Skrivar tú trygging verður eisini leitað eftir øðrum endingum av orðinum sum t.d. tryggingar og tryggingarvirksemi.
Skrivar tú ?trygging verður leitað eftir orðum sum t.d. lívstrygging og lívstryggingar.
Skrivar tú ”trygging” verður einans leitað eftir júst hesum sniðnum av orðinum.
28. apríl 2025Nr. 67
Løgtingslóg um heilivág
Samsvarandi samtykt Løgtingsins staðfestir og kunnger løgmaður hesa løgtingslóg:
Kapittul 1
Virkisøki og allýsingar
§ 1. Løgtingslógin fevnir um heilivág til fólk og djór, og um miðvørur, virkisevni og hjálparevni.
Stk. 2. Løgtingslógin fevnir um gitnaðarfyribyrgjandi evni, sum ikki er fevnt av stk. 1 ella løgtingslóg um innflutning, nýtslu og góðskutryggjan av medisinskari útgerð.
§ 2. Løgtingslógin fevnir ikki um matvørur, kostískoyti, fóður, vakurleikarøkt t.e. kosmetikk, líveitur t.e. biosider, medisinska útgerð, tubbaksvøru ella líknandi nikotin vøru, radionukleid í afturlatnum keldum, óviðgjørdan vevnað, kyknur og blóðflot frá fólki, undantikið blóðflot sum rávøra í heilivágsframleiðslu.
§ 3. Landsstýrisfólkið kann áseta reglur um, at løgtingslógin heilt ella fyri ein part skal fevna um vøru, sum skal nýtast til fyribyrging, avgerð um og viðgerð av sjúku ella vøru, fevnd av § 2 um so er, at serligir eginleikar ella óheppin árin standast av at nýta hesar vørur.
Stk. 2. Landsstýrisfólkið kann áseta reglur um, at løgtingslógin heilt ella fyri ein part ikki skal fevna um vørur ella vørubólkar, fevnd av § 4, nr. 1, og áseta serligar reglur fyri hesar.
§ 4. Í hesi løgtingslóg er at skilja við:
1) Heilivágur: Einhvør vøra,
a) ið kann nýtast ella gevast fólki ella djórum við tí endamáli at ávirka, broyta ella fáa í rættlag aftur fysiologiskt virksemi við at hava ein farmakologiskan, immunologiskan ella metaboliskan virknað ella fyri at taka sjúkuavgerð, ella
b) um lýst verður við, at hon er egnað til at viðgera ella fyribyrgja sjúku.
2) Miðvøra: Ein blandingur av virkisevni og hjálparevni, ætlað til at gera heilivág.
3) Virkisevni: Eitthvørt evni ella einhvør blandingur av evnum, ætlað til at nýta í sambandi við at gera heilivág, og sum er ein virkin partur av heiliváginum.
4) Hjálparevni: Einhvør partur av heiliváginum, ið ikki er virkisevni ogpakkingartilfar.
5) Klinisk kanning við heilivági: Kanning, ið hevur til endamáls at kanna kliniska, farmakologiska og/ella farmakodynamiska virknaðin av royndarheilivági og/ella at eyðmerkja hjáárin við heilivági og/ella at kanna evnaskifti, tað er metabolisma, ella annað við tí fyri eyga at meta um trygdina ella virknaðin av heiliváginum.
6) Lýsing um heilivág: Alt kunningarvirksemi og øll ávirkan á hugburð, undir hesum at leita eftir viðskiftafólki, ið hevur til endamáls at styrkja ávísing, útflýggjan, sølu ella nýtslu av heilivági.
Kapittul 2
Einkarættur hjá apoteksverkinum at flyta inn o.a. heilivág og undantøk til einkarættin
§ 5. Apoteksverkið hevur einkarætt at framleiða, flyta inn, flýggja út, hava á goymslu, handla við og pakka heilivág.
Stk. 2. Fylgjandi undantøk eru til einkarættin sambært stk. 1:
1) Persónar kunnu flyta inn heilivág til egna nýtslu.
2) Sjúkrahúsverkið og aðrir líkir stovnar kunnu hava á goymslu og flýggja út heilivág til nýtslu í viðgerðini. Harumframt kann sjúkrahúsverkið flyta inn ávísan heilivág.
3) Heilsustarvsfólk, ið kann ávísa heilivág sambært aðrari lóggávu, kann hava á goymslu og flýggja út heilivág til nýtslu í starvinum.
4) Heilsustarvsfólk og onnur starvsfólk kunnu flyta inn og flýggja út heilivág í sambandi við tilbúgvingararbeiði, um Føroyar heita á aðra tjóð um at veita Føroyum tilbúgvingarhjálp.
5) Flogskiparar, skiparar og reiðarar kunnu hava á goymslu og flýggja út heilivág til nýtslu í viðgerðini umborð og í ávísum føri keypa og flyta inn heilivág, tá skipið ella flogfarið leggur at í útlendskum havnum ella floghavnum.
6) Handkeypssølur sambært § 19 í løgtingslóg um apoteksverkið kunnu hava á goymslu og handla við heilivági.
7) Feløg og aðrir løgfrøðiligir persónar kunnu framleiða heilivág til at flyta út og til at selja apoteksverkinum, samanber tó stk. 4.
Stk. 3. Landsstýrisfólkið kann áseta reglur um handfaringina av heilivági sambært stk. 2 og kann áseta eitt gjald fyri eftirlit við hesari handfaring.
Stk. 4. Landsstýrisfólkið skal loyva virkseminum, sambært stk. 2, nr. 7 og kann taka aftur loyvi. Landsstýrisfólkið kann áseta reglur um virksemi og eftirlit við virkseminum.
Kapittul 3
Skráseting av heilivági og reseptskyldigur heilivágur
§ 6. Landsstýrisfólkið setir eitt heilivágsráð, sum ger av, hvørjir heilivágar skulu verða skrásettir og setir hesar í eina heilivágsskrá. Harumframt skal heilivágsráðið virka fyri skynsamari nýtslu av heilivági.
Stk. 2. Landsstýrisfólkið ásetir reglur um samansetingina av ráðnum og starvsskipan tess.
§ 7. Loyvt er ikki at flyta inn, handla við ella flýggja út heilivág, sum ikki er skrásettur.
Stk. 2. Landsapotekarin kann, hóast stk. 1, loyva at flyta inn og handla við heilivági, um hann er góðkendur í einum øðrum landi, og seta treytir í hesum sambandi.
Stk. 3. Landslæknin og landsdjóralæknin kunnu, hóast stk. 1, loyva útflýgging til ávikavist fólk og djór.
§ 8. Ein og hvør kann fáa eitt avrit av heilivágsskránni frá heilivágsráðnum.
§ 9. Landsstýrisfólkið ásetir reglur um, hvør heilivágur skal útflýggjast eftir resept, um hvussu reseptir skulu orðast, setast upp o.a., um generiska umbýting, um útlendskar reseptir og teirra gildi her á landi, um útflýggingarbólkar og útflýgging í serstøkum føri uttan trygd fyri gjalding.
Kapittul 4
Dygd á heilivági, merking og pakking o.a.
§ 10. Landsstýrisfólkið kann áseta reglur um dygd og tílíkt á heilivági í einum heilivágsstandardi, og um at útlendskir heilivágsstandardir fyri heilivág heilt ella fyri ein part hava gildi her á landi.
Stk. 2. Ásetir landsstýrisfólkið reglur sambært hesi grein, verður heilivágsstandardurin ikki kunngjørdur í síni heild í Kunngerðarblaðnum.
§ 11. Landsstýrisfólkið ásetir reglur um framleiðslu, eftirlit, goymsluhald og goyming av heilivági og øðrum vørum á apotekum.
§ 12. Landsstýrisfólkið kann áseta reglur um navn og navnaseðlar á heilivági, íløt og stødd á pakkingum.
Kapittul 5
Klinisk kanning við heilivági
§ 13. Ábyrgdarhavandi fyri kliniskari kanning við heilivági til fólk, ávikavist djór, og framleiðari av heiliváginum ella umboðsfólk hansara, skulu boða landslæknanum ella landsdjóralæknanum frá kanningini.
Stk. 2. Ábyrgdarhavandi fyri kanningini skal alt fyri eitt boða landslæknanum ella landsdjóralæknanum frá álvarsligum hjáárinum, sum vísa seg undir ella eftir kanningina.
Stk. 3. Landslæknin ella landsdjóralæknin kann gera undantak til fráboðanarskylduna hjá framleiðara ella umboðsmanni hansara sambært stk. 1.
§ 14. Klinisk kanning við heilivági kann ikki byrja, fyrr enn landslæknin ella landsdjóralæknin letur kvittan fyri fráboðanina.
§ 15. Landslæknin ella landsdjóralæknin kunnu steðga ella broyta klinisku kanningina, um tørvur er á hesum.
§ 16. Heilivágur kann seljast ella útflýggjast í sambandi við kliniska kanning, sum er fráboðað sambært § 13, stk. 1.
Stk. 2. Apoteksverkið kann útflýggja skrásettan heilivág til kanningina ókeypis.
Stk. 3. Landsstýrisfólkið kann áseta reglur um sølu ella útflýgging sambært hesi grein.
§ 17. Landslæknin og landsdjóralæknin kunnu leggja sínar heimildir, sambært hesum kapitli, til vísindasiðseminevndina, samanber anordning om ikrafttræden for Færøerne af sundhedsvidenskabelige forskningsprojekter og sundhedsdatavidenskabelige forskningsprojekter.
Kapittul 6
Lýsing o.a. um heilivág
§ 18. Loyvt er ikki at lýsa við heilivági fyri almenninginum.
Stk. 2. Hóast stk. 1 kunnu almennir stovnar lýsa við heilivági, fevndur av almenna koppsetingartilboðnum.
Stk. 3. Hóast stk. 1 kann Apoteksverkið lýsa við hondkeypsheilivági.
Stk. 4. Landsapotekarin kann í serligum førum loyva undantak frá stk. 1 og kann áseta treytir fyri hesum.
§ 19. Loyvt er ikki at lýsa við, at vørur, sum ikki eru heilivágar, eru fyribyrgjandi, linnandi ella virknar móti sjúku ella sjúkueyðkennum ella í lýsingum at nýta orðið apotek ella tílíkt.
Stk. 2. Landsstýrisfólkið kann í serligum førum loyva undantak frá stk. 1 og kann áseta treytir fyri hesum.
§ 20. Lýsing við heilivági, sambært § 18, og vørum, sambært § 19, skal vera saklig og fullfíggjað og má ikki geva eina ov avgjørda, reingjandi ella villleiðandi mynd av heiliváginum ella vøruni.
Stk. 2. Landsstýrisfólkið kann áseta reglur um, at lýsingin sambært stk. 1 skal tilskila navn, ábendingarøki, hjáárin o.a. á heiliváginum.
§ 21. Landsapotekarin kann krevja, at ábyrgdarhavandi fyri einari lýsing boðar frá rættingum og uppískoytum til lýsingartilfarið og kann gera av form og innihald í fráboðanini.
Kapittul 7
Eftirlit, revsing, gildiskoma, broytingar í aðrari lóggávu
§ 22. Landsapotekarin hevur eftirlit við, at løgtingslógin og ásetingarnar við heimild í løgtingslógini verða hildnar.
Stk. 2. Landsapotekarin kann góðkenna eftirlit framt av myndugleika í øðrum landi, sum var tað útint her á landi.
§ 23. Landsapotekarin kann krevja allar upplýsingar útflýggjaðar, sum eru av týdningi fyri eftirlitið hjá honum.
Stk. 2. Landsapotekarin og starvsfólk undir Landsapotekaranum hava uttan dómsúrskurð, við at vísa galdandi samleikaprógv, atgongd til høli, har heilivágur verður goymdur ella á annan hátt handfarin.
§ 24. Landsapotekarin kann geva stovni, fyritøku o.ø., sum handfer heilivág, boð um at seta tiltøk í verk, so at handfaringin fer fram í samsvari við hesa løgtingslóg.
§ 25. Landsstýrisfólkið kann leggja sínar heimildir til landsapotekaran eftir løgtingslógini.
Stk. 2. Landsstýrisfólkið kann áseta reglur um klagu um avgerðir, heruppií reglur um klagufreistir.
§ 26. Um ikki hægri revsing er ásett eftir aðrari lóg, verður tann revsaður við sekt, sum:
1) Brýtur ásetingarnar í § 5, § 7, stk. 1, § 13, stk. 2, § 14, § 18, stk. 1, § 19, stk. 1 og § 20, stk. 1.
2) Ikki lýðir krøv ella boð sambært § 5, stk. 3 og 4, § 15, § 19, stk. 2, og §§ 21-24.
Stk. 2. Í reglum, givnar við heimild í løgtingslógini, kann verða ásett, at brot á reglurnar ella treytir, givnar eftir reglunum, verður revsað við sekt.
Stk. 3. Feløg og aðrir løgfrøðiligir persónar koma undir revsiábyrgd eftir reglunum í kapitli 5 í revsilógini.
§ 27. Henda løgtingslóg kemur í gildi dagin eftir, at hon er kunngjørd.
Stk. 2. Kunngerðir, sum eru settar í gildi sambært løgtingslóg nr. 104 frá 5. september 1988 um apoteksverkið og heilivág, og sum ikki eru í ósamsvari við hesa løgtingslóg ella løgtingslóg um apoteksverkið og heilivág, verða verandi í gildi, til tær verða settar úr gildi ella verða avloystar av reglum, givnum við heimild í hesi løgtingslóg ella løgtingslóg um apoteksverkið og heilivág.
§ 28. Í løgtingslóg nr. 104 frá 5. september 1988 um apoteksverkið og heilivág, sum broytt við løgtingslóg nr. 54 frá 8. mai 1991, løgtingslóg nr. 40 frá 6. mai 2014, løgtingslóg nr. 14 frá 16. mars 2015 og løgtingslóg nr. 79 frá 7. juni 2020 verða gjørdar hesar broytingar:
1. Heitið á løgtingslógini verður orðað soleiðis:
“Løgtingslóg
um
apoteksverkið”
2. Í § 4 verða sum stk. 3 og 4 sett:
“Stk. 3. Apotekari kann gera avtalu við ella seta í starv heilsustarvsfólk til tess at koppseta fyri apoteksverkið.
Stk. 4. Landsstýrisfólkið ásetir reglur um, hvørjar koppsetingar apotek kunnu bjóða.”
3. § 17 verður strikað.
4. Heitið á kapitli IV verður orðað soleiðis:
“Handkeypssølur”
5. §§ 20 og 21 verða strikaðar.
6. Partur B verður strikaður.
7. § 51, stk. 1 og 2 verða orðað soleiðis:
“Um ikki størri revsing er uppiborin eftir aðrari lóg, kann tann revsast við sekt sum:
1) ger brot móti § 2, stk. 1 og 2, § 4, stk. 1 ella 2,
2) fjónar treytir sum liggja við sum loyvi ella góðkenning sambært lógarinnar § 4, stk. 2, § 19, stk. 2, ella sambært fyriskipanum, sum ásettar eru við heimild í løgtingslógini.
Stk. 2. Sekt kann verða givin sum revsing fyri brot móti fyriskipanum, sum ásettar eru við heimild í lógarinnar § 9, stk. 1 og § 18.”
§ 29. Í løgtingslóg nr. 118 frá 12. desember 2007 um ókeypis koppseting móti ávísum smittandi sjúkum verður í § 2, stk. 1, nr. 3 “hvørjir læknar” broytt til: “hvørji heilsustarvsfólk”.
Í Tinganesi, 28. apríl 2025
Aksel V. Johannesen (sign.)
løgmaður
Lm. nr. 49/2024
