Skrivar tú trygging verður eisini leitað eftir øðrum endingum av orðinum sum t.d. tryggingar og tryggingarvirksemi.
Skrivar tú ?trygging verður leitað eftir orðum sum t.d. lívstrygging og lívstryggingar.
Skrivar tú ”trygging” verður einans leitað eftir júst hesum sniðnum av orðinum.
30. mai 2005Nr. 86
Kunngerð um gjald til arbeiðsmarknaðareftirlønargrunn
Við heimild í § 2, stk. 3 í løgtingslóg nr. 39 frá 7. mai 1991 um arbeiðsmarknaðar-eftirlønargrunn verður ásett:
§ 1. Skyldu at rinda í grunnin hava allir persónar, sum eru undir skattskyldu í Føroyum, og allir arbeiðsgevarar, sum gjalda út A-inntøku.
Stk. 2. Persónligir skattgjaldarar, sum eru 67 ár ella eldri, skulu ikki rinda inn í grunnin, og heldur ikki skulu teir rinda inn í tí árinum, sum teir fylla 67 ár.
Stk. 3. Persónar, sum eru avmarkað skattskyldugir til Føroya, rinda tó ikki til grunnin av løn undir FAS skipanini ella av løn umborð á skipum, sum eftir § 2, stk. 1, litra j, 2. pkt. í skattalógini, verða javnmett við skip, ið eru skrásett við heimstaði í Føroyum, og sum, um tey vóru føroysk, lúka treytirnar í § 1, stk. 1 í løgtingslóg um Føroyska Altjóða Skipaskrá.
§ 2. Arbeiðsgevarin rindar 0,75% av tí samlaðu útgoldnu A-inntøkuni.
Stk. 2. Tá A-inntøka verður rindað, skal arbeiðsgevarin avrokna sín part av gjaldinum til Toll- og Skattstovu Føroya:
Við at geva Toll- og Skattstovu Føroya fulltrú til at taka gjaldið av peningastovnskonto hjá viðkomandi, ella við at rinda gjaldið eftir rokning frá Toll- og Skattstovu Føroya. Gjaldið eftir rokning frá Toll- og Skattstovu Føroya skal gjaldast innan 20 dagar eftir, at Toll- og Skattstova Føroya hevur sent rokningina.
§ 3. Persónligir skattgjaldarar rinda 0,75% av skattskyldugu inntøkuni. Gjaldið verður kravt inn saman við fyribilsskattinum, og verður endaliga gjørt upp árið eftir í skattauppgerðini.
§ 4. Gjøld sambært § 2, sum eru minni enn 50 kr. um árið, verða ikki kravd.
§ 5. Verður útrokningargrundarlagið sambært § 2 broytt aftaná, at gjaldið er kravt, verður munurin bert kravdur/útgoldin, um hann er størri enn 50 kr.
Stk. 2. Verður inntøkugrundarlagið sambært § 3 broytt aftaná, at gjaldið er kravt, verður munurin bert kravdur/útgoldin, um hann er størri enn 200 kr.
§ 6. Henda kunngerð kemur í gildi 1. januar 2006. Samstundis fer úr gildi kunngerð nr. 28 frá 25. mars 2002 um gjald til arbeiðs marknaðareftirlønargrunn.
Fíggjarmálaráðið, 30. mai 2005
Bárður Nielsen (sign.)
landsstýrismaður
/ Petur Alberg Lamhauge (sign.)
