Skrivar tú trygging verður eisini leitað eftir øðrum endingum av orðinum sum t.d. tryggingar og tryggingarvirksemi.
Skrivar tú ?trygging verður leitað eftir orðum sum t.d. lívstrygging og lívstryggingar.
Skrivar tú ”trygging” verður einans leitað eftir júst hesum sniðnum av orðinum.
22. februar 2022Nr. 21
Kunngerð um innleggingar í ídnaðarliga framleiddum flytførum eindum og í bygningslutum
Við heimild í § 3, stk. 1, nr. 1 og 2 í løgtingslóg nr. 76 frá 5. mai 2021 um løggilding av elinnleggingarfyritøkum verður ásett:
Ídnaðarliga framleiddar flytførar eindir
§ 1. Elinnleggingar í niðanfyri standandi ídnaðarliga framleiddu flytføru eindum, sum ikki eru ætlaðar til eina slíka nýtslu, at tær koma í staðin fyri fastar bygningar, kunnu verða gjørdar av framleiðarum uttan at nýta eina løggilda elinnleggjarafyritøku, um so er, at elinnleggingin verður gjørd sum liður í samlaðu framleiðsluni á verksmiðju, har flytføra eindin verður framleidd, og um elinnleggingin verður gjørd av serkønum starvsfólki:
1) Kampingvognum.
2) Skúrum á hjólum.
3) Bingjum.
4) Bókasavnsbussum.
5) Flytførum eindum til læknafrøðiligar kanningar og viðgerðir til persónar og djór.
6) Flytførum eindum til skeinking og borðreiðing.
7) Flytførum vesi og bað.
8) Øðrum flytførum eindum, sum eftir eini ítøkiligari meting ikki kunnu nýtast sum fastur bygningur.
Stk. 2. Framleiðarin av teimum í stk. 1 nevndu flytføru eindum hevur ábyrgd av, at elinnleggingarnar og tilfar eru í samsvari við sterkstreymskunngerðina og onnur trygdarkrøv.
Ídnaðarliga framleiddir bygningslutir
§ 2. Elinnleggingar yvir lendi og í bygningum kunnu í niðanfyri standandi ídnaðarliga framleiddu bygningslutum verða gjørdar av framleiðarum uttan at nýta eina løggilda elinnleggjarafyritøku, um so er, at elinnleggingin verður gjørd sum liður í samlaðu framleiðsluni á verksmiðjuni, har bygningsluturin verður framleiddur, og um elinnleggingin verður gjørd av serkønum starvsfólki:
1) Undanframleiddum baðirúmum og køkum.
2) Sýnisskápum, diskum og køksskápum, sum verða sett upp í bygninginum.
3) Øðrum ídnaðarliga framleiddum bygningslutum, har elinnleggingin eftir eini ítøkiligari meting kann verða gjørd á ein tryggan hátt.
Stk. 2. Framleiðarin av undanframleiddum bygningslutum kann uttan at nýta góðkenda elinnleggjarafyritøku stoypa inn rør og dósir í bygningslutirnar, um hetta verður gjørt av serkønum starvsfólki á verksmiðjuni sum liður í samlaðu framleiðsluni, har bygningslutirnir verða framleiddir.
Stk. 3. Framleiðarin av teimum í stk. 1 og 2 nevndu bygningslutum hevur ábyrgd av, at elinnleggingarnar og tilfar eru í samsvari við sterkstreymskunngerðina og onnur trygdarkrøv.
Gildiskoma
§ 3. Henda kunngerð kemur í gildi dagin eftir, at hon er kunngjørd.
Umhvørvis- og vinnumálaráðið, 22. februar 2022
Magnus Rasmussen (sign.)
landsstýrismaður
/ Herálvur Joensen (sign.)
