Kunngerð nr. 231 frá 30. desember 2025 um at skipa fiskiskapin hjá skipum undir grønlendskum flaggi í føroyskum sjógvi í 2026

30. desember 2025Nr. 231

Kunngerð um at skipa fiskiskapin hjá skipum undir grønlendskum flaggi í føroyskum sjógvi í 2026

• Kapittul 1 Virkisøki
• Kapittul 2 Veiða eftir svartkjafti
• Kapittul 3 Veiða eftir norðhavssild
• Kapittul 4 Ymiskar ásetingar
• Kapittul 5 Revsireglur og gildistíð

Við heimild í § 25, stk. 4, § 26, stk. 2, § 34, stk. 1, nr. 1-4 og 6, stk. 2, nr. 2, 4, 6-9 og stk. 3 og § 64, stk. 2 í løgtingslóg nr. 152 frá 23. desember 2019 um sjófeingi (Sjófeingislógin), sum broytt við løgtingslóg nr. 106 frá 29. juni 2020, løgtingslóg nr. 185 frá 18. desember 2020, løgtingslóg nr. 170 frá 21. desember 2021 og løgtingslóg nr. 155 frá 20. desember 2023, verður ásett:

Kapittul 1

Virkisøki

§ 1. Kunngerðin skipar fiskiskapin í føroyskum sjógvi hjá skipum undir grønlendskum flaggi samsvarandi sínámillum fiskiveiðiavtalu millum Føroyar og Grønland fyri 2026.

Kapittul 2

Veiða eftir svartkjafti

§ 2. Loyvt er skipum undir grønlendskum flaggi at veiða 20.400 tons av svartkjafti í føroyskum sjógvi í 2026.

Stk. 2. Umframt kvotuna sambært stk. 1 hava skip undir grønlendskum flaggi í 2026 atgongd at veiða í mesta lagi 4.597 tons av grønlendsku kvotuni av svartkjafti í altjóða sjógvi í NEAFC-skipanarøkinum í føroyskum sjógvi í 2026.

Fiskileiðir

§ 3. Loyvt er ikki at royna eftir svartkjafti við troli á teimum leiðum nevndar í stk. 2 og 3.

Stk. 2. Á landgrunninum innan fyri linjur drignar millum hesi støð og í hesi raðfylgju:

1)   62°50'00"N, 07°11'00"V

2)   62°53'00"N, 06°40'00"V

3)   62°50'00"N, 06°10'00"V

4)   62°43'00"N, 05°38'00"V

5)   62°32'00"N, 05°02'00"V

6)   62°25'00"N, 04°15'00"V

7)   62°19'00"N, 04°00'00"V

8)   62°01'00"N, 04°00'00"V

9)   61°17'00"N, 04°56'00"V

10) 60°26'00"N, 06°10'00"V

11) 60°26'00"N, 06°32'00"V

12) 60°35'00"N, 06°35'00"V

13) 61°23'00"N, 07°30'00"V

14) 61°25'25"N, 08°01'00"V

15) 61°32'48"N, 08°20'30"V

16) 61°49'00"N, 08°41'50"V

17) 62°00'00"N, 10°00'00"V

18) 62°40'00"N, 10°00'00"V

19) 62°40'00"N, 08°00'00"V

20) 62°50'00"N, 07°11'00"V

Stk. 3. Á Føroyabanka innan fyri linjur drignar millum hesi støð og í hesi raðfylgju:

1)   60°50'00"N, 07°57'00"V

2)   61°03'00"N, 07°57'00"V

3)   61°15'30"N, 08°16'00"V

4)   61°13'20"N, 08°42'12"V

5)   61°00'00"N, 09°11'00"V

6)   60°48'40"N, 09°25'00"V

7)   60°24'00"N, 09°07'00"V

8)   60°50'00"N, 07°57'00"V

Reiðskapur

§ 4. Tá svartkjaftur verður veiddur við uppsjóvartroli, skulu meskarnir í trolinum ikki vera minni enn 35 mm.

§ 5. Trolið skal hava innsetta skiljirist, tá roynt verður eftir svartkjafti á leiðunum norðan fyri 60°20'00''N og sunnan fyri eina linju drigna í ein beinan eystan úr punktinum 63°00'00''N, 06°00'00''V og út á fiskimarkið, og 315° rættvísandi úr punktinum 63°00'00''N, 06°00'00''V og út á fiskimarkið.

Stk. 2. Ristseksjónin skal setast inn framman fyri posan. Ristin skal hava rimar við í mesta lagi 55 mm millum hvørja. Hallið á ristini skal vera 45°-60°. Op skal vera í netinum undir ristini. Opið skal vera breiddin á ristini og skal vera frítt soleiðis, at hjáveiða ótarnað sleppur út. Skjal 1 vísir skitsu av rist og ristseksjón.

Kapittul 3

Veiða eftir norðhavssild

§ 6. Skip undir grønlendskum flaggi kunnu veiða 4.900 tons av norðhavssild í føroyskum sjógvi í 2026. Hendan kvotan kann eisini fiskast í altjóða sjógvi í NEAFC-skipanarøkinum.

Fiskileiðir

§ 7. Kvotan sambært § 6 kann í føroyskum sjógvi bert fiskast uttan fyri linjur drignar 12 fjórðingar úr grundlinjunum norðan fyri 62˚30N.

§ 8. Fiskifør, sum fiska sambært hesi kunngerð, skulu halda seg til ásetingarnar um friðað øki, ásettar í kunngerð um at friða ávísar leiðir í føroyskum sjógvi fyri veiðu við troli og øðrum reiðskapi og í kunngerð um tíðaravmarkað veiðibann á gýtingarleiðum.

§ 9. Kemur skip inn í øki, har tað ikki hevur loyvi at fiska, skal allur fiskireiðskapur vera burturstúgvaður á sínum natúrliga staði og trolwirar úrsjeklaðir.

Reiðskapur

§ 10. Tá norðhavssild verður veidd við uppsjóvartroli, skulu meskarnir í trolinum ikki vera minni enn 35 mm.

Ymiskar ásetingar um útgerð umborð fyri skip, sum veiða norðhavssild

§ 11. Gloppið millum rimarnar í pumpukassanum kann í mesta lagi vera 10 mm. Rimarnar skulu vera sveisaðar fastar. Um pumpukassin hevur hol í staðin fyri rimar, skal tvørmátið á holunum ikki fara upp um 10 mm. Hol í sliskuni, áðrenn pumpukassan, skulu ikki vera meira enn 15 mm í tvørmát.

§ 12. Skip skulu ikki vera innrættað soleiðis, at møguligt er at tøma fisk úr tangunum yvir borð undir vatnlinjuni.

§ 13. Vørn kann krevja at fáa tekningar frá skipum, sum vísa, hvussu fongurin verður hagreiddur umborð og um tømingarmøguleikar. Skip skulu til einhvørja tíð hava avrit av hesum tekningum.

§ 14. Fiskifør, sum ikki frysta veiðuna umborð, hava ikki loyvi at hava ella brúka sjálvvirkandi støddarskiljarar umborð. Um veiðan verður fryst ella virkað umborð, skal hetta gerast beint eftir støddarskiljing.

Kapittul 4

Ymiskar ásetingar

Loyvi

§ 15. Fiskifør undir grønlendskum flaggi kunnu bert byrja fiskiskap á føroysku landleiðunum, um tey eru á lista yvir fiskifør, sum Grønland hevur givið loyvi at fiska á føroysku landleiðunum sambært hesi kunngerð. Listin skal vera fráboðaður og góðkendur av føroyskum myndugleikum.

Hjáveiða í fiskiskapi eftir svartkjafti og norðhavssild og ungfiskur

§ 16. Í fiskiskapi eftir svartkjafti ella í fiskiskapi eftir norðhavssild skal samlaða hjáveiðan av fiskasløgunum toskur, hýsa, upsi og kongafiskur, hvørki fyri hvørt hál ella fyri túrin, vera meir enn 2% av samlaðu veiðuni fyri túrin ella hálið.

Stk. 2. Skiparin hevur skyldu at boða Vørn frá, er íblandingin av fiskasløgunum toskur, hýsa, upsi og kongafiskur meir enn 2% av samlaðu vektini í hvørjum háli ella kasti.

§ 17. Sambært § 59, stk. 1 í løgtingslógini kann fiskiveiðieftirlitið áseta bráðfeingis veiðibann fyri ávísan fiskiskap á ávísum leiðum í føroyskum sjógvi, har hjáveiða er meira enn ásetta hámarkið. Bráðfeingis veiðibann kann lýsast fyri upp til 4 vikur hvørja ferð.

§ 18. Fiskifør, sum fiska sambært hesi kunngerð, skulu halda seg til ásetingarnar um ungfisk, ásettar í kunngerð um vernd av ungfiski og hámark fyri íblanding av ungfiski.

Umrokningarfaktorar

§ 19. Við umrokning av fiski og fiskavørum til runda vekt skulu hesir umrokningarfaktorar nýtast fyri norðhavssild:

1)   Kruvd, við høvdi: 1,00.

2)   Kruvd, avhøvdað: 1,00.

3)   Flak við skræðu og beinum: 2,00.

4)   Flak, uttan skræðu, við beinum: 2,00.

5)   Flak uttan skræðu og bein: 2,00.

6)   Fiskamjøl: 5,11.

§ 20. Við umrokning av fiski og fiskavørum til runda vekt skulu hesir umrokningarfaktorar nýtast fyri svartkjaft:

1)   Kruvdur, við høvdi: 1,20.

2)   Kruvdur, avhøvdaður: 1,40.

3)   Flak við skræðu og beinum: 2,80.

4)   Flak, uttan skræðu, við beinum: 2,80.

5)   Flak uttan skræðu og bein: 2,80.

6)   Fiskamjøl: 5,11.

Undirmálssild

§ 21. Veiðan av undirmálssild skal ikki vera meir enn 10% av samlaðu vektini av veiðuni fyri túrin.

Stk. 2. Sild, ið er undir 22 cm, mátað fremst úr høvdinum til aftast á stertinum, tá hon er strekt, er undirmálssild.

Umskipingar

§ 22. Sambært § 26, stk. 1 í løgtingslógini er umskiping av veiðu ikki loyvd.

Stk. 2. Vørn kann tó loyva umskiping við bryggju í føroyskari havn samsvarandi galdandi NEAFC-reglum hesum viðvíkjandi.

Eygleiðari

§ 23. Vørn ger av, um eygleiðari skal vera umborð á fiskiførum, ið fiska sambært hesi kunngerð. Eygleiðarar hava loyvi at nýta samskiftisútgerðina umborð til tess at hava samband við Vørn og við aðrar myndugleikar.

Fráboðanarskyldur

§ 24. Skip undir grønlendskum flaggi, sum sambært § 15 hava loyvi at fiska á føroysku landleiðunum, skulu senda fráboðan til Vørn, sum nærri ásett í skjali 2 til hesa kunngerð.

Stk. 2. Tá fiskað verður av nøgdini, sum atgongd er til sambært § 2, stk. 2, skal í fráboðanini sambært stk. 1 undir viðmerkingunum viðmerkjast, at talan er um atgongd.

§ 25. Verður fiskað av kvotu av norðhavssild í altjóða sjógvi sambært § 6, 2. pkt., skal skipið eisini senda Vørn fráboðan sambært § 24, stk. 1.

Kapittul 5

Revsireglur og gildistíð

Revsing

§ 26. Brot á §§ 3-5, 7 og 9-12, § 13, 2. pkt., § 14, § 16, stk. 2, §§ 19 og 20, § 21, stk. 1 og §§ 24 og 25 verða revsað við sekt, er ikki harðari revsing ásett eftir aðrari lóg. Á sama hátt verður tann revsaður, sum ikki fylgir boðum sambært § 13, 1. pkt. ella forðar Vørn í at útinna sínar uppgávur sambært § 23.

Stk. 2. Feløg og aðrir løgfrøðiligir persónar koma undir revsiábyrgd eftir reglunum í kapitli 5 í revsilógini.

Stk. 3. Sambært § 70 í løgtingslógini kann Vørn beinanvegin taka aftur rættin til at reka vinnuligan fiskiskap, um brot er framt sambært stk. 1. Rætturin at reka vinnuligan fiskiskap kann takast aftur upp til 4 vikur hvørja ferð.

Gildistíð

§ 27. Henda kunngerð kemur í gildi 1. januar 2026 og fer úr gildi 1. januar 2027.

 

 

Tilfeingis- og vinnumálaráðið, 30. desember 2025

 

Eirikur í Jákupsstovu (sign.)

landsstýrismaður

/ Pól E. Egholm (sign.)

 

 

 

 

Skjal 1

 

Skitsa av rist og ristseksjón

 

Skiljiristin hevur sum endamál at skilja stóran fisk frá smáum og sleppa størra fiskinum út gjøgnum op í undirnetinum.

 

 

Ristseksjón

 

Ristseksjónin skal setast inn framman fyri posan. Ristin skal hava rimar við í mesta lagi 55 mm millum hvørja. Hallið á ristini skal vera 45° - 60°. Op skal vera í netinum undir ristini. Opið skal vera breiddin á ristini og skal vera frítt soleiðis, at hjáveiða ótarnað sleppur út.

 

 

 

 

 

Skjal 2

Fráboðanir til Vørn

 

Niðan fyri standandi fráboðanir skulu sendast til vakt@vorn.fo, telefaks +298 313981 ella INMARSAT-C 492880010. Eisini er møguleiki hjá skipum undir grønlendskum flaggi at senda fráboðanir til Vørn umvegis heimasíðuna, www.vorn.fo, undir fráboðanir.

 

1) COE - Fráboðan um, at fiskiskapur byrjar. Skal sendast, í fyrsta lagi 6 tímar og í seinasta lagi 2 tímar, áðrenn skipið kemur inn í føroyskt fiskiøki.

 

Fráboðanin skal hava fylgjandi tekst:

Dataelement	Koda	Frágreiðing
Fráboðan	TM	COE, fráboðan um, at fiskiskapur byrjar (Catch on Entry)
Raðnummar	SQ	Nummar á fráboðanini
Loyvisnummar	LC	Nummar á fiskiloyvi (ikki krav)
Beinleiðis veiða	DS	Fiskaslag, sum beinleiðis veiða er eftir
Radio kallimerki	RC	Kallimerki hjá skipinum
IMO nummar	IM	IMO nummar á skipinum (ikki krav)
Túranummar	TN	Túrur hjá skipinum í hesum árinum (ikki krav)
Skip	NA	Navn á skipinum
Skipari	MA	Navn á skiparanum
Havnarkenningarnummar	XR	Havnarkenningarnummar hjá skipinum
Veiðiøki	RA	Økið hagar skipið fer til fiskiskap
Breiddarstig	LA	Knattstøða (N/S breidd), tá fráboðanin verður send
Longdarstig	LO	Knattstøða (E/V longd), tá fráboðanin verður send
Veiða umborð	OB	Veiða umborð flokkað eftir fiskasløgum (FAO 3 alpha kodu. Veiðan skal gevast upp í rundari vekt í kg.
Dagfesting	DA	Dagfesting, tá fráboðanin er send (dd-mm-yyyy)
Klokkutíð	TI	Klokkutíð, tá fráboðanin er send í UTC (24M h:m)
Viðmerkingar	RE	Viðmerkingar

 

 

2) CAT – Veiðifráboðan hvønn dag. Fráboðanin skal sendast, hóast eingin veiða er fingin. Skal sendast dagliga fyrrapartin áðrenn kl. 12 UTC.

 

Fráboðanin skal hava fylgjandi tekst:

Dataelement	Koda	Frágreiðing
Fráboðan	TM	CAT, veiðifráboðan (Daily Catch report)
Raðnummar	SQ	Nummar á fráboðanini
Loyvisnummar	LC	Nummar á fiskiloyvi (ikki krav)
Beinleiðis veiða	DS	Fiskaslag, sum beinleiðis veiða er eftir
Radio kallimerki	RC	Kallimerki hjá skipinum
IMO nummar	IM	IMO nummar á skipinum (ikki krav)
Túranummar	TN	Túrur hjá skipinum í hesum árinum (ikki krav)
Skip	NA	Navn á skipinum
Skipari	MA	Navn á skiparanum
Havnarkenningarnummar	XR	Havnarkenningarnummar hjá skipinum
Veiðiøki	RA	Økið har skipið er til fiskiskap
Breiddarstig	LA	Knattstøða (N/S breidd), tá fráboðanin verður send
Longdarstig	LO	Knattstøða (E/V longd), tá fráboðanin verður send
Veiða	CA	Veiða undanfarna samdøgur frá 00.00 til 23.59 (CAT), flokkað eftir fiskasløgum (FAO 3 alpha kodu). Veiðan skal gevast upp í rundari vekt í kg.
Samlað veiða umborð	TC	Samlað veiða umborð (FAO 3 alpha kodu), í rundari vekt í kg.
Dagfesting	DA	Dagfesting, tá fráboðanin er send (dd-mm-yyyy)
Klokkutíð	TI	Klokkutíð, tá fráboðanin er send í UTC (24H h:m)
Viðmerkingar	RE	Viðmerkingar

 

 

3) COX – Fráboðan um, at fiskiskapur endar. Skal sendast, í fyrsta lagi 8 tímar og í seinasta lagi 2 tímar, áðrenn skipið skiftir frá einum fiskaslagi til eitt annað ella gevst at fiska. Verður farið úr føroyskum sjógvi, skal fráboðanin sendast í seinasta lagi 12 tímar áðrenn.

 

Fráboðanin skal hava fylgjandi tekst:

Dataelement	Koda	Frágreiðing
Fráboðan	TM	COX, fráboðan, at fiskiskapur endar (Catch on Exit)
Raðnummar	SQ	Nummar á fráboðanini
Loyvisnummar	LC	Nummar á fiskiloyvi (ikki krav)
Beinleiðis veiða	DS	Fiskaslag, sum beinleiðis veiða hevur verið eftir
Radio kallimerki	RC	Kallimerki hjá skipinum
IMO nummar	IM	IMO nummar á skipinum (ikki krav)
Túranummar	TN	Túrur hjá skipinum í hesum árinum (ikki krav)
Skip	NA	Navn á skipinum
Skipari	MA	Navn á skiparanum
Havnarkenningarnummar	XR	Havnarkenningarnummar hjá skipinum
Veiðiøki	RA	Økið hvaðani skipið kemur av fiskiskapi
Breiddarstig	LA	Knattstøða (N/S breidd), tá fráboðanin verður send
Longdarstig	LO	Knattstøða (E/V longd), tá fráboðanin verður send
Veiða	CA	Veiða, fiskað undanfarna samdøgur frá 00.00-23.59, flokkað eftir fiskasløgum (FAO 3 alpha kodu). Veiðan skal gevast upp í rundari vekt í kg.
Samlað veiða umborð	TC	Samlað veiða umborð (FAO 3 alpha kodu), í rundari vekt í kg.
Móttøkuhavn	PO	Havn har fiskurin verður uppskipaður/umskipaður
Landað ella umskipað	TR	Upplýs hvat virki ella skip veiðan verður landað ella umskipað til
Dagur, tá veiðan verður landað ella umskipað	PD	Dagurin, tá mett verður, at veiðan verður landað ella umskipað (dd-mm-yyyy)
Klokkutíð har veiðan verður landað ella umskipað	PT	Tíð á degnum mett verður, at veiðan verður landað ella umskipað (24H h:m)
Dagfesting	DA	Dagfesting, tá fráboðanin er send (dd-mm-yyyy)
Klokkutíð	TI	Klokkutíð, tá fráboðanin er send í UTC (24H h:m)
Viðmerking	RE	Viðmerking