Rættarregluevni (einans høvuðslógir og galdandi lógir):
Rættarreglubólkur:
Gildisstøða:
Ár:
Felagsmál / Sermál:
Mál:
Myndugleiki:
Um rættarregluna
  • Bólkur: Kunngerð
  • Gildisstøða: Galdandi
  • Felagsmál/Sermál: Sermál
  • Myndugleiki: Mentamálaráðið
  • Útgávudagur: 23-09-2004
Tilvísingar
Kunngerðablaðið
  • Kunngerðarblað 2004 A - Hefti 19 A frá 23. september 2004
  • Rættarreglan soleiðis sum hon upprunaliga varð kunngjørd í Kunngerðablaðnum
Valmøguleikar
Tín lógalisti

14. september 2004Nr. 59

Kunngerð um lesiætlanir í yrkislærugreinum

Við heimild í § 24, stk. 3 í løgtingslóg nr. 94 frá 29. desember 1998 um yrkisútbúgvingar, sum m.a. broytt við løgtingslóg nr. 48 frá 26. mars 2002 verður ásett:

§ 1. Viðkomandi yrkisnevnd ásetir í lesiætlanum neyvari reglur um innihaldið í yrkislærugreinunum, í teimum ávísu yrkisútbúgvingunum. Hetta fer fram í neyvum samstarvi við teir skúlar, har undirvísingin fer fram.

Stk. 2. Lesiætlanirnar taka støði í galdandi útbúgvingarkunngerð, eins og í ásetingum um yvirskipaðu viðurskiftini á økinum.

Stk. 3. Lesiætlanirnar verða gjørdar eftir leisti, sum yrkisnevndarfyrisitingin útvegar.

Stk. 4. Í einstøku lesiætlanini skal greitt tilskilast, nær hon fær gildi og um hon kemur í staðin fyri eina aðra, áður samtykta lesiætlan.

§ 2. Viðkomandi yrkisnevnd hevur ábyrdina av, at arbeiði við at tilevna lesiætlan fyri ávísa útbúgving, verður sett í verk.

Stk. 2. Yrkisnevndin kann seta fyribilsnevnd við 3 limum til at lata yrkisnevndini uppskot um lesiætlan. Í minsta lagi 1 limur skal undirvísa í avvarðandi útbúgving. Um neyðugt kann fyribilsnevndin innkalla yrkisnevndarlimir og onnur sakkøn at luttaka á fundum í fyribilsnevndini.

Stk. 3. Fyribilsnevndin sambært stk. 2 skal skipa seg við formanni og skrivara.

Stk. 4. Limirnir í fyribilsnevndini skulu hava neyðugan kunnleika til ta ávísu yrkisútbúgvingina og neyðugan førleika til at tilevna lesiætlanir.

§ 3. Uppskot til lesiætlan verður løgd fyri avvarðandi yrkisnevnd til samtyktar á tveimum regluligum yrkisnevndarfundum. Ein samd yrkisnevnd kann í serligum føri gera av at víkja frá hesi reglu og bert viðgera málið á einum fundi.

Stk. 2. Tá ið yrkisnevnd hevur samtykt eina lesiætlan, skal hon latast yrkisnevndarfyrisitingini at avgreiða.

§ 4. Yrkisnevndarfyrisitingin skal í innskrivaðum brævi senda avrit av lesiætlan fyri yrkislærugreinarnar til kunningar til hesi:

1.    Limirnar í avvarðandi yrkisnevnd

2.    Avvarðandi yrkisfeløg

3.    Skúlaleiðarar á avvarðandi skúla/skúlum

4.    Mentamálaráðið

5.    Yrkisútbúgvingarráðið

§ 5. Tað áliggur skúlaleiðsluni at kunna lærarar, sum undirvísa í viðkomandi lærugrein umframt onnur á skúlanum, sum á onkran hátt varða av útbúgvingini og undirvísingini, um samtyktu lesiætlanirnar.

§ 6. Henda kunngerð kemur í  gildi dagin eftir, at hon er kunngjørd.

 

 

Mentamálaráðið, 14. september 2004

 

Jógvan á Lakjuni (sign.)

landsstýrismaður

/ Petur Petersen (sign.)