Rættarregluevni (einans høvuðslógir og galdandi lógir):
Rættarreglubólkur:
Gildisstøða:
Ár:
Felagsmál / Sermál:
Mál:
Myndugleiki:
Um rættarregluna
  • Bólkur: Kunngerð
  • Gildisstøða: Galdandi
  • Felagsmál/Sermál: Sermál
  • Myndugleiki: Fiskimálaráðið
  • Útgávudagur: 22-12-2018
Tilvísingar
Kunngerðablaðið
  • Kunngerðarblað 2018 A - Kunngerð 174 frá 21. desember 2018
  • Rættarreglan soleiðis sum hon upprunaliga varð kunngjørd í Kunngerðablaðnum
Valmøguleikar
Tín lógalisti

21. desember 2018Nr. 174

Kunngerð um treytir fyri fiskiloyvi 5 A og 5 B og reglur um býtið av fiskidagatalinum hjá bólki 5, útróðrarbátar undir 15 tons

Við heimild í § 74, stk. 4 í løgtingslóg nr. 161 frá 18. desember 2017 um fyrisiting av sjófeingi, sum broytt við løgtingslóg nr. 162 frá 21. desember 2018, verður ásett:

Virkisøki o.a.

§ 1. Henda kunngerð fevnir um treytir fyri fiskiloyvi 5 A og fiskiloyvi 5 B og reglur um býtið av fiskidagatalinum hjá bólki 5, útróðrarbátar undir 15 tons, sambært § 74, stk. 1, nr. 6 í løgtingslógini.

Fiskiloyvi 5 A

§ 2. Fiskiloyvi 5 A kann eftir umsókn verða skrivað eigara av fult riknum fiskifari í bólki 5:

1)   um eigarin við fiskifarinum álmanakkaárið fyri hevur avreitt fyri minst kr. 200.000, og

2)   um inntøkan hjá eigaranum, sum ikki stavar frá útróðri álmanakkaárið fyri, í mesta lagi hevur verið kr. 150.000.

Stk. 2. Rógva eigarar ikki út við viðkomandi útróðrarfari, kann fiskiloyvi 5 A verða útskrivað, um fastur útróðrarformaður lýkur treytirnar í stk. 1, nr. 1 og 2.

Stk. 3. Sum inntøka verða roknaðar allar inntøkur og veitingar, undantikið rentur og veitingar í samband við sjúku ella skaða hjá persóni, sum annars hevur útróður sum høvuðsvinnu.

Stk. 4. Sum inntøka frá útróðri verður roknað inntøka forvunnin við:

1)   fiskifari í bólki 4 A, útróðrarbátar millum 15 og 40 tons sambært § 74, stk. 1, nr. 3 í løgtingslógini,

2)   fiskifari í bólki 4 B, útróðrarbátar størri enn 40 tons sambært § 74, stk. 1, nr. 4 í løgtingslógini,

3)   fiskifari í bólki 4 T, útróðrarbátar størri enn 40 tons á trolveiðu sambært § 74, stk. 1, nr. 5 í løgtingslógini, ella

4)   fiskifari í bólki 5, útróðrarbátar undir 15 tons sambært § 74, stk. 1, nr. 6 í løgtingslógini.

Stk. 5. Um ein persónur, sum lýkur treytirnar sambært stk. 1, nr. 2, keypir ein bát í bólki 5, ið lýkur treytirnar í stk. 1, nr. 1, kann hesin, eftir umsókn, fáa skrivað eitt fiskiloyvi 5 A.

Fiskiloyvi 5 B

§ 3. Fiskiloyvi 5 B kann, eftir umsókn, verða skrivað eigara av fiskifari í bólki 5, um treytirnar sambært § 2, stk. 1 ikki eru loknar.

Fiskidagatal

§ 4. Fiskidagatalið, ásett fyri bólk 5, verður lutað millum bátar við fiskiloyvi 5 A og fiskiloyvi 5 B.

Stk. 2. Tal av fiskidøgum, ið verður tillutað eigarum av útróðrarbátum við fiskiloyvi 5 A, er talið av bátum, ið lúka treytina sambært § 2, stk. 1, nr. 1, faldað við 110, tó avmarkað til í mesta lagi 60% av fiskidagatalinum ásett fyri bólk 5.

Stk. 3. Tal av fiskidøgum tilsamans, ið verður tillutað eigarum av útróðrarbátum við fiskiloyvi 5 B, er fiskidagatalið ásett fyri bólk 5, frádrigið fiskidagatalið sambært stk. 2.

Stk. 4. Rættindi til fiskidagar, sambært stk. 1, verða tillutað sum felags fiskidagar í fiskiloyvini 5 A og 5 B.

Gildiskoma

§ 5. Henda kunngerð kemur í gildi 1. januar 2019, og samstundis fer kunngerð nr. 86 frá 14. juni 2011 um treytir fyri fiskiloyvi og reglur um fiskidagatal hjá fiskiførum í bólki 5 úr gildi.

 

 

Fiskimálaráðið, 21. desember 2018

 

Høgni Hoydal (sign.)

landsstýrismaður

/ Rógvi Reinert (sign.)