Kunngerð nr. 19 frá 12. mars 2019 um virkið musikkskúlastjórans

12. mars 2019Nr. 19

Kunngerð um virkið musikkskúlastjórans

Við heimild í § 5, stk. 6 í løgtingslóg nr. 83 frá 29. mai 2017 um musikkskúlaskipan (Musikkskúlalógin) verður ásett:

§ 1. Musikkskúlastjórin skal undir ábyrgd landsstýrismansins leiða, standa fyri og samskipa musikkskúlaskipanina.

§ 2. Musikkskúlastjórin skal taka sær av yvirskipaðu fakligu, námsfrøðiligu, fíggjarligu og samskipandi uppgávunum í musikkskúlaskipanini.

Stk. 2. Musikkskúlastjórin hevur ábyrgd av, at undirvísingin verður framd sambært lóggávuni.

Stk. 3. Musikkskúlastjórin skipar í samráð við lokalu musikkskúlaleiðararnar fyri lærarabýti, tímabýti og lærugreinabýti skúlanna millum fyri hvørt skúlaár.

Stk. 4. Musikkskúlastjórin skal syrgja fyri, at musikkskúlarnir halda tær skyldur, ið ásettar eru í løgtingslógini.

§ 3. Musikkskúlastjórin hevur skyldu at halda seg kunnugan við ta gongd og menning, ið fer fram innan tónleik og tónleikaundirvísing.

§ 4. Musikkskúlastjórin hevur skyldu til í ávísum vavi at vitja musikkskúlarnar og halda seg kunnugan við virksemi teirra.

Stk. 2. Musikkskúlastjórin skal vera teimum einstøku musikkskúlunum til hjálpar við vegleiðing og ráðgeving í fakligum og námsfrøðiligum spurningum.

§ 5. Musikkskúlastjórin hevur arbeiðsstað í Undirvísingarstýrinum.

§ 6. Musikkskúlastjórin hevur eftirlit við royndum, sum kommunali musikkskúlaleiðarin skipar fyri.

Stk. 2. Musikkskúlastjórin skal góðkenna skipanina við royndum á orgulútbúgvingini og musikkskúlamiðnámsútbúgvingini.

§ 7. Musikkskúlastjórin setir í starv og loysir úr starvi musikkskúlalærarar í samráð við kommunala musikkskúlaleiðaran. Í aðrar mátar er setanarpolitikkurin hjá tí almenna galdandi.

§ 8. Henda kunngerð kemur í gildi dagin eftir, at hon er kunngjørd.

Mentamálaráðið, 12. mars 2019

Hanna Jensen (sign.)

landsstýrismaður

/ Poul Geert Hansen (sign.)