Skrivar tú trygging verður eisini leitað eftir øðrum endingum av orðinum sum t.d. tryggingar og tryggingarvirksemi.
Skrivar tú ?trygging verður leitað eftir orðum sum t.d. lívstrygging og lívstryggingar.
Skrivar tú ”trygging” verður einans leitað eftir júst hesum sniðnum av orðinum.
20. desember 2024Nr. 146
Løgtingslóg um integratión
(Integratiónslógin)
Samsvarandi samtykt Løgtingsins staðfestir og kunnger løgmaður hesa løgtingslóg:
Virkisøki
§ 1. Henda løgtingslóg er galdandi fyri útlendingar, sum hava uppihaldsloyvi í Føroyum.
Stk. 2. Løgtingslógin er eisini galdandi fyri børn undir 18 ár, sum hava fastan bústað hjá foreldrum ella verja, fevnd av stk. 1.
Allýsingar
§ 2. Í løgtingslógini verður skilt millum:
1) Tilflytarar og samfylgjandi familju, sum hava vinnuligt uppihaldsloyvi sambært anordning for ikrafttræden for Færøerne af udlændingeloven, lov for Færøerne om udlændinges adgang til opholdstilladelse med henblik på visse former for beskæftigelse ella fast-track avtaluni.
2) Tilflytarar, sum hava uppihaldsloyvi eftir reglunum um familjusameining í anordning for ikrafttræden for Færøerne af udlændingeloven.
3) Tilflytarar, sum hava uppihaldsloyvi sambært anordning om ikrafttræden for Færøerne af lov om midlertidig opholdstilladelse til personer, der er fordrevet fra Ukraine.
Integratiónsmyndugleiki
§ 3. Landsstýrisfólkið leggur umsitingina av løgtingslógini til stovn undir landsstýrinum. Hesin stovnur verður nevndur integratiónsmyndugleikin.
Kommunalir integratiónssamskiparar
§ 4. Hvør kommuna skal í seinasta lagi 1. juli 2026 hava integratiónssamskipara.
Stk. 2. Kommunurnar kunnu samstarva við aðrar kommunur um integratión og integratiónssamskiparar.
Stk. 3. Landsstýrisfólkið kann í samráð við kommunurnar áseta nærri reglur um integratiónsøkið og kommunalar integratiónssamskiparar, herundir reglur um, hvat skal gerast, um kommunurnar ikki halda sínar skyldur sambært løgtingslógini.
Kunnandi fundur við komu
§ 5. Kommunurnar skulu regluliga skipa fyri kunnandi fundi fyri útlendskum tilflytarum í kommununi, sum nýliga eru fluttir til Føroya. Fundirnir verða skipaðir í samráð við integratiónsmyndugleikan fyri at tryggja, at kunningin er einsháttað um alt landið.
Stk. 2. Á fundinum verður kunnað um rættindi og skyldur, tilflytarar hava í Føroyum. Somuleiðis verður kunnað um, hvørjum integratiónsmyndugleikin, kommunan og aðrir viðkomandi partar kunnu hjálpa við, og hvar tilflytarin annars kann leita sær hjálp, um tørvur er á tí.
Stk. 3. Kommunurnar kunnu samstarva við aðrar kommunur um kunnandi fundirnar.
Stk. 4. Tilflytarar, sum eru fevndir av løgtingslógini, verða bidnir at koma til kunnandi fund skjótast gjørligt eftir flyting til Føroya.
Integratiónssamrøða
§ 6. Integratiónsmyndugleikin áleggur tilflytarum, ið eru 18 ár ella eldri, at møta til integratiónssamrøðu, um teir:
1) Hava tíðaravmarkað uppihaldsloyvi eftir reglunum um familjusameining sambært § 2, nr. 2.
2) Hava tíðaravmarkað uppihaldsloyvi og hava børn undir 18 ár við sær til Føroya ella seinni fáa børn í Føroyum.
3) Hava tíðaravmarkað uppihaldsloyvi eftir anordning om ikrafttræden for Færøerne af lov om midlertidig opholdstilladelse til personer, der er fordrevet fra Ukraine.
4) Hava uppihaldsloyvi og verða sameind við eitt barn undir 18 ár.
5) Hava fingið tíðaravmarkað arbeiðsloyvi triðju ferð.
6) Eru samfylgjandi familja hjá einum persóni, sum hevur fingið tíðaravmarkað arbeiðsloyvi triðju ferð.
Stk. 2. Integratiónsmyndugleikin kann bjóða tilflytarum, ið ikki eru nevndir í stk. 1, til integratiónssamrøðu, um hesir ynskja tað.
Stk. 3. Integratiónsmyndugleikin skal tryggja, at tilflytarin er kunnaður um, at fyri at fáa varandi uppihaldsloyvi í Føroyum sambært anordning for ikrafttræden for Færøerne af udlændingeloven, skal viðkomandi sum útgangsstøði lúka treytirnar um luttøku í integratiónssamrøðu eftir stk. 1 og um nøktandi málkunnleika og innlit í føroyska samfelagið og mentanina sambært § 7.
Stk. 4. Integratiónsmyndugleikin kunnar tilflytaran um rættindi og skyldur hansara í Føroyum og um integratiónsfremjandi tiltøk og tænastur, sum stuðla tilflytaranum at læra seg føroyskt og at ogna sær vitan og førleikar, sum hava týdning fyri at virka og liva í føroyska samfelagnum á jøvnum føti við aðrar borgarar.
Stk. 5. Landsstýrisfólkið kann áseta nærri reglur um, hvat integratiónssamrøðan skal fevna um.
Málførleikar og kunnleiki um føroyska mentan og føroysk samfelagsviðurskifti
§ 7. Tilflytarar, ið eru fevndir av løgtingslógini, fáa tilboð um ókeypis undirvísing í føroyskum sambært løgtingslóg um føroyskt sum annaðmál.
Stk. 2. Tilflytarar, ið eru fevndir av løgtingslógini, fáa somuleiðis tilboð um ókeypis skeið í føroyskari mentan og samfelagsviðurskiftum.
Stk. 3. Landsstýrisfólkið kann áseta nærri reglur um innihald og longd á skeiðinum um føroyska mentan og samfelagsviðurskifti.
At lata persónsupplýsingar til aðrar myndugleikar
§ 8. Integratiónsmyndugleikin veitir bústaðarkommununi neyðugar persónsupplýsingar, so kommunan kann bjóða tilflytarum viðkomandi skeið og kunna um frítíðarvirksemi, almenn tiltøk o.a. í økinum.
Stk. 2. Integratiónsmyndugleikin kunnar bústaðarkommununa og Gigni, um tilflytarin hevur børn undir 18 ár við sær til Føroya. Integratiónsmyndugleikin kunnar somuleiðis bústaðarkommununa og Gigni, um eitt barn undir 18 ár verður sameint við foreldur ella familju í Føroyum, eftir hesi eru komin til Føroya.
Integratión barnanna
§ 9. Bústaðarkommunan skal virka fyri at tryggja børnum góða móttøku, eitt gott og trygt barnalív og ungdómslív og góða integratión.
§ 10. Bústaðarkommunan skal veita børnum, sum ikki hava føroyskt sum móðurmál, eina skipaða trivnaðarætlan á dagstovnum hóskandi til aldurin á barninum.
Stk. 2. Tvímælt børn, ið hava annað móðurmál enn føroyskt, og sum enn ikki hava byrjað skúlagongdina, kunnu fáa tilboð um stuðul til frama fyri málsligu menningina í føroyskum máli sambært løgtingslóg um fólkaskúlan.
Stk. 3. Børn í skúlaaldri, ið hava føroyskt sum annaðmál, kunnu í hóskandi vavi fáa serstaka undirvísing í føroyskum og kunnu fáa tilboð um undirvísing í móðurmáli sínum sambært løgtingslóg um fólkaskúlan.
Stk. 4. Bústaðarkommunan skal skipa fyri integratiónsfremjandi tiltøkum fyri ungum eftir tørvi.
§ 11. Tilflytarar, sum hava børn undir undirvísingarskyldugan aldur, skulu fáa tilboð um heimavitjan av heilsufrøðingi sambært løgtingslóg um fyribyrgjandi heilsutænastur til børn og ung.
§ 12. Integratiónsmyndugleikin bjóðar tilflytarum, sum hava børn undir 15 ár, á skeið um integratión av børnum. Skeiðini verða fyrireikað og løgd til rættis í samstarvi við viðkomandi myndugleikar.
Stk. 2. Integratiónsmyndugleikin kann eisini skipa fyri skeiðum, ið fevna um aðrar aldursbólkar enn teir, ið verða nevndir í stk. 1.
Stk. 3. Landsstýrisfólkið kann í samráð við landsstýrisfólkið í barna- og útbúgvingarmálum áseta nærri reglur um innihald og longd á skeiðinum.
§ 13. Um børn skulu hoyrast í málum, sum viðvíkja teimum, skulu øll gjørlig fyrilit takast fyri, at tey verða hoyrd á tí máli, sum børnini skilja best.
§ 14. Almennir myndugleikar skulu í virksemi sínum brúka tulk, tá tað verður mett neyðugt.
Almenn kunning og integratiónsfremjandi tiltøk
§ 15. Aftur at kunningarfundinum sambært § 5 skulu kommunurnar saman við integratiónsmyndugleikanum skipa fyri almennari kunning og vegleiðing um viðkomandi samfelagsviðurskifti, integratiónsskipanina og tilboð og tænastur, sum kommunan, integratiónsmyndugleikin og onnur veita.
Stk. 2. Landsstýrisfólkið kann í samráð við kommunurnar áseta nærri reglur um, hvussu kunning sambært stk. 1 verður skipað millum kommunurnar og integratiónsmyndugleikan.
Stk. 3. Integratiónsmyndugleikin skal framleiða og miðla kunnandi tilfar um føroyska samfelagið, siðir og mentan til tilflytarar.
§ 16. Integratiónsmyndugleikin vegleiðir og ráðgevur almennum myndugleikum, stovnum, kommunum, fyritøkum, samtøkum, almannagagnligum felagsskapum, sjálvbodnum felagsskapum o.ø. um integratión og integratiónsfremjandi tiltøk.
Stk. 2. Integratiónsmyndugleikin kann lata peningaligan stuðul til integratiónsfremjandi tiltøk eftir umsókn.
Stk. 3. Landsstýrisfólkið ásetir nærri reglur um integratiónsfremjandi tiltøk og peningaligan stuðul sambært stk. 2, m.a. um krøvini til umsókn og skjalprógv, og um í hvørjum førum, stuðul kann latast.
Gildiskoma o.a.
§ 17. Henda løgtingslóg kemur í gildi 1. juli 2025 og er galdandi fyri tilflytarar, sum søkja uppihaldsloyvi fyrstu ferð eftir hendan dag.
Stk. 2. Ásetingarnar um ókeypis skeið í føroyskari mentan og samfelagsviðurskiftum sambært § 7, stk. 2, heimavitjan av heilsufrøðingi sambært § 11 og skeið um integratión av børnum sambært § 12, stk. 1 koma í gildi 1. januar 2026.
Stk. 3. Ásetingin um skipaða trivnaðarætlan á dagstovnum sambært § 10, stk. 1 kemur í gildi 1. juli 2026.
§ 18. Tilboðið um ókeypis undirvísing í føroyskum sum annaðmál er galdandi fyri allar tilflytarar, sum hava fingið uppihaldsloyvi í Føroyum.
Stk. 2. Børn, sum longu hava uppihaldsloyvi í Føroyum, eru fevnd av ásetingini í § 10 um eina skipaða trivnaðarætlan á dagstovnum.
Stk. 3. Tilflytarar, sum longu hava uppihaldsloyvi í Føroyum, kunnu biðja um at sleppa til eina integratiónssamrøðu, samanber § 6, at fáa vitjan av heilsufrøðingi, samanber § 11, og at luttaka á skeiði um integratión av børnum, samanber § 12.
§ 19. Landsstýrisfólkið setir í løgtingsárinum 2028 fram løgtingslógaruppskot um endurskoðan av løgtingslógini.
Í Tinganesi, 20. desember 2024
Aksel V. Johannesen (sign.)
løgmaður
Lm. nr. 33/2024
