Kunngerð nr. 93 frá 11. september 2012 um broyting í kunngerð um koyrikort og koyrifrálæru

11. september 2012Nr. 93

Kunngerð um broyting í kunngerð um koyrikort og koyrifrálæru

§ 1

Í kunngerð nr. 112 frá 29. september 2005 um koyrikort og koyrifrálæru, sum seinast broytt við kunngerð nr. 58 frá 11. mai 2012, verða hesar broytingar gjørdar:

1)   Í § 2, stk. 2 verður aftaná 2. pkt. sett:
“Útgáva av avriti av koyrikorti, sbrt. § 55, stk. 1-3, og endurnýggjan av koyrikorti sambært ásetingunum í kapittul 6, kann harumframt verða gjørd hjá persónum, sum hava ognað sær eitt føroyskt koyrikort, og sum ikki hava vanligan bústað í Føroyum. Sama ger seg galdandi fyri eftiransandi koyriroynd eftir treytaða frádøming av koyrirættinum, sbrt. § 70, stk. 1-3, endurtøku av koyrirætti aftan á koyriforboð, sbrt. kapittul 7 a, og endurtøku av koyrirætti eftir treytaleysa frádøming, sbr. kapittul 8, við støði í einum koyrikorti, sum varð útgivið í Føroyum áðrenn frádøming.”

2)   Í § 2 verður sum stk. 3 sett:
“Stk. 3. Koyrikort kann ikki verða útgivið til persónar, hvørs koyrikort í einum øðrum landi er avmarkað, bráðfeingis sett úr gildi ella inndrigið. Hetta er ikki galdandi fyri avmarkingar, sum nevndar eru í fylgiskjali 8.”

3)   Í § 3, stk. 2 verður sum nr. 4 sett:
“4) prógv fyri framdum skeiði í fyrstuhjálp í ferðsluni, sbr. § 21 a.”

4)   Í § 18, verður sum stk. 3 og 4 sett:
”Stk. 3. Landslæknin og Heilsustýrið í Danmark (Sundhedsstyrelsen), eru ummælandi læknafakligir myndugleikar í málum um útgávu, endurnýggjan og varðveitslu av koyrikorti. Læknafakligu vegleiðingarnar hjá Heilsustýrinum í Danmark verða nýttar samsvarandi.
Stk. 4. Í málum um útgávu, endurnýggjan og varðveitslu av koyrikorti, har tað koma fram heilsuligar upplýsingar, sum krevja læknaligar váttanir, ummæli ella metingar, ásetir landsstýrismaðurin í samráð við landslæknan og Akstovuna neyvari leiðreglur fyri viðgerðini av hesum málum.”

5)   Aftaná § 21verður sett:

 

“Kapittul 1 a

Fyrstahjálp í ferðsluni

 

§ 21 a. Umsøkjarar, sum ogna sær koyrikort á fyrsta sinni, skulu hava framt eitt skeið í fyrstuhjálp í ferðsluni.

Stk. 2. Umsøkjarar, sum søkja um útgávu og endurnýggjan av koyrikorti til vinnuligan fólkaflutning til bólkarnar B og D, sbr. § 16, stk. 1-3, og § 52, stk. 5, og útgávu og endurnýggjan av koyrikorti við koyrilæraragóðkenning, sbrt. ferðslulógini, skulu hava framt eitt skeið í fyrstuhjálp í ferðsluni.

Stk. 3. Fyrstahjálparskeiðið í ferðsluni, skal vera framt í samsvari við fylgiskjal 9 í hesi kunngerð og fyriskipað av lærara, ið er góðkendur av Dansk Førstehjælpsråd.

Stk. 4. Tá skeiðið í fyrstuhjálp í ferðsluni er framt, skrivar lærarin eitt skeiðsprógv.

Stk. 5. Tá skeiðsprógv verður latið inn í sambandi við umsókn um koyrikort, má tað í mesta lagi vera eitt ára gamalt.

Stk. 6. Hjá persónum við breki kann Akstovan í serligum førum geva undantaksloyvi frá kravinum um, at partar av fyrstahjálparskeiðinum í ferðsluni, skulu vera framdir. Harafturat kann Akstovan í serligum førum, geva undantak frá kravinum um  fyrstahjálparskeið í ferðsluni, um so er, at umsøkjarin í tí síðsta árinum hevur framt eitt samsvarandi fyrstahjálparskeið, ella um so er, at umsøkjarin í aðramáta verður mettur at hava nóg góðar førleikar og vitan um fyrstuhjálp.

Stk. 7. Stk. 1 og 2 eru ikki galdandi fyri umsøkjarar, sum í tí  síðsta árinum, áðrenn umsókn um koyrikort er latin inn, hava rokkið útbúgvingarstøðið ”høgt”, samsvarandi útbúgvingarmálinum hjá Dansk Førsthjælpsråd, og sum hava fingið undirvísing frá lærara, ið er góðkendur av Dansk Førstehjælpsråd.”

6)   § 32 verður orðað soleiðis:
”§ 32. Áðrenn farið kann vera til verkliga koyriroynd, sbrt. ásetingunum í kapittul 3, skal umsøkjari, sum á fyrsta sinni tekur koyrikort til bólkarnar A, B ella A og B, skjalprógva fyri Akstovuni at hava fingið frálæru í koyring í myrkri, sbrt. frálæruætlanini fyri bólk A ella B. Harafturat skal frálæran í koyring í myrkri fevna um sýning.
Stk. 2. Í minsta lagi 1 verkligur skúlatími skal vera nýttur til sýning á útiøki við lítlari ella ongari ferðslu, har royndirnar hjá bæði fólki til gongu og koyrandi, verða sæddar í røttum samanhangi. Hesin parturin kann verða framdur við í mesta lagi 6 næmingum fyri hvønn koyrilærara. Í minsta lagi 1 verkligur skúlatími skal vera nýttur til sýning á vegi, í veruligum ferðslustøðum við næmingum sum ferðandi. Hesin parturin kann verða framdur við í mesta lagi 2 næmingum í sama skúlavogni.
Stk. 3. Sum meginregla skal frálæra í koyring í myrkri og sýning verða hildin í tíðarskeiðinum 15. september til 15. apríl. Í tíðarskeiðinum 16. apríl til 14. september, kann koyriroynd tó verða hildin og koyrikort útgivið við styttri gildistíð, sbr. § 51, uttan at umsøkjari hevur fingið frálæru í koyring í myrkri og sýning.
Stk. 4. Akstovan kann í heilt serligum føri eftir skrivligari umbøn, um tað snýr seg  um frálæru í koyring í myrkri og sýning í seinnu helvt av apríl ella fyrru helvt av september, víkja frá ásetingini í stk. 3, 1. petti.
Stk. 5. Skjalprógv fyri koyring í myrkri og sýning verður somuleiðis kravt, hóast ásetingina um eftiransandi koyriroynd, sbrt. § 43, stk. 1, nr. 6.”

§ 2

Í fylgiskjølunum til kunngerð nr. 112 frá 29. september 2005 um koyrikort og koyrifrálæru verða hesar broytingar gjørdar: Sí broytingarnar í hjálagda fylgiskjali 1 til hesa kunngerð.

§ 3

 ¹⁾ Henda kunngerð kemur í gildi dagin eftir, at hon er kunngjørd. Tó kemur nr. 6 ikki í gildi fyrr enn 1. apríl 2013, og nr. 3 og nr. 5 og nr. 3 í fylgiskjali 1 í hesi kunngerð koma í gildi hin 1. august 2013.

 

 

Innlendismálaráðið, 11. september 2012

 

Kári P. Højgaard (sign.)
landsstýrismaður

/ Rúni Joensen (sign.)

 

Fylgiskjal 1

 

1)    Fylgiskjal 2 verður orðað soleiðis:

 

”Fylgiskjal 2: Minstakrøv viðvíkjandi kropsligum og sálarligum førleika at koyra motordrivið akfar, sum koyrikort krevst til

 

Allýsing:
1) Í hesum fylgiskjali verða førarar býttir í tveir flokkar:
a) Flokkur 1: Førarar av akførum í bólkunum A, B, B/E og førarar av traktori/motoramboði.
b) Flokkur 2: Førarar av akførum í bólkunum C, C/E, D og D/E og harafturat førarar av akførum í bólkunum B og D, sum verða nýtt til vinnuligan fólkaflutning, eins og førarar, sum biðja um útgávu, endurnýggjan ella varðveitslu av koyrikorti við átekning um góðkenning sum koyrilærari.

 

2) Fyri handhavar av koyrikorti til vinnuligan fólkaflutning til bólk B og koyrikort við átekning um góðkenning sum koyrilærari til bólkarnar A ella B, útgivið áðrenn 1. januar 2006, galda harumframt ásetingarnar í hesum skjali fyri førarar í flokki 1 í sambandi við umsókn um endurnýggjan av slíkum koyrikorti.

 

3) Hvør einstakur, sum biður um útgávu, endurnýggjan ella varðveitslu av koyrikorti, verður lutaður í tann flokk, har viðkomandi hoyrir heima, tá koyrikort er útgivið ella endurnýggjað.

 

A. Sjónin
1) Tann sum biður um koyrikort, skal lata seg kanna av egnum lækna ella serlækna í eygnasjúkum fyri at tryggja, at sjónsansurin er nóg góður til, at viðkomandi kann koyra motordrivið akfar, sum koyrikort krevst til. Kanningin skal leggja serligan dent á: sjónstyrki, sjónvídd, skygni í skýming,viðkvæmi fyri blindni, viðkvæmi við møti (kontrast), dupultsjón og annað sjónvirkni, ið kann vera til vanda fyri ferðslutrygdina.

 

Flokkur 1:
2) Útgáva, endurnýggjan og varðveitsla av koyrikorti hjá umsøkjara og førarum í flokki 1 er treytað av:
a) Umsøkjarin ella førarin skal, um neyðugt við rættleiðandi linsum, hava eina tvíoygda sjónstyrki, sum í minsta lagi er 0,5 á báðum eygum samstundis.
b) Umsøkjarans ella førarans sjónvídd, skal í vatnrættari flatu vera í minsta lagi 120^o, og sjónvinkulin skal í minsta lagi vera 50^o til vinstru og høgru, og 20^o í rætningi uppeftir og niðureftir. Tað má ikki vera útrás innan ein radius uppá 20^o frá meginsjónvíddini.
c) Við sjúku í eygunum, sum er í menning, kann koyrikort bert vera útgivið, endurnýggjað ella varðveitt eftir ummæli frá egnum lækna  ella serlækna í eygnasjúkum og við treyt um einsæris tíðaravmarking.
d) Við blindni í øðrum eyganum, ella dupultsjón, skal sjónstyrkin á síggjandi eyganum, í minsta lagi vera 0,5, møguliga við rættleiðandi linsum. Egin lækni ella serlækni í eygnasjúkum skal vátta, at henda sjónin við tí eina eyganum, hevur verið so leingi, at viðkomandi hevur vant seg við tað, eins og sjónvíddin á tí fríska eyganum lýkur krøvini í litra b.

 

Flokkur 2:
3) Útgáva, endurnýggjan ella varðveitsla av koyrikorti fyri umsøkjarar og førarar í flokki 2, er treytað av:
a) Umsøkjarin ella førarin skal, møguliga við rættleiðandi linsum, hava eina sjónstyrki uppá í minsta lagi 0,8 á tí betra eyganum og í minsta lagi 0,1 á tí veikara eyganum. Rættleiðing av sjónini við nýtslu av brillum má ikki vera hægri enn pluss átta dioptriir. Rættleiðingin eigur at kunna tolast væl.
b) Umsøkjarans ella førarans sjónvídd, skal í vatnrættari flatu vera í minsta lagi 160^o, og sjónvinkulin skal í minsta lagi vera 70^o til vinstru og høgru, og 30^o í rætningi uppeftir og niðureftir. Tað má ikki vera útrás innan ein radius uppá 30^o frá meginsjónvíddini.
c) Umsøkjarin ella førarin má ikki hava skert viðkvæmi við møti (kontrast) ella hava dupultsjón.

 

B. Hoyrnin
1) Við skerda hoyrn, kann koyrikort bert vera útgivið, endurnýggjað ella varðveitt hjá umsøkjarum ella førarum við støði í ummæli frá egnum lækna ella frá serlækna í oyrna-, næsa- og hálssjúkum. Við læknakanningina skulu atlit takast til møguleikarnar fyri ábótum við hoyritóli.

 

C. Ferðugleiki
1) Koyrikort má hvørki vera útgivið, endurnýggjað ella varðveitt hjá umsøkjarum ella førarum, sum bera sjúku ella avlaging í gongu- og handalimum, og sum ger tað hættisligt at lata viðkomandi koyra motordrivið akfar, sum koyrikort krevst til.

 

Flokkur 1:
2) Við kropsligt brek, kann koyrikort vera útgivið, endurnýggjað ella varðveitt, møguliga við serligum treytum, eftir ummæli frá egnum lækna ella serlækna í ortopedkirurgi, reumatologi ella aðrari viðkomandi sergrein. Ummælið skal taka støði í eini læknaligari meting av sjúkuni ella avlagingini hjá viðkomandi. Tá tað hevur týdning, skal ummælið hava ískoyti við tilskilan av, hvussu akfarið kann vera tillagað føraranum, og/ella um ortopediskur hjálparlimur (protesta) skal vera nýtt, um staðfest verður, at koyringin við hjálparlimi (protesu) kann fara fram á trygdargóðan hátt. Ummælið kann mæla til eina vegleiðandi heilsuliga koyriroynd.

 

3) Koyrikort kann vera útgivið, endurnýggjað ella varðveitt við sjúku, sum er í menning, eftir ummæli frá egnum lækna ella serlækna í ortopedkirurgi, reumatologi ella aðrari viðkomandi sergrein, við treyt um einsæris ásetta tíðaravmarking fyri at meta, um umsøkjarin ella førarin framvegis uttan vanda kann koyra motordrivið akfar, sum koyrikort krevst til.

 

4) Koyrikort kann vera útgivið, endurnýggjað ella varðveitt uttan krav um serliga tíðaravmarking, tá javnvág er í brekinum.

 

Flokkur 2:
5) Koyrikort kann vera útgivið, endurnýggjað ella varðveitt samsvarandi ásetingunum fyri flokk 1. Læknin skal serliga meta um teir eyka vandar, ið tengdir eru at koyring við akførum í hesum flokki.

 

D. Hjarta- og æðrasjúkur
1) Hevur tann, sum biður um útgávu, endurnýggjan ella varðveitslu av koyrikorti, sjúkur í hjarta ella blóðrenslinum, sum brádliga kunnu ávirka heilavirknið, kunnu hesar vera vandamiklar fyri ferðslutrygdina.

 

Flokkur 1:
2) Koyrikort má hvørki vera útgivið, endurnýggjað ella varðveitt hjá umsøkjarum ella førarum, sum líða av álvarsomum órógvi í hjartaslagnum.

 

3) Koyrikort má hvørki vera útgivið, endurnýggjað ella varðveitt hjá umsøkjarum ella førarum, sum eru sjúkir av bringutaki (angina pectoris), tá teir eru í hvíld ella við sinnisrørslu.

 

4) Koyrikort kann bert verða útgivið, endurnýggjað ella varðveitt við støði í ummæli frá egnum lækna ella serlækna í hjartasjúkum, møguliga við treyt um einsæris ásetta tíðaravmarking, fyri umsøkjarar og førarar:
a) ið nýta hjartakvikil (pacemaker), ICD ella líknandi tól,
b) har ólag er á blóðtrýstinum, og har ólagið á blóðtrýstinum hevur ført við sær eftirsjúkur ella aðrar sjúkur, sum kunnu vera til vanda fyri ferðslutrygdina,
c) ið innan fyri tey síðstu 5 árini hava havt hjartatilburð (-infarkt),
d) ið hava ella hava havt skert hjartavirkni/hjartasvík, ella
e) hava fingið skurðviðgerð í hjartanum, herundir hjartaflutning (-transplantión).

 

Flokkur 2:
5) Koyrikort kann vera útgivið, endurnýggjað ella varðveitt samsvarandi ásetingunum fyri flokk 1, tó bert eftir ummæli frá serlækna í hjartasjúkum (kardiologi). Læknin skal serliga meta um teir eyka vandar, ið eru tengdir at koyring við akførum, sum eru flokkaði í hesum flokki.

 

E. Diabetes
1) Í pørtunum niðanfyri, verður álvarsliga lágt blóðsukur (hypoglykæmi), allýst sum ein støða, ið krevur hjálp frá einum øðrum persóni. Ein persónur verður mettur at líða av afturvendandi álvarsliga lágum blóðsukri (recidiverandi hypoglykæmi), tá viðkomandi hevur havt meira enn ein tilburð av álvarsliga lágum blóðsukri, í einum tíðarskeiði uppá 12 mánaðir.

 

Flokkur 1:
2) Koyrikort kann bert vera útgivið, endurnýggjað ella varðveitt hjá umsøkjarum ella førarum við diabetes, eftir ummæli frá egnum lækna ella serlækna í internum medisini við serligum kunnleika til diabetes, og um:
a) umsøkjarin ella førarin ikki líða av afturvendandi álvarsliga lágum blóðsukri (hypoglykæmi) og/ella manglandi fatan av støðuni, og
b) umsøkjarin ella førarin við læknakanningina sanna, at viðkomandi skilir vandan í sambandi við lágt blóðsukur (hypoglykæmi), og er førur fyri sjálvur at hava eftirlit við sjúkuni á ein nøktandi hátt.

 

3) Koyrikort kann vera útgivið, endurnýggjað ella varðveitt við treyt um einsæris ásetta tíðaravmarking á í mesta lagi 5 ár, tó hægst 3 ár, um umsøkjarin verður viðgjørdur við heilivági (tvs. insulin og/ella møguliga øðrum heilivági), sum hevur við sær vanda fyri tilburði við lágum blóðsukri (hypoglykæmi).

 

Flokkur 2:
4) Koyrikort kann sambært ásetingunum fyri flokk 1, sbr. pkt. 2 og 3, verða útgivið, endurnýggjað ella varðveitt hjá umsøkjarum ella førarum, sum hava diabetes, um so er, at viðkomandi ikki verður viðgjørdur við heilivági, sum hevur við sær vanda fyri lágum blóðsukri (hypoglykæmi). Verður viðgjørt við heilivági, sum ikki hevur við sær vanda fyri lágum blóðsukri (hypoglykæmi), verður tíðaravmarkingin tó ásett til í mesta lagi 3 ár.

 

5) Koyrikort kann bert í heilt serligum førum vera útgivið, endurnýggjað ella varðveitt hjá umsøkjarum ella førarum, ið eru í viðgerð við heilivági (tvs. insulin og/ella møguliga øðrum heilivági), sum hevur við sær vanda fyri tilburði við lágum blóðsukri (hypoglykæmi), og tá eftir ummæli frá serlækna í internum medisini við serligum kunnleika til diabetes. Í metingini skal vera tikið serligt atlit til slag av diabetes og koyrikortbólk, eins og støðuleika í sjúkuni. Útgáva, endurnýggjan ella varðveitsla av koyrikorti, fer fram við treyt um einsæris ásetta tíðaravmarkan upp á í mesta lagi 3 ár og í minsta lagi undir hesum fortreytum:
a) tað hevur ikki verið tilburður av álvarsliga lágum blóðsukri (hypoglykæmi), seinasta 12 mánaðar tíðarskeiðið,
b) umsøkjarin ella førarin kann fata og reagera upp á ávaringar um sjúkueyðkenni fyri nærverandi lágt blóðsukur,
c) umsøkjarin ella førarin við læknakanningina sannar, at vera førur fyri sjálvur at hava eftirlit við sjúkuni við regluligum mátingum av blóðsukurhæddini, í minsta lagi 2 ferðir dagliga og í tíðarbilum, tá viðkomandi skal koyra,
d) umsøkjarin ella førarin við læknakanningina sannar, at hann skilur vandan í sambandi við lágt blóðsukur, og
e) tað ikki eru aðrar eftirsjúkur (t.d. sjónviknan, nervasjúka (neuropati) ella kognitiv viknan) í sambandi við diabetessjúkuna, sum kunnu føra við sær týðandi váða fyri ferðslutrygdina.

 

F. Nervasjúkufrøðiligar sjúkur (epilepsi v.m)
1) Hjá umsøkjarum ella førarum, sum hava nervasjúkufrøðiligar sjúkur, ið viðføra kognitiv ella kropslig eyðkenni, kann koyrikort bert vera útgivið, endurnýggjað ella varðveitt, um so er, at umbønin er stuðlað av einum læknaummæli. Har annað ikki er ásett, skal ummælið vera givið av einum serlækna í nervasjúkufrøði. Er vandi fyri, at sjúkan versnar, verður koyrikort útgivið, endurnýggjað ella varðveitt við treyt um einsæris ásetta tíðaravmarkan. Í hesum sambandi, skal læknin í síni meting taka hædd fyri vandanum fyri menning í nervasjúkufrøðiligum óvirkni, sum er orsakað av sjúkum, løstum ella skurðviðgerðum í meginnervalagnum ella í tí perifera nervalagnum, og sum kunnu viðføra kognitiv óvirkni ella funktiónsóvirkni, herundir ávirkan á rørslur, kenslur, balansur og koordinatión.

 

2) Herðindi av epilepsi og onnur álvarssom tilvitskuóløg eru ein týðandi vandi fyri ferðslutrygdina, um herðindini berast á, meðan sjúklingurin koyrir eitt motordrivið akfar.

 

3) Epilepsi verður allýst sum ein støða, har ein persónur hevur havt tvey ella fleiri epileptisk herðindi í einum tíðarskeiði, sum er minni enn 5 ár. Eitt provokerað epileptiskt herðindi verður allýst sum eitt herðindi, sum eftir øllum at døma stendst av eini kendari orsøk, sum kann umgangast.

 

Flokkur 1:
4) Hjá umsøkjarum ella førarum, ið hava havt eitt einstakt provokerað epileptisk herðindi orsakað av eini kendari provokerandi atvold, sum eftir øllum sannlíkindum ikki vil koma fyri undir koyring, kann koyrikort vera útgivið, endurnýggjað ella varðveitt eftir ummæli frá serlækna í nervasjúkufrøði ella nervaskurðfrøði.

 

5) Hjá umsøkjarum ella førarum, ið hava havt eitt einstakt provokerað epileptiskt herðindi í øðrum førum enn teimum í pkt. 4 nevndu, kann koyrikort bert verða útgivið, endurnýggjað ella varðveitt, eftir eitt tíðarskeið uppá í minsta lagi 6 mánaðir uttan herðindir, og tá eftir ummæli frá serlækna í nervasjúkufrøði. Í heilt serligum førum, kann koyrikort tó verða útgivið, endurnýggjað ella varðveitt, áðrenn hetta tíðarskeið, um so er, at serlig heilsufaklig viðurskifti tala fyri hesum.

 

6) Hevur umsøkjari ella førari verið úti fyri tapi av tilviti í øðrum føri enn teimum í pkt. 4 og 5 nevndu, kann koyrikort vera útgivið, endurnýggjað ella varðveitt eftir ummæli frá egnum lækna ella serlækna í viðkomandi sergrein um vandan fyri endurtøku undir koyring.

 

7) Fyri umsøkjarar ella førarar við epilepsi kann koyrikort bert vera útgivið, endurnýggjað ella varðveitt við treyt um einsæris ásetta tíðaravmarking, til umsøkjarin ella førarin hevur verið uttan tilburð í minsta lagi 5 í ár. Hevur umsøkjarin ella førarin havt tilburð innan fyri tey seinastu 2 árini, verður koyrikort útgivið, endurnýggjað ella varðveitt við tíðaravmarking uppá í mesta lagi 2 ár. Hevur umsøkjarin ella førarin ikki havt tilburð innan fyri tey seinastu 2 árini, men tó innan fyri tey seinastu 5 árini, verður koyrikort útgivið, endurnýggjað ella varðveitt við eini tíðaravmarking uppá í mesta lagi 3 ár.

 

8) Hjá umsøkjarum ella førarum, sum hava epilepsi, kann koyrikort bert vera útgivið, endurnýggjað ella varðveitt eftir 1 ár uttan fleiri tilburðir, tá viðkomandi hevur fingið fyribyrgjandi viðgerð móti epilepsi í minsta lagi í 6 mánaðir. Sama ger seg galdandi eftir skurðviðgerð móti epilepsi. Hjá umsøkjarum ella førarum, sum ikki ynskja at taka ímóti antiepileptiskari (herðindifyribyrgjandi) viðgerð, kann koyrikort í fyrsta lagi vera útgivið, endurnýggjað ella varðveitt eftir 2 árum uttan fleiri tilburðir.

 

9) Hjá umsøkjarum ella førarum, sum hava epilepsi og sum bert hava havt herðindi, meðan sovið verður, kann koyrikort tó vera útgivið, endurnýggjað ella varðveitt, tá hetta mynstrið av herðindum hevur vart í einum tíðarbili uppá í minsta lagi 2 ár. Hetta skal váttast av egnum lækna ella serlækna í nervasjúkufrøði. Um tað heilsufakliga er ráðiligt, kann koyrikort vera útgivið, endurnýggjað ella varðveitt, við eini tíðaravmarking, sum er longri enn tann í pkt. 7 nevnda.

 

10) Hjá umsøkjarum ella førarum, sum hava epilepsi, og sum ikki hava havt herðindi, burtursæð frá herðindi, har tað er próvfast, at herðindi hvørki hevur ávirkað vitið ella ført við sær skert funktiónsevni, kann koyrikort harumframt vera útgivið, endurnýggjað ella varðveitt, tá hetta mynstrið av herðindum hevur vart í einum tíðarskeiði uppá í minsta lagi 2 ár. Hetta skal váttast av egnum lækna ella serlækna í nervasjúkufrøði. Um tað heilsufakliga er ráðiligt, kann koyrikort verða útgivið, endurnýggjað ella varðveitt, við eini tíðaravmarking, sum er longri enn tann í pkt. 7 nevnda.

 

Flokkur 2:
11) Hjá umsøkjarum ella førarum, sum hava epilepsi, kann koyrikort bert verða útgivið, endurnýggjað ella varðveitt eftir eitt tíðarskeið uttan herðindi, sum í minsta lagi er 10 ár uttan antiepileptiska (herðindifyribyrgjandi) viðgerð. Umsøkjarin ella førarin skal skjalprógva at hava verið til regluligt eftirlit hjá egnum lækna ella serlækna í nervasjúkufrøði. Ein nervasjúkufrøðilig serlæknakanning má ikki hava víst nakað slag av sjúkueyðkenni í heilanum (cerebral patologi), og eitt elektroencefalografi (EEG) má ikki hava víst nakað slag av epileptiskum virksemi. Í heilt serligum førum kann koyrikort vera útgivið, endurnýggjað ella varðveitt áðrenn hetta tíðarskeið, um so er, at serlig heilsufaklig viðurskifti tala fyri hesum.

 

12) Hjá umsøkjarum ella førarum, ið hava havt eitt einstakt provokerað epileptiskt herðindi orsakað av eini kendari provokerandi atvold, sum eftir øllum sannlíkindum ikki vil koma fyri undir koyring, kann koyrikort bert vera útgivið, endurnýggjað ella varðveitt eftir ummæli frá serlækna í nervasjúkufrøði ella nervaskurðfrøði. Til staðar skal vera eitt EEG og ein nervasjúkufrøðilig serlæknakanning.

 

13) Hjá umsøkjarum ella førarum, ið hava havt eitt einstakt óprovokerað epileptiskt herðindi, kann koyrikort vera útgivið, endurnýggjað ella varðveitt eftir eitt tíðarskeið uttan herðindi uppá 5 ár, uttan antiepileptiska (herðindifyribyrgjandi) viðgerð og eftir ummæli frá serlækna í nervasjúkufrøði. Í heilt serligum førum kann koyrikort vera útgivið, endurnýggjað ella varðveitt hjá umsøkjarum ella førarum áðrenn hetta tíðarskeið, um so er, at serlig heilsufaklig viðurskifti tala fyri hesum.

 

14) Hjá umsøkjarum ella førarum, ið hava havt annað álvarssamt tilvitskuólag, herundir hava mist vitið, kann koyrikort bert vera útgivið, endurnýggjað ella varðveitt, um so er, at vandin fyri endurtøku eftir ummæli frá egnum lækna ella serlækna í viðkomandi sergrein verður mett at vera í mesta lagi 2% um árið.

 

15) Hjá umsøkjarum ella førarum, sum hava órógv, ið førir við sær øktan vanda fyri herðindi (t.d. arteriuvenøsa avlagan, intracerebrala bløðing ella onnur bygnaðarlig viðurskifti), óansæð um tað enn ikki hava verið herðindi, kann koyrikort bert vera útgivið, endurnýggjað ella varðveitt eftir ummæli frá serlækna í nervasjúkufrøði ella nervaskurðfrøði. Vandin fyri herðindi skal metast at vera í mesta lagi 2% um árið.

 

16) Hjá umsøkjarum ella førarum, sum hava ein bygnaðarligan intracerebralan løst, sum hevur við sær øktan vanda fyri herðindi, kann koyrikort bert vera útgivið, endurnýggjað ella varðveitt, um vandin fyri epilepsi uttan antiepileptiskari (herðindifyribyrgjandi) viðgerð eftir ummæli frá serlækna í nervasjúkufrøði ella nervaskurðfrøði, verður mettur at vera í mesta lagi 2% um árið.

 

G. Sinnisligar sjúkur ella veikleikar
1) Kanningar av kognitivum funktiónsstøði (urskivukanning og at minnast orð) eru kravdar tá koyrikort verður endurnýggjað frá 70 ára aldri, men skal eisini fremjast fyri onnur, har grundaður illgruni er um viknað kognitivt funktiónsstøði.

 

2) Við kognitiva viknan, skal umsøkjarin ella førarin vera ávístur av egnum lækna ella serlækna í sálarsjúkum/geriatri ella í nervasjúkum til eina vegleiðandi heilsuliga roynd.

 

Flokkur 1:
3) Koyrikort kann bert vera útgivið, endurnýggjað ella varðveitt, eftir ummæli frá egnum lækna ella serlækna í viðkomandi sergrein og møguliga við treyt um einsæris ásetta tíðaravmarking hjá umsøkjarum og førarum,
a) sum hava álvarsamt sinnisligt ólag, viðføtt ella komið av sjúkum, skaðum ella nervaskurðsfrøðiligum inntrivi,
b) sum eru álvarsliga andliga brekaði,
c) sum hava álvarssama ellisviknan, eitt álvarsligt viknað dømievni, atferð ella tillagingarevni, sum er knýtt at persónmenskuni.

 

Flokkur 2:
4) Koyrikort kann vera útgivið, endurnýggjað ella varðveitt samsvarandi ásetingunum í 1. flokki. Egin lækni ella serlækni í viðkomandi sergrein skal serliga ummæla teir eyka vandar, ið tengdir eru at koyring við akførum í hesum flokki.

 

H. Rúsdrekka, rúseitur og heilivágur

 

Rúsdrekka
1) Nýtsla av rúsdrekka er ein týðandi váði fyri ferðslutrygdina. Orsakað av álvarseminum við trupulleikanum, má tað frá lækna síðu verða víst størsta eftiransni.

 

Flokkur 1:
2) Koyrikort má hvørki vera útgivið, endurnýggjað ella varðveitt hjá umsøkjarum ella førarum, sum eru bundnir av rúsdrekkanýtslu, ella sum ikki kunnu skilja í millum koyring við bili og nýtslu av rúsdrekka.

 

3) Hjá umsøkjarum ella førarum, sum hava verið tráir drykkjumenn (alkoholafhængighedssyndrom), kann koyrikort bert vera útgivið, endurnýggjað ella varðveitt eftir eitt tíðarbil, har tað er próvfast, at teir hava verið fráhaldandi, og eftir ummæli frá egnum lækna ella serlækna í sálarfrøði, við treyt um einsæris ásetta tíðarfreist.

 

Flokkur 2:
4) Koyrikort kann vera útgivið, endurnýggjað ella varðveitt samsvarandi ásetingunum í 1. flokki.  Læknin skal ummæla teir eyka vandar, ið tengdir eru at koyring við  akførum í hesum flokki.

 

Rúseitur og heilivágur

 

Misnýtsla:
5) Koyrikort má hvørki vera útgivið, endurnýggjað ella varðveitt hjá umsøkjarum ella førarum, sum regluliga nýta dusandi evni ella onnur evni, sum ávirka sinnið, uttan mun til hvønn koyrikortbólk biðið verður um.

 

Reglulig nýtsla:
Flokkur 1:
6) Koyrikort má hvørki vera útgivið, endurnýggjað ella varðveitt hjá umsøkjarum ella førarum, sum regluliga nýta dusandi evni ella heilivág fyri sinnið, uttan mun til slag, tá hesi kunnu skerja evnini hjá viðkomandi at koyra motordrivið akfar, sum koyrikort krevst til, uttan váða, og um nýtslan er so stór, at hon ávirkar koyringina skeiva vegin. Sama ger seg galdandi fyri allan annan heilivág ella blandingar av heilivági, sum ávirka evnini at koyra motordrivið akfar, sum koyrikort krevst til.

 

Flokkur 2:
7) Koyrikort kann vera útgivið, endurnýggjað ella varðveitt samsvarandi ásetingunum í 1. flokki. Egin lækni ella serlækni í viðkomandi sergrein skal serliga ummæla teir  eyka vandar, ið tengdir eru at koyring við akførum í hesum flokki.

 

I. Nýrasjúkur

 

Flokkur 1:
1) Hjá umsøkjarum ella førarum, sum eru sjúkir av álvarsomum nýrasvíkvirki, kann koyrikort bert vera útgivið, endurnýggjað ella varðveitt eftir ummæli frá egnum lækna ella serlækna í internum medisini og við treyt um einsæris ásetta tíðaravmarking.

 

Flokkur 2:
2) Hjá umsøkjarum ella førarum, sum eru sjúkir av álvarsomum nýrasjúkum, ið ikki bøtast, kann koyrikort bert vera útgivið, endurnýggjað ella varðveitt í serligum førum eftir ummæli frá egnum lækna ella serlækna í internum medisini og við treyt um einsæris ásetta tíðaravmarking.

 

J. Annað
1) Hjá umsøkjarum ella førarum, sum hava aðrar sjúkur enn tær, sum eru nevndar í pkt. A-I, og sum kunnu skerja evnini til á trygdargóðan hátt at koyra motordrivið akfar, sum koyrikort krevst til, kann koyrikort bert vera útgivið, endurnýggjað ella varðveitt eftir ummæli frá egnum lækna ella serlækna í viðkomandi sergrein og um neyðugt við treyt um einsæris ásetta tíðaravmarking.

 

Flokkur 1:
2) Hjá umsøkjarum ella førarum, sum hava fingið vevnaðarflutt yrkisgøgn ella vevnaðarísett eftirgjørd yrkisgøgn, sum kunna ávirka evnini at koyra motordrivið akfar, sum koyrikort krevst til, kann koyrikort vera útgivið, endurnýggjað ella varðveitt eftir ummæli frá egnum lækna ella serlækna í viðkomandi sergrein og um neyðugt við  treyt um einsæris ásetta tíðaravmarking.

 

Flokkur 2:
3) Koyrikort kann vera útgivið, endurnýggjað ella varðveitt samsvarandi ásetingunum í 1. flokki. Egin lækni ella serlækni í viðkomandi sergrein, skal serliga ummæla teir eyka vandar, ið tengdir eru at koyring við akførum í hesum flokki.”

 

2)   Í fylgiskjali 5, Reglur fyri akfør, sum skulu nýtast til venjingarakstur og verkliga koyriroynd, I. Skoðan og góðkenning verður 1. pkt. orðað soleiðis:

”Akfar, sum verður nýtt til royndarakstur og verkliga koyriroynd, skal skoðast, góðkennast og skrásetast á Akstovuni sum skúlaakfar, áðrenn tað verður tikið í nýtslu.”

3)   Aftaná Fylgiskjal 8 verður sett:

 

”Fylgiskjal 9: Ásetingar um skeið í fyrstuhjálp í ferðsluni

 

I. Endamál
Endamálið er at veita luttakaranum ta vitan, tann dugnaskap og tann hugburð, sum ger viðkomandi føran fyri at veita fyrstuhjálp í sambandi við ferðsluvanlukkur.

 

II. Útbúgvingarmál
Tá skeiðið er lokið, skal skeiðluttakarin kunna:

 

-     bera seg hóskandi at á einum skaðastaði, undir hesum megna at viðgera fleiri skaddar persónar og taka neyðugt fyrivarni fyri, ikki sjálvur at koma til skaða,

-     veita grundleggjandi uppafturlíving hjá persóni, sum ikki dregur andan og er uttan lívstekin,

-     veita fyrstuhjálp fyri eyðkendum skaðum í sambandi við ferðsluvanlukkur, og

-     fyribyrgja skelki, og undir hesum tosa róliga við tann/tey skaddu.

 

III. Útbúgvingarvavið
Skeiðið fevnir um frálæru í 7 tímar, nevniliga 3 tímar í grundleggjandi uppafturlíving og 4 tímar í fyrstuhjálp í ferðsluni.

 

IV. Fremjan
Frálæran í fyrstuhjálp í ferðsluni, skal fara fram í samsvari við frálæruætlanirnar hjá Dansk Førstehjælpsråd um grundleggjandi uppafturlíving og fyrstuhjálp í ferðsluni.

 

Frálæran skal vera fyriskipað av lærara, ið er góðkendur av Dansk Førstehjælpsråd.

 

Dentur skal í frálæruni vera lagdur á, hvussu ein í veruleikanum eigur at bera seg at á einum skaðastaði. Frálæra við dømum og dugnaskapi, skal vera bygd á eyðkend sløg av vanlukkum og skaðum, sum kunnu koma fyri á einum skaðastaði á ferðslulógarinnar øki.

 

Fyrstahjálparskeiðið í ferðsluni, skal fevna um lutmál av fyribyrgjandi slagi, fyri at geva skeiðsluttakaranum vitan um tey vanlukkufyribyrgjandi tiltøk, ið kunnu setast í samband við nýtsluna av einum akfari hjá tí, sum hevur ognað sær koyrikort.

 

V. Skeiðsprógv
Tá fyrstahjálparskeiðið í ferðsluni er lokið, skrivar lærarin eitt skeiðsprógv.”