Skrivar tú trygging verður eisini leitað eftir øðrum endingum av orðinum sum t.d. tryggingar og tryggingarvirksemi.
Skrivar tú ?trygging verður leitað eftir orðum sum t.d. lívstrygging og lívstryggingar.
Skrivar tú ”trygging” verður einans leitað eftir júst hesum sniðnum av orðinum.
25. november 2021Nr. 147
Løgtingslóg um Føroya Kærustovn
Samsvarandi samtykt Løgtingsins staðfestir og kunnger løgmaður hesa løgtingslóg:
§ 1. Føroya Kærustovnur er fyrisitingarmyndugleiki, fevndur av fyrisitingarlógini, og virkar óheftur av landsfyrisitingini. Virksemið hjá Føroya Kærustovni er grundað á meginregluna um, at øll eru líka og hava sama rætt sambært lógini. Føroya Kærustovnur virkar fyri, at rættar avgerðir verða tiknar stundisliga.
Stk. 2. Avgerðir hjá Føroya Kærustovni kunnu ikki kærast til annan fyrisitingarligan myndugleika.
Virkisøki
§ 2. Føroya Kærustovnur er kærumyndugleiki fyri fyrisitingarligar avgerðir, tá ið tað er ásett í løgtingslóg ella við heimild í løgtingslóg. Harumframt tekur Føroya Kærustovnur avgerð í málum, tá ið tað er ásett í løgtingslóg.
Stk. 2. Er ikki annað ásett, er freistin at kæra 4 vikur at rokna frá tí degi, kærarin hevur fingið fráboðan um avgerðina. Í serligum føri kann Føroya Kærustovnur viðgera kærumál, ið eru latin inn, eftir at kærufreistin er farin.
Stk. 3. Landsstýrismaðurin ásetir nærri reglur um starvsskipan fyri Føroya Kærustovni.
Útbúgvingarkrøv
§ 3. Stjórin á Føroya Kærustovni skal hava løgfrøðiligt kandidatsprógv og hava royndir í fyrisiting ella øðrum viðkomandi fakøki.
Stk. 2. Løgfrøðingarnir, sum skulu taka avgerð eftir §§ 5-8, skulu hava løgfrøðiligt kandidatsprógv ella aðra samsvarandi útbúgving.
Heimildir stjórans at taka avgerðir í serligum málum
§ 4. Stjórin kann gera av, at ein avgerð hjá Føroya Kærustovni skal takast upp aftur til nýggja viðgerð, tá ið hetta er ivaleyst, og talan ikki er um eitt mál av grundleggjandi týdningi.
Stk. 2. Stjórin kann játta ella sýta steðgandi virknað í kærumálum, tá ið slík avgerð ikki tolir at bíða.
Stk. 3. Eisini kann stjórin gera av, um kærarin er partur í málinum, um kærufreistin er hildin, og um kært er til rætta myndugleika.
Stk. 4. Stjórin kann lata øðrum starvsfólki á Føroya Kærustovni heimildir sínar sambært stk. 1-3.
Stk. 5. Hevur mál sambært stk. 1-3 grundleggjandi týdning, skal Føroya Kærustovnur setast.
Setan av Føroya Kærustovni
§ 5. Føroya Kærustovnur verður settur við stjóranum og tveimum løgfrøðingum.
Stk. 2. Í serligum førum kann stjórin gera av, at Føroya Kærustovnur verður settur við stjóranum og fýra løgfrøðingum.
Stk. 3. Í málum, har serkunnleiki verður mettur neyðugur fyri viðgerðina, kann Føroya Kærustovnur verða settur við stjóranum og einum ella tveimum løgfrøðingum umframt einum ella tveimum viðkomandi serkønum.
Stk. 4. Um ikki annað er ásett, ger stjórin av, um mál skulu viðgerast eftir stk. 1, 2 ella 3, og hvør mannar Føroya Kærustovn í einstøku málunum. Stjórin kann gera av, at mál, sum er byrjað sum vanlig viðgerð eftir stk. 1, skal flytast til viðgerð sambært stk. 2 ella 3.
Stk. 5. Stjórin kann gera av, at í staðin fyri ein av løgfrøðingunum kann Føroya Kærustovnur setast við einum persóni við øðrum viðkomandi serkunnleika.
Avgerðir hjá Føroya Kærustovni
§ 6. Um ikki annað er ásett í aðrari lóggávu, er royndin hjá Føroya Kærustovni av einum kærumáli ein fullfíggjað roynd av øllum faktum í málinum og av øllum rættarligum spurningum í málinum.
Stk. 2. Føroya Kærustovnur eftirkannar eisini óskert tøkniligar og sakkønar metingar í málinum.
Stk. 3. Føroya Kærustovnur ger sínar egnu løgfrøðiligu tulkingar, bæði við atliti at almennum løgfrøðiligum spurningum, tulking, útfylling og meting. Í royndini skal støða eisini takast til ta ítøkiligu metingina, sum er gjørd í málinum, og um avgerðin er rímilig og gagnlig.
§ 7. Avgerðir hjá Føroya Kærustovni sambært § 5 verða tiknar við vanligum meiriluta, eftir at fundur er hildin um málið. Standa atkvøðurnar á jøvnum, er atkvøða stjórans avgerandi. Øll hava skyldu til at greiða atkvøðu.
Stk. 2. Stjórin kann gera av, at serkøn luttaka á fundi uttan av hava atkvøðurætt.
§ 8. Avgerð hjá Føroya Kærustovni kann vera burturvísing, staðfesting, avtøka ella broyting av tí kærdu avgerðini. Føroya Kærustovnur kann eisini afturvísa málið til nýggja viðgerð ella beina málið til viðgerðar hjá einum myndugleika, sum ikki áður hevur tikið avgerð í málinum.
Stk. 2. Føroya Kærustovnur er ikki bundin av málskrøvum partanna.
Stk. 3. Avgerðir hjá Føroya Kærustovni skulu fráboðast skrivliga og skulu vera grundgivnar.
Serkøn ráðgeving
§ 9. Føroya Kærustovnur fær sær neyðuga serkøna ráðgeving, sum verður tikin við í viðgerðina eftir tørvi.
Stk. 2. Val av serkønum skal vera grundað á teirra fakligu førleikar og eftir tilmæli frá yrkisbólkum, har tað ber til.
Stk. 3. Serkøn verða vald fyri 3 ár í senn.
Stk. 4. Serkøn fáa løn ella samsýning, sum landsstýrismaðurin ásetir.
Stk. 5. Serkøn, sum ikki eru starvssett á Føroya Kærustovni, hava í sínum virksemi fyri Føroya Kærustovn somu tagnarskyldu sum almenn starvsfólk sambært § 26 í løgtingslóg um fyrisitingarlóg.
Kærur
§ 10. Kæra skal sendast skrivliga til Føroya Kærustovn og skal, har tað ber til, vera grundgivin og hava skjalprógv hjáløgd.
Stk. 2. Allar upplýsingar, so sum ummæli, váttanir o.a., ið verða mettar neyðugar fyri at kunna viðgera og taka avgerð í málinum, skulu verða fingnar til vegar, áðrenn málið verður lagt fyri Føroya Kærustovn til avgerðar.
Stk. 3. Tann myndugleiki, ið hevur tikið ta kærdu avgerðina, hevur skyldu til at lata Føroya Kærustovni allar upplýsingar, sum hava verið grundarlag undir kærdu avgerðini.
Stk. 4. Kæra hevur ikki steðgandi virknað uttan so, at hetta er ásett í aðrari lóggávu. Um serligar umstøður tala fyri tí, kann Føroya Kærustovnur gera av, at ein kæra fær steðgandi virknað.
Onnur mál enn kærumál
§ 11. Umsóknir, tilmæli o.a., har Føroya Kærustovnur sambært § 2 skal taka avgerð, verða send Føroya Kærustovni skrivliga.
Stk. 2. Allar upplýsingar, ið verða mettar neyðugar fyri at kunna viðgera og taka avgerð í málinum, skulu verða fingnar til vegar, áðrenn málið verður lagt fyri Føroya Kærustovn til avgerðar.
Almannakunngering av avgerðum og ársfrágreiðing
§ 12. Ein umboðandi partur av avgerðunum, sum Føroya Kærustovnur hevur tikið, skulu almannakunngerast. Avgerðir, sum verða kunngjørdar, skulu vera navnleysar og gjørdar so ókenniligar sum gjørligt.
Stk. 2. Tá ið avgerðir verða almannakunngjørdar, eigur serligur dentur at verða lagdur á, at avgerðirnar hava meginregluligan ella almennan týdning fyri siðvenjuna á økinum.
Stk. 3. Avgerðirnar kunnu almannakunngerast í øllum miðlum.
§ 13. Føroya Kærustovnur ger eina ársfrágreiðing um virksemi sítt, sum skal almannakunngerast.
Rættur partanna at møta í Føroya Kærustovni
§ 14. Føroya Kærustovnur eigur eftir áheitan og kann av sínum eintingum geva pørtunum og øðrum høvi til at siga sína áskoðan munnliga fyri Føroya Kærustovni.
Roynd av avgerðum í Føroya Rætti
§ 15. Um ikki annað er ásett í aðrari lóggávu, kunnu avgerðir hjá Føroya Kærustovni skjótast inn fyri Føroya Rætt innan 6 mánaðir eftir, at avgerðin er fráboðað viðkomandi.
Skiftistíðarskeið
§ 16. Tann 1. januar 2022 verða hesar kærunevndir tiknar av og virkisøkið flutt til Føroya Kærustovn:
1) Kærunevndin í almanna-, familju- og heilsumálum.
2) Skatta- og avgjaldskærunevndin.
3) Kærunevndin hjá Studna.
Stk. 2. Tann 1. juli 2022 verða hesar nevndir og kærunevndir tiknar av og virkisøkið flutt til Føroya Kærustovn:
1) Kærunevndin í lendismálum.
2) Vinnukærunevndin.
3) Skuldarumskipanarnevndin.
Stk. 3. Tann 1. januar 2023 verða hesar kærunevndir tiknar av og virkisøkið flutt til Føroya Kærustovn:
1) Kærunevndin hjá Arbeiðsloysisskipanini, ALS.
2) Kærunevndin hjá Barsilsskipanini.
Stk. 4. Tann 1. juli 2023 verða hesar nevndir og kærunevndir tiknar av og virkisøkið flutt til Føroya Kærustovn:
1) Høvuðsbarnaverndarnevndin.
2) Psykiatriska sjúklingakærunevndin.
Stk. 5. Tann 1. januar 2024 verður Tvingsilsnevndin tikin av og virkisøkið flutt til Føroya Kærustovn.
§ 17. Inntil allar kærunevndir og nevndir sambært § 16 eru tiknar av, virkar Føroya Kærustovnur í skiftistíðarskeiðnum til 1. januar 2024 sum skrivstova hjá hesum kærunevndum og nevndum.
Gildiskoma og skiftisreglur
§ 18. Henda løgtingslóg kemur í gildi dagin eftir, at hon er kunngjørd.
Stk. 2. Kæra send til kærunevnd og mál sent til nevnd, sum ikki er avgreitt, tá ið viðkomandi kærunevnd ella nevnd sambært § 16 verður tikin av, viðger og avgreiðir Føroya Kærustovnur sambært reglunum í hesi løgtingslóg.
Í Tinganesi, 25. november 2021
Bárður á Steig Nielsen (sign.)
løgmaður
Lm. nr. 7/2021
