Skrivar tú trygging verður eisini leitað eftir øðrum endingum av orðinum sum t.d. tryggingar og tryggingarvirksemi.
Skrivar tú ?trygging verður leitað eftir orðum sum t.d. lívstrygging og lívstryggingar.
Skrivar tú ”trygging” verður einans leitað eftir júst hesum sniðnum av orðinum.
26. mai 2010Nr. 60
Løgtingslóg um útleigan av bústøðum, sum seinast broytt við løgtingslóg nr. 149 frá 19. desember 2023
(Leigulógin)
Kapittul 1
Lógarøki v.m.
§ 1. Lógin fevnir um alla leigu av húsum ella hølum, ið verða nýtt til bústað.
Stk. 2. Lógin fevnir um leigu, eisini tá leigan verður goldin við øðrum enn peningi, eitt nú arbeiði.
Stk. 3. Lógin fevnir ikki um leigu, ið sambært leiguavtalu bert fevnir um eitt styttri tíðarskeið, upp til tríggjar mánaðir, og sum endar, tá hetta tíðarskeið er úti.
Stk. 4. Lógin fevnir ikki um leigu í tann mun, at hendan er fevnd av serligum reglum í aðrari lóggávu.
§ 2. 1) Útleiga, sum í mesta lagi fevnir um tvey leigumál, er eftir hesi løgtingslóg at rokna sum ikki vinnulig útleiga.
Stk. 2. Útleiga, ið ikki er fevnd av stk. 1, er eftir hesi lóg at rokna sum vinnulig útleiga.
Stk. 3. Útleiga hjá tí almenna ella løgfrøðiligum persónum er eftir hesi lóg at rokna sum vinnulig útleiga.
§ 3. Leiguavtala og aðrar avtalur um leigumálið skulu vera skrivligar.
Stk. 2. 2) Landsstýrismaðurin ger standard leigusáttmála, ið skal nýtast í leigumálum, fevnd av hesi løgtingslóg. Standard leigusáttmálin fevnir eisini um innflytingarfrágreiðing sbr. § 8.
Stk. 3. 2) Útleigari hevur ábyrgdina av, at standard leigusáttmáli og innflytingarfrágreiðing sambært stk. 2 verða nýtt.
Stk. 4. 2) Avtalur, sum geva leigara, hjúnafelaga ella persóni, ið leigari livir saman við í parlagi verri rættindi enn ásett er í løgtingslógini, hava ikki gildi.
§ 4. Tað er bannað útleigara at taka ímóti ella krevja aðra samsýning frá leigara enn leigu ella at treyta sær, at leigari er partur av aðrari rættargerð, ið ikki er partur av leiguavtaluni.
§ 5. 3) 2) Útleigari kann í mesta lagi krevja depositum, ið svarar til 3 mánaða leigu. Upphæddin verður standandi sum trygd fyri skyldum leigarans, tá hann flytur út úr leigaðu hølunum.
Stk. 2. 3) Depositum, sambært stk. 1, skal setast á deponeringskontu hjá útleigara í peningastovni, tó undantikið fyri leigumál, skipað sambært § 5 b í løgtingslóg um Húsalánsgrunn. Depositum kann takast av deponeringskontuni sambært deponeringsavtalu, ella við avgerð leigunevndarinnar.
Stk. 3. 3) Útleigari kann einans halda aftur depositum við fráflyting, um:
1) leigari ikki letur tað leigaða aftur í sama standi, sum tað var í, tá flutt varð inn, burtursæð frá vanligum sliti og elli,
2) leigari skyldar leigugjald, ella
3) leigari á annan hátt kann lastast fyri, at útleigari hevur havt eitt fíggjarligt tap, orsakað av leiguni. Útleigarin hevur próvbyrðuna fyri, at hann hevur havt eitt slíkt tap.
Stk. 4. 3) Útleigari eigur møguligan rentuágóða av depositum.
§ 6. Rættindi leigarans sambært hesi lóg, eru galdandi mótvegis øllum, uttan at avtalan er tinglýst. Sama er galdandi fyri avtalur um leigu, ið verður rindað í forskoti, innskot og depositum tá hesar upphæddir tilsamans ikki eru størri enn tað, sum svarar til 6 mánaða leigu,
Stk. 2. 2) Leigari skal við rættarmáli gera krav sítt sambært stk. 1 galdandi innan eitt ár eftir, at leiguavtalan er endað.
Kapittul 2
Leigaðu hølini
§ 7. Tað leigaða verður yvirtikið í tí standi, ið leigari hevur sýnað og góðtikið, áðrenn leigusáttmálin er undirskrivaður.
Stk. 2. Leigari kann ikki krevja, at vælt verður um brek, ið hann átti at havt sæð við vanligum eftiransni, um hann ikki skrivliga hevur sagt útleigara frá hesum innan tvær vikur frá tí, at leigubústaðurin er yvirtikin.
Stk. 3. 2) Leigari kann ikki krevja, at vælt verður um onnur brek, enn umrødd í stk. 2, sum koma til sjóndar eftir innflyting, uttan so, at hann skrivliga boðar útleigara frá hesum skjótast gjørligt og í seinasta lagi 4 mánaðir eftir innflyting.
§ 8. 2) Tá flutt verður inn í leigaða bústaðin, skulu útleigari og leigari í felag gera eina innflytingarfrágreiðing, sum skal lýsa, hvørjum standi bústaðurin er í. Frágreiðingin, sum verður gjørd á einum serligum oyðublaði, sbr. § 3, stk. 2, skal váttast av báðum pørtum, og eitt avrit skal útflýggjast leigara.
Stk. 2. Innflytingarfrágreiðingin er grundarlag undir sýni, ið verður framt, tá flutt verður út.
Stk. 3. 2) (Strikað).
§ 9. Útleigari hevur ábyrgdina av, at leigubústaðurin lýkur lógarásett krøv til bústaðarbygging, brunatrygd o.a.
Stk. 2. Lýkur bústaðurin ikki lógarásettu krøvini til bústaðir, tá leigari flytur inn ella seinni, skal útleigari eftir kravi leigarans beinanvegin lata slík brek umvæla.
§ 10. 2) Útleigari hevur skyldu til at halda viðlíka alt, sum stendst av vanligum sliti og elli og at gera neyðugar ábøtur.
§ 11. Leigari kann ikki, uttan skrivligt loyvi frá útleigara, gera broytingar í tí leigaða.
Stk. 2. Um brot verða framd á ásetingina í stk. 1, kann útleigari krevja, at viðurskiftini verða fingin aftur í rættlag innan rímiliga freist.
Stk. 3. 2) Um freistin sambært stk. 2 ikki verður hildin, kann útleigari fáa framdu broytingarnar aftur í rættlag fyri leigarans rokning, eins og útleigari kann uppsiga ella ógilda leiguavtaluna.
Stk. 4. 2) At uppsiga ella ógilda eina leiguavtalu sambært stk. 3 fær ikki virknað, fyrr enn hon er góðkend av leigunevndini, sbr. § 26, stk. 2.
Kapittul 3
Rættindi og skyldur leigarans
§ 12. 2) Leigari hevur skyldu til:
1) At gjalda húsaleigu rættstundis. Leigan skal rindast mánaðarliga frammanundan, í seinasta lagi tann 5. í mánaðinum. Er hesin ikki gerandisdagur, skal leigan rindast næsta gerandisdag.
2) At boða útleigara skrivliga frá møguligum skaðum, sum henda á leigaðu hølini.
3) At bøta um ella endurrinda fyri skaða, sum leigari ella húsfólk ella gestir teirra fremja á leigaðu hølini.
4) At lata leigaðu hølini aftur í sama standi, sum tey vóru í, tá leigumálið byrjaði, tó burtursæð frá vanligum sliti og elli.
5) At lata útleigara fáa atgongd til leigaðu hølini beinanveg, tá hetta er bráðneyðugt, og annars eftir avtalu, tá hetta er neyðugt, undir hesum at sýna leigubústaðin í sambandi við uppsøgn sbr. § 8, stk. 2, og í mun til at vísa bústaðin til nýggjar leigarar.
§ 13. Verður leigan hækkað, skal leigari hava skrivliga fráboðan um hetta 4 mánaðir frammanundan.
§ 14. Um útleigari ynskir at gera neyðugar umvælingar ella broytingar í leigaðu hølunum, skal leigari geva honum atgongd til bústaðin fyri at fáa hetta arbeiðið gjørt.
Stk. 2. Slíkar umvælingar ella broytingar skulu skrivliga fráboðast leigara í seinasta lagi 4 vikur frammanundan, uttan so, at talan er um bráðneyðugar umvælingar.
Stk. 3. Arbeiðið skal taka so stutta tíð sum møguligt, og skal vera leigara til minst møguligan ampa.
§ 15. Leigari hevur rætt til at nýta leigaðu hølini til alt, ið kann metast sum vanlig og rímilig nýtsla av bústaði.
Stk. 2. 2) Onnur nýtsla av leigaðu hølunum enn ásett í stk. 1 krevur skrivligt loyvi frá útleigara.
§ 16. Framleiga av hølunum er bert loyvd, um skrivligt loyvi fyriliggur frá útleigara, áðrenn avtala verður gjørd um framleigu.
Stk. 2. 2) Hjúnafelagi ella persónur, ið leigarin livir saman við í parlagi, skal geva samtykki til, at leigumálið verður framleigað, tá ið leigumálið verður nýtt til felags bústað. Er hesin ómyndugur, gevur verjin samtykki. Ásetingarnar í § 19, stk. 2. og § 20 í lov om ægteskabets retsvirkninger eru somuleiðis galdandi.
Stk. 3. 2) Leigusáttmáli og innflytingarfrágreiðing sambært § 3, stk. 2 skal nýtast millum leigara og framleigara.
Stk. 4. Áðrenn framleiga byrjar, skal hann, ið letur framleiguna, lata útleigara avrit av skrivligu framleiguavtaluni.
Kapittul 4
Uppsøgn av leigumálinum
§ 17. Er leiguavtalan tíðaravmarkað, heldur leigan uppat uttan uppsøgn, tá avtalaða tíðarskeiðið er runnið.
Stk. 2. 2) 1) Verður bústaðurin leigaður út av nýggjum, hevur verandi leigari framíhjárætt til bústaðin, og leiguavtalan er tá ikki longur at meta sum tíðaravmarkað. Hetta er tó ikki galdandi:
1) í teimum í § 21, stk. 2, nr. 1 nevndu førum,
2) tá leigari hevur verið í mishaldi sambært kap. 5 í hesi løgtingslóg, ella
3) tá leigari sambært § 24 b í hesi løgtingslóg hevur fingið ávíst leigubústað gjøgnum Almannaverkið.
Stk. 3. 2) Er leigumálið tengt at, at leigari er í starvi hjá útleigara og fer leigari úr starvinum, heldur leigumálið uppat við 1 mánaðar freist, til endan av einum mánaði, eftir seinasta arbeiðsdag.
§ 18. 2) Verða leigaðu hølini oyðiløgd av eldi ella øðrum slíkum óhappi, dettur leiguavtalan burtur.
§ 19. 2) Leigari skal siga leigumálið upp við 1 mánaðar freist til endan av einum mánaði.
Stk. 2. 2) Hjúnafelagi ella persónur, ið leigarin livir saman við í parlagi, skal geva samtykki til at uppsiga leigumálið, tá ið leigumálið verður nýtt til felags bústað. Er hesin ómyndigur gevur verjin samtykki. Ásetingarnar í § 19, stk. 2 og § 20 í lov om ægteskabets retsvirkninger eru somuleiðis galdandi.
Stk. 3. 2) Uppsøgn frá leigara skal vera skrivlig og dagfest.
§ 20. 2) Ikki vinnuligur útleigari sambært § 2, stk. 1 skal siga leigumálið upp við í minsta lagi 3 mánaða freist til endan av einum mánaði.
Stk. 2. Veðhavari, ið hevur yvirtikið bygning við leigumálum, og sum upprunaliga er at meta sum ikki vinnulig útleiga, og yvirtøka veðhavarans við tvingsilssølu ella sambært avtalu við veðsetara er til nýtiligt veð, kann siga leigumálið upp sbrt. stk. 1.
Stk. 3. 2) Útleigari kann tó ikki siga leigara upp, meðan ein kæra um leigumálið er til viðgerðar í leigunevndini. Um leigari fær fult ella lutvíst viðhald frá leigunevndini, kann uppsøgn ikki fremjast fyrr enn 3 mánaðir eftir, at leigunevndin hevur tikið avgerð í málinum.
Stk. 4. 2) Uppsøgn frá útleigara skal vera skrivlig og dagfest.
§ 21. 2) Vinnuligur útleigari sambært § 2, stk. 2 og 3 skal siga leigumálið upp við í minsta lagi 5 mánaða freist til endan av einum mánaði.
Stk. 2. 2) Vinnuligur útleigari kann bert siga leigumálið upp:
1) Tá útleigari sjálvur, børn, stjúkbørn ella fosturbørn skulu nýta leigumálið at búgva í.
2) Tá leigaðu hølini skulu rívast niður, ella byggjast um, og tískil ikki kunnu nýtast til bústað eftir hetta.
3) Tá týðandi orsøkir annars gera tað umráðandi fyri útleigara at verða loystur frá leigumálinum.
Stk. 3. 2) Umframt treytirnar í stk. 2 kann útleigari siga leigara í lestrarbústaði upp sambært § 24 c, stk. 3 og siga leigara í ungdómsbústaði upp sambært § 24 d, stk. 3.
Stk. 4. 2) Uppsøgnin skal vera skrivlig, dagfest og grundgivin.
§ 22. 2) Doyr ein leigari, áðrenn leigumálið er endað, hevur hjúnafelagin ella persónur, ið leigarin livir saman við í parlagi, rætt til at halda fram í leigumálinum, tá ið leigumálið verður nýtt til felags bústað.
Stk. 2. 2) Doyr leigari ella flytur leigari í vardan bústað hevur tann, ið er fastur partur av húskinum, rætt at halda áfram í leigumálinum treytað av, at hesin hevur búð saman við leigara síðan leigari flutti inn í leigubústaðin ella í minsta lagi 1 ár. Í serligum førum kann útleigari veita undantak frá 1 ára kravinum.
Stk. 3. 2) Persónar kunnu bert halda áfram í leigumálinum til lestrarbústað sambært § 24 c og til ungdómsbústað sambært § 24 d, um treytirnar fyri tillutan av bústaðnum eru loknar. Onnur enn hjúnafelagi ella partur í parlagi kunnu ikki halda áfram í leigumáli ætlað borgarum yvir ávísan aldur.
§ 22 a. 2) Er leigumálið felags bústaður í hjúnabandi ella parlagi, kunnu partarnir avtala, hvør teirra heldur áfram í leigumálinum.
Stk. 2. Semjast partarnir í hjúnabandi ikki um, hvør kann halda áfram í leigumálinum, kann í sambandi við dómin um hjúnaskilnað ella ógilding av hjúnabandinum ella í sambandi við loyvið um sundurlesing avgerast, hvør av pørtunum hevur rætt at halda áfram í leigumálinum.
Stk. 3. Semjast partarnir í parlagi ikki um, hvør kann halda áfram í leigumálinum kann, tá serlig atlit tala fyri hesum, eitt nú atlit til børn undir 18 ár, avgerð takast við dómi um, hvør av pørtunum hevur rætt at halda áfram í leigumálinum.
Stk. 4. Er treyt fyri leiguavtalu, at leigari er limur í bústaðafelagi, skal tann, ið heldur áfram í leigumálinum sbrt. § 22 og § 22 a somuleiðis gerast limur í bústaðafelagnum.
Kapittul 5
Mishald v.m.
§ 23. Heldur útleigari ikki skyldur sínar eftir lógini og leigusáttmálanum, er hann í mishaldi.
Stk. 2. Er útleigari í mishaldi, skal leigari beinanvegin geva útleigara skrivlig boð um at fáa mishaldið steðgað innan eina rímiliga freist, ásetta av leigara. Freistin skal standa í mát við mishaldið.
Stk. 3. 2) Steðgar útleigari ikki mishaldinum innan freistina í stk. 2, og er talan um týðandi mishald ella svikagerð frá útleigara, kann leigari ógilda leiguavtaluna og krevja endurgjald fyri útreiðslur, ið stava beinleiðis frá mishaldinum.
§ 23 a. 2) Heldur leigari ikki skyldur sínar eftir hesi løgtingslóg og leigusáttmálanum, er hann í mishaldi.
Stk. 2. Leigari er somuleiðis í mishaldi, tá leigari í nevndu førum hevur atferð, ið er til ampa fyri bygningin, útleigara, starvsfólk hjá útleigara, aðrar leigarar í bygninginum ella onnur, ið lógliga ferðast í bygninginum:
1) Tá leigari fremur ella hóttir við at fremja likamligan harðskap.
2) Tá atferð leigarans elvir til vanda, undir hesum við at nýta vápn ella við at hava vandamikil evni og tilfar í varðveitslu í bygninginum.
3) Tá atferð leigarans elvir til bága og hevur við sær ótryggleika, heilsuligan vanda ella, at umhvørvið í bygninginum verður ráari.
4) Tá leigari ger ónáðir, uttan at talan er um likamligan harðskap.
5) Tá leigari heldur gang, ið ikki eigur at verða góðtikin, eitt nú við síni atferð, at spæla harðan tónleik ella við hørðum maskinlarmi.
6) Tá leigari oyðileggur bygningin ella leysafæ í bygninginum ella á felagsøkjum.
7) Tá leigari vanrøkir tað leigaða.
8) Tá húsdjór leigarans eru til munandi ampa vegna larm, lukt, óhumsku ella við at elva til vanda ella ótta.
9) Tá leigari hevur larmandi atferð, tó uttan at vera fevnt av nr. 5.
10) Tá húsdjór leigarans hava atferð, ið er til ampa, tó uttan at vera fevnt av nr. 8.
11) Tá leigari í aðramáta hevur atferð, ið er til ampa.
Stk. 3. Leigari er harumframt í mishaldi, um leigari hevur húsdjór, ið er í stríð við leiguavtalu ella húsreglur, uttan mun til um húsdjórini eru til ampa fyri bygningin ella persónar nevndir í stk. 2.
Stk. 4. Leigari er í mishaldi uttan mun til, um tað er leigari sjálvur, húsfólk hjá leigara ella onnur, ið leigari hevur latið inn í bygningin, ið hevur atferðina sambært stk. 2 og 3.
§ 24. 2) Er leigari í mishaldi, skal útleigari beinanvegin geva leigara skrivlig boð um at fáa steðgað mishaldinum innan 8 dagar frá tí, at boðini eru givin.
Stk. 2. 2) Steðgar leigari ikki mishaldinum innan freistina í stk. 1, kann útleigari uppsiga ella ógilda leiguavtaluna. Er grundarlag ikki fyri at uppsiga ella ógilda leiguavtaluna av hesi orsøk, kann útleigari geva leigara ávaring ella gera leiguavtaluna treytaða í upp til eitt ár.
Stk. 3. 2) Rættarligar fylgjur sambært stk. 2 fáa ikki virknað, fyrr enn hesar eru góðkendar av leigunevndini, sbr. § 26, stk. 2. Tó skal leigunevndin ikki góðkenna uppsagnir, tá leigari ikki longur lýkur treytirnar til upptøku í lestrarbústaði ella ungdómsbústaði.
Stk. 4. 2) (Strikað).
Kapittul 5 a 2)
Almenn viðurskifti
§ 24 a. Kommununum verður heimilað at gera almenna skrá yvir leigubústaðir, ið lúka lógarásett krøv til bústað, sbr. § 9.
Stk. 2. Tær upplýsingar, ið kunnu skrásetast í skránni sambært stk. 1 eru adressan á leigubústaðnum, navn og adressa hjá eigara av leigubústaðnum, eins og upplýsingar um í hvønn mun leigubústaðurin heilt ella lutvíst er bygdur, umbygdur ella umvældur sambært teimum lógarásettu krøvum, ið tá vóru galdandi fyri bústaðabygging, brunatrygd o.a.
Stk. 3. Verða bústaðir nýttir til útleigan, ið eru bygdir, umbygdir ella umvældir, uttan at viðkomandi krøv vóru galdandi, eigur hetta at verða tilskilað í skránni.
Stk. 4. Hevur kommuna almenna skrá yvir leigubústaðir, ið lúka lógarásett krøv til bústað, hevur útleigari skyldu at lata leigubústaðin skráseta í skránni og at geva kommununi atgongd at sýna bústaðin eftir umbøn í sambandi við góðkenning. Kommunan kann í serligum førum veita undantak frá almennari skrásetingarskyldu.
§ 24 b. Almannaverkið hevur ávísingarrætt til í minsta lagi 5. hvørja leiguíbúð í almennum bústaðafelagi.
Stk. 2. 1) Landsstýrismaðurin ásetir nærri reglur um treytir fyri ávísing sambært stk. 1, og hvussu ávísing av bústøðum og hýsing fer fram.
Stk. 3. Ávísing sambært stk. 1 skal taka atlit at tørvi borgarans, og hvussu leigaraskarin annars er samansettur.
Stk. 4. Almannaverkið rindar húsaleigu frá tí degi, at leigumálið er tøkt og fram til, at leigarin yvirtekur leigumálið.
Stk. 5. Almannaverkið svarar fyri ábyrgd leigarans mótvegis útleigara í mun til at lata hølini aftur í sama standi, sum tey vóru í, tá ið leiguavtalan byrjaði, sbr. § 12, nr. 4. Ábyrgd Almannaverksins tekur við, tá ið almenna bústaðafelagið til fánýtis hevur kravt leigara eftir peninginum. Almannaverkið kann síðan heinta peningin inn frá viðkomandi leigara.
Stk. 6. Útreiðslur sambært stk. 4 og 5 verða avhildnar umvegis forsorgarlógina.
Stk. 7. 1) Almannaverkið kann eisini, eftir somu treytum sum í stk. 2-6, gera avtalur við aðrar útleigarar um ávísingarrætt til leiguíbúðir. Avtalur um ávísingarrætt skulu góðkennast av landsstýrismanninum.
§ 24 c. Leigubústaðir kunnu skipast sum lestrarbústaðir.
Stk. 2. Verða lestrarbústaðir skipaðir eftir avtalu við landsstýrismannin í skúlamálum, ásetir landsstýrismaðurin í skúlamálum treytir fyri ávísing til lestrarbústað.
Stk. 3. Umframt ásetingarnar í § 17 og § 21, kann leigari verða sagdur úr leigumálinum við í minsta lagi 1 mánaðar freist til endan av einum mánaði, tá treytirnar fyri ávísingini ikki longur eru loknar.
Stk. 4. Leigari í lestrarbústaði skal eftir umbøn vísa skjalprógv fyri lestrarvirkni ella yrkislæru.
Stk. 5. Hóast ásetingarnar í § 22 kann persónur bert halda fram í leigumálinum, um viðkomandi lýkur treytirnar fyri ávísing til lestrarbústað.
§ 24 d. Leigubústaðir kunnu skipast sum ungdómsbústaðir.
Stk. 2. Verða ungdómsbústaðir skipaðir eftir avtalu við landsstýrismannin í bústaðamálum, ásetir landsstýrismaðurin í bústaðamálum treytir fyri ávísing til ungdómsbústað, undir hesum aldurstreytir.
Stk. 3. Umframt ásetingarnar í § 17 og § 21, kann leigari í ungdómsbústaði verða sagdur úr leigumálinum við í minsta lagi 1 mánaðar freist til endan av einum mánaði, tá treytirnar fyri ávísingini ikki longur eru loknar.
Stk. 4. Hóast ásetingarnar í § 22 kann persónur bert halda fram í leigumálinum, um viðkomandi lýkur treytirnar fyri ávísing til ungdómsbústað.
Kapittul 6
Leigunevndin
§ 25. Landsstýrismaðurin setir eina leigunevnd til at taka avgerð í trætumálum millum leigara og útleigara.
Stk. 2. 2) Leigunevndin verður mannað við einum formanni, sum er løgfrøðingur, einum limi, sum er búskaparfrøðingur og einum limi, sum hevur útbúgving innan byggifrøði. Limirnir verða tilnevndir fyri eitt fýra ára tíðarskeið. Fyri formannin og hvønn av limunum verða varalimir tilnevndir. Nevndarlimur verður sitandi, til nýggjur limur er valdur.
Stk. 3. Landsstýrismaðurin ger nærri ásetingar um virksemi og fundarskipan nevndarinnar.
§ 26. 2) 1) Leigunevndin kann viðgera kærur frá pørtunum um:
1) Ta leigu, sum partarnir sínámillum hava avtalað, seta til viks eina greitt órímiliga leigu og samstundis áseta aðra leigu.
2) Ein møgulig hækking av leiguni er rímilig, og kann heilt ella lutvíst strika hesa hækking.
3) Leigaðu hølini lúka ásett krøv til bústað, sambært § 9, og kann í hesum sambandi áleggja útleigara at gera neyðugar umvælingar.
4) Rættin og skyldur hjá útleigara at fremja viðlíkahald og gera ábøtur, sambært §§ 9 og 10.
5) Grundarlagið fyri uppsøgn av leiguavtalu, og kann seta ólógliga uppsøgn úr gildi.
6) Grundarlagið fyri at ógilda leiguavtalu vegna mishald útleigarans.
7) Rætt hjá útleigara at halda aftur depositum.
Stk. 2. 2) Leigunevndin skal góðkenna uppsøgn ella ógildan av leiguavtalu vegna mishald leigarans sambært § 11, stk. 3 og sbr. § 24, stk. 3 eins og leigunevndin skal góðkenna, at útleigari gevur leigara ávaring ella ger leiguavtalu treytaða vegna mishald, sbr. § 24, stk. 3.
Stk. 3. 2) Leigunevndin kann viðgera kæru frá leigara um leigumál, ið ikki lýkur lógarásett krøv til bústað, sambært § 9 eftir, at leigari er fluttur út úr leigubústaðnum. Kæran skal tó vera leigunevndini í hendi fyri uppsagnarfreist leigarans ella útleigarans er úti.
Stk. 4. 2) Kærur til leigunevndina skulu vera skrivligar og hava eina grundgeving fyri kæruni.
§ 26 a. 2) Leigunevndin kann við samtykki frá leigara taka mál upp av sínum eintingum, tá ið leigunevndin í sambandi við viðgerð av kærum sambært § 26 kemur fram á viðurskifti, ið benda á, at leigumálið ikki lýkur lógarásett krøv til bústað, sambært § 9.
§ 27. 2) Leigunevndin kann avvísa mál, ið leigunevndin ikki metir hóska seg at viðgera í leigunevndini.
Stk. 2. 2) Viðgerð leigunevndarinnar sambært § 26 og § 26 a er skrivlig. Leigunevndin avger, hvørjar kanningar eru neyðugar í einstøku málunum. Leigunevndin kann krevja upplýsingar frá pørtunum, frá almennum myndugleikum og kann krevja at sýna leigaðu hølini.
Stk. 3. 2) Eru serligar umstøður galdandi, kann leigunevndin boða pørtunum á fund við nevndina fyri at leggja sína áskoðan fram munnliga.
§ 28. Leigunevndin skal skjótast gjørligt taka avgerð í málinum.
Stk. 2. Avgerðir í leigunevndini verða tiknar við vanligum meiriluta. Avgerðir kunnu bert takast, tá nevndin er fullmannað.
Stk. 3. Formaðurin í leigunevndini kann tó einsamallur taka støðu til mál, sum ikki kunnu útsetast, og kann geva eini kæru steðgandi virknað, til avgerð er tikin í málinum.
Stk. 4. Formaðurin kann avvísa kærur um viðurskifti, sum liggja uttan fyri málsøki nevndarinnar.
§ 29. Avgerðir hjá leigunevndini kunnu ikki kærast til hægri fyrisitingarmyndugleika.
Kapittul 7
Revsing v.m.
§ 30. 2) Leigunevndin kann áleggja honum dagliga sekt, ið ikki letur leigunevndini upplýsingar, sum leigunevndin kann krevja eftir hesi lóg, ella sum ikki virðir avgerðir nevndarinnar ella ger eftir boðum frá nevndini sambært § 26, stk. 1 og 3 og § 26 a.
Stk. 2. Støddin á sektini eftir stk. 1 verður ásett av leigunevndini. Sektin kann tó ikki vera hægri enn leiguupphæddin.
Stk. 3. Sekt, áløgd eftir stk. 1, kann verða innheintað við panting saman við innkrevjingarkostnaði.
§ 31. Uttan so, at harðari revsing er ásett eftir aðrari lóggávu, verður útleigari, sum við vilja ella við grovum ósketni brýtur § 3, stk. 1, § 3, stk. 3 ella § 4, stk. 1 revsaður við bót.
Stk. 2. Feløg v.m. (løgfrøðiligir persónar) kunnu koma undir revsiábyrgd eftir reglunum í kapitli 5 í revsilógini.
Stk. 3. 4) (Strikað).
Kapittul 8
Gildiskoma og skiftisreglur
§ 32. Løgtingslógin kemur í gildi 1. september 2010.
Stk. 2. Samstundis fer úr gildi Midlertidig bestemmelse for Færøerne nr. 41 af 2. december 1940 om lejeforhold, sbr. tó § 33, stk. 2.
§ 33. Løgtingslógin fevnir um leiguavtalur, sum verða gjørdar aftaná, at hendan lóg er komin í gildi.
Stk. 2. Leigumál í Tórshavnar Kommunu, ið eru í gildi, tá henda lóg kemur í gildi, verða viðgjørd sambært §§ 1-10 (Sí notu 5) ) í Midlertidig bestemmelse for Færøerne nr. 41 af 2. desember 1940 om lejeforhold, som senest ændret ved lov nr. 186 af 7. juni 1958.
Tórshavn, 26. mai 2010
Kaj Leo Johannesen (sign.)
løgmaður
Lm. nr. 155/2009
1) Broytt við løgtingslóg nr. 64 frá 9. mai 2019, har § 2 ljóðar soleiðis: “Stk. 1. Henda løgtingslóg kemur í gildi dagin eftir, at hon er kunngjørd, sbr. tó stk. 2. Stk. 2. § 2, stk. 1, sum ásett í § 1, nr. 1, og § 26, stk. 1, nr. 1, sum ásett í § 1, nr. 5, eru bara galdandi fyri leiguavtalur, ið eru gjørdar eftir, at løgtingslógin er komin í gildi.”
2) Broytt við løgtingslóg nr. 43 frá 30. apríl 2018, har § 2 ljóðar soleiðis: “Stk. 1. Henda løgtingslóg kemur í gildi 1. august 2018. Stk. 2. § 21, stk. 2, nr. 1, sum ásett í § 1, nr. 21 er bert galdandi fyri leiguavtalur, ið eru gjørdar eftir, at løgtingslógin er komin í gildi.”
3) Broytt við løgtingslóg nr. 51. frá 14. mai 2013.
4) Broytt við § 9 í løgtingslóg nr. 149 frá 19. desember 2023.
5) §§ 1-10 í Midlertidig bestemmelse for Færøerne nr. 41 af 2. desember 1940 om lejeforhold, som senest ændret ved lov nr. 186 af 7. juni 1958, eru soljóðandi:
§ 1. Nærværende Bestemmelser gælder med nedennævnte Undtagelser for Hus eller Husrum, der udlejes til Beboelse.
Bestemmelserne omfatter ikke
1. (avtikin)
2. (avtikin)
3. Lejemaal, som i Følge Lejeaftalen kun skal gælde for et bestemt kortere Tidsrum (indtil 3 Maaneder), og ophøre ved dettes Udløb.
Kontrakter om udleje af hus eller husrum skal oprettes skriftligt og godkendes af lejenævnet eller prismyndighederne, hvor lejenævn ikke er nedsat.
Det påhviler ejeren at indsende kontrakten til godkendelse inden 14 dage efter underskriften.
Overskridelse af disse bestemmelser straffes med bøder, der tilfalder statskassen.
§ 2. Enhver Opsigelse til Fraflytning efter nærværende Bestemmelsers Ikrafttræden kan inden 14 Dage efter Opsigelsens Modtagelse eller inden 14 Dage efter nærværende Bestemmelsers Ikrafttræden forelægges det i § 12 omhandlede Lejenævn.
Skønner Nævnet, at der ikke foreligger skellig Grund til en Opsigelse, er denne ikke gyldig.
Er Grunden til Opsigelsen et Ønske fra Udlejerens Side om Forhøjelse af Lejens Størrelse, kan Nævnet samtidig med at erklære en Opsigelse ugyldig fastsætte en passende Leje.
§ 3. Skellig Grund til Opsigelse foreligger:
1) naar Ejendommens Nedrivning eller Ombygning medfører, at det lejede maa rømmes helt eller delvis;
2) naar Lejeren er Funktionær ved Ejendommens Drift, og det lejede skal benyttes af hans Efterfølger;
3) naar Lejeren som Arbejder eller Funktionær ved en bestemt Virksomhed har lejet Lejligheden af den paagældende Virksomhed og træder ud af sit Arbejdsforhold til denne;
4) naar Lejligheden omfatter boligrum i velgørende Stiftelser, som herefter skal anvende den efter Stiftelsens Formaal;
5) naar Udlejeren ønsker selv at bebo den paagældende Lejlighed.
6) Naar Lejeren eller hans Husstand optræder paa saadan Maade, at det er til væsentlig Ulempe for Ejeren eller for Ejendommens øvrige Beboere.
Saafremt Lejeren vil rejse Indsigelse mod en Opsigelse i Henhold til nærværende Paragraf, skal han senest 2 Uger efter Opsigelsens Modtagelse skriftligt forelægge Sagen for Lejenævnet til Afgørelse.
§ 4. Aftaler, hvorved en Lejer giver Afkald paa de i nærværende Bestemmelser omhandlede Rettigheder, er ugyldige.
§ 5. Dør en Lejer før Lejemaalets Udløb, har Ægtefællen Ret til at fortsætte Lejemaalet, medmindre Udlejeren efter Lejenævnets Skøn gør antageligt, at han har vægtige Grunde til at modsætte sig det.
En Lejer kan ikke retsgyldigt give Afkald paa den hans Ægtefælle efter Stk. 1 tilkommende Ret.
§ 6. Udlejeren kan, uanset at der ifølge nærværende Bestemmelser eller ifølge Aftale tilkommer Lejeren Uopsigelighed i en vis Tid, ophæve Lejemaalet, hvis Lejeren ikke erlægger skyldig Leje inden 3 Søgnedage efter Forfaldsdag, eller hvis Lejeren iøvrigt groft tilsidesætter sine Pligter, herunder uden Tilladelse fremlejer det lejede.
§ 7. Saafremt en Udlejer betinger sig eller oppebærer en Leje, der staar i Misforhold til det lejedes værdi, kan Lejeren indbringe Sagen for Lejenævnet, der kan nedsætte Lejen til et rimeligt Beløb. Nævnet kan bestemme, at den for meget betalte Leje tilbagebetales for et af Nævnet fastsat Tidsrum, eventuelt ved Modregning i fremtidig Leje. I Forbindelse med Afgørelsen kan Nævnet bestemme, at Lejemaalet skal fortsætte uopsigeligt i et Tidsrum af indtil eet Aar; saadan Afgørelse kan træffes, selvom Lejen ikke nedsættes.
Ved Afgørelse af Lejens Størrelse skal Lejenævnet særlig tage Hensyn til stedfunden Stigning i Vedligeholdelsesudgifterne ved Ejendommen, ligesom der ogsaa skal tages pristalsmæssigt Hensyn til, om det drejer sig om erhvervsmæssig Udlejning eller ej.
§ 8. Naar en Lejer har indbragt Spørgsmaalet om en Opsigelses Gyldighed eller om Lejens Størrelse for Lejenævnet, kan dette, naar Omstændighederne taler derfor, ved en foreløbig Kendelse, der til enhver Tid kan omgøres, bestemme, at Lejemaalet ikke kan opsiges saaledes, at Lejeren skal fraflytte det lejede, forinden endelig Afgørelse er truffet i Sagen.
Regler om Erhvervs- og Forretningslokaler.
§ 9. Naar et Lokale er udlejet til en Forretning i en bestemt Branche, maa Ejeren, medmindre andet er aftalt, ikke udleje andre Lokaler i samme Ejendom til en tilsvarende Forretning eller selv benytte den til Drift af en saadan.
§ 10. Opsigelser, afgivet af Udlejeren af Erhvervs- eller Forretningslokaler, til et Tidspunkt efter nærværende Bestemmelsers Ikrafttræden kan af Lejeren indbringes for Lejenævnet til Prøvelse.
Lejenævnet afgør efter et Skøn over samtlige Omstændigheder, om der foreligger skellig Grund til Opsigelsen.
Finder Lejenævnet, at der ikke foreligger skellig Grund til Opsigelsen, kan Nævnet bestemme, at Lejemaalet skal fortsætte uopsigeligt fra Udlejerens Side i et Tidsrum af indtil to Aar for en af Nævnet fastsat passende Leje.
