Skrivar tú trygging verður eisini leitað eftir øðrum endingum av orðinum sum t.d. tryggingar og tryggingarvirksemi.
Skrivar tú ?trygging verður leitað eftir orðum sum t.d. lívstrygging og lívstryggingar.
Skrivar tú ”trygging” verður einans leitað eftir júst hesum sniðnum av orðinum.
12. mai 2015Nr. 53
Løgtingslóg um P/F Lív lívs- og pensiónstryggingarfelag, sum broytt við løgtingslóg nr. 91 frá 7. juni 2020
Lógarøki
§ 1. P/F Lív lívs- og pensiónstryggingarfelag, skrá nr. 5758, rekur sítt virksemi eftir ásetingunum í hesi løgtingslóg.
Virksemi
§ 2. P/F Lív lívs- og pensiónstryggingarfelag, sum er eitt felag undir avtøku, umsitur tryggingarnar, sum teknaðar eru fyri 1. januar 2000 í Føroya Lívstrygging.
Stk. 2. P/F Lív lívs- og pensiónstryggingarfelag kann ikki tekna nýggjar tryggingar og kann ikki broyta verandi tryggingaravtalur.
Stk. 3. P/F Lív lívs- og pensiónstryggingarfelag kann ikki reka annað virksemi enn tað í stk. 1 nevnda.
Landskassaveðhald
§ 3. Tað í løgtingslóg um lívstryggingarvirki og løgtingslóg um umskipan av Føroya Lívstrygging nevnda landskassaveðhald/-ábyrgd er framvegis galdandi fyri felagið og tær tryggingaravtalur, sum P/F Lív lívs- og pensiónstryggingarfelag umsitur.
Stk. 2. Landsstýrismanninum verður vegna landskassaveðhaldið heimilað at rinda til felagið, tá felagnum tørvar pening at halda verandi tryggingaravtalur.
Stk. 3. Hóast stk. 2 verður landsstýrismanninum heimilað at rinda fyrr til felagið, um tað, við støði í árliga uppgjørdum tíggju ára framskrivingum av gjaldførismetingum frá felagnum, verður mett, at inngjald eftir stk. 2 kann gerast tyngjandi fyri gjaldføri landskassans.
Góður skikkur
§ 4. P/F Lív lívs- og pensiónstryggingarfelag skal verða rikið samsvarandi reiðiligum handilsskikki og góðari siðvenju innan virkisøkið.
Stk. 2. Landsstýrismaðurin ásetir neyvari reglur um reiðiligan handilsskikk og góða siðvenju hjá P/F Lív lívs- og pensiónstryggingarfelag.
Leiðsla
§ 5. So leingi landskassaveðhald er fyri tryggingar felagsins, sbr. § 3, verður nevndin í P/F Lív lívs- og pensiónstryggingarfelag vald av landsstýrismanninum.
Stk. 2. Limur í nevndini ella stjórnini í P/F Lív lívs- og pensiónstryggingarfelag skal hava nøktandi royndir til at røkja starvið ella uppgávuna.
Stk. 3. Nevndar- ella stjórnarlimir skulu lúka hesar treytirnar:
1) Nevndar- ella stjórnarlimi má ikki verða áløgd revsiábyrgd fyri brot á revsilógina, løgtingslóg um tryggingarvirksemi ella aðra viðkomandi lóggávu, um brotið hevur við sær vanda fyri, at viðkomandi ikki kann røkja starvið ella uppgávuna á trygdargóðan hátt.
2) Nevndar- ella stjórnarlimur má ikki hava fráboðað gjaldsteðg, hava latið inn umsókn um neyðskuldarsemju, konkurs ella skuldarumskipan ella vera farin í gjaldsteðg, undir konkursviðgerð, skuldarumskipan ella neyðskuldarsemju.
3) Nevndar- ella stjórnarlimur má ikki vegna sína fíggjarligu støðu ella umvegis eitt felag, sum viðkomandi eigur, luttekur í rakstrinum av ella hevur munandi ávirkan á, hava borið ella bera felagnum tap ella vanda fyri tapi.
§ 6. P/F Lív lívs- og pensiónstryggingarfelag skal hava effektivar stýringshættir, undir hesum:
1) ein greiðan bygnað við væl lýstum, gjøgnumskygdum og føstum ábyrgdarbýti,
2) eina góða umsitingarliga og roknskaparliga siðvenju,
3) skrivligar mannagongdir fyri alt høvuðsvirksemi,
4) effektivar mannagongdir til tess at eyðmerkja, umsita, eftiransa og rapportera um teir váðar, felagið er í ella kann koma í,
5) tað tilfeingið, sum er neyðugt til at útinna virksemi felagsins á rættan hátt og hóskandi nýtslu av hesum tilfeingi,
6) mannagongdir við atliti til at býta sundur virksemi í sambandi við handfaring og fyribyrging av áhugamálsósemjum,
7) nøktandi innanhýsis eftirlitsmannagongdir,
8) álítandi eftirlits- og trygdartiltøk á KT-økinum og
9) lønarpolitikk og -siðvenju, sum er í samsvari við og fremur góða og virkna váðastýring.
Stk. 2. Landsstýrismaðurin kann áseta nærri reglur um tey tiltøk, sum P/F Lív lívs- og pensiónstryggingarfelag skal fremja fyri at hava effektivar stýringshættir, sbrt. stk. 1.
§ 7. Landsstýrismaðurin ásetur nærri reglur um útveiting viðvíkjandi:
1) ábyrgdini hjá P/F Lív lívs- og pensiónstryggingarfelag og eftirlitinum við einum veitara, undir hesum víðariútveiting hjá hesum veitara,
2) innanhýsis leiðreglum hjá P/F Lív lívs- og pensiónstryggingarfelag um útveiting, og
3) krøvunum, sum P/F Lív lívs- og pensiónstryggingarfelag skal tryggja sær, at veitarin í minsta lagi lýkur til eina og hvørja tíð, og sum skulu vera avtalað í útveitingarsáttmálanum.
§ 8. P/F Lív lívs- og pensiónstryggingarfelag skal hava ein ábyrgdarhavandi tryggingarfrøðing í starvi.
Stk. 2. Tann ábyrgdarhavandi tryggingarfrøðingurin skal ansa eftir, at felagið heldur sítt tøkniliga grundarlag til tess at røkja tær neyðugu tryggingartøkniligu uppgávurnar, herundir útrokningar og kanningar. Tryggingarfrøðingurin skal í hesum sambandi gjøgnumganga tað tryggingartøkniliga innihaldið í virksemi og tilfari felagsins.
Stk. 3. Tann ábyrgdarhavandi tryggingarfrøðingurin skal beinanvegin boða Tryggingareftirlitinum frá einum og hvørjum broti á tey í stk. 2 nevndu viðurskifti. Tryggingarfrøðingurin hevur rætt til at krevja allar upplýsingar frá stjórnini, sum eru neyðugar fyri at útinna starvið. Tryggingareftirlitið kann krevja tær upplýsingar frá tryggingarfrøðinginum, sum eru neyðugar til metingar av fíggjarligu støðu felagsins.
Stk. 4. Ábyrgdarhavandi tryggingarfrøðingurin skal senda Tryggingareftirlitinum árliga frágreiðing.
Stk. 5. Landsstýrismaðurin kann áseta neyvari reglur um tey í stk. 1-4 nevndu viðurskifti, undir hesum um tey krøv, ið ein persónur skal lúka fyri at kunna verða settur í starv sum ábyrgdarhavandi tryggingarfrøðingur.
Víðarilatan av trúnaðarupplýsingum
§ 9. Nevndarlimir, stjóri, grannskoðari og ábyrgdarhavandi tryggingarfrøðingur í P/F Lív lívs- og pensiónstryggingarfelag og onnur starvsfólk kunnu ikki av órøttum lata víðari ella misnýta trúnaðarupplýsingar, sum tey í útinnan av sínum starvi hava fingið kunnleika til.
Stk. 2. Tann, sum fær upplýsingar sambært stk. 1, er fevndur av tagnarskylduni, nevnd í stk. 1.
§ 10. Vanligar upplýsingar um kundaviðurskifti kunnu latast víðari til at nýta í sambandi við røkt av umsitingarligum uppgávum.
Stk. 2. Tann, sum fær upplýsingar sambært stk. 1, er fevndur av tagnarskylduni, nevnd í § 9, stk. 1.
Stk. 3. Landsstýrismaðurin ásetir neyvari reglur um, hvørjar upplýsingar eru vanligar kundaupplýsingar sambært stk. 1.
§ 11. Upplýsingar um heilt privat viðurskifti kunnu ikki latast víðari uttan kundans samtykki, uttan so at víðarilatanin er heimilað eftir § 9, stk. 1.
§ 12. P/F Lív lívs- og pensiónstryggingarfelag skal gera leiðreglur fyri, í hvønn mun upplýsingar verða latnar víðari frá felagnum. Leiðreglurnar skulu vera alment atkomuligar.
§ 13. Eitt samtykki til víðarilatan av upplýsingum skal vera skrivligt.
Ársfrásøgn og grannskoðan
§ 14. P/F Lív lívs- og pensiónstryggingarfelag skal gera eina ársfrásøgn, sum skal hava eina leiðslufrágreiðing, leiðsluátekning og ein ársroknskap við fíggjarjavna, rakstrarroknskapi, notum, undir hesum frágreiðing um nýtta roknskaparsiðvenju og eitt yvirlit yvir gongdina í eginpeninginum. Tá ið ein ársroknskapur er grannskoðaður, inngongur grannskoðanarátekningin í ársfrásøgnina.
Stk. 2. Ársfrásøgnin skal gerast í samsvari við kunngerð um ársfrásagnir hjá tryggingarfeløgum og haldfelagsskapum.
Stk. 3. Tryggingareftirlitið kann loyva frávik frá ásetingunum í kunngerð um ársfrásagnir hjá tryggingarfeløgum og haldfelagsskapum.
§ 15. P/F Lív lívs- og pensiónstryggingarfelag skal í minsta lagi hava ein løggildan grannskoðara.
Stk. 2. Kunngerð um grannskoðan av tryggingarfeløgum og fíggjarligum samtøkum er galdandi fyri P/F Lív lívs- og pensiónstryggingarfelag.
Stk. 3. Tryggingareftirlitið kann loyva frávik frá ásetingunum í kunngerð um grannskoðan av tryggingarfeløgum og fíggjarligum samtøkum.
Peningaíløgur og gjaldføri
§ 16. Peningur, ið P/F Lív lívs- og pensiónstryggingarfelag hevur ræði á, skal verða nýttur til íløgur á ein hóskandi og fyri tryggingartakararnar gagnligan hátt og soleiðis, at Føroya landsstýri ikki verður fyri óneyðugum váða orsakað av landskassaveðhaldinum.
Stk. 2. Íløgupolitikkurin og váðaprofilurin hjá P/F Lív lívs- og pensiónstryggingarfelag skal vera ásettur í viðtøkum felagsins.
Stk. 3. So leingi landskassaveðhald er fyri tryggingar felagsins, sbr. § 3, skal landsstýrismaðurin góðkenna viðtøkurnar fyri P/F Lív lívs- og pensiónstryggingarfelag.
Eftirlit
§ 17. Tryggingareftirlitið ansar eftir, at henda løgtingslóg verður hildin.
Stk. 2. Tryggingareftirlitið kann nýta uttanhýsis hjálp.
Avgjøld
§ 18. P/F Lív lívs- og pensiónstryggingarfelag rindar avgjøld til Tryggingareftirlitið fyri eftiransan av lógini.
Stk. 2. Landsstýrismaðurin ásetir nærri reglur um hetta.
Revsireglur
§ 19. Brot á §§ 9 og 11 verða revsað við bót ella fongsli í upp til 4 mánaðir, uttan so, at hægri revsing er heimilað eftir aðrari lóggávu.
Stk. 2. 1) (Strikað).
Gildiskoma
§ 20. Hendan løgtingslóg kemur í gildi dagin eftir, at hon er kunngjørd, og hevur roknskaparligan virknað frá og við roknskaparárinum 2014.
Broyting í løgtingslóg um tryggingarvirksemi
§ 21. Í løgtingslóg nr. 55 frá 9. juni 2008, sum broytt við løgtingslóg nr. 137 frá 20. desember 2012 verður í § 7, stk. 2, sum nr. 5 sett: “5) P/F Lív lívs- og pensiónstryggingarfelag, sum er fevnt av løgtingslóg um P/F Lív lívs- og pensiónstryggingarfelag”.
Í Tinganesi, 12. mai 2015
Kaj Leo Holm Johannesen (sign.)
løgmaður
Lm. nr. 85/2014
1) Broytt við løgtingslóg nr. 91 frá 7. juni 2020, har § 79 ljóðar soleiðis: “Henda løgtingslóg kemur í gildi 1. januar 2021.”
