7.    Ein húktong.

8.    Fýra skarpskeiðir í ymsum støddum.

9.    Tvey nasaspekula.

10.  Ein gipssaks.

11.  Tvær vinkulpinsettir.

12.  Ein fingur-ring-skerari.

13.  Ein akuttaska, læknataska, við innihaldi.

14.  Bæði anuskop og einnýtis anuskop (endatarmskanningar).

15.  Uppvaskiútgerð.

16.  Fasukontrast mikroskop.

17.  Tól til at lesa av landstix.

18.  Hitaskáp til at dyrka land.

19.  Tól til at máta CRP, í minsta lagi eitt til hvørja kommunulæknaviðtalu.

20.  Tól til at máta Hæmoglobin.

21.  Tól til munar teljing (differential teljing).

22.  Tól til at máta HbA1c.

23.  Tól til at máta INR.

24.  Sentrifuga til blóðroyndir.

25.  Formalin lukka system, t.d. Hounisen formalin lukket system ella stingskáp við útsúgving.

26.  Trý blóðtrýsttól í hvørja viðtalu til útlán.

27.  Eitt køliskáp við ventilatión og møguleika fyri temperaturlog til hvønn kommunulækna, til goymslu av koppingarevni.

28.  Spirometur og EKG-tól, sum kunnu samskifta við telduskipan (tvey í hvørja viðtalu).

29.  Tvey in-check.

30.  Tvey peakflow-metur.

31.  Tvey tympanometur.

32.  Tveir dopplarar.

33.  Ein blóðsukurmátari.

34.  Tveir saturatiónsmátarar.

35.  Eitt cerumensúgv ella sproyta.

 

Í hvørt viðtaluhøli, har kommunulækni ella kommunulæknaavloysari, sum Heilsutrygd hevur sett í starv:

1.    Ein barnavekt.

2.    Ein vekt.

3.    Ein Snellen ella onnur sjónstalva.

4.    Eitt blóðtrýsttól.

5.    Eitt stetoskop.

6.    Eitt otoskop/oftalmoskop við hvítum og bláum ljósi.

7.    Ein reflekshamari.

8.    Ein stemmugaffil 128Hz.

9.    Ein hæddarmátari.

10.  Eitt oyratermometur.

 

 

 

 

Skjal 3

 

Tól og amboð, sum Heilsutrygd útvegar til Læknavaktina

 

Í hølunum hjá Læknavaktini:

1.    Tvey einnýtis GU-sett.

2.    Tjúgu sutursett í metalkassa.

3.    Fýra skalpelhaldarar.

4.    Eina cerumenslyngu.

5.    Blóðtrýsttól.

6.    Eina húktong.

9.    Tvey nasaspekula.

10.  Ein gipssaks.

11.  Tvær vinkulpinsettir.

12.  Ein vekt.

13.  Ein lega til børn.

14.  Ein reflekshamari.

16.  Eitt blóðtrýsttól.

17.  Eitt stetoskop.

18.  Eitt otoskop/oftalmoskop við hvítum og bláum ljósi í hvørjum rúmi.

19.  Ein Fingur-ring-skerari.

20.  Tól til at lesa av landstix.

21.  Køliskáp til heilivág og annað.

22.  Fasukontrast mikroskop.

23.  Tól til at máta CRP íroknað reagens.

24.  Tól til at máta Hæmoglobin íroknað reagens.

25.  Tól til munar teljing (differential teljing) íroknað reagens.

26.  Blátt ljos til eygnakanning.

27.  EKG-tól, sum kunnu samskifta við telduskipan.

23.  Tympanometur.

24.  Ein blóðsukurmátari.

25.  Dopplari.

27.  Tveir saturatiónsmátarar.

28.  Eitt cerumensúgv ella sproyta.

29.  Oyratermometur.