Skrivar tú trygging verður eisini leitað eftir øðrum endingum av orðinum sum t.d. tryggingar og tryggingarvirksemi.
Skrivar tú ?trygging verður leitað eftir orðum sum t.d. lívstrygging og lívstryggingar.
Skrivar tú ”trygging” verður einans leitað eftir júst hesum sniðnum av orðinum.
19. juni 2000Nr. 8000
Vegleiðing um hugtakið "onnur verulig heilsurøkt" í meirvirðisgjaldslógini § 2, stk. 3, litra a
(Til Toll- og Skattastovu Føroya)
Sambært § 2, stk. 3, litra a í meirvirðisgjaldslógini er viðgerð á sjúkrahúsi, læknavirksemi, tannlækna- og annað dentalvirksemi, kiropraktik og fysioterapi undantikið mvgskyldu. Umframt hesar tænastur, er eisini "onnur verulig heilsurøkt" undantikin mvgskyldu. Hugtakið fevnir um viðgerð, sum vanliga verður kallað alternativ viðgerð, av tí at viðgerðin ikki formliga er góðkend av myndugleikunum.
Toll- og Skattstova Føroya ger av, hvørt umsøkjarar, sum søkja um mvgfrítøku, koma undir hugtakið "onnur verulig heilsurøkt". Í samband við viðgerð av tílíkum umsóknum kann Toll- og Skattstovan senda umsóknir til ummælis hjá Almanna- og heilsumálastýrinum fyri at fáa eina meting av, hvørt ein viðgerðarháttur er umfataður av hugtakinum. Av tí at góðkenning av heilsustarvsfólki er felagsmál, miðar Almanna- og heilsumálastýrið í tílíkum málum ímóti at fylgja avgerðum hjá Sundhedsstyrelsen, sum hevur um hendi tær heilsufakligu uppgávurnar á heilsuøkinum í Danmark.
Viðmerkjast skal, at tá talan er um alternativa viðgerð, so er í dag ikki gjørligt hjá nøkrum myndugleika at gera eina heilsufrøðiliga meting av viðgerðarhættunum. Metast kann ikki um førleikan hjá umsøkjarunum ella dygdina av útbúgvingini, soleiðis at ávísir fakbólkar/viðgerðarhættir verða góðkendir av myndugleikunum. Hetta kemst av, at nøktandi dokumentatión fyri viðgerðarhættunum ikki fyriliggur, og í øðrum lagi hevur hvørki Almanna- og heilsumálastýrið ella Sundhedsstyrelsen ikki neyðugu orkuna at gera hetta.
"Onnur verulig heilsurøkt"
Hugtakið "onnur verulig heilsurøkt" sigur nakað um, hvat slag av heilsurøkt talan er um, men sigur harafturímóti einki um dygdina av viðgerðini. Ein dygdarmeting av einum viðgerðarhátti ella førleikanum hjá viðgeranum kann tí ikki nýtast til at avmarka hugtakið.
Sundhedsstyrelsen metir, at alternativ viðgerð generelt er at roknað sum "onnur verulig heilsurøkt". Hetta verður grundað á, at hóast nøktandi dokumentatión ikki fyriliggur fyri alternativa viðgerð, so er á ávísum økjum prógvað, at alternativ viðgerð hjálpir fólki við ymiskum líðingum. Haraftrat søkja støðugt fleiri fólk alternativa viðgerð við góðum úrslitum.
"Onnur verulig heilsurøkt" í meirvirðisgjaldslógini
Sundhedsstyrelsen hevur í samráð við Told- og Skattestyrelsen í Danmark gjørt leiðreglur fyri, hvat er at roknað sum "onnur verulig heilsurøkt" í donsku meirvirðisgjaldslógini. Í hesum sambandi er dentur lagdur á, at alternativir viðgerarar gjøgnum frálæru í anatomi, fysiologi og sjúkulæru hava fingið eina grundleggjandi vitan um, hvussu mannakroppurin er skapaður og virkar. Er talan um sálarviðgerð, er dentur lagdur á ástøðiliga útbúgving innan tað psykoterapeutiska økið.
Told- og Skattestyrelsen lýsir í fleiri avgerðum í Tidsskrift for Skatter og Afgifter leiðreglurnar fyri, nær alternativ viðgerð er mvgfrí. Talan er um Tfs.1999.889, Tfs.1999.736 og Tfs.1999.833.
Treytir eru settar til tímatalið í lærugreinum, sum tann einstaki skal hava fingið frálæru í, fyri at koma undir hugtakið "onnur verulig heilsurøkt". Lýkur umsøkjarin settu treytirnar, er viðgerðin, sum umsøkjarin veitir, mvgfrí.
Í minsta lagi skal umsøkjarin hava fingið frálæru í:
| Anatomi/fysiologi | 200 tímar |
| Sjúkulæra/farmakologi | 100 tímar |
| Alternativur viðgerðarháttur* | 250 tímar |
| Sálarfrøði | 50 tímar |
| Klinikkvegleiðing/kundaviðgerð | 10 tímar |
| Innførsla til aðrar alternativar viðgerðarhættir | 50 tímar |
* Innihaldsligu krøvini til hesar frálærutímar eru ymisk alt eftir, hvørja viðgerð talan er um.
Er talan um sálarviðgerð, skal útbúgvingin fevna um ástøðiliga frálæru innan psykoterapeutiska øki, eginviðgerð umframt vegleiðing (supervision).
Settu treytirnar eru generellar, soleiðis at ávísir viðgerðarhættir ikki konkret eru undantiknir. Hetta er upp til skattamyndugleikan at avgera í hvørjum einstøkum føri. Sum rætningslinjurnar eru orðaðar, verður ikki sett sum krav, at undirvísingin er fingin á einum ávísum útbúgvingarstovni, og sostatt er gjørligt hjá umsøkjarunum at seta saman eina útbúgving við undirvísing frá fleiri ymiskum skúlum/skeiðum.
Skiftisskipan
Ein serlig skiftisskipan er gjørd, sum tekur hædd fyri alternativum viðgerarum, sum onga ella lítla útbúgving hava, men sum hava veitt viðgerðina í fleiri ár. Hendan skiftisskipan ber í sær, at undantak kann gerast frá kravda tímatalinum uppá 660 tímar, um umsøkjarin er útbúgvin innan 1. juli 2000, soleiðis at umsøkjari, sum hevur 400 undirvísingartímar kann verða mvgfrítikin. Umframt hetta hava umsøkjarar, sum ikki uppfylla treytirnar fyri hesum undantaki, møguleika at verða frítiknir fyri mvg, um teir kunnu prógva at hava havt 400 undirvísingartímar í anatomi/fysiolgi, sjúkulæru/farmakologi og alternativa viðgerðarháttinum innan 31. desember 2000.
Almanna- og heilsumálastýrið skal í hesum sambandi mæla Toll- og Skattstovu Føroya til at fylgja leiðreglunum frá donsku myndugleikunum í málum viðv. tulking av hugtakinum "onnur verulig heilsurøkt" í meirvirðisgjaldslógini.
Almanna- og heilsumálastýrið, 19. juni 2000
Aibritt á Plógv (sign.)
deildarstjóri
/ Jóhanna Arge (sign.)
