Løgtingslóg nr. 50 frá 28. apríl 1992 um maskinmeistaraútbúgving og aðrar maskin- og eltøkniútbúgvingar, sum broytt við løgtingslóg nr. 67 frá 20. mai 1996

28. apríl 1992Nr. 50

Løgtingslóg um maskinmeistaraútbúgving og aðrar maskin- og eltøkniútbúgvingar, sum broytt við løgtingslóg nr. 67 frá 20. mai 1996

§ 1.¹⁾  Landsstýrismanninum verður heimilað at reka skúla og venjingarskip til fremjing av teimum útbúgvingum, sum eru nevndar í §  3.

§ 2. ¹⁾ Landsstýrismaðurin setir útbúgvingarráð fyri útbúgvingar sambært hesi lóg og ger reglugerð fyri virki tess.

§ 3. Á maskinskúla kunnu fara fram hesar útbúgvingar:

1)   Dugnaskaparútbúgving í motorpassing,

2)   motorpassaraútbúgving,

3)   maskinmeistaraútbúgving,

4)   elinnleggjaraútbúgving og sterkstreymsteknikaraútbúgving.

Stk. 2. Eftirútbúgving í teimum útbúgvingum, sum eru nevndar í stk. 1, pkt. 1)-4) og royndarútbúgvingar kunnu eisini fara fram á maskinskúla.

Stk. 3. ¹⁾ Fyrireiking og próvtøka til dugnaskaparútbúgving í motorpassing og motorpassaraútbúgving eins og eftirútbúgving sambært stk. 2 kunnu eisini fara fram á øðrum skeiðum eftir góðkenning frá landsstýrismanninum.

§ 4. Næmingarnir skulu fáa ein part av undirvísingini umborð á venjingarskipi og við simulatori.

§ 5. ¹⁾ Landsstýrismaðurin skipar fyri próvtøkuni.

Stk. 2. Til próvtøkuna verða havdar skrivligar og munnligar royndir við próvdómarum, sum landsstýrismaðurin útnevnir. Próvdómarar í maskin- og ellæru skulu hava hægsta maskinmeistaraprógv ella samsvarandi prógv.

Stk. 3. Landsstýrismaðurin gevur teimum, ið staðið hava próvtøkuna, próvbræv.

§ 6. Landsstýrið ásetir nærri reglur um:

a)    treytir fyri upptøku á maskinskúla,

b)   undirvísingarskipan, lærukrøv og lærugreinir,

c)    próvtøkuhald, herundir krøv til tær einstøku próvtøkurnar, próvtalsgeving og próvdøming,

d)   útbúgvingarkrøv til lærarar.

§ 7. Maskinskúlin skal tryggja næmingar móti óhappi undir sigling við venjingarskipi og bjargingarroynd og á eldsløkkingarskeiði.

§ 8. Henda løgtingslóg fær gildi 1. august 1992.