Løgtingslóg nr. 38 frá 20. mai 1988 um stuðul til bygging av fiskiførum á føroyskum skipasmiðjum til útflutnings, sum seinast broytt við løgtingslóg nr. 73 frá 20. mai 1996

20. mai 1988Nr. 38

Løgtingslóg um stuðul til bygging av fiskiførum á føroyskum skipasmiðjum til útflutnings, sum seinast broytt við løgtingslóg nr. 73 frá 20. mai 1996

§ 1. Landsstýrinum verður heimilað í samráð við fíggjarnevnd Løgtingsins landskassans vegna at veðhalda fyri byggilánum til fiskifør og fyri at føroyskar skipasmiðjur lúka treytirnar eftir sáttmálum um bygging av fiskiskipum til útlendskan eigara.

§ 2. Lán, landskassin veðheldur fyri, skal tryggjast við pantirætti í viðkomandi skipi innanfyri 90% av sáttmálaprísinum.

§ 3.^{1) 2)} (Strikað).

§ 4. ^{1) 2) 3)}  (Strikað).

§ 5. ¹⁾ Landsstýrinum verður heimilað eftir góðkenning fíggjarnevndarinnar at veita upp til 6% í rentustudningi til felag, ið byggir fiskiskip á føroyskari skipasmiðju. Studningurin verður veittur av virði skipsins eftir meting.

Stk. 2. Landsstýrinum verður heimilað eftir góðkenning fíggjarnevndarinnar at veita upp til 6% í rentustudningi til felag, ið umbyggir fiskiskip á føroyskum skipasmiðjum. Studningurin verður veittur av umbyggingarvirðinum eftir meting. Studningurin er treytaður av, at virðið, ið umbyggingin gevur, verður 8 mió. kr. ella meira.

Stk. 3. Rentustudningurin verður goldin yvir 3 ár við 2% hvørt árið. Goldið verður hálvárliga, fyrstu ferð 1/2 ár aftaná at skipið er virðismett, avhendað og skrásett uttanlands.

§ 6. ²⁾ Henda lóg kemur í gildi dagin eftir kunnger.

Stk. 2. (Strikað).