Skrivar tú trygging verður eisini leitað eftir øðrum endingum av orðinum sum t.d. tryggingar og tryggingarvirksemi.
Skrivar tú ?trygging verður leitað eftir orðum sum t.d. lívstrygging og lívstryggingar.
Skrivar tú ”trygging” verður einans leitað eftir júst hesum sniðnum av orðinum.
19. mars 2025Nr. 34
Kunngerð um heilsufrøðiligar treytir fyri framleiðslu av matvørum og krøv til høli í sambandi við matvøruframleiðslu
Við heimild í § 3, stk. 1, § 24, §§ 26-28, § 30, § 34, § 43, stk. 2 og 3, §§ 48 og 49, § 52, stk. 4, § 56, stk. 1 og § 58, stk. 4 í løgtingslóg nr. 58 frá 26. mai 2010 um matvørur v.m. verður ásett:
Kapittul 1
Øki, allýsingar og skyldur
Øki
§ 1. Kunngerðin ásetir almennar treytir fyri m.a. at framleiða, viðgera og goyma matvørur í øllum liðum. Er ikki annað ásett í aðrari lóggávu, galda ásetingarnar í hesi kunngerð.
Allýsingar
§ 2. Í hesi kunngerð merkir:
1) Dálking: Lívfrøðilig, fysisk ella evnafrøðilig dálking ella vandar, sum kunnu elva til sjúku, um matvøran verður brúkt á vanligan hátt.
2) Drekkivatn: Vatn, sum er allýst í kunngerð um veiting av drekkivatni.
3) Framleiðsla í fyrsta liði: At framleiða matvørur, at ala djór ella dyrka fyrstaliðsvøru, undir hesum eisini at heysta, mjólka, veiða, taka, fiska o.tíl.
4) HACCP: Stytting fyri Hazard Analysis and Critical Control Points, t.e. vandagreining og kritiskir stýringarliðir.
5) Heilsufrøði: Reinføri í hølum, á útgerð og hjá starvsfólki, at útgerð og høli eru hóskandi og løtt at halda rein, at umstøður og mannagongdir eru fyri at halda skilnað millum ymiskar rávørubólkar og virkingarstig, og at halda og røkka nøktandi temperaturi til tess at minka og tálma vandanum fyri smáverum t.e. mikroorganismum í mati í øllum liðum í framleiðsluni.
6) Innaneftirlit: Virkisins egna eftirlit við, at matvørurnar eru tryggar at eta.
7) Kritiskur stýringarliður (KSL): Eitt stað, ein mannagongd, liðir í eini tilgongd ella ein liður í framleiðsluketuni, sum kann stýrast, soleiðis at ein vandi verður burturbeindur ella avmarkaður til eitt støði, ið kann góðtakast.
8) Matvøra: Øll evni og allir úrdráttir, undir hesum vatn, sum eru ætlað til ella eftir øllum líkindum kunnu ætlast til matna, bæði óvirkað ella heilt ella lutvíst virkað, og eitt og hvørt evni, sum tilvitað verður latið út í matvøru, tá hon verður virkað, viðgjørd ella gjørd til.
9) Matvøruframleiðari: Likamligur ella løgfrøðiligur persónur, sum á tí matvøruvirki, ið er undir leiðslu hansara, hevur ábyrgdina av, at ásetingarnar í løgtingslógini og í kunngerðum, givnar við heimild í henni, verða hildnar.
10) Matvøruvirki: Eitt og hvørt virki, alment ella privat, sum við ella uttan vinning fyri eyga fæst við eitt og hvørt virksemi, sum er partur av einum og hvørjum liði í at framleiða, virka ella veita matvøru, t.d. smásøla, matvøruhandil, heilsøla ella fiskavirki.
11) Vandi: Møguligur heilsuskaðiligur virknaður, sum kann hava samband við lívfrøðilig, fysisk ella evnafrøðilig evni í matvørum ella fóðri, ella sum hevur samband við standin, sum matvøran ella fóðrið eru í.
12) Váði: Sannlíkindini fyri, at ein vandi hevur við sær neilig árin á heilsuna sammett við, hvussu álvarsligt árinið er.
13) Veiting t.e. distributión: Ein og hvør søla, latan, flutningur og útflýggjan av matvørum ella fóðri, uttan mun til um hetta fer fram við vinningi fyri eyga ella ikki.
14) Viðgerð: Ein og hvør gerð, sum broytir upprunaligu vøruna ella úrdráttin, t.d. við at hita, roykja, salta, turka o.tíl.
15) Starvsskipan: Yvirskipað lýsing av, hvussu ein arbeiðsgongd verður skipað á einum matvøruvirki.
Yvirskipað skylda
§ 3. Matvøruframleiðari, sum fæst við eitt og hvørt lið í at framleiða, virka ella marknaðarføra matvørur aftan á framleiðslu í fyrsta liði, skal halda krøvini í hesi kunngerð, sbr. tó stk. 2.
Stk. 2. Matvøruframleiðari, sum fæst við framleiðslu í fyrsta liði og virksemi, knýtt at hesum, skal halda almennu krøvini í skjali 10.
Kapittul 2
Løggilding, skráseting og innaneftirlit
Løggilding og skráseting av virkjum
§ 4. Matvøruframleiðsla skal fara fram á virkjum, sum Heilsufrøðiliga starvsstovan hevur løggildað ella skrásett til endamálið eftir kunngerð um løggilding og skráseting av matvøruvirkjum.
§ 5. Matvøruframleiðari skal tryggja, at Heilsufrøðiliga starvsstovan á kravdan hátt fær, og støðugt hevur, dagførdar upplýsingar um allar virkiseindir, sum framleiða, viðgera og marknaðarføra matvørur.
Framleiðslustýring og vandagreining
§ 6. Matvøruframleiðari skal seta í verk eina innaneftirlitsskipan, ið er grundað á vandagreining og kritiskar stýringarliðir, t.e. HACCP-meginreglur, sum ásett í skjali 1.
Stk. 2. Starvsfólk, sum hevur ábyrgd av at menna og dagføra innaneftirlitsskipanina, nevnda í stk. 1, skal hava fingið hóskandi upplæring í at brúka HACCP-meginreglurnar.
Stk. 3. Matvøruvinnugreinar kunnu, sum ískoyti til HACCP-meginreglurnar, gera leiðreglur eftir skjali 11.
Kapittul 3
Almennar heilsufrøðiligar treytir fyri høli, heruppií akfør, útgerð o.tíl.
Innrætting
§ 7. Høli og innbúgv, har matvøra er, undir hesum kølirúm, goymslurúm og gongir, skulu lúka almennu treytirnar fyri heilsufrøði, sum ásett í skjali 2, kapitli I, sbr. tó § 8.
Stk. 2. Høli, har matvøra verður tilgjørd, viðgjørd ella virkað, skal lúka serligu treytirnar, sum ásett í skjali 2, kapitli II, sbr. tó § 8.
Matarvognar o.tíl.
§ 8. Matarvognar, tjøld, sølubúðir, sjálvtøkur o.tíl. skulu vera soleiðis háttað, at tað ikki er váði fyri dálking, serliga frá djórum og skaðakyktum, sbr. skjal 3.
Vøruflutningur
§ 9. Akfør, bingjur, kassar o.o. íløt, sum verða brúkt til at flyta matvørur, skulu vera egnað til matvørur og skulu haldast rein og í góðum standi, soleiðis at matvørurnar eru vardar fyri dálking. Um neyðugt skulu akfør, bingjur, kassar o.o. íløt verða lokað, sbr. skjal 4.
Útgerð o.a.
§ 10. Øll amboð, útgerð og tilhoyr, undir hesum íløt, sum koma í samband við matvørur, skulu halda krøvini í skjali 5.
Stk. 2. Reingerð og sóttreinsing av teimum í stk. 1 nevndu amboð, útgerð o.a. skal fara fram so mikið ofta, at tað slepst undan øllum dálkingarváða.
Stk. 3. Reingerðarevni og sóttreinsingarevni skulu goymast á egnaðum stað og skulu ikki goymast á staði, har matvørur verða hagreiddar, virkaðar, pakkaðar ella goymdar.
Matvøruburturkast og hjáúrdráttir
§ 11. Matvøruburturkast, hjáúrdráttir, sum ikki eru egnaðir til matna, og annað burturkast skal skjótast gjørligt flytast úr hølum, har matvørur eru, sbr. skjal 6.
Vatn, sum verður brúkt til matvøruframleiðslu
§ 12. Bara drekkivatn skal brúkast til matvøruframleiðslu, sbr. § 2, nr. 2.
Stk. 2. Ísur, sum kemur í samband við matvørur, skal verða framleiddur úr drekkivatni. Ísur skal framleiðast, handfarast og goymast undir umstøðum, sum verja hann fyri dálking.
Stk. 3. Dampur, sum kemur beinleiðis í samband við matvørur, skal ikki innihalda evni, sum kunnu vera heilsuskaðilig ella sum kunnu dálka tær.
Stk. 4. Tá matvørur, sum verða goymdar í lufttætt lokaðum íløtum, verða hitaviðgjørdar, skal ansast eftir, at vatnið, sum verður brúkt til at køla íløtini eftir hitaviðgerðina, ikki dálkar tær.
Pakkitilfar og pakking
§ 13. Evni, sum eru partur av pakkitilfari, skulu ikki elva til dálking. Pakkitilfar skal vera egnað og góðkent sum pakkitilfar at nýta í samband við matvørur.
Stk. 2. Pakkitilfar skal goymast soleiðis, at váði ikki er fyri, at tað verður dálkað.
Stk. 3. Tá ið pakkað verður, skal tað gerast soleiðis, at úrdráttirnir ikki verða dálkaðir.
Stk. 4. Pakkitilfar, sum verður endurnýtt til matvørur, skal vera lætt at vaska og, um neyðugt, sóttreinsað.
Andelvi t.e. allergen
§ 14. Útgerð, flutningsfør ella bingjur, sum verða brúkt at viðgera, handfara, flyta ella goyma evni ella úrdráttir, sum kunnu elva til ovurviðkvæmi ella ótol, mugu ikki brúkast at viðgera, handfara, flyta ella goyma matvørur, sum ikki innihalda hesi evni ella úrdráttir.
Stk. 2. Víkjast kann frá ásetingini í stk. 1, um útgerðin, flutningsfarið ella bingjan er vaskað, og tryggjað er, at ongar restir eru av hesum evnum ella úrdráttum.
Kapittul 4
Upplæring og persónligt reinføri o.a.
Upplæring
§ 15. Matvøruframleiðari skal tryggja, at fólk, sum handfer matvørur, verður leiðbeint og upplært í matvørutrygd í samsvari við arbeiðið, sum verður útint.
Persónligt reinføri
§ 16. Øll, sum arbeiða á støðum, har matvørur verða handfarnar, skulu hava gott persónligt reinføri og bera ein hóskandi, reinan og, um neyðugt, verjandi klædnabúna.
Stk. 2. Eingin, sum hevur ella ber sjúku, sum kann berast gjøgnum matvørur, ella sum t.d. hevur sár við ígerð, vanlig sár ella leyst lív, má handfara matvørur ella hava atgongd at einum stað, har matvørur verða handfarnar, um nakar váði er fyri beinleiðis ella óbeinleiðis dálking. Starvsfólk við sjúkueyðkennum, sum kann koma í samband við matvørur, skal beinanvegin boða virkisleiðsluni frá sjúku ella sjúkueyðkennum og, tá tað er gjørligt, um orsøkina.
Stk. 3. Matvøruframleiðari skal tryggja, at starvsfólk eru gjølliga kunnað um týdningin av persónligum reinføri, og at tey hava fingið nøktandi upplæring í hesum.
Skiftingarrúm, vesi og vøsk
§ 17. Starvsfólk skulu, um neyðugt, hava hóskandi skiftingarrúm.
Stk. 2. Nóg mikið av vesum og vøskum skulu vera tøk hjá starvsfólkum. Vesini skulu vera bundin í eina munadygga frárenningarskipan. Tað má ikki vera beinleiðis atgongd frá vesunum til høli, har matvørur verða handfarnar.
Kapittul 5
Ásetingar um matvørur
Móttøka av rávørum
§ 18. Matvøruframleiðari skal ikki taka ímóti matvørum, rávørum, útílatingarevnum ella øðrum tilfari, sum kann vera dálkað, um lidna matvøran gerst óegnað til matna.
Verja fyri dálking
§ 19. Rávørur og alt tilfar, sum verður goymt á einum matvøruvirki, skal goymast undir hóskandi umstøðum, sum forða fyri skaðiligum niðurbroti og verja fyri dálking.
Stk. 2. Matvørur skulu í øllum liðum verjast fyri dálking, sum kann gera tær heilsuskaðiligar ella óegnaðar til matna.
Stk. 3. Hóskandi tiltøk skulu setast í verk til at forða skaðadjórum og húsdjórum at sleppa inn, har matvørur verða hagreiddar, viðgjørdar ella goymdar.
Temperaturkrøv
§ 20. Rávørur, tilfar, hálvvirkaðar vørur og liðugtvirkaðar vørur, har sjúkuelvandi smálívverur kunnu nørast, ella har eiturevni kann íkoma, mugu ikki goymast í temperaturi, sum kann elva til heilsuvanda. Køliketan skal ikki brótast, sbr. skjal 7.
Stk. 2. Hóast ásetingina í stk. 1 er loyvt at gera til, flyta, sýna fram og borðreiða matvørur í styttri tíðarskeið uttan temperaturstýring, um hetta ikki hevur við sær heilsuváða.
Stk. 3. Matvøruvirki, sum framleiða, hagreiða og pakka viðgjørdar matvørur, skulu hava hóskandi høli, sum eru nóg stór til at goyma rávørur og viðgjørt tilfar hvørt sær og, um neyðugt, nóg mikið av atskildum kølirúmum.
§ 21. Um matvørur skulu goymast kalt, ella um tær skulu borðreiðast kaldar, skulu tær skjótast gjørligt eftir møguliga hitaviðgerð ella, um tær ikki verða hitaviðgjørdar, eftir endaliga tilgerð, verða niðurkøldar til ein temperatur, sum ikki kann elva til heilsuvanda.
Stk. 2. Matvørur skulu tiðna soleiðis, at minst møguligur váði er fyri gróðrarlíkindum av eiturevnum ella sjúkuelvandi smálívverum.
Stk. 3. Matvørur skulu tiðnast fyri seg í temperaturi, sum ikki kann elva til heilsuvanda. Væta, sum rennur frá matvøruni, og sum kann elva til heilsuváða, skal leiðast burtur. Matvøra, sum er tiðnað, skal viðgerast soleiðis, at minst møguligur váði er fyri gróðrarlíkindum av eiturevnum ella sjúkuelvandi smálívverum.
§ 22. Matvørur, nevndar í skjali 7, skulu goymast og flytast við tí temperaturi, sum er nevndur fyri hvørja matvøru sær, sbr. tó stk. 2.
Stk. 2. Matvøruvirki kann flyta matvørur beinleiðis til brúkaran uttan at halda ásetta temperaturin í skjali 7, um matvøruvirkið tryggjar, at flutningurin ikki hevur við sær vanda fyri matvørutrygdina.
Vandamikil evni
§ 23. Vandamikil ella óetandi evni, íroknað fóður, skulu merkjast nøktandi og goymast fyri seg í lokaðum íløtum.
Matvørudonasjón
§ 24. Matvøruframleiðari kann lata matvørur til matvørudonasjón, eftir ásetingunum í skjali 8.
Hitaviðgerð
§ 25. Matvøra, sum verður hitaviðgjørd ella hitað uppaftur, skal hitast við slíkum hita og so leingi, at matvørurnar eru tryggar, sbr. skjal 9.
At halda matin heitan
§ 26. Hitaviðgjørd borðbúgvin matvøra kann haldast heit, um hon verður hitað soleiðis, at matvørutrygdin ikki kemur í vanda.
Stk. 2. Matvøruvirkið skal skjalprógva, at mátin, sum verður brúktur til at halda matvøruna heita, lýkur kravið í stk. 1.
Stk. 3. Ikki er neyðugt hjá matvøruvirkinum at skjalprógva kravið í stk. 2, um matvøran verður hildin heit soleiðis, at hitin allastaðni í matinum í minsta lagi er 65 ℃.
Sporføri
§ 27. Sporførið skal í øllum liðum tryggjast fyri matvørur og livandi djór, sum verða brúkt í matvøruframleiðsluni, og harumframt fyri eitt og hvørt evni, sum er ætlað til, ella sum kann ætlast til, at verða latið út í eina matvøru. Sporførið skal í minsta lagi tryggjast eitt lið aftur og eitt lið fram.
Afturkallað matvøra
§ 28. Hevur matvøruframleiðari staðfest ella hevur orsøk til at halda, at ein matvøra, sum virkið hevur innflutt, framleitt, virkað, viðgjørt ella veitt, ikki lýkur krøvini um matvørutrygd, skal framleiðarin beinanvegin seta í verk tiltøk fyri at afturkalla matvøruna og boða Heilsufrøðiligu starvsstovuni frá hesum.
Kapittul 5
Eftirlit o.a.
§ 29. Heilsufrøðiliga starvsstovan hevur eftirlit við og tekur avgerðir fyri at fremja ásetingarnar í hesi kunngerð, undir hesum eisini heimild at áseta boð og forboð.
Stk. 2. Heilsufrøðiliga starvsstovan kann seta fyribils bann fyri framhaldandi rakstri ella taka løggilding ella skráseting frá matvøruvirkjum, um boð ella forboð, givin sambært stk. 1, ikki verða fylgd.
Kapittul 7
Gjøld fyri eyka eftirlit
§ 30. Gjald verður tikið fyri eyka eftirlit, sum er neyðugt til tess at tryggja, at boð ella forboð sambært § 29 verða fylgd ella at rættandi atgerð er framd aftaná eina sekt sambært § 32. Heilsufrøðiliga starvsstovan ger av, um eyka eftirlit verður framt á staðnum ella sum talgilt eftirlit.
Stk. 2. Hesi gjøld verða tikin fyri eyka eftirlit:
1) 2.000 kr. fyri eyka eftirlit á staðnum í arbeiðstíð, t.e. gerandisdagar millum kl. 8.00 og 16.00.
2) 3.000 kr. fyri eyka eftirlit á staðnum eftir arbeiðstíð umframt leygardag, sunnudag, halgidagar og fastar frídagar.
3) 1.000 kr. fyri talgilt eftirlit í arbeiðstíð, t.e. gerandisdagar millum kl. 8:00 og kl.16:00.
4) 2.000 kr. fyri talgilt eftirlit eftir arbeiðstíð umframt leygardag, sunnudag, halgidagar og fastar frídagar.
Stk. 3. Útgangsstøðið er, at eyka eftirlit tekur ein tíma. Um eyka eftirlit, vegna serligar umstøður, varir meiri enn ein tíma, er gjaldið 1.000 kr. um tíman eftir hetta.
Kapittul 7
Kæra, revsing og gildiskoma
Kæra
§ 31. Avgerðir, tiknar við heimild í hesi kunngerð, kunnu kærast til Føroya Kærustovn. Kærufreistin er 4 vikur frá tí degi, at avgerðin er fráboðað.
Revsing
§ 32. Um ikki hægri revsing er uppiborin eftir aðrari lóggávu, verður við sekt revsaður tann, sum brýtur ásetingarnar í § 3, stk. 1 og 2, §§ 4 og 5, § 6, stk. 1 og 2, §§ 7-13, § 14, stk. 1, §§ 15-23, § 25, § 26, stk. 1 og 2 og §§ 27 og 28.
Stk. 2. Feløg og aðrir løgfrøðiligir persónar koma undir revsiábyrgd eftir reglunum í 5. kapitli í revsilógini.
Stk. 3. Heilsufrøðiliga starvsstovan kann boða frá, at málið kann verða gjørt av uttan rættarsókn, sambært § 59, stk. 1 í løgtingslóg um matvørur v.m., um tann, sum hevur framt brotið, játtar seg sekan í brotinum og váttar innan eina nærri ásetta freist, ið eftir umsókn kann verða longd, at rinda eina í fráboðanini ásetta sekt.
Gildiskoma
§ 33. Henda kunngerð kemur í gildi 1. apríl 2025, samstundis fer úr gildi kunngerð nr. 114 frá 15. august 2001 um innaneftirlit.
Uttanríkis- og vinnumálaráðið, 19. mars 2025
Sirið Stenberg (sign.)
landsstýriskvinna
/ Herálvur Joensen (sign.)
Skjal 1
Framleiðslustýring og vandagreining
Matvøruframleiðari skal seta í verk eina innaneftirlitsskipan, ið er grundað á vandagreining og kritiskar stýringarliðir.
Kritiskur stýringarliður (KSL) er eitt stað, ein mannagongd, liðir í eini tilgongd ella ein liður í framleiðsluketuni, sum kann stýrast, soleiðis at ein vandi verður burturbeindur ella avmarkaður til eitt støði, ið kann góðtakast.
A. Vandagreining og kritiskir stýringarliðir, t.e. HACCP-meginreglurnar, sbr. § 6, stk. 1, skulu í minsta lagi:
1) Eyðmerkja vandar, sum skulu fyribyrgjast, beinast burtur ella minkast til eitt nøktandi støði.
2) Eyðmerkja kritiskar stýringarliðir á tí ella teimum framleiðslustigunum, har tað er týdningarmikið at hava neyvt tamarhald og eftirlit við framleiðsluni fyri at fyribyrgja ella beina burtur ein vanda ella at minka um vandan til eitt støði, ið kann góðtakast.
3) Áseta mørk fyri kritiskar stýringarliðir, sum skilja millum viðurskifti, ið kunnu góðtakast, og viðurskifti, ið ikki kunnu góðtakast, og soleiðis at fyribyrgja, burturbeina ella at minka um eyðmerktar vandar.
4) Seta upp og fremja munadyggar mannagongdir, og hava eftirlit við viðbreknum stýringarliðum.
5) Áseta rættandi atgerðir, um tamarhald ikki er á einum viðbreknum stýringarliði.
6) Áseta starvsskipanir, sum regluliga tryggja, at tey tiltøk, sum eru lýst í nr. 1-5, virka munadygt.
7) Stovna skjøl og føra skráir, sum svara til slag og stødd á matvøruframleiðsluni, fyri at skjalprógva, at tiltøkini í nr. 1-6 verða nýtt munadygt.
B. Verður einhvør broyting framd í matvøruni, framleiðsluni ella á einhvørjum øðrum stigi, skal matvøruframleiðarin endurskoða viðkomandi starvsskipanir og gera neyðugar broytingar í hesum
C. Matvøruframleiðarin skal:
1) útvega Heilsufrøðiligu starvsstovuni kravd prógv fyri, at tey lúka krøvini í § 6, stk. 1. Prógvini skulu útvegast á tann hátt og í tí líki, sum Heilsufrøðiliga starvsstovan biður um, við fyriliti fyri slagi og stødd á matvøruvirkinum,
2) tryggja, at øll skjøl, sum lýsa tær starvsskipanir, sum eru mentar í samsvari við § 6, eru dagførd, og
3) goyma øll skjøl og allar skráir í eitt hóskandi tíðarskeið.
Skjal 2
Innrætting
Kapittul I í hesum skjali er galdandi fyri øll matvøruhøli, heruppií m.a. kølirúm, goymslurúm og gongir.
Kapittul II í hesum skjali er galdandi fyri høli, har matvøra verður tilgjørd, viðgjørd ella virkað, tó ikki høli fevnd av § 8 og skjali 3, men íroknað rúm í akførum.
Kapittul I
Almennar treytir fyri høli
A. Høli, íroknað innbúgv, t.d. vøsk, har matvøra er, skal haldast reint og í góðum standi.
B. Grundætlan, skap, staðseting, konstruktión og stødd á hølunum skulu vera soleiðis, at:
1) tey kunnu røkjast, gerast rein og sóttreinsast, at sleppast kann undan dálking, sum verður borin við luft, ella at hon kann avmarkast til tað minst møguliga, og at tað er nóg rúmsátt til, at alt arbeiði kann fara fram undir hóskandi heilsufrøðiligum viðurskiftum,
2) vart verður fyri, at skittur rúgvar seg upp, at samband ikki er við eitrandi tilfar, at sleppast kann undan fráláti av bitlum til matvørurnar ella at slevja ella óynskt hýggj legst á yvirflatar,
3) tað er møguleiki fyri góðum heilsufrøðiligum arbeiðslagi, íroknað verju fyri dálking og skaðadjórum, og
4) har tørvur er á tí, eru nóg góðar temperaturstýrdar umstøður til at handfara og goyma matvørur við hóskandi temperaturi, og sum eru innrættaðar til at tryggja, at eftirlit kann havast við temperaturinum, og sum, tá tað er neyðugt, kann verða skrásettur.
C. Luftskipanir og ljós:
1) Høli, íroknað vesi, skulu hava hóskandi luftskifti, annaðhvørt natúrligt ella mekaniskt.
2) Hølini skulu vera soleiðis skipað og innrættað, at sleppast skal undan mekaniskum luftstreymi frá dálkaðum til rein øki.
3) Luftskiftisskipanir skulu vera soleiðis gjørdar, at filtur og aðrir partar, sum skulu vaskast ella skiftast, eru løtt at koma til.
4) Høli skulu hava hóskandi arbeiðsljós, annaðhvørt natúrligt ella elektriskt.
D. Handvøsk:
1) Tað skulu vera nóg mikið av handvøskum til at vaska sær um hendurnar. Handvøskini skulu hava rennandi heitt og kalt vatn.
2) Útgerð og tilfar skal vera til at vaska og turka sær um hendurnar á ein heilsufrøðiligan hátt.
3) Har, sum viðurskiftini gera tað neyðugt, skal stað og útgerð til at skola matvørur og til at vaska sær um hendurnar vera hvør sær.
E. Frárensl:
1) Frárensl frá matvøruframleiðslu skulu gerast soleiðis, at sleppast kann undan vanda fyri dálking.
2) Heil ella lutvíst opin frárenningarrør skulu vera soleiðis háttað, at spillvatn ikki kann renna frá dálkaðum og inn á rein øki.
F. Arbeiðsamboð, útgerð og goymslurúm:
1) Hóskandi høli skulu vera, har tað er neyðugt til:
a) Reingerð og sóttreinsan.
b) Goymslu av reingerðarevnum og sóttreinsingarevnum.
c) Arbeiðsamboð og útgerð.
d) Goymslu av pakkitilfari, heruppí íløt o.tíl.
2) Hølini skulu verða gjørd úr tilfari, sum er tæringardygt og lætt at vaska, og tað skal vera nokk av heitum og køldum vatni tøkt.
G. At skola matvørur:
1) Hóskandi møguleikar skulu vera, har tað er neyðugt, til at skola matvørur.
2) Nóg nógv heitt og kalt vatn skal vera tøkt.
3) Høli, vøsk og útgerð til at skola matvørur skulu hava nóg stóra mongd av drekkivatni, sbr. § 2, nr. 2, og tey skulu haldast rein og, um neyðugt, sóttreinsast.
Kapittul II
Serligar treytir fyri høli, har matvørur verða framleiddar, hagreiddar ella viðgjørdar
H. Til tess at halda eitt gott heilsufrøðiligt arbeiðslag sambært § 7 skulu:
1) Gólvini haldast í góðum standi og vera løtt at gera rein og, um neyðugt, at sóttreinsa. Tilfarið til gólvið skal vera vatntætt, ikki ísúgvandi, lætt at vaska og skal ikki vera eitrandi, uttan so at matvøruframleiðarin mótvegis Heilsufrøðiligu starvsstovuni kann prógva, at annað tilfar er hóskiligt. Gólvini skulu, um neyðugt, hava hóskandi frárenning.
2) Veggir haldast í góðum standi og vera lættir at vaska og, um neyðugt, sóttreinsa. Hetta krevur, at tilfarið er vatntætt, ikki ísúgvandi, og lætt at vaska, at tilfarið ikki er eitrandi, og at veggurin er slættur upp til eina hædd, sum hóskar til virksemið, uttan so at matvøruframleiðarin kann prógva, at annað tilfar er nýtiligt.
3) Loft ella, har tað ikki eru loft, innara síða á tekjuni og upphongt innbúgv verða bygd og tilevnað soleiðis, at skittur ikki rúgvar seg upp, og at forðað verður fyri t.d. kondensi, hýggi og fráláti av bitlum, ið kunnu dálka matin.
4) Vindeygu og onnur op verða bygd soleiðis, at skittur ikki rúgvar seg upp. Tey, sum kunnu latast upp út móti uttanumøki, skulu, um neyðugt, hava skordýranet, sum lættliga kann takast frá og gerast reint. Hevur tað dálking við sær, um vindeyguni verða latin upp, skulu vindeyguni vera aftur og læst undir framleiðsluni.
5) Hurðarnar vera lættar at gera reinar og, um neyðugt, at sóttreinsa. Hetta krevur, at slættir, ikki ísúgvandi yvirflatar verða nýttir, uttan so at matvøruframleiðarin mótvegis Heilsufrøðiligu starvsstovuni kann prógva, at annað tilfar er hóskandi.
6) Yvirflatar, har ið matvørur verða handfarnar, og serstakliga yvirflatar, sum koma í samband við matvørur, haldast í góðum standi og vera lættir at reingera og, um neyðugt, sóttreinsa. Uttan so at matvøruframleiðarin mótvegis Heilsufrøðiligu starvsstovuni kann prógva, at annað tilfar er nýtiligt, má tilfarið vera slætt, vaskandi og ikki lættliga kunna terast ella vera úr eitrandi tilfari.
Skjal 3
Matarvognar o.tíl.
Har tað er neyðugt, er hetta galdandi fyri matarvognar, tjøld, sølubúðir, sjálvtøkur o.tíl.:
1) Hóskandi pláss og hentleikar skulu vera til nøktandi persónligt reinføri, íroknað til á heilsufrøðiligan hátt at vaska og turka sær um hendurnar. Starvsfólk skulu hava atgongd til vesi og til klædnaskifti, um hetta ikki er tøkt í sjálvum sølustaðnum.
2) Yvirflatar, sum koma í samband við matvørur, skulu vera í góðum standi og lættir at vaska og, um neyðugt, sóttreinsa. Hetta krevur, at tilfarið er slætt, lætt at vaska, ikki terist lættliga og ikki er eitrandi, uttan so at matvøruframleiðarin mótvegis Heilsufrøðiligu starvsstovuni kann veita prógv um, at annað tilfar er hóskandi.
3) Nøktandi umstøður skulu vera til at vaska og, um neyðugt, at sóttreinsa arbeiðsamboð og útgerð.
4) Um matvørurnar verða skolaðar ella reinsaðar sum liður í matvøruframleiðsluni, skal hetta gerast á ein heilsufrøðiliga tryggan hátt.
5) Nóg mikið av heitum og køldum drekkivatni skal vera tøkt.
6) Nøktandi umstøður ella hentleikar skulu vera til á heilsufrøðiligan hátt at goyma og burturbeina vandamikil evni og evni, sum ikki eru nýtilig til matna, og rusk, antin tað er fast ella flótandi.
7) Nøktandi umstøður og møguleiki skulu vera fyri at fylgja við og at halda hóskandi temperatur fyri matvørurnar.
8) Matvørur skulu goymast soleiðis, at eingin ella minst møguligur váði er fyri dálking.
Skjal 4
Flutningur
Akfør, bingjur, kassar o.o. íløt, sum verða brúkt at flyta matvørur, skulu verða egnað til matvørur og skulu haldast rein og í góðum standi, soleiðis at matvørurnar eru vardar fyri dálking:
1) Íløt í akførum ella bingjum mugu ikki nýtast til at flyta annað enn matvørur í, um tað kann hava við sær, at matvørurnar verða dálkaðar.
2) Um akfør ella bingjur verða nýtt til at flyta annað enn matvørur í ella til at flyta ymsar matvørur í samstundis, og um matvørurnar kunnu verða dálkaðar av hesum, skulu vørurnar á munadyggan hátt haldast hvør frá øðrum.
3) Íløt, bingjur og tangar, sum verða nýtt til leysaflutning av flótandi, kornkendum ella pulvurkendum matvørum, skulu burturav nýtast til at flyta matvørur í. Bingjurnar skulu merkjast týðiliga við tilskilan av hesum, sum ikki kann strikast, t.d. “Bert til matvørur”.
4) Akfør ella bingjur, sum hava verið nýtt til at flyta annað enn matvørur ella til at flyta ymsar matvørur, skulu vaskast væl ímillum hvønn flutning fyri at sleppa undan dálkingarváða.
5) Matvørur í akførum og bingjum skulu setast og verjast á slíkan hátt, at dálkingarváðin verður so lítil sum møguligt.
6) Tá slagið av matvørum ger tað viðkomandi, skulu akfør og bingjur til at flyta matvørur í kunna tryggja hóskandi temperatur og at fylgjast kann við temperaturinum.
Skjal 5
Útgerð
Øll amboð, útgerð og tilhoyr, sum koma í samband við matvørur, skulu haldast rein og, um neyðugt, sóttreinsast, og skulu:
1) Hava eitt slíkt snið, vera úr slíkum tilfari og haldast í slíkum standi, at dálkingarváðin verður so lítil sum møguligt.
2) Hava eitt slíkt snið, verða framleidd úr slíkum tilfari og haldast í slíkum standi, at tey kunnu haldast rein og, um neyðugt, sóttreinsast, tó undantikið einnýtisíløt og einnýtisinnballing, og vera staðsett soleiðis, at tey og økið rundan um útgerðina kann vaskast á hóskandi hátt.
3) Um neyðugt, skal útgerðin vera soleiðis háttað, at tað ber til at fylgja við, at framleiðslan lýkur treytir í kunngerðini.
4) Um tað er neyðugt at nýta evnafrøðilig evni til at forða fyri, at útgerð og íløt verða tærd, skulu hesi nýtast soleiðis, at matvørurnar ikki verða dálkaðar ella neiliga ávirkaðar.
Skjal 6
Burturkast og hjáúrdráttir
Burturkast, matvøruburturkast, hjáúrdráttir, sum ikki eru egnað til matna, og annað burturkast skal skjótast gjørligt flytast úr hølum, har matvørur eru, og eru hesar treytir galdandi:
1) Burturkast skal leggjast í ruskíløt, sum kunnu lokast, uttan so at matvøruframleiðarin mótvegis Heilsufrøðiligu starvsstovuni kann prógva, at onnur sløg av íløtum ella skipanum til burturkast eru hóskilig. Hesi íløt skulu hava eitt hóskandi snið, haldast í góðum standi og vera løtt at reingera og, um neyðugt, sóttreinsa.
2) Nøktandi møguleikar skulu vera at goyma og beina fyri matvøruburturkasti, hjáúrdráttum, sum ikki eru etandi, og øðrum burturkasti. Hølini ella staðið til burturkast, skulu vera innrættað og nýtast á slíkan hátt, at tey kunnu haldast rein og, har tað er neyðugt, frí fyri djór og skaðakykt.
3) Burturkast skal beinast fyri á heilsufrøðiligan og umhvørvisgóðan hátt sambært galdandi lóggávu og má hvørki beinleiðis ella óbeinleiðis elva til matvørudálking.
Skjal 7
Temperaturásetingar
Matvørur skulu goymast og flytast við tí temperaturi, sum er nevndur fyri hvørja matvøru sær, og eru hesar treytir galdandi:
1) Kølivøra skal goymast kaldari enn 5 °C, um ikki annað er tilskilað á pakkanum.
2) Frostvørur skulu goymast ÷18 °C ella kaldari, um annað ikki er tilskilað á pakkanum.
3) Matur við kremi og róma ella fromasju skal goymast kaldari enn 5 °C. Í bakaríútsølum kann slík matvøra goymast kaldari enn 10 °C, treytað av, at hon verður seld innan 12 tímar.
4) Verður matur goymdur í hita, skal hitin vera hægri enn 65 °C.
5) Matur, sum hevur verið hildin heitur, skal ikki kølast niður til aðra nýtslu ella sølu, men beinast burtur.
6) Egg skulu goymast kaldari enn 12 °C í søluliðinum.
7) Matur skal undir ongum umstøðum standa uttandura. Heilsufrøðiliga starvsstovan kann í serligum førum geva loyvi til tess.
8) Sjónligur hitamátari skal vera í hita- og kuldagoymslum.
Skjal 8
Matvørudonasjón
A. Matvøruframleiðari kann lata matvørur til matvørudonasjón eftir hesum treytum:
1) Tað við eftirliti kann staðfestast, at matvørur eru egnaðar til matna og ikki eru heilsuskaðiligar.
2) Um eftirlit sambært nr. 1 er nøktandi, kann matvøra donerast í samsvari við B:
a) áðrenn tíðarfestingin gongur út fyri matvørur við tíðarfestingini “seinasti nýtsludagur”,
b) áðrenn ella eftir tíðarfestingin gongur út fyri matvøru, við tíðarfestingini “best fyri”, og
c) nær sum helst fyri matvørur, har tíðarfesting ikki er eitt krav
B. Tá matvøruframleiðarin skal meta um, hvørt ein matvøra er heilsuskaðilig ella ikki, og um matvøran er egnað til matna, skal fyrilit í minsta lagi takast fyri:
1) Dagfestingini fyri “best fyri” og “seinasta nýtsludag”, so trygd verður veitt fyri, at írestandi haldførið er nóg mikið fyri, at matvøran kann donerast, og at tann brúkarin kann nýta matvøruna á ein tryggan hátt.
2) At innballingin á matvøruni er heil og ikki skadd, tá hetta er neyðugt.
3) Treytir fyri goymslu og flutningi, íroknað krøv til temperatur.
4) Um neyðugt tíðarfesting fyri innfrysting, um hendan ikki er tann sama sum framleiðlsutíðarfestingin.
5) Tær organoleptisku treytirnar.
6) Trygd fyri sporføri, um talan er um djóraúrdráttir.
Skjal 9
Hitaviðgerð
Hitaviðgerð og uppafturhiting av matvørum skulu gerast við slíkari tíð og slíkum hita, at matvørurnar eru tryggar.
Í hesum skjali er nýmjólk tað sama sum ikki hitaviðgjørd mjólk.
A. Matvøruvirkið skal skjalprógva, at mátin, sum verður nýttur til hitaviðgerð ella uppafturhiting, er við slíkari tíð og slíkum hita, at matvørurnar eru tryggar.
B. Kravið um skjalprógv sambært litra A er tó ikki galdandi:
1) Um matvøran verður hitað ella uppafturhitað til í minsta lagi 75 ℃ gjøgnum alla matvøruna, sbr. tó litra C og E.
2) Tá ið borðreitt verður við kjøti, sum brúkarin ikki vil hava gjøgnumstokt.
3) Tá ið borðreitt verður við høsnareggjum, sum eru komin úr eggjapakkivirki, sum hevur óavmarkað loyvi.
4) Tá ið aðrar matvørur verða hitaviðgjørdar, sum vegna slag av matvøru ikki kunnu verða hitaðar ella uppafturhitaðar til í minsta lagi 75 ℃.
5) Tá ið nýmjólk og rátt mjólkarevni verður hitaviðgjørt sbr. litra C, nr. 1.
C. Hitaviðgerð av mjólk og mjólkarevni fer fram eftir hesum treytum:
1) Nýmjólk og rátt mjólkarevni, sum eru partur av framleiðsluni av mjólkarvørum, skulu í minsta lagi hitaviðgerast við teirri tíð og tí hita, sum krevst til pasteurisering, sí tó nr. 3, nr. 4 og litra D.
2) Víkjast kann frá nr. 1 við matvørum, sum ikki eru mjólkarvørur, og sum nýmjólk ella rátt mjólkarevni er latið í, treytað av, at matvøran, eftir at nýmjólk ella rátt mjólkarevni er latið í, verður hitaviðgjørd sambært litra A og B.
3) Víkjast kann frá nr. 1, tá ið blásoppabúnaður ostur verður gjørdur, treytað av, at nýmjólk og rátt mjólkarevni til at gera blásoppabúnaðan ost við verða hitaviðgjørd við í minsta lagi 57 ℃ í 15 sekund ella við aðrari tíð og øðrum hita, sum hevur samsvarandi ávirkan.
4) Víkjast kann frá nr. 1 viðvíkjandi nýmjólk og ráum mjólkarevni til at gera aðrar ostar við hesum treytum:
a) Ystingurin skal hava fingið eftirhitaviðgerð við í minsta lagi 50 ℃ í 30 minuttir ella við aðrari tíð og øðrum hita, sum hevur samsvarandi ávirkan.
b) Osturin skal vera á goymslu í meira enn 60 dagar, áðrenn hann verður seldur sum matur, og
c) tann lidni osturin skal hava minni enn 56% av vatni í tí feittleysa ostamassanum.
5) Víkjast kann frá nr. 1, tá ið talan er um nýmjólk og rátt mjólkarevni, sum verður nýtt í øðrum matvørum enn mjólkarvørum. Í slíkum føri eru ásetingarnar í litra A og B galdandi.
D. Heilsufrøðiliga starvsstovan kann gera undantøk frá kravinum í litra C, nr. 1, um so er, at matvøruvirkið fær skjalprógvað, at tilgerðin fer fram við at nýta aðrar reinførisskipanir ella tøkni, sum tryggja, at galdandi reinføristreytir verða hildnar, og um so er, at Heilsufrøðiliga starvsstovan metir, at hesar skipanir eru reinførisliga og heilsufrøðiliga fullgóðar.
E. Fryst ber skulu hitaviðgerast:
1) Fryst ber, sum eru partur av matvøru, sum ikki verður hitaviðgjørd seinni, skulu hitaviðgerast í minsta lagi 1 minutt við 100 ℃ ella fáa aðra viðgerð, sum ger somu nyttu.
2) Um matvøra, við frystum berum í tilfarinum, ikki kann gerast við kravinum í nr. 1, uttan so at stór broyting hendir við eyðkennum vørunnar, kann Heilsufrøðiliga starvsstovan gera undantak frá hesum kravi, um virkið fær skjalprógvað, at berini eru framleidd undir viðurskiftum, sum geva somu matvørutrygd. Heilsufrøðiliga starvsstovan kann lata treytir fylgja undantakinum.
F. Eggmikil matvøra skal hitaviðgerast, soleiðis at øll matvøran verður hitaviðgjørd í samsvari við litra A og B.
1) Víkjast kann frá kravinum í nr. 1, um:
a) pasteuriserað eggjavøra verður brúkt, ella
b) onnur viðgerð verður gjørd, og virkið fær skjalprógvað, at matvørurnar eru tryggar við tí viðgerðini.
G. Øll hitaviðgerð, sum verður brúkt til at viðgera óviðgjørdar og viðgjørdar úrdráttir, sum verða marknaðarførdir í lufttætt lokaðum íløtum, skal tryggja, at allir partar av vøruni verða hitaðir upp til ein ávísan hita í eitt ávíst tíðarskeið, og at vøran ikki verður dálkað í tilgongdini.
1) Fyri at tryggja, at tann tilgongdin røkkur endamálinum, nevnt omanfyri, skal matvøruframleiðarin regluliga kanna tey viðurskifti, sum eftir umstøðunum eru viðkomandi og hava størst týdning, t.e. serstakliga hita, trýst, innsigli og mikrobiologisk viðurskifti.
2) Tilgongdin skal vera í samsvari við altjóða viðurkend krøv, t.d. fyri pasteurisering ella ovurhøgan hita, t.e. UHT ella sterilisering.
Skjal 10
Framleiðsla í fyrsta liði
Vanlig heilsufrøðilig krøv til framleiðslu í fyrsta liði og virksemi í sambandi við hesa
Nýtsluøki
A. Hetta skjal er galdandi í sambandi við framleiðslu í fyrsta liði og niðanfyri nevnda virksemi, ið hevur samband við hesa:
1) Flutningur, goymsla og handfaring av fyrstaliðsvørum á framleiðslustaðnum, treytað av, at tað ikki broytir eginleikar teirra munandi.
2) Flutningur av livandi djórum, tá ið tað er neyðugt fyri at lúka endamálið við hesi kunngerð.
3) Flutningur av fyrstaliðsvørum av plantum, fiskavørum og veiðudjórum, hvørs eginleikar ikki eru munandi broyttir frá framleiðslustaði til virki.
Heilsufrøðilig krøv
B. Framleiðari í fyrsta liði skal tryggja, at vørur, sum eru framleiddar í fyrsta liði, verða vardar fyri dálking. Framleiðari í fyrsta liði skal:
1) Hava tiltøk til eftirlit við dálking frá luft, mold, vatni, fóðri, taðingarevnum, heilivági, plantuverjuevnum og evnum, sum eru eitrandi fyri livandi verur, umframt goyma, handfara og burturbeina rusk, og
2) seta tiltøk í verk viðvíkjandi djóraheilsu, djóravælferð og plantuheilsu, sum hava árin á heilsuna hjá fólki, m.a. skipanir til at fylgja við, stýra og tálma djórasjúkum, sum eisini kunnu smitta fólk (zoonosur) og smittuevni (zoonotisk agens), sum kunnu elva til sjúkur hjá fólki sambært viðkomandi lóggávu.
C. Framleiðari í fyrsta liði, sum elur, tekur ella veiðir djór ella framleiðir fyrstaliðsvørur av djórauppruna, skal:
1) Halda øll høli rein, sum verða nýtt í sambandi við framleiðslu í fyrsta liði, íroknað høli til at goyma og handfara fóður, og, um neyðugt, sóttreinsa hølini á hóskandi hátt eftir reingerðina,
2) halda útgerð og amboð rein, t.d. tangar, íløt, kassar, akfør, før og kør og, um neyðugt, sóttreinsa tey á hóskandi hátt eftir reingerðina,
3) tryggja at djór, sum skulu á sláturvirki, eru rein,
4) brúka drekkivatn ella reint vatn, har tað er neyðugt, fyri at fyribyrgja dálking,
5) tryggja, at heilsustøðan hjá starvsfólki, sum handfara matvørur, er í lagi, og at tey verða upplærd í heilsuváðum. Eingin, sum hevur ella ber sjúku, sum kann berast gjøgnum matvørur, ella sum t.d. hevur sár við ígerð, vanlig sár ella leyst lív, má handfara matvørur ella hava atgongd at einum stað, har ið matvørur verða handfarnar, um nakar váði er fyri beinleiðis ella óbeinleiðis dálking,
6) fyribyrgja at djór og skaðadjór elva til dálking,
7) goyma rusk og vandamikil evni soleiðis, at tað slepst undan dálking,
8) fyribyrgja at smittandi sjúkur, sum kunnu berast til fólk við matvørum, verða innsløddar og spjaðast,
9) hava fyrilit fyri úrslitum av sýnum frá djórum ella øðrum sýnum, sum hava týdning fyri heilsuna hjá fólki, og
10) brúka fóðurútílatingarevni og heilivág rætt sambært viðkomandi lóggávu.
D. Framleiðari í fyrsta liði, sum veltir, dyrkar ella heystar plantur, skal:
1) Halda hølir, útgerð, tangar, íløt, kassar, akfør, før og kør rein og, um neyðugt, sóttreinsa tey á hóskandi hátt eftir reingerðina,
2) tryggja, at plantur verða framleiddar, fluttar og goymdar á heilsufrøðiligan hátt,
3) brúka drekkivatn ella reint vatn, tá tað er neyðugt, fyri at fyribyrgja dálking,
4) tryggja, at starvsfólk eru frísk, sum handfara matvørur, og at tey eru kunnað um og verða upplærd í heilsuváðum. Eingin, sum hevur ella ber sjúku, sum kann berast gjøgnum matvørur, ella sum t.d. hevur sár við ígerð, vanlig sár ella leyst lív, má handfara matvørur ella hava atgongd at einum stað, har ið matvørur verða handfarnar, um nakar váði er fyri beinleiðis ella óbeinleiðis dálking,
5) í gjørligan mun forða fyri, at djór og skaðadjór elva til dálking,
6) goyma og handfara burturkast og vandamikil evni soleiðis, at dálking verður fyribyrgd,
7) hava fyrilit fyri úrslitunum av viðkomandi kanningum av sýnum frá plantum og øðrum sýnum, ið hava týdning fyri heilsuna hjá fólki, og
8) nýta møgulig plantuverjandi evni og lívtýningarevni rætt og í samsvari við viðkomandi lóggávu.
E. Framleiðari í fyrsta liði skal seta hóskandi bøtandi tiltøk í verk, tá ið hann verður kunnaður um trupulleikar, sum Heilsufrøðiliga starvsstovan staðfestir.
F. Útgerð, flutningsfør ella bingjur, sum verða nýtt til heysting, flutning ella goymslu av evnum ella úrdráttum, ið kunnu elva til ovurviðkvæmi ella ótol, nevnd í merkingarkunngerðini, mugu ikki brúkast til heysting, flutning ella goymslu av matvørum, sum ikki innihalda hesi evni ella úrdráttir, uttan so at útgerðin, flutningsførini ella bingjurnar eru vaskað væl, og sum í minsta lagi hava verið undir eftirliti fyri sjónligum restum av hesum evnum ella úrdráttum.
Skjalaskráir
G. Framleiðari í fyrsta liði skal skráseta øll tiltøk, sum eru framd fyri at hava eftirlit við matvøruvandum. Skrásetingarnar skulu førast í eina skjalaskrá. Hetta skal gerast á hóskandi hátt og í eitt hóskandi tíðarskeið, og sum samsvarar við slag og stødd á matvøruvirkseminum. Eftir áheitan skal framleiðarin í fyrsta liði veita Heilsufrøðiligu starvsstovuni og matvøruframleiðarum, sum taka ímóti matvørunum, viðkomandi upplýsingar úr rakstrardagbókini.
H. Framleiðari í fyrsta liði, sum elur djór ella framleiðir fyrstaliðsvørur av djórauppruna, skal í minsta lagi gera og goyma skjalaskráir við upplýsingum um:
1) slag á tí fóðri, sum er givið djórunum, og hvaðani tað stavar,
2) heilivág ella aðra viðgerð, sum djórini hava fingið, viðgerðardagar og afturhaldstíðir,
3) tilburðir av sjúkum, sum kunnu ávirka trygdina við djóraúrdráttum,
4) greiningarúrslit av sýnum av djórum ella øðrum sýnum, sum eru tikin við atliti at sjúkuavgerð, og sum hava týdning fyri heilsuna hjá fólki, og
5) allar viðkomandi frágreiðingar um eftirlit við djórum ella djóraúrdráttum.
I. Framleiðari í fyrsta liði, ið veltir, dyrkar, framleiðir ella heystar plantur, skal í minsta lagi gera og goyma skjalaskráir við upplýsingum um:
1) eina og hvørja nýtslu av plantuverjandi evnum og evnum, sum eru eitrandi fyri livandi verur,
2) skaðadjór ella sjúku, sum kann ávirka matvørutrygdina í sambandi við plantur ella plantuúrdráttir og
3) úrslitini av eini og hvørjari viðkomandi kanning, ið er gjørd av plantum ella av øðrum sýnum, sum hava týdning fyri heilsuna hjá fólki.
Skjal 11
Leiðreglur
A. Matvøruvinnugreinin kann gera leiðreglur fyri gott heilsufrøðiligt arbeiðslag, og fyri hvussu HACCP-meginreglurnar verða nýttar. Matvøruframleiðarin kann nýta slíkar leiðreglur í sambandi við, at starvsskipanir skulu skipast sum nevnt í § 6, stk. 1.
B. Tá ið leiðreglur fyri gott arbeiðslag verða mentar ella broyttar munandi, skal matvøruvinnugreinin menna og kunna um tær:
1) í samráð við umboð fyri teir partar, ið hava áhugamál, ið eru ávirkað í avgerandi mun, t.d. skikkaðu myndugleikar og brúkarabólkar,
2) við fyriliti fyri viðkomandi reglunum fyri gott arbeiðslag í Codex Alimentarius.
C. Heilsufrøðiliga starvsstovan metir um leiðreglur fyri gott arbeiðslag fyri at tryggja:
1) at tær eru mentar í samsvari við brot A,
2) at innihaldið er nýtiligt í verki á teimum økjum og fyri tey sløg av framleiðslu, sum tær eru galdandi fyri, og
3) at tær hóska sum leiðbeining fyri tær matvørugreinar og fyri tær matvørur, sum tær eru galdandi fyri.
