Løgtingslóg nr. 11 frá 3. apríl 1970 um eigaraíbúðir, sum seinast broytt við løgtingslóg nr. 41 frá 4. apríl 2022

3. apríl 1970Nr. 11

Løgtingslóg um eigaraíbúðir, sum seinast broytt við løgtingslóg nr. 41 frá 4. apríl 2022

§ 1. ¹⁾ Undir hesa løgtingslógina koma eigaraíbúðir, ið eru íbúðir, sum hvør sær er egin ogn.

Stk. 2. Undir reglurnar um eigaraíbúðir koma eisini handlar, skrivstovur, goymslurúm, búrúm og onnur serliga avskilað húsarúm.

§ 2. ²⁾ Eigari av íbúð hevur í felag við hinum eigarunum av íbúðum ognarrættin til grundina, lutir í felag og tilhoyr v.m. eftir býtistali, sum fyrisett er sum brotpartur. Er býtistal ikki fyrisett, eru allar íbúðirnar javnbjóðis um. Eigararíbúðir kunnu eftir somu reglum stovnast í eigindómum á leigaðum grundøki.

Stk. 2. ¹⁾ Til íbúðina liggja í sama mun rættindir og skyldur hjá eigaranum sum limur í eigarafelagnum.

Stk. 3. Rættindini og skyldurnar eftir stk. 1 og 2 kunnu ikki loysast frá ognarrættinum til íbúðina.

§ 3. ¹⁾ Eigaraíbúðir kunnu bert gerast í bygningi, sum allur er lagdur sundur í eigaraíbúðir.

§ 4. Hvør eigaraíbúðin er at skilja sum egin føst ogn.

Stk. 2. ^{3) 1)} Gjøllari reglur um tinglýsing av rættindum í eigaraíbúðum verða fyrisettar av landsstýrismanninum.

§ 5. Eigarafelagsskapurin kann fyriseta reglur um lag og skil í eini húsreglugerð.

Stk. 2. Eigari skal lata upp íbúð, tá ið tað er neyðugt, til eftirlit og umvæling.

§ 6. ¹⁾ Felags útreiðslur, herí roknaðar útreiðslur viðvíkjandi grundini, gjøld til vegir og rennur, tryggingargjøld og útreiðslur til fyrisiting og viðlíkahald av felags lutum og tilhoyri, gjøld til møguligan stovngrunn o.tíl. verða at gjalda av eigaranum í sama lutfalli sum nevnt í § 2, stk. 1.

Stk. 2. ¹⁾ Ger eigari tiltøk í íbúð síni, sum vaksa um tær útreiðslur, ið nevndar eru í stk. 1, skal eigarin gjalda eykakostnaðin.

§ 7. ¹⁾ Greiniligari fyriskipan um leiðslu av eigarafelagnum, roknskaparførslu, grannskoðan o.a. verður ásett av landsstýrismanninum í kunngerð, sum er galdandi, um ikki annað er samtykt og tinglýst.

§ 8. Brýtur eigari grovliga ella ferð eftir ferð skyldur sínar móti eigarafelagnum ella einstøkum limi, kann felagið áleggja honum at flyta úr íbúð síni við hóskandi freist.

§ 9. ¹⁾ Verður íbúð í bygningi, sum er í gerð, avhend, skal avhendarin, áðrenn avtala verður gjørd, gera tann, ið tekur við, kunnugan við kostnaðarætlan um byggingina, ætlan um ta endaligu fíggjanina av bygninginum og íbúðini og rakstrarútreiðslurnar.

§ 10. ¹⁾ Undir løgtingslógina koma bert íbúðir í bygningum, sum eru ætlaðir at leggja sundur í eigaraíbúðir.

Stk. 2.^{4) 1)} Øll sundurbýtismál skulu sendast avvarðandi kommunu til ummælis. Kommunan skal greitt tilskila, um eitt møguligt sundurbýti ikki er í samsvari við:

1)   lóggávuna um byggiviðurskifti og brunaviðurskifti,

2)   eina góðkenda byggisamtykt ella býarskipan ella

3)   lóggávuna annars.

Stk. 3. ⁴⁾ Verður tað í ummæli frá kommununi eftir stk. 2 ella á annan hátt upplýst, at tað við sundurbýtinum koma fram viðurskifti, sum ikki samsvara við reglurnar í teimum í stk. 2, nr. 1-3 nevndu viðurskiftum, verður sundurbýtið ikki góðkent uttan so, at avvarðandi myndugleiki hevur givið undantaksloyvi.

§ 11. ^{5) 6) 7)} Avgerðir sambært hesi løgtingslóg kunnu kærast til Føroya Kærustovn innan 4 vikur eftir, at viðkomandi hevur fingið fráboðan um avgerðina.

§ 12. ⁵⁾ Henda lóg kemur í gildi beinanvegin.