Skrivar tú trygging verður eisini leitað eftir øðrum endingum av orðinum sum t.d. tryggingar og tryggingarvirksemi.
Skrivar tú ?trygging verður leitað eftir orðum sum t.d. lívstrygging og lívstryggingar.
Skrivar tú ”trygging” verður einans leitað eftir júst hesum sniðnum av orðinum.
17. juni 2013Nr. 90
Kunngerð um ískoytisútbúgving fyri sjúkrarøktarfrøðingar og onnur við heilsufakligari miðallangari framhaldsútbúving, útbúgvin eftir eldri lógum
Við heimild í § 6, stk. 1 í løgtingslóg nr. 58 frá 9. juni 2008 um Fróðskaparsetur Føroya verður ásett:
Endamál, longd, o.a.
§ 1. Endamálið við ískoytisútbúgvingini er
1) at geva sjúkrarøktarfrøðingum, ið eru útbúnir eftir eldri lógum, møguleika til at uppstiga eldru útbúgvingina til bachelor, og
2) at geva heilsustarvsfólki við aðrari heilsufakligari miðallangari framhaldsútbúgving akademiska ískoytisútbúgving á bachelorstigi.
Stk. 2. Ískoytisútbúgvingin skal geva teimum lesandi ástøðiligan og verkligan førleika og kunnleika til vísindalig háttaløg, og evnir til eftir lokna útbúgving
1) at menna kliniska praksis og útinna dygdar- og menningararbeiði og haraftrat fylgja, gera nýtslu av og taka lut í granskingararbeiði á heilsuøkinum, og
2) at halda fram í ástøðiligum og kliniskum førleikagevandi framhaldslestri, umframt akademiskari framhaldsútbúgving.
§ 2. Ískoytisútbúgvingin er ásett at vera 35 ECTS stig.
Stk. 2. Sjúkrarøktarfrøðideildin ger av, hvussu nógv lesandi kunnu fara undir lestur hvørt skeið. Landsstýrismaðurin kann áseta eitt hægsta tal av lesandi við upptøku.
§ 3. Ískoytisútbúgvingin gevur fyri sjúkrarøktarfrøðingar rætt til heitið bachelor í sjúkrarøktarfrøði, enska navnið er Bachelor of Science in Nursing, stytt B.Sc.Cur.
Stk. 2. Heilsustarvsfólk við aðrari heilsufakligari miðallangari framhaldsútbúgving fáa prógv fyri at hava nomið sær akademiska ískoytisútbúgving á bachelorstigi á 35 ECTS.
Stk. 3. Ískoytisútbúgvingin skal vera lokin í seinasta lagi 3 ár eftir, at hon er byrjað. Rektarin kann í serligum førum gera undantøk frá hesi reglu.
Skipan og innihald
§ 4. Ískoytisútbúgvingin er býtt í tríggjar eindir.
Stk. 2. Fyrsta eind er vísindaástøði og granskingarháttalag, ið telur 10 ECTS. Luttakararnir nema sær grundleggjandi kunnleika og háttalagsligan førleika innan vitan, vísindi og gransking á vísindaligum stigi og nema sær førleika innan eina vísindaliga tilgongd til sjúkrarøktaryrkið og onnur heilsuyrki. Eisini nema lesandi sær kunnleika til kunningartøkni.
Stk. 3. Onnur eind er valfrí eind, ið telur 10 ECTS. Í valfríu eindini kunnu lesandi velja ymisk klinisk sjúkrarøktarfaklig ella heilsufaklig øki, sum skulu verða viðgjørd við støði í fyrstu eind.
Stk. 4. Triðja eind er ritgerð, ið telur 15 ECTS. Í arbeiðinum við ritgerðini skal tann lesandi vinna sær førleika innan sjúkrarøktarfakligt ella heilsufakligt menningararbeiði. Í ritgerðini verður ein sjálvvaldur spurningur viðgjørdur við evni úr kliniskari sjúkrarøkt ella aðrari heilsufakligari praksis og við vísindaligum háttalagi. Ritgerðarevnið skal verða góðkent av Sjúkrarøktarfrøðideildini.
Próvtøka
§ 5. Dekanurin ger av, um próvtøkurnar í ískoytisútbúgvingini eru innanhýsis ella uttanhýsis, og um metingarnar “staðið” ella “ikki staðið” ella galdandi próvtalsstigi verða nýttar til próvtøkurnar.
Stk. 2. Ritgerðin verður dømd við einari uttanhýsis próvtøku.
Stk. 3. Tann lesandi skal hava staðið tær innanhýsis og uttanhýsis próvtøkur, sum eru ásettar í námsskipanini fyri fyrstu og aðru eind, áðrenn ritgerðin er endaliga avgreidd.
Stk. 4. Kærur um próvtøku verða viðgjørdar samsvarandi kapittul 6 í løgtingslóg um Fróðskaparsetur Føroya.
Námsskipan
§ 6. Dekanurin skal gera eina námsskipan, sum lýsir innihald o.a. í útbúgvingini. Rektarin góðkennir námsskipanina eftir tilmæli frá dekaninum.
Stk. 2. Í námsskipanini verða ásettar reglur um:
1) Endamál og innihald í teimum einstøku lærugreinunum í lestrinum, hvussu nógvar tímar tær fevna um, og hvussu dømt verður. Lærugreinirnar verða ásettar í ECTS stigum.
2) Undirvísingar- og arbeiðshættir í útbúgvingini, íroknað: kunningartøkni í undirvísingini sambært § 4, stk. 2, valfríu eindina sambært § 4, stk. 3, ritgerðina sambært § 4, stk. 4 og
góðskriving sambært § 7, stk. 1.
Stk. 3. Umframt reglur, sum eru ásettar sambært hesi kunngerð, umfatar námsskipanin reglur, sum eru ásettar sambært kunngerð nr. 19 frá 3. mars 2011 um útbúgving til sjúkrarøktarfrøðing (B.Sc.Cur).
Aðrar reglur
§ 7. Dekanurin kann í hvørjum einstøkum føri gera av, at útbúgvingarpartar, sum ein lesandi hevur staðið við eina aðra útbúgving, heilt ella lutvíst kunna góðskrivast í ískoytisútbúgvingini. Avgerðin verður tikin við støði í fakligari meting.
Stk 2. Avgerðir dekansins sambært stk. 1 kunnu verða kærdar til rektaran.
Stk. 3. Kæra skal verða latin inn í seinasta lagi 2 vikur eftir, at tann, sum kærir, hevur fingið fráboðan um avgerðina.
Stk. 4. Rektarin kann síggja burtur frá kærufreistini, tá serlig viðurskifti tala fyri tí.
§ 8. Landsstýrismaðurin kann góðkenna frávik frá hesi kunngerð sum liður í royndar- og menningarvirksemi. Ásett verður, hvussu leingi royndar- og menningarvirksemið skal vara, og hvussu frágreiðing í hesum sambandi skal verða tilevnað.
Gildiskoma
§ 9. Henda kunngerð kemur í gildi dagin eftir, at hon er kunngjørd, og fevnir eisini um sjúkrarøktarfrøðingar, sum byrjaðu ískoytisútbúgvingina eftir 1. september 2008. Kunngerðin fevnir eisini um onnur heilsustarvsfólk við heilsufakligari miðallangari framhaldsútbúgving, sum eru farin undir lesnaðin í september 2011.
Stk. 2. Samstundis fer úr gildi kunngerð nr. 90 frá 15. juni 2009 um ískoytisútbúgving fyri sjúkrarøktarfrøðingar, útbúnir eftir eldri lógum, tó soleiðis at lesandi, sum hava byrjað lesturin sambært gomlu kunngerðini, gera seg lidnan við útbúgvingina sambært gomlu kunngerðini.
Mentamálaráðið, 17. juni 2013
Bjørn Kalsø (sign.)
landsstýrismaður
/ Poul Geert Hansen (sign.)
