19. mai 2006Nr. 69

Kunngerð um samsýning til fosturforeldur, sum broytt við kunngerð nr. 159 frá 13. desember 2018

Við heimild í § 29, stk. 4 í løgtingslóg nr. 18 frá 8. mars 2005 um barnavernd, sum broytt við løgtingslóg nr. 134 frá 9. desember 2005, verður ásett:

§ 1. Fosturforeldur fáa eina samsýning áljóðandi 101 kr. um samdøgrið fyri hvørt fosturbarn.

Stk. 2. Eitt fast gjald um samdøgrið verður rindað til vistarhald og klæði til barnið. Tá upp til 2 børn eru í somu fosturfamilju, er gjaldið fyri hvørt barnið ávikavist 133 kr. til børn undir 10 ár, og 140 kr. til børn 10 ár og eldri. Tá fleiri enn 2 børn eru í somu fosturfamilju, er gjaldið 124 kr. fyri hvørt barnið.

Stk. 3. Eisini verður eitt fast gjald um vikuna rindað til lummapening til barnið. Tá barnið er:

1)   3-10 ár er gjaldið 20 kr.

2)   11-13 ár er gjaldið 47 kr.

3)   14-15 ár er gjaldið 96 kr.

4)   16 ár og eldri er gjaldið 191 kr.

Stk. 4. Útreiðslur til stovnan og útbúnað í sambandi við fosturuppihald kunnu rindast fosturforeldrum, tá ið barnið verður latið teimum, við upp til kr. 6.986.

Stk. 5. Um barn verður sent til fosturforeldur í Danmark, eru donsku upphæddirnar fyri samsýning, lummapening, stovnan og útbúnað galdandi.

§ 2.¹⁾ Afturat samsýningini í § 1, stk. 1 verður lagt gjald til arbeiðsloysisskipanina, gjald til barsilsgrunnin, gjald til arbeiðsmarknaðareftirlønargrunnin og bundna eftirlønargjaldið sambært § 2 í løgtingslóg um eftirløn.

Stk. 2. Landsstýrismaðurin ásetir javnaðu gjøldini í kunngerð um áseting og javning av almannaveitingum, í seinasta lagi 1. januar á hvørjum ári.

§ 3. Um talan er um eitt sera trupult barn, kunnu fosturforeldrini samsýnast við upp til 3 ferðir samsýningini, sambært § 1, stk. 1, umframt 1 ferð føstu gjøldini í § 1, stk. 2 og 3.

Stk. 2. Um talan er um eitt óvanliga trupult barn, sum tí krevur heilt serliga røkt frá fosturforeldrunum, kunnu fosturforeldrini samsýnast við upp til 7 ferðir samsýningini, sambært § 1, stk. 1, umframt 1 ferð føstu gjøldini í § 1, stk. 2 og 3.

Stk. 3. Um talan er um eitt pinkubarn undir 1 ár, kunnu fosturforeldrini samsýnast við upp til 7 ferðir samsýningini, sambært § 1, stk. 1, umframt 1 ferð føstu gjøldini í § 1, stk. 2 og 3.

Stk. 4. Samsýning sambært hesi grein kann bert veitast í 3 mánaðir í senn. Eftir hetta tíðarskeið skal metast, um tiltakið virkar eftir ætlan, og um ráðiligt er at halda áfram við tiltakinum.

§ 4. Hendan kunngerð kemur í gildi dagin eftir, at hon er kunngjørd, og hevur virknað frá 1. januar 2006.

Stk. 2. Samstundis fer úr gildi kunngerð nr. 3 frá 3. mars 2004 um samsýning til fosturforeldur.

Almanna- og heilsumálaráðið, 19. mai 2006

Hans Pauli Strøm (sign.)

landsstýrismaður

/ Maria á Dul (sign.)