Skrivar tú trygging verður eisini leitað eftir øðrum endingum av orðinum sum t.d. tryggingar og tryggingarvirksemi.
Skrivar tú ?trygging verður leitað eftir orðum sum t.d. lívstrygging og lívstryggingar.
Skrivar tú ”trygging” verður einans leitað eftir júst hesum sniðnum av orðinum.
17. september 2024Nr. 97
Kunngerð um skráseting og almannakunngering av upplýsingum um eigarar í vinnufyritøkum í kt-skipan Skráseting Føroya
Við heimild í § 12, stk. 1 og 2, § 55, stk. 3, § 56, stk. 2, 3. pkt., § 57 a, stk. 6, § 58 a, stk. 9 og § 319, stk. 4 í løgtingslóg nr. 73 frá 31. mai 2011 um parta- og smápartafeløg (Vinnufelagalógin), sum broytt við løgtingslóg nr. 56 frá 6. mai 2016, løgtingslóg nr. 44 frá 26. apríl 2019, løgtingslóg nr. 45 frá 26. apríl 2019, og løgtingslóg nr. 19 frá 26. mars 2024, og § 15 f og § 15 g, stk. 9 í anordning nr. 1114 af 20. september 2007 om ikrafttræden for Færøerne af lov om visse erhvervsdrivende virksomheder (Vinnufyritøkulógin), sum broytt við løgtingslóg nr. 44 frá 26. apríl 2019, løgtingslóg nr. 45 frá 26. apríl 2019 og løgtingslóg nr. 19 frá 26. mars 2024, og § 56 b, stk. 8 í anordning nr. 1113 af 20. september 2007 om ikrafttræden for Færøerne af lov om erhvervsdrivende fonde, sum broytt við løgtingslóg nr. 45 frá 26. apríl 2019 og løgtingslóg nr. 19 frá 26. mars 2024, og § 17, stk. 10 í løgtingslóg nr. 55 frá 9. juni 2008 um tryggingarvirksemi, sum broytt við løgtingslóg nr. 45 frá 26. apríl 2019 og løgtingslóg nr. 19 frá 26. mars 2024, og í § 36 b, stk. 9 í løgtingslóg nr. 190 frá 18. desember 2020 um fyribyrgjandi tiltøk ímóti hvítvaski av vinningi og fígging av yvirgangi (Hvítvasklógin), sum broytt við løgtingslóg nr. 69 frá 22. mai 2023, verður ásett:
Kapittul 1
Eigaraupplýsingar í feløgum sambært vinnufelagalógini
Løgligir eigarar
Fráboðan til kapitalfelagið um týðandi kapitalpostar
§ 1. Ein og hvør, sum hevur ræði á kapitalpørtum í einum kapitalfelagi, skal boða felagnum frá um týðandi kapitalpostar sambært § 55, stk. 1 í vinnufelagalógini. Fráboðanin skal verða latin felagnum í seinasta lagi 2 vikur eftir, at eitt av mørkunum í § 55, stk. 1 í vinnufelagalógini verður rokkið ella ikki longur er rokkið. Felagið førir upplýsingarnar í eigarabókina.
Stk. 2. Fráboðanin hjá kapitaleigaranum til felagið skal fevna um tær upplýsingar, sum nevndar eru í § 56, stk. 2 í vinnufelagalógini.
§ 2. Ein og hvør, sum hevur ræði á partabrøvum, sum verða handlað á einum reguleraðum marknaði ella á einum multilateralum handilsfasiliteti, og sum sambært reglum, ásettar við heimild í § 29, stk. 4 í anordning om ikrafttræden for Færøerne af lov om værdipapirhandel m.v., er undantikin frá skylduni um at boða kapitalfelagnum frá sambært § 29, stk. 1 í sama anordningi, og er heldur ikki fevndur av skylduni um at boða kapitalfelagnum frá um týðandi kapitalpostar eftir § 55, stk. 1 í vinnufelagalógini, sbr. tó stk. 2.
Stk. 2. Hóast stk. 1, skal fráboðan altíð gevast eftir § 55, stk. 1 í vinnufelagalógini, tá ognarmarkið upp á 100% verður rokkið ella ikki longur er rokkið.
Skráseting av týðandi kapitalpostum
§ 3. Eitt kapitalfelag skal skjótast gjørligt, eftir at felagið hevur fingið fráboðan eftir § 1, stk. 1, skráseta upplýsingarnar í kt-skipan Skráseting Føroya.
Stk. 2. Tá ið eitt kapitalfelag verður stovnað, skal felagið skráseta upplýsingar sambært § 1, stk. 1 í kt-skipan Skráseting Føroya, í seinasta lagi samstundis við skrásetingina av felagnum. Eru ongir kapitaleigarar, sum hava ræði á týðandi kapitalpørtum, ella ber ikki til at eyðmerkja nakrar slíkar eigarar, skal hetta somuleiðis skrásetast í seinasta lagi samstundis við skrásetingina av felagnum, sambært § 58, stk. 1 og § 9 í vinnufelagalógini.
Stk. 3. Staðfestir eitt kapitalfelag, at tað ikki longur hevur kapitaleigarar, sum hava ræði á týðandi kapitalpostum í felagnum, skal hetta skrásetast skjótast gjørligt í kt-skipan Skráseting Føroya.
Stk. 4. Kapitalfelagið skal skjótast gjørligt skráseta eina og hvørja broyting í teimum upplýsingum, sum eru fráboðaðar sambært stk. 1, um broytingin hevur við sær, at mørkini í § 55, stk. 1 í vinnufelagalógini verða rokkin ella ikki longur eru rokkin.
Skráseting av smærri nøgd av handhavapartabrøvum
§ 4. Ognari av einum ella fleiri handhavapartabrøvum í einum partafelagi, sum tilsamans hevur minni enn 5% av atkvøðurættinum hjá felagskapitalinum ella minni enn 5% av felagskapitalinum, skal í seinasta lagi 2 vikur eftir útveganina lata seg skráseta í kt-skipan Skráseting Føroya, sbr. tó § 57 a, stk. 4 í vinnufelagalógini.
Stk. 2. Skrásetingin sambært stk. 1, skal fevna um tær upplýsingar, sum nevndar eru í § 57 a, stk. 2 í vinnufelagalógini.
Stk. 3. Tá ið eitt ella fleiri handhavapartabrøv, sum eru skrásett sambært stk. 1, verða avhendað, skal tað í seinasta lagi 2 vikur eftir hetta skrásetast í kt-skipan Skráseting Føroya, at tann, ið hevur avhendað partabrøvini, ikki longur hevur tey, eins og avhendingardagurin skal skrásetast, sbr. tó § 57 a, stk. 4 í vinnufelagalógini.
Veruligir eigarar
§ 5. Kapitalfeløg skulu savna upplýsingar um felagsins veruligu eigarar, heruppií upplýsingar um rættindi hjá veruligu eigarunum sambært § 58 a, stk. 1 í vinnufelagalógini.
Stk. 2. Rættindini kunnu fevna um:
1) Kapitalpartar í kapitalfelagnum, sum viðkomandi beinleiðis ella óbeinleiðis eigur, heruppií møguligir kapitalpartar, og møguliga hvønn partabrævaflokk, teir hoyra til.
2) Ræði á annan hátt.
§ 6. Kapitalfelagið skal skráseta teir veruligu eigararnar og upplýsingarnar um, hvussu tann veruligi ognarrætturin er samansettur, í kt-skipan Skráseting Føroya, sbr. § 5, stk. 2. Dagfestingin fyri nær veruligi ognarrætturin er íkomin og møguliga hildin uppat, skal eisini skrásetast.
Stk. 2. Eigur ein persónur kapitalpartar, skal samlaða talið á kapitalpørtum, býtt á atkvøðurætt og kapital, skrásetast. Til ræði verður íroknað:
1) Kapitalpartar, har atkvøðurætturin er í luti hjá einari fyritøku, sum viðkomandi hevur ræði á.
2) Kapitalpartar, sum viðkomandi hevur sett sum trygd, uttan so, at veðhavari hevur ræði á atkvøðurættinum og boðar frá, at ætlanin er at brúka rættin.
Stk. 3. Eru kapitalpartar ogn gjøgnum eina røð av fyritøkum, sum ræði er á, skal hendan upplýsing skrásetast.
Stk. 4. Hevur kapitalfelagið ikki ella kann felagið ikki eyðmerkja veruligar eigarar, skal stjórn felagsins skrásetast sum veruligur eigari.
Stk. 5. Kapitalfelagið skal skráseta upplýsingarnar um veruligu eigararnar, heruppií upplýsingar um rættindini hjá veruligu eigarunum, í kt-skipan Skráseting Føroya, skjótast gjørligt eftir, at felagið er vorðið kunnugt við, at ein persónur er blivin veruligur eigari, og eftir hvørja broyting í frammanundan skrásettum upplýsingum.
Kapittul 2
Eigaraupplýsingar í fyritøkum sambært vinnufyritøkulógini
Løgligir eigarar
Fráboðan til kommandittfelagið um týðandi eigarapartar
§ 7. Ein og hvør, sum eigur ognarpartar í einum kommandittfelagi, sum er skrásetingarskyldugt sambært § 2, stk. 3, nr. 2 í vinnufyritøkulógini, skal boðað kommanditfelagnum frá um týðandi eigarapartar sambært § 55, stk. 1 í vinnufelagalógini, sbr. § 15 f í vinnufyritøkulógini. Fráboðanin skal verða latin kommandittfelagnum í seinasta lagi 2 vikur eftir, at eitt av mørkunum í § 55, stk. 1 í vinnufelagalógini verður rokkið ella ikki longur er rokkið.
Stk. 2. Eigarans fráboðan til kapitalfelagið skal fevna um tær upplýsingar, sum nevndar eru í § 56, stk. 2 í vinnufelagalógini, sbr. § 15 f í vinnufyritøkulógini.
§ 8. Ein og hvør, sum hevur ræði á eigarapørtum, sum verða handlaðir á einum reguleraðum marknaði ella á einum multilateralum handilsfasiliteti, og sum sambært reglum, ásettar við heimild í § 29, stk. 4 í anordning om ikrafttræden for Færøerne af lov om værdipapirhandel m.v., er undantikin frá skylduni um at boða kommandittfelagnum frá sambært § 29, stk. 1 í sama anordningi og er heldur ikki fevndur av skylduni um at boða kommandittfelagnum frá um týðandi eigarapartar eftir § 55, stk. 1 í vinnufelagalógini, sambært § 15 f í vinnufyritøkulógini, sbr. tó stk. 2.
Stk. 2. Hóast stk. 1, skal fráboðan altíð gevast eftir § 55, stk. 1 í vinnufelagalógini, sambært § 15 f í vinnufyritøkulógini tá ognarmarkið upp á 100% verður rokkið ella ikki longur er rokkið.
Skráseting av týðandi eigarapørtum
§ 9. Eitt kommanditfelag, ið er skrásetingarskyldugt sambært § 2, stk. 3, nr. 2 í vinnufyritøkulógini, sum hevur móttikið fráboðan um týðandi eigarapartar, sambært § 7, stk. 1, skal skjótast gjørligt eftir móttøkuna, skráseta upplýsingarnar í kt-skipan Skráseting Føroya.
Stk. 2. Tá ið eitt kommanditfelag, ið er skrásetingarskyldugt sambært § 2, stk. 3, nr. 2 í vinnufyritøkulógini verður stovnað, skal kommanditfelagið skráseta upplýsingar sambært § 7, stk. 1 í kt-skipan Skráseting Føroya, í seinasta lagi samstundis við skrásetingina av kommanditfelagnum. Eru ongir eigarar, sum hava ræði á týðandi eigarapørtum, ella ber ikki til at eyðmerkja nakrar slíkar eigarar, skal hetta somuleiðis skrásetast í seinasta lagi samstundis við skrásetingina av kommanditfelagnum sambært § 58, stk. 1 og § 15 f í vinnufyritøkulógini.
Stk. 3. Staðfestir eitt kommanditfelag, at tað ikki longur hevur eigarar, sum hava ræði á týðandi eigarapørtum í felagnum, skal hetta skrásetast skjótast gjørligt í kt-skipan Skráseting Føroya.
Stk. 4. Kommanditfelagið skal skjótast gjørligt skráseta eina og hvørja broyting í teimum upplýsingum, sum eru fráboðaðar sambært stk. 1, um broytingin hevur við sær, at mørkini í § 55, stk. 1 í vinnufelagalógini, sbr. § 15 f í vinnufyritøkulógini, verða rokkin ella ikki longur eru rokkin.
Veruligir eigarar
§ 10. Íognarfeløg, kommanditfeløg og fyritøkur við avmarkaðari ábyrgd skulu savna upplýsingar um felagsins veruligu eigarar, heruppií upplýsingar um rættindi hjá teimum veruligu eigarunum sambært § 15 g, stk. 1 í vinnufyritøkulógini.
Stk. 2. Rættindini kunnu fevna um:
1) Eigarapartar í felagnum, sum viðkomandi beinleiðis ella óbeinleiðis eigur.
2) Ræði á annan hátt.
§ 11. Fyritøkan skal skráseta teir veruligu eigararnar og upplýsingarnar um, hvat ognarrætturin er samansettur av, í kt-skipan Skráseting Føroya, sbr. § 10, stk. 2. Dagfestingin fyri nær veruligi ognarrætturin er íkomin og møguliga hildin uppat, skal eisini skrásetast.
Stk. 2. Hevur ein persónur ræði á eigarapørtum, skal samlaða talið av eigarapørtum býtt á atkvøðurættindi og kapital skrásetast. Til ræði verður íroknað:
1) Eigarapartar har atkvøðurætturin er í luti hjá einari fyritøku, sum viðkomandi hevur ræði á.
2) Eigarapartar, sum viðkomandi hevur sett sum trygd, uttan so, at veðhavari hevur ræði á atkvøðurættinum og boðar frá, at ætlanin er at brúka rættin.
Stk. 3. Eru eigarapartar ogn gjøgnum eina røð av fyritøkum, sum ræði er á, skulu hesi ognarviðurskifti skrásetast.
Stk. 4. Hevur fyritøkan ikki, ella kann fyritøkan ikki eyðmerkja veruligar eigarar, skal dagliga leiðslan skrásetast sum veruligir eigarar. Íognarfeløg og kommanditfeløg, sum ikki hava eina leiðslu samansett av likamligum persónum skrásettir í kt-skipan Skráseting Føroya, skal skráseta tann ella teir likamligu persónar, sum standa fyri dagligu leiðsluni, sum veruligar eigarar.
Stk. 5. Fyritøkan skal skráseta upplýsingarnar um veruligu eigararnar, heruppií upplýsingar um rættindini hjá veruligu eigarunum, í kt-skipan Skráseting Føroya, skjótast gjørligt eftir, at fyritøkan er vorðin kunnug við, at ein persónur er blivin veruligur eigari, og eftir hvørja broyting í frammanundan skrásettum upplýsingum.
Kapittul 3
Eigaraupplýsingar í grunnum sambært anordning om ikrafttræden for Færøerne af lov om erhvervsdrivende fonde
Veruligir eigarar
§ 12. Vinnurekandi grunnar skulu savna upplýsingar um grunsins veruligu eigarar, heruppií upplýsingar um atkvøðurættin hjá teimum veruligu eigarunum sambært § 56 b í anordning om ikrafttræden for Færøerne af lov om erhvervsdrivende fonde.
§ 13. Grunnurin skal skráseta teir veruligu eigararnar og upplýsingarnar um, hvat veruligi ognarrætturin er samansettur av, í kt-skipan Skráseting Føroya. Dagfestingin fyri nær veruligi ognarrætturin er íkomin og møguliga hildin uppat, skal eisini skrásetast. Um dagfestingin fyri veruliga ognarrættin ikki kann staðfestast, kann dagfestingin fyri skrásetingina nýtast.
Stk. 2. Rættindi hjá grunsins nevnd skulu ikki skrásetast, uttan so, at einstøku nevndarlimirnir á annan hátt mugu metast at vera veruligir eigarar.
Stk. 3. Grunnurin skal skráseta nøvnini hjá teimum persónum, í hvørs høvuðsáhugamáli grunnurin er stovnaður ella virkar, um so er, at teir einstaklingar, sum hava gagn av grunninum ikki eru kendir enn.
Stk. 4. Fyrstu ferð grunsins nevnd skal skrásetast sum veruligir eigarar, skal grunnurin skráseta upplýsingina í kt-skipan Skráseting Føroya.
Kapittul 4
Eigaraupplýsingar í ávísum feløgum sambært løgtingslóg um tryggingarvirksemi
Veruligir eigarar
§ 14. Sínámillum tryggingarfeløg og tvørgangandi eftirlønargrunnar skulu savna upplýsingar um felagsins veruligu eigarar, heruppií upplýsingar um rættindi hjá teimum veruligu eigarunum sambært § 17, stk. 3 í løgtingslóg um tryggingarvirksemi.
Stk. 2. Rættindini kunnu fevna um:
1) Eigarapartar í felagnum, sum viðkomandi beinleiðis ella óbeinleiðis eigur.
2) Ræði á annan hátt.
§ 15. Sínámillum tryggingarfeløg og tvørgangandi eftirlønargrunnar skulu skráseta teir veruligu eigararnar og upplýsingarnar um, hvat veruligi ognarrætturin er samansettur av, í kt-skipan Skráseting Føroya sambært § 14, stk. 2. Dagfestingin fyri nær veruligi ognarrætturin er íkomin og møguliga hildin uppat, skal eisini skrásetast.
Stk. 2. Eigur ein persónur eigarapartar, skal samlaða talið á eigarapørtum, býtt á atkvøðurætt og kapital, skrásetast. Til ræði verður íroknað:
1) Eigarapartar, har atkvøðurætturin er í luti hjá einari fyritøku, sum viðkomandi hevur ræði á.
2) Eigarapartar, sum viðkomandi hevur sett sum trygd, uttan so, at veðhavari hevur ræði á atkvøðurættinum og boðar frá, at ætlanin er at brúka rættin.
Stk. 3. Eru eigarapartar ogn gjøgnum eina røð av fyritøkum, sum ræði er á, skal hendan upplýsing skrásetast.
Stk. 4. Hevur sínámillum tryggingarfelagið ella tvørgangandi eftirlønargrunnurin ikki, ella kann sínámillum tryggingarfelagið ella tvørgangandi eftirlønargrunnurin ikki eyðmerkja veruligar eigarar, skulu skrásettu limirnir í stjórnini í sínámillum tryggingarfelagnum ella tvørgangandi eftirlønargrunninum skrásetast sum veruligir eigarar.
Stk. 5. Sínámillum tryggingarfeløg og tvørgangandi eftirlønargrunnar skulu skráseta upplýsingarnar um veruligu eigararnar, heruppií upplýsingar um rættindini hjá veruligu eigararunum, í kt-skipan Skráseting Føroya, skjótast gjørligt eftir, at sínámillum tryggingarfelagið ella tvørgangandi eftirlønargrunnurin er vorðin kunnug við, at ein persónur er blivin veruligur eigari, og eftir hvørja broyting í frammanundan skrásettum upplýsingum.
Kapittul 5
Eigaraupplýsingar í trustum og líknandi løgfrøðiligum skipanum
§ 16. Umsitarin av einum trusti ella ein persónur, ið røkir eitt samsvarandi starv í einari líknandi løgfrøðiligari skipan skal savna upplýsingar um veruligu eigararnar hjá trustinum ella líknandi løgfrøðiligu skipanini, heruppií upplýsingar um rættindini hjá veruligu eigarunum sambært § 36 b í hvítvasklógini.
§ 17. Umsitarin av einum trusti ella ein persónur, ið røkir eitt samsvarandi starv í einari líknandi løgfrøðiligari skipan, skal skráseta veruligu eigararnar í trustinum ella í líknandi skipanini, heruppií hvat veruligi ognarrætturin er samansettur av, í kt-skipan Skráseting Føroya sambært § 14 a. Dagfestingin fyri nær veruligi ognarrætturin er íkomin og møguliga hildin uppat, skal eisini skrásetast.
Stk. 2. Rættindi hjá stovnarum, umsitarum, møguligum verjum ella hjá persónum, sum reka samsvarandi størv í einari líknandi løgfrøðiligari skipan, skulu ikki skrásetast, uttan so, at viðkomandi persónar á annan hátt mugu metast at vera veruligir eigarar.
Stk. 3. Umsitarin av einum trusti ella ein persónur, ið røkir eitt samsvarandi starv í einari líknandi løgfrøðiligari skipan, skal skráseta nøvnini hjá teimum persónum, í hvørs høvuðsáhuga trusturin ella líknandi løgfrøðiliga skipanin er stovnað ella virkar, um so er, at teir einstaklingar, sum hava gagn av trustinum ella líknandi løgfrøðiligu skipanini ikki eru kendir enn.
Stk. 4. Umsitarin av einum trusti ella ein persónur, sum røkir eitt samsvarandi starv í einari líknandi løgfrøðiligari skipan, skal skráseta upplýsingar um veruligu eigararnar í kt-skipan Skráseting Føroya skjótast gjørligt eftir, at umsitarin ella persónurin, sum røkir eitt samsvarandi starv hevur fingið kunnleika til, at ein persónur er blivin veruligur eigari, og eftir hvørja broyting í frammanundan skrásettum upplýsingum.
Kapittul 6
Felags ásetingar um skráseting og almannakunngering
Skráseting umvegis kt-skipan Skráseting Føroya
§ 18. Skráseting av upplýsingum við heimild í hesi kunngerð, og broyting í frammanundan skrásettum upplýsingum, sum eru skrásettar við heimild í hesi kunngerð, skal fara fram umvegis sjálvavgreiðsluskipan inni á www.skraseting.fo, sbr. tó stk. 2 og 3.
Stk. 2. Til Skráseting Føroya fær sjálvavgreiðsluskipan inni á www.skraseting.fo, skulu fráboðanir til skráseting í kt-skipan Skráseting Føroya fara fram umvegis teldupost til Skráseting Føroya.
Stk. 3. Fráboðan til skrásetingar sambært stk. 2 skal gerast á fráboðanarskjali frá Skráseting Føroya. Fráboðan og møgulig skjalfesting skal latast í PDF-fílum hvør sær.
Skráseting av likamligum og løgfrøðiligum persónum við tilknýti til feløg o.fl.
§ 19. Skrásetingin av likamligum og løgfrøðiligum persónum við tilknýti til kapitalfeløg, fyritøkur, grunnar, sínamíllum tryggingarfeløg, tvørgangandi eftirlønargrunnar, trustar ella líknandi løgfrøðiligar skipanir, o.fl. sum eigarar, skal geva upp fult navn, starv í felagnum ella løgfrøðiligu eindini, p-tal, ríkisborgaraskap við føðing, bústaðaradressu og bústaðarland fyri likamligar persónar, ella navn, skrásetingarnummar og heimstað fyri løgfrøðiligar persónar.
Stk. 2. Hevur likamligi persónurin ikki eitt p-tal ella hevur tann løgfrøðiligi persónurin ikki eitt skrásetingarnummar, skulu hesar upplýsingar gevast upp:
1) Fyri likamligar persónar uttan p-tal, skal tað í sambandi við skrásetingina sláast inn upplýsing um føðingardag, ríkisborgaraskap við føðing, kyn, passnummar ella nummar frá samleikaprógvi, sum kann nýtast við innferð í einum Schengenlandi, umframt útgávuland fyri passi ella samleikaprógvi. Mynd av galdandi passi ella samleikaprógvi, sum kann nýtast við innferð í einum Schengenlandi, skal leggjast við fráboðanini.
2) Fyri løgfrøðiligar persónar uttan skrásetingarnummar, skulu felagsskráin, har tann løgfrøðiligi persónurin er skrásettur, og skrásetingarnummarið gevast upp, umframt upplýsingar um møguligt skattaeyðmerkingarnummar í heimlandinum. Formligt prógv, sum í mesta lagi kann vera 3 mánaðir gamalt, fyri at tann løgfrøðiligi persónurin er lógliga til í heimlandinum, skal leggjast við fráboðanini.
§ 20. Í sambandi við skráseting av upplýsingum um veruligu eigararnar í einum trusti ella líknandi løgfrøðiligari skipan, skal umsitarin ella persónurin, ið røkir eitt samsvarandi starv í líknandi løgfrøðiligu skipanini, í minsta lagi geva Skráseting Føroya upplýsingar um:
1) Navnið á trustinum ella líknandi løgfrøðiligu skipanini.
2) Vinnugrein og møguligar hjávinnugreinar.
3) Bústað hjá trustinum ella líknandi løgfrøðiligu skipanini.
4) Virkishátt.
5) Byrjanartíðspunkt.
6) Nær trusturin ella líknandi løgfrøðiliga skipanin møguliga eru hildin uppat.
7) Upplýsingar um teir luttakarar, sum eru fult ábyrgdarhavandi.
Stk. 2. Fyri trustar og líknandi løgfrøðiligar skipanir skulu upplýsingar um veruligu eigararnar, heruppií rættindini hjá veruligu eigarunum, savnast og skrásetast sambært §§ 30 a og 30 b í anordning nr. 813 af 12. august 2019 om ikrafttræden for Færøerne af lov om forebyggende foranstaltninger mod hvidvask og finansiering af terrorisme (hvidvaskloven).
Ábyrgd fyri skráseting í kt-skipan Skráseting Føroya
§ 21. Teir løgfrøðiligu persónar, trustar og líknandi løgfrøðiligar skipanir, ið eru fevnd av hesi kunngerð, kunnu heimila einum fráboðara at umboða felagið mótvegis Skráseting Føroya, og til at fremja skrásetingar.
Stk. 2. Ein fráboðari, sambært stk. 1, skal svara fyri, at skrásetingin fer fram á lógligan hátt, heruppií, at neyðug fulltrú er útvegað, og at skjalprógvanin í sambandi við skrásetingina hevur gildi.
Stk. 3. Stk. 2 fevnir eisini um skráseting av upplýsingum um handhavapartabrøv, sambært § 4. Við skráseting av handhavapartabrøvum sambært § 4, skal við skrásetingini, um skrásetingin ikki verður framd av eigaranum sjálvum, fylgja ein fulltrú, sum heimilar fráboðaranum at fremja skrásetingina vegna eigaran.
Kunngering í kt-skipan Skráseting Føroya
§ 22. Upplýsingar um týðandi kapitalpostar og eigarapartar, sum eru skrásettar við heimild í §§ 3 og 9, verða almannakunngjørdar í kt-skipan Skráseting Føroya sambært § 58, stk. 3 í vinnufelagalógini og § 15 f í vinnufyritøkulógini.
Stk. 2. Upplýsingar um handhavapartabrøv, sum eru skrásettar sambært § 4, stk. 1 og 4, verða ikki almannakunngjørdar, men kunnu einans verða latnar víðari til almennar myndugleikar sambært. § 57 a, stk. 5 í vinnufelagalógini.
Stk. 3. Upplýsingar um veruligar eigarar skrásettar sambært §§ 6, 11, 13 og 15, verða almannakunngjørdar í kt-skipan Skráseting Føroya sambært § 58, stk. 3 í vinnufelagalógini, § 15 g, stk. 9 í vinnufyritøkulógini, § 56 b, stk. 8 í anordning om ikrafttræden for Færøerne af lov om erhvervsdrivende fonde og § 17, stk. 10 í løgtingslóg um tryggingarvirksemi.
§ 23. Ein og hvør hevur atgongd til upplýsingar um veruliga eigarans navn, føðingarmánað og føðingarár, ríkisborgaraskap, bústaðaradressu og bústaðarland, umframt slag og vav av rættindunum hjá veruliga eigaranum, sbr. tó stk. 2.
Stk. 2. Upplýsingar sambært stk. 1, sum Skráseting Føroya ikki hevur kunngjørt í kt-skipan Skráseting Føroya, kunnu fáast til vegar við at venda sær til Skráseting Føroya, sbr. tó § 21.
§ 24. Skráseting Føroya kann heilt ella partvís lata vera við at kunngera upplýsingar um eigarar í serstøkum førum, har Skráseting Føroya metir, at kunngering kann føra við sær ósamsvarandi stóran váða fyri sviki, burturflyting, penganoyðslu, harðskapi, hóttan ella líknandi. Er tann veruligi eigarin ikki komin til lógaldur ella er hann ómyndigur, kann Skráseting Føroya somuleiðis lata vera við at kunngera ítøkiligar upplýsingar.
Stk. 2. Skráseting Føroya kann, tá ið treytirnar í stk. 1 eru loknar, lata vera við at kunngera upplýsingar um, at kapitalpartar eru ogn gjøgnum eina røð av fyritøkum, sum ræði er á sambært § 6, stk. 3. Sama er galdandi fyri aðrar upplýsingar um, hvussu ognarrætturin er samansettur, ella líknandi.
Stk. 3. Skráseting Føroya kann savna ummæli frá øðrum skikkaðum myndugleikum, áðrenn avgerð eftir stk. 1 verður tikin.
Stk. 4. Hvidvasksekretariatet og aðrir skikkaðir myndugleikar kunnu fáa upplýsingar, sum eru undantiknar frá kunngering sambært stk. 1 ella 2, við at venda sær til Skráseting Føroya.
Kapittul 7
Revsing
§ 25. Brot á § 1, § 2, stk. 2, §§ 3, 4, 6 og 7, § 8, stk. 2, §§ 9, 11, 13, 15-17 og 20, stk. 1 verður revsað við sekt.
Kapittul 8
Gildiskoma og úrgildisseting
§ 26. Henda kunngerð kemur í gildi 1. oktober 2024. Samstundis fer úr gildi kunngerð nr. 5 frá 19. januar 2022 um skráseting og almannakunngering av upplýsingum um eigarar í vinnufyritøkum í kt-skipan Skráseting Føroya.
Uttanríkis- og vinnumálaráðið, 17. september 2024
Høgni Hoydal (sign.)
landsstýrismaður
/ Herálvur Joensen (sign.)
