Skrivar tú trygging verður eisini leitað eftir øðrum endingum av orðinum sum t.d. tryggingar og tryggingarvirksemi.
Skrivar tú ?trygging verður leitað eftir orðum sum t.d. lívstrygging og lívstryggingar.
Skrivar tú ”trygging” verður einans leitað eftir júst hesum sniðnum av orðinum.
26. mars 2002Nr. 46
Løgtingslóg um frískúlar, sum seinast broytt við løgtingslóg nr. 67 frá 4. mai 2022
Kapittul 1
Endamál og virkisøki
§ 1. Endamálið við lógini er at skipa viðurskiftini og tann almenna stuðulin til frískúlar í Føroyum og áseta karmarnar fyri virkseminum.
§ 2. Lógin er galdandi fyri frískúlar, sum undirvísa aldursbólkum samsvarandi 1.- 9. skúlaári í fólkaskúlanum.
Stk. 2. Landsstýrismaðurin kann geva loyvi til, at forskúlaflokkar og undirvísing eftir 9. skúlaár eisini koma undir lógina.
Stk. 3. Ein frískúli skal í minsta lagi bjóða undirvísing í 1.- 7. skúlaári.
Stk. 4. Landsstýrismaðurin kann víkja frá reglunum í stk. 3.
§ 3. Skúlin skal geva næmingunum møguleika at fara til fráfaringarroyndir fólkaskúlans.
Stk. 2. Landsstýrismaðurin kann geva einum frískúla loyvi at hava somu royndir og vallærugreinir sum fólkaskúlin. Reglurnar fyri royndunum eru tær somu sum í fólkaskúlanum, og skúlin ger sjálvur av, á hvørjum floksstigi royndirnar fara fram.
Stk. 3. Landsstýrismaðurin kann í samráð við skúlamyndugleikarnar á staðnum loyva næmingum úr frískúlum at taka fráfaringarroyndirnar í fólkaskúlanum.
Kapittul 2
Góðkenning og eftirlit
§ 4. Landsstýrismaðurin skal góðkenna ein frískúla, áðrenn farast kann undir undirvísingina.
Stk. 2. Fyri at fáa góðkenning skal frískúlin vera:
1. ein fakligur og/ella námsfrøðiligur valmøguleiki í mun til almenna skúlan
2. skipaður fyri at nøkta ein størri undirvísingartørv enn vanligt.
3. skipaður soleiðis, at hann uppfyllir § 2, stk. 3 í fólkaskúlalógini.
Stk. 3. Undirvísingarhøli og útbúnaður skulu góðkennast av landsstýrismanninum og vera tillagað tørvinum hjá brekaðum.
§ 5. 1) Treytin fyri, at ein frískúli kann fara undir virksemi sítt, er, at skúlin skjalprógvar við undirskrift foreldranna í seinasta lagi 1. apríl sama ár, sum skúlaárið byrjar, at í minsta lagi 12 næmingar eru innskrivaðir at byrja komandi skúlaár.
Stk. 2. Eftir trimum árum skal næmingatalið vera í minsta lagi 28.
Stk. 3. Lýkur skúlin ikki treytirnar ásettar í stk. 1 og 2, kann landsstýrismaðurin loyva skúlanum at halda fram við ella uttan stuðli sambært § 18, stk. 1, 1. pkt.
§ 6. Frískúlarnir verða skipaðir sum sjálvsognarstovnar, hvørs viðtøkur skulu góðkennast av landsstýrismanninum. Landsstýrismaðurin kann áseta nærri reglur um karmar og innihald í viðtøkunum.
Stk. 2. Landsstýrismaðurin kann taka aftur góðkenningina av einum frískúla, um so er, at skúlin ikki heldur galdandi reglur.
§ 7. Undirvísingarætlan skúlans skal góðkennast av landsstýrismanninum.
Stk. 2. Landsstýrismaðurin hevur eftirlit við frískúlum og kann í hesum sambandi biðja um allar neyðugar upplýsingar um næmingar, lærarar, undirvísingina og skúlans rakstur.
§ 8. Talið á døgum í skúlaárinum er í minsta lagi tað sama sum í fólkaskúlanum.
Kapittul 3
Rættur næminganna
§ 9. Frískúlar hava skyldu at taka næmingar inn úr øllum landinum.
Stk. 2. 2) Skúlastýrið kann áseta almennar reglur fyri innskrivingini. Høvuðsreglan er, at børn hava sama rætt at verða innskrivað í frískúlan sum í fólkaskúlan.
Stk. 3. 2) Frískúlar skulu í september mánað boða heimstaðarkommununi hjá næmingunum frá teimum næmingum, sum eru innskrivaðir í frískúlan.
§ 9 a. 1) Næmingur í frískúla hevur rætt til ferðastuðul frá heimstaðarkommununi, tá ið næmingurin ferðast við Strandfaraskipum Landsins í og úr skúla.
Stk. 2. Næmingurin hevur rætt til ferðastuðul aftur og fram til og frá skúlanum eina ferð um dagin.
§ 10. Næmingarnir hava rætt til at gera seg lidnar við tað skúlaárið, sum er byrjað.
Stk. 2. Um skúlin er floksbýttur, verður uppflytingin av næmingum framd á sama hátt sum í fólkaskúlanum.
§ 11. Næmingarnir hava rætt til sernámsfrøðiliga hjálp og ráðgeving á sama støði sum næmingarnir í fólkaskúlanum.
Stk. 2. 2) Landsstýrismaðurin veitir næmingunum í frískúlunum tímar til serligan tørv eftir somu reglum sum næmingum fólkaskúlans.
Stk. 3. Frískúlar hava rætt til somu tænastuveitingar frá Sernámsdeplinum sum fólkaskúlarnir hava.
Kapittul 4
Leiðsluviðurskifti
§ 12. Eitt skúlastýri skal verða valt til hvønn frískúla. Limir tess eru:
1) 2 foreldraumboð vald av og ímillum teirra, ið hava foreldramyndugleikan yvir teimum børnum, sum eru innskrivað í skúlan
2) 2 umboð fyri áhugabólkin, sum rekur skúlan, vald av og ímillum teirra, ið eru í áhugabólkinum
3) 1 umboð fyri starvsfólkið valt av og ímillum teirra, ið starvast í skúlanum.
Hesi hava øll atkvøðurætt. Formaðurin í skúlastýrinum skal verða valdur í millum foreldraumboðini ella umboðini fyri áhugabólkin.
Stk. 2. Er eingin áhugabólkur knýttur at skúlanum, hava foreldrini rætt til umboðini hjá áhugabólkinum.
Stk. 3. 2) Leiðari skúlans er skrivari skúlastýrisins og tekur lut uttan atkvøðurætt á skúlastýrisfundum.
Stk. 4. Kommunustýrið kann eftir áheitan frá skúlastýrinum gera av, at ein av limum tess er við á skúlastýrisfundi uttan atkvøðurætt.
Stk. 5. 2) Eitt umboð fyri næmingarnar kann eftir áheitan frá skúlastýrinum luttaka á skúlastýrisfundunum.
Stk. 6. 2) Valskeiðið hjá skúlastýrislimunum er 2 ár. Landsstýrismaðurin ger reglur fyri valið.
§ 13. 2) Skúlastýrið er ovasta leiðsla í skúlanum og virkar samsvarandi viðtøkum skúlans. Eftir tilmæli skúlaleiðarans staðfestir skúlastýrið virksemið í einum skúlaári, eins og tað skal góðkenna skúlans rakstrarætlan og roknskap.
Stk. 2. 2) Tá ið eitt skúlastýri er valt, skal tað boða landsstýrismanninum frá, hvørjir limirnir í skúlastýrinum eru. Broytingar í samansetingini av skúlastýrinum skulu somuleiðis boðast landsstýrismanninum.
§ 14. 2) Skúlastýrið hevur mótvegis landsstýrismanninum ábyrgdina av virksemi skúlans.
Stk. 2. 2) Um skúlastýrið ikki fylgir boðum frá landsstýrismanninum um rætting av nærri ásettum viðurskiftum, kann landsstýrismaðurin gera av
1) at uppgávurnar hjá skúlastýrinum heilt ella lutvíst verða røktar av persónum, sum landsstýrismaðurin hevur tilnevnt, ella
2) at skúlastýrið fer frá, so eitt nýtt skúlastýri kann verða valt eftir viðtøkum skúlans.
Kapittul 5
Starvsfólkaviðurskifti
§ 15. Skúlastýrið setur leiðaran, lærarar og onnur starvsfólk. Leiðarin kann seta starvsfólk, sum eru í arbeiði ein part av skúlaárinum.
Stk. 2. Høvuðsreglan er, at fólk við læraraútbúgving skulu setast í størv, sum krevja undirvísingarligan førleika.
Stk. 3. Skúlastýrið kann, um serligar grundir tala fyri tí, seta fólk uttan læraraútbúgving.
§ 16. 2) Skúlaleiðarin hevur ta fyrisitingarligu og námsfrøðiligu leiðsluna. Leiðarin hevur fyri skúlastýrinum ábyrgdina av
1) at galdandi lógir og reglur verða hildnar
2) at undirvísingin verður framd samsvarandi galdandi reglum
3) at undirvísingarligu viðurskiftini eru í lagi
4) at tann av skúlastýrinum góðkenda rakstrarætlan verður hildin
5) at skúlans virksemi er samsvarandi avgerðum og ásetingum skúlastýrisins.
§ 17. Starvsfólk skúlans hava rætt til somu løn sum fólk í samsvarandi størvum í fólkaskúlanum.
Kapittul 6
Fígging av rakstri
§ 18. Virksemið hjá frískúlunum verður partvíst fíggjað við stuðli, sum landsstýrismaðurin og kommunurnar útvega. Írestandi fíggingin skal útvegast við foreldragjaldi og/ella privatum stuðli.
Stk. 2. 2) Landsstýrisins partur av rakstrinum verður útroknaður hvønn 1. september í skúlaárinum. Stuðulin svarar til 85% av miðalkostnaðinum fyri hvønn næming í fólkaskúlanum, tó kann stuðulin ikki fara upp um játtan sambært góðkendari fíggjarætlan uttan loyvi frá landsstýrismanninum.
Stk. 3. 2) Skúlin skal lata inn fíggjarætlan fyri komandi fíggjarár áðrenn 1. juni. Stk. 3, 2. pkt. Skúlin skal fyri komandi skúlaár lata landsstýrimanninum fyribils næmingatal í seinasta lagi 1. februar og endaligt næmingatal 1. september.
Stk. 4. Heimstaðarkommunan hjá næminginum rindar kommunugjaldið
Stk. 5. 1) Kommununnar stuðul til næmingar í frískúlum verður roknaður eftir einum miðalkostnaði fyri hvønn næming, við grundarlagi í rakstrarútreiðslunum fyri hvønn næming í skúlunum hjá fimm teimum størstu kommununum. Stuðulin til hvønn næming í frískúlum er 85% av miðalkostnaðinum fyri hvønn næming. Avdráttur, renta og leiga eru ikki roknað upp í rakstrarútreiðslurnar.
Stk. 6. 2) Kommununnar stuðul til forskúlaflokkar, sum verða góðkendir sbrt. § 2, stk. 2, er 85% av rakstrarútreiðslunum, íroknað útreiðslur til skrivstovuhald og 85% av útreiðslunum til læraralønir og námsfrøðingalønir.
Stk. 7. 2) Kommununnar partur av rakstrarútreiðslunum samanber stk. 5 verður í fyrsta umfari rindað av landsstýrinum, og síðan býtir Føroya Gjaldsstova við ársenda rakstrarútreiðslurnar millum kommunurnar eftir heimstaðnum, næmingarnir sambært landsfólkayvirlitið høvdu 1. september.
Stk. 8. 2) Eru eingi rakstrartøl fyri kommunalu útreiðslurnar, samanber stk. 5 og 6, roknar Føroya Gjaldstova eitt miðaltal út við grundarlagi í fimm teimum størstu kommununum.
Stk. 9. 2) Foreldragjaldið verður ásett av skúlastýrinum.
Stk. 10. 2) Møguligt yvirskot hjá sjálvsognarstovninum kann ikki flytast til annað virksemi.
§ 19. Landsstýrismaðurin kann halda aftur ella krevja stuðul afturgoldnan, um treytir fyri veiting av stuðli ikki verða hildnar.
Stk. 2. 1) (Strikað).
Kapittul 7
Roknskapur og grannskoðan
§ 20. Roknskapurin hjá frískúlum sambært hesi lóg skal gerast og setast upp samsvarandi ásetingunum í løgtingslóg nr. 33 frá 23. mars 1994 um landsins almenna roknskaparhald v.m.
Stk. 2. Roknskapurin skal grannskoðast av løggildum grannskoðara. Grannskoðaður roknskapur og grannskoðarafrágreiðing skal sendast landsstýrismanninum.
Stk. 3. Grannskoðaradeild landskassans kann í sambandi við landsgrannskoðanina biðja um upplýsingar beinleiðis frá stýrinum.
Stk. 4. 2) Um tað í grannskoðarafrágreiðingini, samanber stk. 2, verður víst á lógarbrot ella onnur óreglulig viðurskifti í sambandi við umsitingina av skúlanum, skal landsstýrismaðurin alt fyri eitt, um grannskoðanin gevur orsøk til tess, seta í verk tiltøk, sum aftur tryggja lóglig viðurskifti og fullgóða umsiting. Sama er eisini galdandi, um landsstýrismaðurin á annan hátt verður gjørdur kunnugur við nevndu viðurskifti.
Kapittul 8
Ymsar ásetingar
§ 21. Avgerð, sum skúlastýri og leiðari skúlans hava tikið, kann verða kærd til landsstýrismannin í seinasta lagi 4 vikur eftir, at avgerðin er fráboðað. Landsstýrismaðurin ásetur gjøllari reglur um kærur.
Stk. 2. Reglurnar um innlit eftir fyrisitingarlógini og lógini um alment innlit galda fyri frískúlar.
Kapittul 9
Gildissetan
§ 23. Henda løgtingslóg kemur í gildi 1. august 2003 og samstundis verður § 27 í løgtingslóg nr. 58 frá 2. oktober 1978 um skúlafyrisiting strikað.
Tórshavn, 26. mars 2002
Anfinn Kallsberg (sign.)
løgmaður
