Kunngerð nr. 4 frá 24. januar 2023 um veiðu eftir lodnu við fiskiførum undir føroyskum flaggi í íslendskum sjógvi í 2023

24. januar 2023Nr. 4

Kunngerð um veiðu eftir lodnu við fiskiførum undir føroyskum flaggi í íslendskum sjógvi í 2023

Við heimild í § 23, stk. 1 og 2, § 34, stk. 2, nr. 2 og 4 og stk. 3 og § 64, stk. 2 í løgtingslóg nr. 152 frá 23. desember 2019 um sjófeingi (Sjófeingislógin), sum broytt við løgtingslóg nr. 106 frá 29. juni 2020, løgtingslóg nr. 185 frá 18. desember 2020 og løgtingslóg nr. 170 frá 21. desember 2021, verður ásett:

Virkisøki

§ 1. Kunngerðin fevnir um fiskiskap eftir lodnu í serbúskaparøkinum hjá Íslandi við fiskiførum undir føroyskum flaggi sambært fiskiveiðiavtalu millum Føroyar og Ísland.

Áseting av heildarkvotu

§ 2. Fiskifør undir føroyskum flaggi kunnu fram til 30. apríl 2023 fiska 10.920 tons av lodnu í íslendskum sjógvi.

Fiskiloyvi

§ 3. Fiskiskapur eftir lodnu í íslendskum sjógvi kann bert fara fram við fiskifari við veiðiloyvi, sum eftir skrivligari umsókn hevur fingið fiskiloyvi frá Vørn til slíkan fiskiskap, og um Vørn hevur váttað, at tey eru á lista yvir fiskifør, sum Ísland hevur givið loyvi at fiska í íslendskum sjógvi.

§ 4. Fiskiloyvi sambært § 3 verða latin teimum, sum í 2022 høvdu rætt til fiskiloyvi at fiska eginkvotu av lodnu í íslendskum sjógvi ella teimum, ið hesin rættur seinni er fluttur til. Fiskiskapurin verður skipaður við egnari árskvotu.

§ 5. Skiparin skal, sambært § 23, stk. 3 í løgtingslógini, fylgja teimum treytum, sum galda fyri fiskiskap í íslendskum sjógvi.

Treytir viðvíkjandi at frysta umborð og at landa uttan fyri Ísland

§ 6. Av nøgdini sambært § 2 er til og við 17. februar 2023 loyvt føroyskum skipum tilsamans at landa í mesta lagi 8.190 tons til frystingar uttan fyri Ísland, ella at frysta umborð.

Stk. 2. Eftir 17. februar 2023 er loyvt føroyskum skipum tilsamans at landa til frystingar uttan fyri Ísland, ella at frysta umborð, í mesta lagi 4.000 tons.

Stk. 3. Frysting umborð og at landa til frystingar uttan fyri Ísland kann ikki halda fram, tá nøgdirnar sambært stk. 1 og 2, sum kunnu frystast umborð ella verða landaðar til frystingar uttan fyri Ísland, eru brúktar.

Stk. 4. Nøgdin at landa til frystingar uttan fyri Ísland ella at frysta umborð á føroyskum skipum verður tilskilað í fiskiloyvinum.

Eygleiðari

§ 7. Vørn ger av, um eygleiðari skal vera umborð á fiskiførum, ið fiska sambært hesi kunngerð. Fiskifarið ber allar útreiðslur av at hava eygleiðara umborð. Eygleiðarar hava loyvi at nýta samskiftisútgerðina umborð til tess at hava samband við Vørn og við aðrar myndugleikar.

Fráboðanir

§ 8. Fiskifør, sum fiska sambært hesi kunngerð, skulu senda hesar fráboðanir elektroniskt til Vørn sambært skjali 1:

1)   Fráboðan um, at fiskiskapur byrjar. Fráboðanin skal sendast, í fyrsta lagi 6 tímar og í seinasta lagi 2 tímar, áðrenn skipið kemur inn í íslendskan sjógv.

2)   Veiðifráboðan hvønn dag. Hvønn dag, millum kl. 6 og kl. 8 UTC, skal boðast frá veiðu fyri undanfarna samdøgur. Fráboðanin skal sendast, hóast eingin veiða er fingin.

3)   Fráboðan um, at fiskiskapur endar. Fráboðanin skal sendast, í fyrsta lagi 6 tímar og í seinasta lagi 2 tímar, áðrenn skipið fer úr íslendskum sjógvi.

Stk. 2. Fiskifarið skal somuleiðis senda íslendskum myndugleikum fráboðanir samsvarandi teimum reglum, sum galda fyri fiskiskap í íslendskum sjógvi.

Revsing o.a.

§ 9. Brot á § 8, stk. 1 verða revsað við sekt, er ikki harðari revsing ásett eftir aðrari lóg. Á sama hátt verður tann revsaður, sum forðar Vørn í at útinna sínar uppgávur sambært § 7.

Stk. 2. Feløg og aðrir løgfrøðiligir persónar koma undir revsiábyrgd eftir reglunum í kapitli 5 í revsilógini.

Stk. 3. Sambært § 70 í løgtingslógini kann Vørn beinanvegin taka aftur rættin til at reka vinnuligan fiskiskap, um brot er framt sambært stk. 1. Rætturin at reka vinnuligan fiskiskap kann takast aftur upp til 4 vikur hvørja ferð.

Gildistíð

§ 10. Henda kunngerð kemur í gildi dagin eftir, at hon er kunngjørd og fer úr gildi 1. mai 2023.

Fiskimálaráðið, 24. januar 2023

Dennis Holm (sign.)

landsstýrismaður

/ Elin Mortensen (sign.)

Skjal 1

Fráboðanir til Vørn

Niðan fyri standandi fráboðanir skulu sendast VØRN í XML sniði umvegis heimasíðuna www.vorn.fo, undir “talgild móttøka”. Fráboðanir kunnu eisini sendast umvegis Elektronisku veiðidagbókina, sum er góðkend av Vørn.

1) COE - Fráboðan um, at fiskiskapur byrjar. Skal sendast, í fyrsta lagi 6 tímar og í seinasta lagi 2 tímar, áðrenn skipið kemur inn í íslendskan sjógv.

Fráboðanin skal hava fylgjandi tekst:

2) CAT - Veiðifráboðan hvønn dag. Fráboðanin skal sendast, hóast eingin veiða er fingin. Skal sendast dagliga millum kl. 6 og kl. 8 UTC.

Fráboðanin skal hava fylgjandi tekst:

3) COX - Fráboðan um, at fiskiskapur endar. Skal sendast, í fyrsta lagi 6 tímar og í seinasta lagi 2 tímar, áðrenn skipið fer úr íslendskum sjógvi.

Fráboðanin skal hava fylgjandi tekst: