Kunngerð nr. 86 frá 13. august 2024 um umsiting av PKU-kortskránni

13. august 2024Nr. 86

Kunngerð um umsiting av PKU-kortskránni

Við heimild í § 3, stk. 2 í løgtingslóg nr. 77 frá 6. mai 2022 um Heilsustýrið verður ásett:

§ 1. Heilsustýrið skipar, umsitur og mennir PKU-kortskránna.

§ 2. Ein PKU-roynd, ella eina hælroynd, er ein kanning, sum verður bjóðað øllum nýføðingum, fyri at kanna, um nýføðingurin hevur nakrar ávísar sjúkur, eitt nú Følling sjúkuna.

Stk. 2. PKU-royndirnar verða goymdar í PKU-kortskránni hjá Heilsustýrinum.

§ 3. Landsstýrisfólkið velur eina nevnd, sum skal taka avgerð um, hvørt ein granskingarverkætlan kann fáa loyvi at granska í PKU-kortskránni.

Stk. 2. Landsstýrisfólkið velur fýra limir í nevndina. Tvey umboð verða vald fyri Heilsustýrið, undir hesum stjórin í Heilsustýrinum; ein kliniskur varastjóri innan Sjúkrahúsverkið og eitt umboð fyri Heilsugranskingareindina innan Sjúkrahúsverkið við granskingarkunnleika og granskingarroyndum.

Stk. 3. Stjórin í Heilsustýrinum er forfólk í nevndini.

Stk. 4. Limirnir í nevndini verða valdir sambært § 8 í javnstøðulógini.

Stk. 5. Nevndin verður tilnevnd fjórða hvørt ár. Limirnir í nevndini verða sitandi, til nýggir limir eru tilnevndir.

§ 4. Umsóknir um loyvi til gransking í PKU-kortskránni verða sendar til Heilsustýrið.

Stk. 2. Áðrenn loyvi verður givið til gransking í PKU-kortskránni, skal Vísindasiðseminevndin hava góðkent granskingarverkætlanina.

§ 5. Fyri at fáa atgongd til gransking í PKU-kortskránni, skal ein granskingarverkætlan verða mett at hava munandi samfelagsligum týdning, umframt at koma við einum týðandi íkasti til føroyska heilsugransking, sum kann koma føroyska fólkinum til gagns. PKU-kortini skulu harumframt vera mett at vera neyðug fyri at kunna uppfylla endamálið við verkætlanini.

§ 6. Henda kunngerð kemur í gildi dagin eftir, at hon er kunngjørd.

Heilsumálaráðið, 13. august 2024

Margit Stórá (sign.)

landsstýriskvinna

/ Bjørgfríð Ludvig (sign.)