20. mai 1988Nr. 30
Kunngerð um merking av skipum
Við heimild í § 56 í løgtingslóg nr. 9 frá 5. mars 1970 um skráseting av skipum, hevur landsstýrið fyrisett:
§ 1. Skipaskrásetingin gevur hvørjum skipi uppá 20 brutto tons ella meira, ið verður skrásett sum fiskiskip, havnarkenninummar.
§ 2. Havnarkenninummarið skal málast sjónliga og við týðuligum bókstavum og tølum á báðum síðum á bógnum, so høgt sum gjørligt. Litirnir skulu skilja seg væl frá litinum á skipinum. Hæddin á teim einstøku stavunum og tølunum skal vera minst 45 cm og strikan skal vera minst 6 cm tjúkk.
Stk. 2. Omaná stýrihúsinum skal havnarkenninummarið verða málað á sama hátt sum á bógnum og umframt skal radiofrámerki (kenningarstavir) eisini verða sett í somu stødd og tjúgd á stýrhúsatakið.
Stk. 3. Merkingin má ongantíð vera fjald, men altíð vera sjónlig.
§ 3. Vaktar- og bjargingatænastan hevur eftirlit við, at reglurnar verða hildnar.
§ 4. Brot á reglurnar í hesi kunngerð verða revsað við sekt.
§ 5. Henda kunngerð kemur í gildi 1. oktober 1988.