Kunngerð nr. 59 frá 5. mai 2021 um nýtslu av dekkum

5. mai 2021Nr. 59

Kunngerð um nýtslu av dekkum

Við heimild í § 10, stk. 1 og 2, og § 58 a, stk. 5 í løgtingslóg um ferðslu, sbrt. løgtingslógarkunngerð nr. 14. frá 2. mars 1988 um ferðslu, sum broytt við løgtingslóg nr. 68 frá 10. mai 2000, verður ásett:

Allýsingar o.a.

§ 1. Vetrardekk eru dekk, ið serliga eru ætlað til vetrarkoyring, og sum eru merkt við:

1)   M+S,

2)   MS,

3)   M&S,

4)   M-S,

5)   Mud and Snow, og

6)   kavaflykru og fjallatindi, 3PMSF. Sí mynd í skjali 1.

Stk. 2. Í tíðarskeiðnum frá 1. desember til og við 30. apríl skulu dekkini hava eina mynsturdýpd, sum er í minsta lagi 3 mm.

Stk. 3. Í tíðarskeiðnum frá 1. mai til og við 30. november skulu dekkini hava eina mynsturdýpd, sum er í minsta lagi 1,6 mm.

Stk. 4. Summardekk eru vanlig dekk, ið ikki eru vetrardekk. Mynsturdýpdin skal verða hendan:

1)   Fyri bilar, lendisakfør og viðfestisvognar við einari heildarvekt, sum í mesta lagi er 3.500 kg skal mynsturdýpdin í minsta lagi verða 1,6 mm.

2)   Fyri onnur akfør, herundir eisini motorsúkklur og prutl, skal mynsturdýpdin í minsta lagi verða 1 mm.

Stk. 5. Píkadekk eru dekk við píkum.

Stk. 6. Píkaketur eru ketur við píkum, tindum ella líknandi.

Nýtsla av summardekkum, vetrardekkum og píkadekkum

§ 2. Ikki er loyvt at brúka summardekk í tíðarskeiðnum frá 1. desember til og við 30. apríl, uttan so, at akfarinum er tryggjað nóg gott vegtak, tá hálkað er, við at akfarið er skøtt við ketum á hjólunum á minst einum trekkási. Í hesum tíðarskeiði kunnu í staðin nýtast vetrardekk ella píkadekk.

Stk. 2. Á vognraði, har viðfestiakfarið hevur eina heildarvekt yvir 750 kg, skal viðfestiakfarið í tíðarskeiðnum og sbrt. treytunum í stk. 1, hava ketur á minst einum ási, um viðfestiakfarið ikki er skøtt við vetrardekkum.

Stk. 3. Motorsúkklur og prutl eru undantikin treytunum um vetrardekk og píkadekk, sbrt. stk. 1.

Stk. 4. Í tíðarskeiðnum 1. desember til og við 30. apríl kunnu vetrardekk einans verða nýtt, um øll hjól á akfarinum hava hesi.

§ 3. Ikki er loyvt at nýta píkadekk í tíðarskeiðnum frá 15. mai til og við 15. oktober.

Stk. 2. Tó kunnu neyðsendarakfør og akfør, sum verða nýtt í sambandi við vetrarhaldið hjá landi og kommunum, nýta píkar í nevnda tíðarskeiði teir dagar, ið hálka er. Sama er galdandi fyri stovnsbilar hjá Kriminalforsorgini og stovnsbilar hjá kommunalu heimatænastuni.

§ 4. Á bili, hvørs heildarvekt í mesta lagi er 3.500 kg, og motorsúkklu kunnu píkadekk einans verða nýtt, um øll hjól á akfarinum hava hesi. Tó kann annað dekkið vera uttan píkar, tá ið talan er um dupult monterað hjól, tvíburahjól.

Stk. 2. Á traktori, motoramboði, viðfestisvogni til traktor ella motoramboð, viðfestisamboði og øllum akførum, hvørs loyvda heildarvekt er yvir 3.500 kg, kunnu píkadekk einans verða nýtt, um øll hjól á sama ási hava tey. Tó kann annað dekkið vera uttan píkar, tá ið talan er um dupult monterað hjól, tvíburahjól.

§ 5. Ikki er loyvt at brúka píkaketur.

Tilgerð av píkadekkum

§ 6. Í píkadekkum er ikki loyvt at nýta rørpíkar, heilt spískar píkar ella píkar við fleiri tindum.

Stk. 2. Talið av píkum á hvørjum dekki má ikki víkja meiri enn 25% í mun til tað hjólið, sum hevur flest píkar.

§ 7. Píkadekk skulu annars lúka hesar ásetingar:

1)   Akfør undir 3.500 kg:

a)    Størsta vekt á píki:

i)    Dekk til lættari lastvognar, C- ella LT-merkt dekk: 2,3 g.

ii)   Onnur dekk: 1,1 g.

b)    Størsta miðalútstikk av píkum á nýggjum, óbrúktum dekki: 1,2 mm.

c)    Størsta útstikk av píki á brúktum dekkum: 2,0 mm.

d)   Størsta píkatal á dekki:

i)    Hjólstødd 13 tummar: 90 píkar.

ii)   Hjólstødd 14 tummar - 15 tummar: 100 píkar.

iii)  Hjólstødd 16 tummar ella størri: 130 píkar, tó 150 píkar fyri C- og LT-merkt dekk.

2)   Akfør yvir 3.500 kg:

a)    Størsta vekt á píki: 3,5 g.

b)    Størsta miðalútstikk av píkum á nýggjum, óbrúktum dekki: 1,5 mm.

c)    Størsta útstikk av píki á brúktum dekkum: 2,5 mm.

d)   Størsta píkatal á dekki: 150 píkar.

3)   Tað er bert loyvt at nýta vetrardekk sum píkadekk, motorsúkkla tó undantikin.

§ 8. Tað er bert loyvi at marknaðarføra píkadekk, sum eru tilgjørd í samsvari við ásetingarnar í §§ 6-7.

§ 9. Tað er bert loyvt at nýta píkadekk, sum eru tilgjørd í samsvari við ásetingarnar í §§ 6-7.

Revsing og gildiskoma

§ 10. Brot á §§ 2-9 verður revsað við sekt.

§ 11. Henda kunngerð kemur í gildi dagin eftir, at hon er kunngjørd, og samstundis fer úr gildi kunngerð nr. 126 frá 22. november 2013 um nýtslu av dekkum.

Skiftisregla

§ 12. Eftir 30. apríl 2025 kunnu dekk ikki verða nýtt sum vetrardekk, sum bert eru merkt við:

1)   M+S,

2)   MS,

3)   M&S,

4)   M-S, ella

5)   Mud and Snow.

Fíggjarmálaráðið, 5. mai 2021

Jørgen Niclasen (sign.)

landsstýrismaður

/ Bjarni Askham Bjarnason (sign.)

Skjal 1

Merking av dekkum við kavaflykru og fjallatindi

3PMSF