Skrivar tú trygging verður eisini leitað eftir øðrum endingum av orðinum sum t.d. tryggingar og tryggingarvirksemi.
Skrivar tú ?trygging verður leitað eftir orðum sum t.d. lívstrygging og lívstryggingar.
Skrivar tú ”trygging” verður einans leitað eftir júst hesum sniðnum av orðinum.
13. mars 1996Nr. 22
Kunngerð um læknakanning fyri sjómenn
Samsvarandi § 4, stk. 2 og § 68 í løgtingslóg nr. 4 frá 15. januar 1988 um sjómenn og § 33 í løgtingslóg nr. 16 frá 3. mars 1988 um sjóvinnu hevur Føroya Landsstýri fyrisett:
§ 1. Í hesi kunngerð merkir:
1) Skip: Eitt og hvørt skip 20 tons ella meira, hóast farleið.
2) Heilsuprógv: Prógv fyri at hava verið til læknakanning fyri sjómenn.
3) Gilt heilsuprógv: Prógv fyri at avvarðandi er heilsuliga skikkaður til arbeiðis umborð á skipi, møguliga skikkaður við treytum.
4) Sjómenn: Skiparar og persónar, sum koma undir §§ 1 og 2 í løgtingslógini um sjómenn.
§ 2. Ein og hvør, sum settur verður at røkja skipsarbeiði umborð á skipi, skal hava gilt heilsuprógv.
Stk. 2. Kommunulæknin gevur út og áteknar heilsuprógv eftir teimum í hesum parti fyriskipaðu reglum um læknakanningar fyri sjómenn, møguliga við treytum, sum í hesi kunngerð loyvt er eftir § 9, stk. 2.
Stk. 3. Læknakanningin fatar um eina gjøgnumgongd av heilsuviðurskiftum og arbeiðsumhvørvisviðurskiftum hjá sjómonnum og síðani eina kliniska kanning.
Stk. 4. Tá læknakanning fer fram, skulu oyðubløð, sum Sjóvinnufyrisitingin gevur út, nýtast.
Stk. 5. Oyðiblaðið skal verða sent Sjóvinnufyrisitingini, samstundis sum kommunulæknin váttar heilsuprógvið.
Stk. 6. Tað áliggur læknanum at tryggja sær, at sjómaðurin hevur svarað sínum parti av oyðiblaðnum áðrenn oyðiblaðið verður sent Sjóvinnufyrisitingini.
Stk. 7. Tá Sjóvinnufyrisitingin hevur móttikið svarað oyðiblað, verður samsýning rinda samb. § 11, stk. 2.
Stk. 8. Sjóvinnufyrisitingin kann áseta nærri reglur til tess at umsita hesa kunngerð.
§ 3. Læknakanningin skal í Føroyum fara fram hjá kommunulækna.
Stk. 2. Er læknakanningin farin fram uttanlands, skal avvarðandi skipari beinanvegin átekna heilsuprógvið samsvarandi læknaváttanini, og skal læknaváttanin (frumritið) beinanvegin verða send Sjóvinnufyrisitingini, jbr. § 2. Í teimum førum, har sjómaður, sum kannaður verður uttanlands, frammanundan er mettur ikki at vera skikkaður til arbeiðis umborð, skal Sjóvinnufyrisitingin boða skiparanum frá hesum, og skal skiparin hóast seinastu læknakanning síggja til, at sjómaðurin verður avmynstraður og heimsendur í fyrstu komuhavn skipsins, har heimferðin hóskandi kann fara fram.
§ 4. Fyrstu ferð sjómaður fer í starv umborð á skipi, skal heilsuprógvið vera áteknað um, at avvarðandi er skikkaður til skipsarbeiði, møguliga við treytum skikkaður, jbr. fylgiskjalið, teigur A.
§ 5. Til tess, at sjómaður yngri enn 18 ár framhaldandi kann verða í starvi umborð, krevst nýggj læknakanning við 1 ára millumbili, og skal tá heilsuprógvið verða áteknað um, at avvarðandi framhaldandi er skikkaður til skipsarbeiði, møguliga við treytum skikkaður, jbr. fylgiskjalið, teigur A.
§ 6. Til tess, at sjómaður 18 ár og eldri framhaldandi kann verða í starvi umborð, krevst nýggj læknakanning við hægst 2 ára millumbili, og skal tá heilsuprógvið verða áteknað um, at avvarðandi framhaldandi er skikkaður til skipsarbeiði, møguliga við treytum skikkaður, jbr. fylgiskjalið, teigur B.
§ 7. Um serligar umstøður eru til tess, kann tann, sum við læknakanning eftir § 9 er mettur at vera óskikkaður til skipsarbeiði ella bert skikkaður við treytum, krevja, at nýggj læknakanning verður gjørd á Deildini fyri Arbeiðs- og Almannaheilsu. Sjóvinnufyrisitingin, reiðarí ella avvarðandi sjómaður kann innan 4 vikur leggja kanningarúrslitið fyri Heilsunevndina fyri Sjómenn. Heilsunevndin kann víkja frá tíðarfreistini, um serstøk orsøk er til tess.
§ 8. Er ivi um, at sjómaður vegna heilsustøðuna er skikkaður til arbeiðis umborð, kann Sjóvinnufyrisitingin, hóast avvarðandi hevur gilt heilsuprógv, treytað framhaldandi arbeiði umborð við at krevja nýggja læknakanning innan ásetta tíðarfreist.
Stk. 2. Innan ásetta tíðarfreist skal við nýggjari læknakanning verða váttað, at sjómaður er skikkaður til arbeiðis umborð. Sjóvinnufyrisitingin kann krevja, at sjómaður, sum er óskikkaður til arbeiðis umborð, verður avmynstraður í fyrstu komuhavn skipsins, har heimferðin hóskandi kann fara fram.
Stk. 3. Sjóvinnufyrisitingin, avvarðandi reiðarí ella sjómaður kunnu innan 4 vikur leggja læknakanningarúrslitið fyri Heilsunevndina fyri Sjómenn. Heilsunevndin kann víkja frá tíðarfreistini, um serligar orsøkir eru til tess.
Stk. 4. Sjómaður, sum eftir læknakanningina í stk. 1 er óskikkaður til arbeiðis umborð, skal ikki verða settur til arbeiðis umborð, hóast kanningin er løgd fyri Heilsunevndina ella rættin til viðgerðar.
§ 9. Tá læknakanningar verða gjørdar, verður mett um, hvørt tann likamliga og sálarliga støðan vanliga er soleiðis, at avvarðandi er skikkaður til arbeiði umborð á skipi, jbr. fylgiskjalið.
Stk. 2. Hevur onkur, tá læknakanningar verða gjørdar eftir §§ 4, 5 og 6, eina ella fleiri av teimum í fylgiskjalinum nevndu sjúkum, metir læknin um avvarðandi er skikkaður ella óskikkaður til skipsarbeiði, ella um treytir skulu skrivast á heilsuprógvið viðvíkjandi tíð, starvsøki umborð og/ella farleið.
§ 10. Føroya Landsstýri setir Heilsunevndina fyri Sjómenn, sum tekur ta endaligu fyrisitingarligu avgerðina viðvíkjandi málum, sum Sjóvinnufyrisitingin, reiðarí ella sjómaður leggur fyri nevndina eftir § 7 ella § 8, stk. 3.
Stk. 2. Í Heilsunevndina fyri Sjómenn tilnevnir Føroya Landsstýri 3 limir og 3 varalimir, harav 1 limur og varalimur skal vera lækni, tilmæltur av Læknafelag Føroya, og 1 limur og ein varalimur skal vera sjókønur.
Stk. 3. Føroya Landsstýri ásetur reglur um málsviðgerðina í nevndini.
Stk. 4. Sjóvinnufyrisitingin áteknar heilsuprógv samsvarandi avgerðum, tiknar í Heilsunevndini.
§ 11. Kanningar, sum verða gjørdar sambært § 2, rindar Sjóvinnufyrisitingin í tann mun avvarðandi ikki eftir aðrari lóggávu ella fyrisitingarligum reglum hevur rætt til ókeypis kanningar av nevnda slagi. Útreiðslur til ferðing til og frá kanningarstaðnum ella aðrar útreiðslur í samband við kanningina verða ikki endurrindaðar.
Stk. 2. Samsýning fyri læknakanningar skulu góðkennast sambært avtalu millum Føroya Landsstýri og Læknafelag Føroya.
Stk. 3. Fyri læknakanningar uttanlands verða útreiðslurnar goldnar av reiðarínum, sum kann krevja útreiðslurnar endurgoldnar, tá læknaváttan og kvittað læknarokning verður send Sjóvinnufyrisitingini. Tað er ein fortreyt fyri endurgjaldi, at læknasamsýningin er rímilig.
§ 12. Meðan sjómaður er í starvi umborð, skal heilsuprógvið verða latið skiparanum í varðveitslu.
Stk. 2. Sjómaður, sum ikki heldur ásettu tíðarfreistina eftir § 8, stk. 1, og sjómaður, sum er mettur óskikkaður eftir § 8, stk. 4, skal lata Sjóvinnufyrisitingini heilsuprógv sítt. Harumframt hevur sjómaður skyldu at lata Sjóvinnufyrisitingini heilsuprógv sítt, tá biðið verður um tað.
Stk. 3. Í teimum førum, tá sjómaður er í starvi umborð á skipi um tað mundið, at heilsuprógv skulu latast Sjóvinnufyrisitingini eftir stk. 2, skal skiparin síggja til, at hetta verður gjørt. Sjóvinnufyrisitingin kann í slíkum føri loyva, at avvarðandi sjómaður framvegis er í starvi umborð, hóast gilt heilsuprógv ikki fyriliggur umborð.
§ 13. Skiparin skal síggja til, at tær í hesi kunngerð ásettu reglur í § 2, stk. 1, § 3, stk. 2, §§ 5 og 6, § 8, stk. 2 og § 12, stk. 1 og 3 verða hildnar.
§ 14. Um so er, at tíðarfreist ásett eftir § 5 ella § 6 gongur út á túri, er seinasta átekningin á heilsuprógvinum gilt til fyrstu komuhavn skipsins, har læknakanningin kann gerast uttan óneyðugt drál.
§ 15. Brot á reglurnar í hesi kunngerð verða revsað við bót.
§ 16. Henda kunngerð fær gildi 1. apríl 1996.
