Løgtingslóg nr. 65 frá 17. mai 2005 um broyting í løgtingslóg um ferðslu

17. mai 2005Nr. 65

Løgtingslóg um broyting í løgtingslóg um ferðslu

Samsvarandi samtykt Løgtingsins staðfestir og kunnger løgmaður hesa løgtingslóg:

§ 1

Í løgtingslóg um ferðslu, sbr. løgtingslógarkunngerð nr. 14 frá 2. mars 1988, sum seinast broytt við løgtingslóg nr. 54 frá 22. apríl 2003, verða gjørdar hesar broytingar:

1)   Í § 39, stk. 1, 1. pkt., verður aftaná “motorvogn (bil)” sett: “, motorsúkklu”. Í § 39, stk. 1, 3. pkt. verða orðini “motorsúkklu og” strikað.

2)   § 42a, stk. 1 verður orðað soleiðis:

“§ 42 a. Førari av tvíhjólaðari motorsúkklu, ella av motorsúkklu við síðuvogni, og av prutli og øll ferðandi, sum fylt eru 15 ár, skulu undir akstrinum nýta fastspentan fallhjálm.”

3)   § 44, stk. 6 og stk. 7 verða strikað, og sum nýtt stk. 6 verður sett:

“Stk. 6. Á tveyhjólaðum prutli má bert førarin vera. Á øðrum prutli mugu ikki vera fleiri persónar enn tað er ætlað til.”

Stk. 8 verður hereftir stk. 7.

4)   Í § 59 a, stk. 2 verður aftaná nr. 2 sett sum nýggj nr. 3 og 4:

“3)  hevur koyrt við ferð, ið fer upp um loyvdu hámarksferðirnar sbrt. § 30a, stk. 1 og stk. 3 við meira enn 50 km/t, ella eina lægri ferðavmarking ásett sbrt. § 30a, stk. 2 ella § 47 við meira enn 40 km/t,

4)    við einum av teim í § 30b nevndu akførum hevur koyrt við ferð, sum fer meira enn 40 km/t upp um ta loyvdu ferðina fyri tílík akfør sbrt. §§ 30a, 30b ella 47,”

Nr. 3 og nr. 4 verða hereftir nr. 5 og nr. 6.

§ 2

Stk. 1. Henda løgtingslóg kemur í gildi dagin eftir, at hon er kunngjørd.

Stk. 2. Tó kemur § 1, nr. 3 og nr. 4 í gildi 1. september 2005.

Stk. 3. Spurningar um frádøming av koyrirættinum kunnu bert verða avgjørdir eftir reglunum í § 1, nr. 4 í hesari lógini, um tilburðurin er farin fram eftir, at henda áseting er komin í gildi, sbr. stk. 2.

Tórshavn, 17. mai 2005

Jóannes Eidesgaard (sign.)

løgmaður

/ Bjarni Djurholm (sign.)

Lm. nr. 78/2004