Skrivar tú trygging verður eisini leitað eftir øðrum endingum av orðinum sum t.d. tryggingar og tryggingarvirksemi.
Skrivar tú ?trygging verður leitað eftir orðum sum t.d. lívstrygging og lívstryggingar.
Skrivar tú ”trygging” verður einans leitað eftir júst hesum sniðnum av orðinum.
13. januar 2009Nr. 3
Kunngerð um Dissiplinernevnd fyri løggildar og skrásettar grannskoðarar
Við heimild í § 19, stk. 1 og 5 í løgtingslóg nr. 116 frá 11. desember 2007 um løggildar og skrásettar grannskoðarar (grannskoðaralógin) verður ásett:
Kapittul 1
Málsræði og bygnaður hjá Dissiplinernevndini
§ 1. Dissiplinernevndin viðger klagur um, at løggildur ella skrásettur grannskoðari í sambandi við arbeiði sítt sambært § 1, stk. 2 í grannskoðaralógini, hevur sett til síðis tær skyldur, ið hoyra starvinum til. Mál, sum er lagt fyri Dissiplinernevndina eftir, at grannskoðaralógin er komin í gildi, men sum snýr seg um brot á Løgtingslóg nr. 120 frá 21. mai 1993 um løggildar grannskoðarar ella Løgtingslóg nr. 119 frá 21. mai 1993 um skrásettar grannskoðarar, verður viðgjørt í Dissiplinernevndini eftir teimum reglum, sum vóru galdandi, tá brotið fór fram.
Stk. 2. Klagur um samsýning til grannskoðara og felagslig mál kunnu ikki leggjast fyri Dissiplinernevndina.
§ 2. Í Dissiplinernevndini er ein formaður, sum er løgfrøðingur, og 8 nevndarlimir, harav 2 eru løggildir grannskoðarar, 2 eru skrásettir grannskoðarar, og 4 eru umboðandi roknskaparbrúkararnar. Skráseting Føroya kann tilnevna ein ella fleiri løgfrøðingar sum næstformenn.
Stk. 2. Fyri hvønn nevndarlim kann verða valdur ein varalimur.
Stk. 3. Skráseting Føroya tilnevnir formannin og nevndarlimirnar fyri fýra ár í senn.
Stk. 4. Formaðurin avger út frá einari meting í hvørjum einstøkum máli, hvussu nógvir og hvørjir nevndarlimir skulu luttaka, tá eitt mál verður viðgjørt. Tað skulu altíð vera líka nógvir grannskoðarar sum umboð fyri roknskaparbrúkararnar.
Stk. 5. Tá nevndin viðger mál viðvíkjandi løggildum grannskoðara, skal í minsta lagi 1 løggildur grannskoðari og 1 umboð fyri roknskaparbrúkararnar luttaka í nevndini. Tá nevndin viðger mál um skrásettan grannskoðara, skal somuleiðis í minsta lagi 1 skrásettur grannskoðari og 1 umboð fyri roknskaparbrúkararnar luttaka. Hetta er ikki galdandi í teimum málum, har formaðurin sambært § 7 tekur avgerð einsamallur. Í málum, har tað kann koma upp á tal at taka aftur tilnevningina sum løggildur ella skrásettur grannskoðari sambært § 20, stk. 2 grannskoðaralógini, skulu, umframt formannin, í minsta lagi luttaka 2 løggildir ávíkavist 2 skrásettir grannskoðarar og tilsvarandi tal av limum umboðandi roknskaparbrúkaran.
§ 3. Formaðurin ella nevndarlimir mugu ikki vera við í viðgerðini av einum máli, um viðkomandi eftir reglunum í rættargangslógini hevði verið ógegnigur sum dómari.
Stk. 2. Formaðurin og nevndarlimir hava skyldu til at boða nevndini frá um umstøður, ið kunnu hava ógegni við sær, sbrt. stk. 1.
Stk. 3. Ivamál um gegni eiga so vítt gjørligt at verða tikin upp, áðrenn málið verður tikið til nevndarviðgerðar.
Stk. 4. Dissiplinernevndin avger, um ein limur kann vera við í viðgerðini av einum máli.
§ 4. Formaðurin leggur arbeiðið hjá Dissiplinernevndini til rættis.
Stk. 2. Formaðurin ásetir tíð og stað fyri fundin, og hevur ábyrgd av fundarskrá og at kalla inn til fundar. Er ein fundur almennur sambært § 9, stk. 3, skal hetta verða kunngjørt í minsta lagi 3 dagar frammanundan við tilskilan um tíð og stað fyri fundin.
Stk. 3. Í sambandi við fundir í nevndini verður fundarbók skrivað, har tíð og stað fyri fundin verður tilskilað, um fundurin hevur verið almennur, hvørjir limir hava luttikið og nøvnini á teimum, sum hava verið til staðar sum partar, umboðandi partarnar ella sum hjálparfólk. Formaðurin avger annars í hvørjum einstøkum máli, hvat kemur í fundarbókina.
Stk. 4. Formaðurin leiðir fundirnar í nevndini.
Stk. 5. Formaðurin skal syrgja fyri, at málini verða viðgjørd skjótt.
Stk. 6. Formaðurin tekur avgerð, hvussu málini verða býtt millum formannin og næstformannin. Næstformaðurin røkir í teimum málum, sum formaðurin hevur givið honum, tær heimildir, ið við hesi kunngerð eru givnar formanninum.
Kapittul 2
Hvussu mál verða fyrireikað
§ 5. Klaga skal vera skrivlig og sendast til Dissiplinernevndin, c/o Skráseting Føroya, Postboks 264, 110 Tórshavn.
Stk. 2. Klagur skulu innihalda eina frágreiðing um tær umstøður, ið klagarin ynskir Dissiplinernevndina at viðgera. Klaga skal vera latin nevndini í seinasta lagi 5 ár eftir, at tað vansketni, ið klagan viðvíkur, er endað.
Stk. 3. Við klaguni skal fylgja eitt gjald áljóðandi 500 kr. Verður ikki goldið beinanvegin, ásetur formaðurin eina gjaldsfreist, og verður klagan ikki viðgjørd, um gjaldið ikki er goldið innan hesa freist.
§ 6. Løgtingslóg nr. 133 frá 10. juni 1993 um innlit í fyrisitingina, við seinni broytingum og Løgtingslóg nr. 132 frá 10. juni 1993 um fyrisitingarlóg eru galdandi fyri virksemi nevndarinnar.
§ 7. Um ein klaga ikki kemur undir virkisøkið hjá nevndini, vísur formaðurin hana frá sær, herundir klagum frá persónum, sum ikki hava rættarligan áhuga í teimum viðurskiftum, ið klagan viðvíkur, og klagum, ið frammanundan eyðsýnt verða mettar ógrundaðar.
§ 8. Dissiplinernevndin skal senda avrit av klaguni við møguligum fylgiskjølum til klagaða við áheitan um at koma við viðmerkingum, innan eina nærri ásetta freist. Samstundis skal klagaði hava fráboðan um, at viðkomandi hevur rætt til at møta í nevndini við einum umboðsmanni, t.d. einum advokati, og at klagan kann verða viðgjørd á fyriliggjandi grundarlagi, um klagaði ikki kemur við fleiri upplýsingum um málið.
Stk. 2. Úttalilsi frá klagaða við møguligum fylgiskjølum verða løgd fyri klagaran. Metir formaðurin tað verða neyðugt, skulu partarnir við einari ávísari freist hava møguleika at koma við fleiri viðmerkingum til málið.
Stk. 3. Formaðurin syrgir fyri, at neyðugu upplýsingarnar fyri at viðgera klaguna eru fingnar til vega, og at tær neyðugu kanningarnar eru gjørdar. Til eina og hvørja tíð undir viðgerðini av málinum kunnu fleiri upplýsingar verða innheintaðar.
Stk. 4. Formaðurin syrgir fyri, at partarnir fáa innlit í upplýsingar frá mótpartinum, sum verða mettar at hava týdning fyri avgerðina í málinum, uttan so, at avgerandi atlit til almenn ella privat áhugamál tala ímóti hesum, herundir vinnu- og fíggjarviðurskifti hjá viðskiftafólki.
Kapittul 3
Avgerðin í málinum
§ 9. Partarnir í málinum hava rætt til at møta í Dissiplinernevndini og at leggja fram frágreiðing fyri nevndina.
Stk. 2. Formaðurin kann loyva, at aðrir persónar verða kallaðir inn fyri at leggja fram frágreiðing fyri nevndina.
Stk. 3. Fundir í nevndini eru ikki almennir. Formaðurin kann eftir ynski frá pørtunum loyva, at almenningurin fær høvi til at koma á fund í nevndini. Hetta er tó ikki galdandi í teimum førum, har tað fyri onkran kann hava óneyðugar vansar við sær, m.a. tí, at handils- ella rakstararloyndarmál harvið verða avdúkað.
§ 10. Um hvørgin partur ynskir at møta í nevndini, og formaðurin og nevndarlimirnir eru samdir um framferðarháttin, kann nevndin viðgera málið skrivliga.
§ 11. Avgerðir hjá nevndini verða tiknar við vanligum atkvøðumeiriluta.
Stk. 2. Avgerðir skulu grundgevast, og er avgerðin ikki einmælt samtykt, skal avgerðin lýsa sjónarmið minnilutans.
Stk. 3. Avgerðir hjá Dissiplinernevndini kunnu ikki leggjast fyri annan fyrisitingarligan myndugleika.
Kapittul 4
Almannakunngerð og frágreiðing v.m.
§ 12. Formaðurin skal undirskriva avgerðir hjá Dissiplinernevndini, og tær verða skrivaðar í eina skipaða fundarbók.
Stk. 2. Avgerðir hjá nevndini verða sendar pørtunum í málinum, Felagnum fyri løggildar grannskoðarar, Felagnum fyri skrásettar grannskoðarar og til Skráseting Føroya.
Stk. 3. Dissiplinernevndin kann velja at almannakunngera eina avgerð. Ynskir klagaði, at avgerðin verður almannakunngjørd, eigur hetta at verða gingið á møti.
Stk. 4. Fær klagarin heilt ella partvís viðhald, kann Dissiplinernevndin ella formaðurin vegna nevndina taka avgerð um, at inngoldna gjaldið sambært § 5, stk. 3 verður afturgoldið heilt ella lutvíst. Tað sama er galdandi, tá klagur ikki verða tiknar upp til viðgerðar, sbr. § 7, stk. 1.
§ 13. Dissiplinernevndin útgevur eina árliga frágreiðing um sítt virksemi.
§ 14. Henda kunngerð kemur í gildi dagin eftir, at hon er kunngjørd.
Vinnumálaráðið, 13. januar 2009
Johan Dahl (sign.)
landsstýrismaður
/ Arne Poulsen (sign.)
