Skrivar tú trygging verður eisini leitað eftir øðrum endingum av orðinum sum t.d. tryggingar og tryggingarvirksemi.
Skrivar tú ?trygging verður leitað eftir orðum sum t.d. lívstrygging og lívstryggingar.
Skrivar tú ”trygging” verður einans leitað eftir júst hesum sniðnum av orðinum.
22. juni 2005Nr. 91
Kunngerð um stuðul til keyp av avlamisbili sambært forsorgarlógini
Við heimild í § 18, stk. 6 í lovbekendtgørelse nr. 100 af 2. marts 1988 om offentlig forsorg, sum seinast broytt við løgtingslóg nr. 71 frá 11. november 2004, verður ásett:
Kapittul 1
Heilsu- og vinnutreytir
§ 1. Stuðul til bilkeyp verður latin persóni, sum hevur slíkan varandi niðursettan førleika, at tað er til munandi ampa fyri viðkomandi í samferðslu, arbeiði ella útbúgving, um hann ikki hevur bil.
Stk. 2. Endamálið við stuðlinum er, at persónurin kann gerast so sjálvhjálpin sum gjørligt í gerandisdegnum.
§ 2. Til tess at fáa stuðul, skal bilurin:
1) verða neyðugur fyri, at umsøkjarin kann koma til og frá arbeiði ella útbúgvingarstaði, ella
2) munandi bøta um avleiðingar av niðursetta førleikanum hjá umsøkjaranum, ella
3) munandi lætta um gerandisdagin hjá umsøkjaranum í heiminum.
Stk. 2. Stuðul verður játtaður til bíligasta bilin, ið kann nøkta tørvin hjá umsøkjara til avlamisbil.
Stk. 3. Stuðul verður ikki latin, um aldur og heildarstøða umsøkjarans gera, at hóskiligari er við øðrum flutningsskipanum, t.d. at umsøkjarin kann nýta almenn flutningsfør, tilboð frá Serflutningsskipan Landsins ella øðrum.
§ 3. Ger aldur og heildarstøða umsøkjarans, at óráð eru at lata honum stuðul til bil, ið hann sjálvur skal føra, eigur Bileftirlit Føroya at meta um, hvørt hann er egnaður til tess ella ikki.
Kapittul 2
Stuðulsáseting
§ 4. Stuðul sbrt. §§ 1 og 2 verður latin sum lán upp til 60.000 kr. Fyri serliga dýrar bilar, ið verða veittir sbrt. § 6, kann upphæddin hækkast upp til 85.000 kr.
Stk. 2. Helvtin av láninum verður at rinda aftur við 1/96 um mánaðin. Hin helvtin verður niðurskrivað 1/96 um mánaðin, frá tí at bilurin verður skrásettur.
Stk. 3. Stuðul til skrásetingargjald verður latin sum lán til bíligast nøktandi bil. Stuðulsupphæddin verður ásett sambært uppgerð frá Toll- og Skattstovu Føroya. Lánið verður niðurskrivað 1/96 um mánaðin, frá tí at bilurin er skrásettur.
Stk. 4. Lánini eru renturfrí og skulu afturgjaldast/niðurskrivast yvir 8 ár.
§ 5. Hevur umsøkjari bil, ið hann hevur fingið stuðul til, og søkir um stuðul til nýggjan bil, skulu upp til 30.000 kr. av nettovinninginum av søluni av gamla bilinum, herundir tryggingarútgjald, verða drignar frá láninum til nýggja bilin.
§ 6. Latið kann verða rentu- og avdráttarfrítt lán at rinda munin millum lán sbrt. § 4 og keypskostnað, tá ið talan er um heilt serligar umstøður viðvíkjandi breki umsøkjarans. Hetta kann til dømis vera, um:
1) niðursetti førleikin krevur útbúnað, sum einans finst ella kann setast í størri ella dýrari bil,
2) niðursetti førleikin hevur við sær, at neyðugt er við størri ella dýrari bili, av tí at ilt er at sleppa inn og út úr bilinum ella at seta seg til rættis í honum,
3) neyðugt er við størri ella dýrari bili til tess at fáa rúm fyri neyðugum hjálpartólum.
Stk. 2. Lán sbrt. stk. 1 verður ásett eftir kostnaðinum á bíligasta og hóskiligasta bilinum, og tað verður niðurskrivað 1/96 um mánaðin, frá tí at bilurin er skrásettur.
Stk. 3. Hevur umsøkjari bil, ið hann hevur fingið stuðul til, og søkir um stuðul til nýggjan bil, skal nettovinningurin av søluni av gamla bilinum, herundir tryggingarútgjald, verða drigin frá láninum sbrt. stk. 1. Loypur peningur av, verður hann drigin frá láninum sbrt. § 4, soleiðis at fyrst verður minkað um afturgjaldsskylduga partin.
Stk. 4. Verður serligur útbúnaður settur í bilin seinni orsakað av heilsustøðu umsøkjarans, verður kostnaðurin av hesum latin sum viðbót sambært § 9.
§ 7. Hevur umsøkjari fingið stuðul til bil, kann stuðul til annan bil ikki verða latin fyrr enn 8 ár eftir, at gamli bilurin er skrásettur.
Stk. 2. Bileftirlit Føroya metir um, hvørt bilurin er í tílíkum standi, at hann eigur at skiftast út.
Stk. 3. Stuðul kann tó verða latin innan 8 ár um:
1) Bileftirlit Føroya váttar, at bilurin eigur at verða útskiftur,
2) bilurin er vorðin vrak, ella
3) bilurin er vorðin óegnaður, av tí at førleiki umsøkjarans er broyttur.
Stk. 4. Verður bilurin útskiftur sbrt. stk. 3, eru somu reglur galdandi sum í § 5 og § 6, stk. 3. Restskuld verður avskrivað, um ikki gjaldsskái er givin sbrt. § 15, ella lánið er misrøkt, sbr. § 13.
§ 8. Almannastovan kann veita umsøkjara stuðul til meirútreiðslur til vektgjald í mun til bil við eginvekt omanfyri 1300 kg, um hann líkur krøvini til stuðul til bilkeyp sambært hesi kunngerð.
Stk. 2. Ynskir umsøkjari annan bil enn bíligast nøktandi bilin sbr. § 2, stk. 2, ið hevur eina eginvekt omanfyri 1300 kg, verður stuðul ikki veittur til meirútreiðslur til vektgjald.
Kapittul 3
Serligur útbúnaður
§ 9. Viðbót kann verða latin fyri serligan útbúnað til bilin, sama um stuðul kann verða latin sbrt. §§ 1 og 2 ella ikki. Viðbótin er treytað av, at umsøkjari ella annað húsfólk eigur bilin, og at bilurin ikki hevur fingið útbúnaðin ísettan á verksmiðjuni.
Stk. 2. Viðbót fyri automatisk gear er tó treytað av, at bilurin er minni enn eitt ára gamal, og at hann hevur fingið útbúnaðin ísettan á verksmiðju.
Stk. 3. Vanliga skulu ganga 6 ár, áðrenn viðbót aftur verður latin fyri líknandi útbúnað.
Stk. 4. Almannastovan kann lata viðbót sambært stk. 1 og 2, um Bileftirlit Føroya krevur serligan útbúnað til bilin.
Stk. 5. Serligur útbúnaður, ið er settur í bilin, er ogn hjá Almannastovuni, og skal, um hann er egnaður til endurnýtslu, latast aftur til Almannastovuna, um bilurin verður seldur.
Kapittul 4
Koyrikort o.a.
§ 10. Viðbót kann verða latin fyri læknaváttan og meirkostnað av koyrifrálæru í sambandi við stuðul til bilkeyp ella í sambandi við endurnýggjan av koyrikorti orsakað av heilsuávum, um treytirnar fyri stuðli til bilkeyp annars eru hildnar.
Stk. 2. Er neyðugt at nýta bil umsøkjarans í koyrifrálæruni, kann viðbót verða latin at seta útgerð til koyrilæraran í bilin og til at taka hana úr aftur.
Kapittul 5
Stuðulstreytir
§ 11. Treytirnar at fáa lán sbrt. § 4 eru hesar:
1) lánið skal verða nýtt til at keypa nýggjan og óbrúktan bil,
2) bilurin skal verða skrásettur í navni stuðulsmóttakarans. Er umsøkjari barn undir 18 ár, skal bilurin verða skrásettur í navni barnsins, meðan foreldramyndugleikin verður skrásettur sum brúkari (førari) av bilinum,
3) Bileftirlit Føroya skal skráseta bilin við tí treyt, at eigaraskifti skal ikki vera fyrr enn 8 ár eftir skrásetingina, uttan so at Almannastovan loyvir tí,
4) bilurin skal vera skrokktryggjaður fyri fult virði,
5) treytirnar í §§ 1 og 2 skulu verða loknar,
6) onnur mugu ikki nýta bilin í longri tíð,
7) bilurin má ikki verða settur ella setast í veð ella havast sum trygd fyri gjaldi, sum ikki hevur við bilin at gera, og
8) avdráttartreytir skulu verða hildnar.
Stk. 2. Sama, hvat ásetingarnar í stk. 1, nr. 1 siga, kann stuðul verða latin til nýggjan og óbrúktan bil, sum umsøkjari ella annað húsfólk hevur keypt seinasta árið. Stuðulin fær gildi, frá tí at bilurin er skrásettur fyrstu ferð.
§ 12. Treytirnar fyri stuðli frá Almannastovuni til vektgjald ella at minka um tað, sbr. § 8, eru, at:
1) bilurin skal vera skrásettur í navni umsøkjarans, og
2) treytirnar í § 11, stk. 1, nr. 5-7 skulu vera hildnar.
§ 13. Verða treytirnar í §§ 11 og 12 ikki hildnar, avger Almannastovan, hvørt lán sbrt. §§ 4 og 6 skal verða afturtikið.
Stk. 2. Ger Almannastovan av at taka stuðulin aftur, verður restskuldin í lánspartinum sbrt. § 4 afturgoldin, og stuðulsveitingin sbrt. § 8 dettur burtur við mánaðarlok eftir tann mánaða, ið umsøkjari er kunnaður um avgerðina.
Stk. 3. Stk. 1 og 2 eru somuleiðis galdandi, um bilurin verður tikin við uttanlands ímóti avgerð Almannastovunnar.
§ 14. Verður lán afturgoldið innan 8 ár eru liðin, verður øll restskuld goldin, eisini ein lutvísur partur av avdráttarfríum lánum.
Stk. 2. Um stuðulsmóttakari doyr, fellur restskuldin av lánspartinum sbrt. § 4 og § 6 til gjaldingar. Røkkur søluvirðið á bilinum ikki til alla skuldina, verður munurin avskrivaður.
§ 15. Almannastovan ger av, um lánsgjald kann verða útsett, ella um lán kann verða eftirgivið orsakað av sjúku, arbeiðsloysi o.ø.
Stk. 2. Er avgjørt at krevja inn restskuld við heimild í § 13, stk. 2, kann Almannastovan gera eina avdráttarskipan og eru ásetingarnar í stk. 1 tá somuleiðis galdandi.
Kapittul 6
Stuðul til bil, ið umsøkjari tekur við sær úr øðrum landi
§ 16. Rentu- og avdráttarfrítt lán kann verða latið til at rinda skrásetingargjald fyri bil, ið umsøkjari tekur við sær úr øðrum landi, um treytirnar í §§ 1 og 2 annars eru hildnar.
Stk. 2. Lánið kann ikki vera størri enn tann upphædd, ið verður niðurskrivað, tá ið stuðulin verður ásettur sbrt. § 4, stk. 1 til 4.
Stk. 3. Lán sbrt. stk. 1 verður niðurskrivað 1/72 um mánaðin, frá tí at bilurin er skrásettur í Føroyum.
Stk. 4. Ásetingarnar í § 7 og §§ 11 til 15 eru somuleiðis galdandi, tó at 8 ár verða sett til 6 ár.
Kapittul 7
Avgerðarmyndugleiki og kærumøguleiki
§ 17. Myndugleika at taka avgerð við heimild í hesi kunngerð hevur Almannastovan.
Stk. 2. Avgerðir kunnu kærast til kærunevndina í almannamálum innan 4 vikur frá tí degi, kærarin hevur fingið fráboðan um avgerðina.
Stk. 3. Í serligum førum kann kærunevndin viðgera kærumál, ið er innlatið aftaná, at kærufreistin er úti.
§ 18. Stuðulsjáttan við heimild í hesi kunngerð dettur burtur, um ikki er sett á stuðulin innan 6 mánaðir eftir játtanina. Almannastovan kann tó leingja freistina í serligum førum.
Kapittul 8
Veðhald og fyrning
§ 19. Lán sambært hesi kunngerð verða tryggjað við tinglýstum veðbrævi í leysafæi.
§ 20. Vísandi til vanligar fyrningarreglur fyrnast lán sambært hesi kunngerð eftir 20 árum.
Kapittul 9
Gildiskoma v.m.
§ 21. Henda kunngerð kemur í gildi dagin eftir, at hon er kunngjørd.
Almanna- og heilsumálaráðið, 22. juni 2005
Hans Pauli Strøm (sign.)
landsstýrismaður
/ Aibritt á Plógv (sign.)
