Skrivar tú trygging verður eisini leitað eftir øðrum endingum av orðinum sum t.d. tryggingar og tryggingarvirksemi.
Skrivar tú ?trygging verður leitað eftir orðum sum t.d. lívstrygging og lívstryggingar.
Skrivar tú ”trygging” verður einans leitað eftir júst hesum sniðnum av orðinum.
26. mars 2002Nr. 38
Løgtingslóg um broyting í løgtingslóg um vinnuligan fiskiskap
Samsvarandi samtykt Løgtingsins staðfestir og kunnger løgmaður hesa løgtingslóg:
§ 1
Í løgtingslóg nr. 28 frá 10. mars 1994 um vinnuligan fiskiskap við seinni broytingum, verða gjørdar hesar broytingar:
1) § 5, stk. 3 verður orðað soleiðis:
“Stk. 3. Veiðiloyvi sambært hesi lóg fyri fiskifør, onnur enn tey, ið koma undir bólk 5 sambært § 28, stk. 1, er góðkenning, ið landsstýrismaðurin veitir ávísum fiskifari at veiða á føroysku landleiðunum og á leiðum uttan fyri føroysku landleiðirnar.”
2) Í § 5, stk. 4 verður eftir 1. pkt. sett:
“Fyri fiskifør, ið koma undir bólk 5 sambært § 28, stk. 1, krevst tó ikki veiðiloyvi fyri at fáa tillutað fiskiloyvi.”
3) § 5, stk. 9 verður orðað soleiðis:
“Fiskidaganevndin. Landsstýrismaðurin velur eina Fiskidaganevnd, umboðandi vinnuna á sjónum, sum letur landsstýrismanninum metingar um støðuna í botnfiskastovninum og tilmæli um fiskidagar, og hvussu fiskiskapurin skal skipast tað komandi fiskiárið. Nevndin og varaumboð verða vald fyri 4 ár í senn. Landsstýrismaðurin ger reglugerð um val og virki nevndarinnar og tryggjar nevndini neyðugt tilfar til tess at útinna arbeiðssetningin. Landsstýrismaðurin velur formann og varaformann og setur skrivara.”
4) § 7, stk. 1, 1. pkt. verður orðað soleiðis: “Vinnuligur fiskiskapur sambært hesi lóg kann bert fara fram við fiskiførum, sum sambært ognarviðurskiftunum til eina og hvørja tíð eru heimahoyrandi í Føroyum og hava veiðuloyvi eftir § 5, stk. 3 ella fiskiloyvi eftir § 5, stk. 4, 2. pkt., ella hvørs eigarar hava fingið fiskiloyvi til fyribils ella avmarkað rættindi sambært § 5, stk. 4, 3. pkt.”
5) Í § 7, stk. 3, nr. 3 verður orðið “Føroya Landsstýri” og í § 7, stk. 5 verður orðið: “Landsstýrið” broytt til: “Landsstýrismaðurin”.
6) § 8, stk. 1 verður orðað soleiðis:
“§ 8. Veiðiloyvi frá fiskifari, ið er lagt med alla, har ræðisavmarking er skrásett í skipaskránni, ella farið er strikað í skipaskránni, kann eftir umsókn verða flutt til annað fiskifar uttan veiðiloyvi við somu ella minni fiskiorku ella til innflutt fiskifar við somu ella minni fiskiorku. Er talan um veiðiloyvi til uppsjóvar fiskasløg, rækjuveiði ella til fiskiskap uttan fyri føroysku landleiðirnar, kann landsstýrismaðurin gera undantak frá hesum kravi.”
7) Í § 8, stk. 2, 2. pkt. og stk. 3, 2. pkt. verður orðingin: “Tó er ikki loyvt at flyta veiðiloyvi frá fiskifari, ið er minni enn 40 tons, til fiskifar størri enn 40 tons ella øvugt” broytt til: “Tó er ikki loyvt at flyta veiðiloyvi frá fiskifari, ið er minni enn 15 tons, til fiskifar størri enn 15 tons ella øvugt”.
8) § 8, stk. 6, 1. og 2. pkt. verða strikað.
9) Í § 8 verður sum stk. 8 sett:
“Stk. 8. Ásetingarnar í stk. 1-7 eru eisini galdandi fyri flyting av fiskiloyvi millum fiskifør í bólki 5 sambært § 28, stk. 1.”
10) § 11, stk. 1, 1. pkt. verður orðað soleiðis:
“Fiskifør undir føroyskum flaggi kunnu ikki fara til vinnuligan fiskiskap
uttan at hava veiðiloyvi og fiskiloyvi sambært § 5, stk. 3 og 4, ella
fiskiloyvi sambært § 5, stk. 4, 2. pkt., ella uttan at eigarar tess hava
fingið fiskiloyvi til fyribils ella avmarkað rættindi sambært § 5, stk. 4.”
11) § 12 verður orðað soleiðis:
“§ 12. Bert persónar og feløg, ið eiga fiskifør, ið hava veiðiloyvi sambært § 5, stk. 3, kunnu fáa rættindi sambært § 5, stk. 4 – 8. Fyri fiskifør í bólki 5 sambært § 28 krevst tó ikki veiðiloyvi fyri at fáa rættindi sambært § 5, stk. 4 – 8. Eigari av fiskifari, ið hevur fingið fiskiloyvi til fyribils ella avmarkað rættindi sambært § 5, stk. 4, kann fáa rættindi sambært § 5, stk. 5–8.”
12) § 13, stk. 1 verður orðað soleiðis:
“§ 13. Fyri eigarar av fiskiførum við veiðiloyvi sambært § 5, stk. 3, og fiskiførum við fiskiloyvi í bólki 5 sambært § 28, stk. 1 hevur rætturin til fiskidagar, egnan kvotupart og egna hjáveiðikvotu gildi 10 ár í senn, smb. tó §§ 14 og 15. “
13) § 13, stk. 2 verður strikað.
14) § 13, stk. 3 verður hereftir stk. 2, og stk. 4 verður stk. 3, og stk. 5 verður stk. 4.
15) § 14 verður orðað soleiðis:
“§ 14. Fiskidagar kunnu avhendast fyri eitt fiskiár í senn ella endaliga millum fiskifør í høvuðsbólkunum 2, 3 og 4, ásettir sambært § 29, stk. 1. Tó er ikki loyvt at avhenda fiskidagar, ætlaðir til húkaveiði, til trolveiði ella øvugt. Farið verður fram eftir reglum, sum landsstýrismaðurin ásetur í kunngerð. Avhendingin er treytað av, at partarnir lúka ásetingarnar í § 13, og fyri avhending, ið ikki er endalig, at í minsta lagi 60% av tillutaðu døgunum fiskiárið frammanundan eru nýttir til fiskiskap við tí í fiskiloyvinum nevnda fiskifarinum. Fyri avhendan millum fiskifør skulu reglurnar áseta tað lutfalsliga virðið á fiskidøgum, grundað á veiðievni.
Stk. 2. Fiskidagar kunnu avhendast í sama fiskiári millum høvuðsbólkarnar, ásettir sambært § 28, stk. 1, undantikið frá bólki 5, til hinar bólkarnar, tá 3 mánaðir eru eftir av fiskiárinum eftir nærri reglum, sum landsstýrismaðurin ásetur í kunngerð. Rættindahavari til húkaveiðu í høvuðsbólki 4 kann ikki avhenda fiskidagar til rættindahavara til trolveiðu í bólki 4. Fyri avhendan millum høvuðsbólkarnar skulu reglurnar áseta tað lutfalsliga virðið á fiskidøgum, grundað á veiðievni.
Stk. 3. Fiskirættindi, svarandi til avhendaðar fiskidagar, verða løgd afturat rættindunum hjá fiskiloyvinum, sum tað er avhendað til. Fiskidagar, sum verða endaliga avhendaðir, skulu fylgja lutfalsliga vøkstri og niðurskurði í sama mun, sum ásetingin í § 29 fyri hvørt fiskiár broytist.
Stk. 4. Um upprunaligi loyvishavarin, sum hevur avhendað fiskidagar fyri eitt fiskiár, ikki lýkur ásetingarnar í § 12, tá nýtt fiskiár byrjar, verður fiskiloyvi ikki útskrivað, men kann landsstýrismaðurin býta fiskidagarnar lutfalsliga í avvarðandi undirbólki.
Stk. 5. Fiskiveiðieftirlitið skal hava fráboðan um avhending av fiskidøgum. Fráboðanin skal gerast skrivliga og skal váttast av báðum pørtum. Áður enn avhendaðu fiskidagarnir kunnu nýtast, skal Fiskiveiðieftirlitið við skrivligari fráboðan til báðar partar hava staðfest, at hann, sum avhendar fiskidagar, hevur ræði yvir so mongum fiskidøgum.
Stk. 6. Fiskidagar kunnu ikki setast í veð.”
16) § 15 verður orðað soleiðis:
“§ 15. Egin kvotupartur, egin árskvota og egin hjáveiðikvota kunnu avhendast í eitt ár í senn ella endaliga eftir nærri reglum, sum landsstýrismaðurin ásetur í kunngerð. Hetta er treytað av, at partarnir lúka ásetingarnar í § 13, og fyri avhending, ið ikki er endalig, at í minsta lagi 60% av tillutaðu kvotunum álmanakkaárið frammanundan eru nýttar til fiskikap við tí í fiskiloyvinum nevnda fiskifarinum.
Stk. 2 Fiskirættindi, svarandi til avhendaðar kvotur, verða løgd afturat rættindunum hjá fiskiloyvinum, sum tað er avhendað til. Kvotur, sum eru avhendaðar, skulu fylgja lutfalsliga vøkstri og niðurskurði í sama mun, sum felags árskvotan broytist hvørt ár.
Stk. 3. Um upprunaligi loyvishavarin, sum hevur avhendað kvotur fyri eitt álmanakkaár, ikki lýkur ásetingarnar í § 12, tá nýtt álmanakkaár byrjar, verða egin árskvota og egin hjáveiðikvota ikki útskrivað, men kann landsstýrismaðurin býta kvoturnar til onnur fiskifør.
Stk. 4. Fiskiveiðieftirlitið skal hava fráboðan um avhending av teimum í stk. 1 nevndu kvotum. Fráboðanin skal gerast skrivliga og skal váttast av báðum pørtum. Áður enn avhendaðu kvoturnar kunnu nýtast, skal Fiskiveiðieftirlitið við skrivligari fráboðan til báðar partar hava staðfest, at hann, sum avhendar kvotur, hevur ræði á hesum kvotum.
Stk. 5. Egin kvotupartur, egin árskvota og egin hjáveiðikvota kunnu ikki setast í veð.”
17) § 21, stk. 1, 1. pkt. verður orðað soleiðis:
“Veiða úr stovnum, ið ikki koma undir kvotu- ella fiskidagaskipan ella
skipan við serligum fiskiloyvi, er loyvd fiskiførum við veiðiloyvi og
fiskiloyvi sambært § 5, stk. 3 og 4, fiskiførum við fiskiloyvi sambært § 5,
stk. 4, 2. pkt. ella fiskiførum, hvørs eigarar hava fingið fiskiloyvi til
fyribils ella avmarkað rættindi sambært § 5, stk. 4.”
18) Í § 31 verður sum stk. 2 sett:
“Stk. 2. Bátar í bólki 5, sambært § 29, stk.1, sum vóru skrásettir í Føroyum fyri 1. januar 1995 og framvegis eru skrásettir, kunnu, hóast ásetingarnar í stk.1, fáa útskrivað fiskiloyvi sambært § 5, stk. 4, 1. pkt.
§ 2
Henda lóg kemur í gildi dagin eftir, at hon er kunngjørd. Í § 1, nr. 13 kemur § 14, stk. 1, 4. pkt. og í § 1, nr. 14 kemur § 15, stk. 1, 2. pkt. tó ikki í gildi fyrr enn 1. september 2002. § 1, nr. 13 og 14 eru tó ikki galdandi fyri fiskidagar, egnar kvotupartar, egnar árskvotur og egnar hjáveiðikvotur, ið , áðrenn henda lóg kom í gildi, eru avhendar fyri meiri enn eitt ár í senn.
Tórshavn, 26. mars 2002
Anfinn Kallsberg (sign.)
løgmaður
