Skrivar tú trygging verður eisini leitað eftir øðrum endingum av orðinum sum t.d. tryggingar og tryggingarvirksemi.
Skrivar tú ?trygging verður leitað eftir orðum sum t.d. lívstrygging og lívstryggingar.
Skrivar tú ”trygging” verður einans leitað eftir júst hesum sniðnum av orðinum.
17. mai 2013Nr. 65
Løgtingslóg um broyting í løgtingslóg um landsjørð
Samsvarandi samtykt Løgtingsins staðfestir og kunnger løgmaður hesa løgtingslóg:
§ 1
Í løgtingslóg nr. 45 frá 15. mai 2007 um landsjørð, sum seinast broytt við løgtingslóg nr. 47 frá 17. mai 2011, verða gjørdar hesar broytingar:
1. Í yvirskriftini áðrenn § 7 verður aftaná orðið “landsjørð” sett: “ v.m.”.
2. Aftaná § 7 verður sett:
“§ 7 a. Búnaðarstovuni verður heimilað frá festara at taka aftur nýtslurætt til ein part av lendinum ella alt lendið tilhoyrandi festið, treytað av
1) at afturtøka av rættinum at nýta lendið er neyðug fyri at skapa karmar fyri øðrum virksemi enn landbúnaði, og at virksemið er almannagagnligt,
2) at kommunan hevur rindað fult endurgjald,
3) at fulla endurgjaldið frá kommununi, sbrt. nr. 2, verður flutt á bitskonto hjá festinum
4) at Búnaðarstovan hevur fingið váttan fyri móttøku av endurgjaldinum og
5) at Búnaðarstovan skal kunna Búnaðargrunnin um ætlanina. Búnaðargrunnurin skal hava rætt at tryggja sær veð fyri verandi láni og gera sín veðrætt galdandi, samsvarandi reglunum í § 4, stk. 2 og stk. 5, áðrenn ætlanin verður framd.
Stk. 2. Eru treytirnar í stk. 1 loknar, kann Búnaðarstovan ávikavist taka rættin at nýta lendið aftur og leiga kommunu lendi, sbrt. reglunum í hesi grein og tilhoyrandi kunngerð. Búnaðarstovan kann leiga kommunu lendi til almannagagnligt endamál í ávísa tíð. Slík leigumál eru avmarkað til at galda í mesta lagi í 20 ár ísenn. Viðkomandi kommuna kann ikki framleiga lendið. Búnaðarstovan ger leigusáttmála við kommununa samsvarandi reglunum í § 7, stk. 4 og stk. 5, nr. 3. Landsstýrismaðurin ásetir í kunngerð leiguupphæddina. Leiguinntøkur eftir hesi grein verða fluttar á bitskontu hjá festinum.”
3. Í § 10 verður sum stk. 2 sett:
“Stk. 2. Ásetingin í stk. 1 í hesi grein er somuleiðis galdandi fyri áseting av fullum endurgjaldi, sbrt. § 7 a, stk. 1, nr. 2 og 3.”
§ 2
Henda løgtingslóg kemur í gildi dagin eftir, at hon er kunngjørd.
Tórshavn, 17. mai 2013
Annika Olsen (sign.)
varaløgmaður
Lm. nr. 114/2012
