Skrivar tú trygging verður eisini leitað eftir øðrum endingum av orðinum sum t.d. tryggingar og tryggingarvirksemi.
Skrivar tú ?trygging verður leitað eftir orðum sum t.d. lívstrygging og lívstryggingar.
Skrivar tú ”trygging” verður einans leitað eftir júst hesum sniðnum av orðinum.
22. mai 2023Nr. 69
Løgtingslóg um broyting í løgtingslóg um fyribyrgjandi tiltøk ímóti hvítvaski av vinningi og fígging av yvirgangi (Hvítvasklógin)
(Ígildissetan av 4. og 5. hvítvaskdirektivi o.a.)
Samsvarandi samtykt Løgtingsins staðfestir og kunnger løgmaður hesa løgtingslóg:
§ 1
Í løgtingslóg nr. 190 frá 18. desember 2020 um fyribyrgjandi tiltøk ímóti hvítvaski av vinningi og fígging av yvirgangi (Hvítvasklógin), sum broytt við § 42 í løgtingslóg nr. 159 frá 10. desember 2021 og § 7 í løgtingslóg nr. 31 frá 17. mars 2022, verða gjørdar hesar broytingar:
1. Í § 1, stk. 1, nr. 1 verður aftan á “Realkredittstovnar” sett: “og Føroya Realkreditstovnur”.
2. Í § 1, stk. 1, nr. 6 verður aftan á “ognarmeklarafyritøkur” sett: “, heruppií tá tey virka sum millumgongufólk í sambandi við útleigan av fastari ogn”.
3. Í § 1, stk. 1, nr. 7 verður “og eksternir bókhaldarar” broytt til: “, eksternir bókhaldarar og ein og hvør annar persónur, ið átekur sær at veita hjálp, stuðul ella ráðgeving um skattaviðurskifti sum sítt mest týðandi vinnuliga virksemi”.
4. Í § 1, stk. 1, nr. 9 verður “stk. 3” broytt til: “stk. 4”.
5. Í § 1, stk. 1 verður sum nr. 10 sett:
“10) Fyritøkur og persónar, sum á vinnuligum grundarlagi varðveita, handla við ella miðla handil við listaverkum, heruppií listasøvn og uppboðshús, har virðið á transaktiónum ella á eini røð av innanhýsum samanbundnum transaktiónum er 50.000 kr. ella meira.”
6. Í § 1 verður aftan á stk. 2 sum nýtt stk. sett:
“Stk. 3. § 34 a er galdandi fyri útlendskar deildir hjá føroyskum fyritøkum.”
Stk. 3 verður eftir hetta stk. 4.
7. Í § 2, nr. 8, litra g verður aftan á “stýrandi” sett: “í”.
8. § 2, nr. 9 verður orðað soleiðis:
“9) Veruligur eigari: Tann ella teir likamligu persónar, sum endaliga eiga kundan ella stýra honum, ella tann ella teir likamligu persónar, hvørs vegna ein transaktión ella virksemi verður gjørt, heruppií:
a) Fyri feløg og aðrar løgfrøðiligar eindir:
i) Tann ella teir likamligu persónar í einari løgfrøðiligari eind, sum endaliga beinleiðis ella óbeinleiðis eiga ella hava ræði á nóg stórum parti av eigarapørtunum ella atkvøðurættindunum, ella sum á annan hátt hava ræði, undantikið eigarar av feløgum, har eigarapartarnir verða handlaðir á einum skipaðum marknaði ella einum líknandi marknaði, sum hevur upplýsingarskyldu sambært ES-rættinum ella samsvarandi altjóða standardum.
ii) Dagliga leiðslan, um eingin persónur er eyðmerktur undir smáa rómartali i, eftir at allir møguleikar eru royndir, ella um ivi er um, um tann ella teir veruligu persónarnir, sum eru eyðmerktir, eru veruligu eigararnir.
b) Fyri trustar og líknandi løgfrøðiligar skipanir:
i) Stovnarin ella stovnararnir.
ii) Umsitarin ella umsitararnir.
iii) Verjin ella verjarnir.
iv) Serliga njótunartilskilaði ella, um teir einstaklingar, sum hava gagn av løgfrøðiligu skipanini ella løgfrøðiligu eindini, ikki eru kendir enn, tann bólkurin av persónum, sum hevur høvuðsáhuga í, at løgfrøðiliga skipanin ella eindin er stovnað ella virkar.
v) Ein og hvør annar likamligur persónur, sum endaliga hevur ræði á trustinum við beinleiðis ella óbeinleiðis ognarskapi ella á annan hátt hevur ræði.
c) Nevndin og tann ella teir likamligu persónarnir í grunnum, ið eru í samsvarandi ella líknandi støðu sum tey í litra b, smá rómartøl ii-v nevndu, við teimum neyðugu frávikunum við atliti at serligu eyðkennunum við grunnum.”
9. Í § 2 verða sum nr. 13-15 sett:
“13) Trustur: Ein eind, sum ikki er ein løgfrøðiligur persónur, og sum er stovnað eftir ynski hjá stovnaranum um at flyta ognir til ein umsitara til fyrimuns fyri ein ella fleiri njótunartilskilaðar.
14) Líknandi løgfrøðilig skipan: Eitt slag av løgfrøðiligari skipan, sum hevur samsvarandi bygnað ella funktión sum ein trustur, og sum er stovnað eftir ynski hjá stovnaranum um at flyta ognir til ein persón, ið hevur eina støðu, ið svarar til starvið hjá einum umsitara av einum trusti.
15) Umsitari av einum trusti ella ein persónur, ið røkir eina samsvarandi støðu í einari líknandi løgfrøðiligari skipan: Ein likamligur ella løgfrøðiligur persónur, ið hevur ræði á ognunum hjá trustinum ella einari líknandi løgfrøðiligari skipan í samsvari við leiðbeiningar frá stovnara.”
10. Í § 3, stk. 2 verður aftan á 1. pkt. sum nýtt pkt. sett:
“Talan er um hvítvask, sbr. stk. 1, hóast tær gerðir, sum hava ført til fíggjarliga vinningin ella peningin, ið skal hvítvaskast, vórðu framdar í einum øðrum landi.”
11. Í § 7, stk. 3, § 25, stk. 1, 1. pkt., stk. 3, 1. og 2. pkt., og stk. 5, § 27, og § 34, stk. 2 verður “Hvidvasksekretariatet hjá Statsadvokaten for Særlig Økonomisk og International Kriminalitet” broytt til: “Hvidvasksekretariatet”.
12. Í § 9, nr. 1 verður aftan á “hóskandi tíðir,” sett: “heruppií tá fyritøkan ella persónurin í viðkomandi álmanakkaárinum løgfrøðiliga hevur skyldu til at seta seg í samband við kundan við tí fyri eyga at kanna eina og hvørja viðkomandi upplýsing viðvíkjandi tí ella teimum veruligu eigarunum,”
13. Í § 10, stk. 1, nr. 2 verður aftan á 1. pkt. sum nýtt pkt. sett:
“Við álítandi og óheftari keldu skilst eitt nú elektronisk eyðmerkingaramboð, viðkomandi álitistænastur ella eitthvørt annað trygt slag av fjareyðmerkingartilgongd ella elektronisk eyðmerkingartilgongd, ið skikkaðir myndugleikar í landinum hava regulerað, viðurkent, góðkent ella góðtikið.”
14. Í § 10, stk. 1, nr. 3, 2. pkt. verður aftan á “ein løgfrøðiligur persónur,” sett: “heruppií grunnur, ella ein ikki løgfrøðiligur persónur, heruppií ein trustur ella ein líknandi løgfrøðilig skipan,”.
15. Í § 10, stk. 1, nr. 3 verður aftan á 2. pkt. sum nýtt 3.-5. pkt. sett:
“Er tann veruligi eigarin ein njótunartilskilaður av ognini hjá einum trusti ella eini líknandi løgfrøðiligari skipan, sbr. § 2, nr. 9, litra b, smátt rómartal iv, ella ognini hjá einum grunni ella eini líknandi løgfrøðiligari skipan, sbr. § 2, nr. 9, litra c, skal fyritøkan ella persónurin fremja tey tiltøk, ið nevnd verða í 1. pkt., í seinasta lagi tá útgjalding fer fram, ella tá móttakarin útinnir sín rætt. Verður tann dagliga leiðslan eyðmerkt sum veruligur eigari, skal fyritøkan ella persónurin fremja tey neyðugu hóskandi tiltøkini fyri at føra eftirlit við samleikanum hjá tí ella teimum likamligu persónunum, ið eru dagliga leiðsla kundans, sbr. § 2, nr. 9, litra a, smátt rómartal ii. Fyritøkan ella persónurin skulu varðveita upplýsingar um tiltøkini, ið eru sett í verk, og um møguligar íkomnar trupulleikar í sambandi við útinnanina av eftirlitinum.”
16. Í § 13, stk. 1 verður aftan á 1. pkt. sum nýtt pkt. sett:
“Verður eitt handilssamband stovnað við eitt felag ella aðra løgfrøðiliga eind ella ein trust ella líknandi løgfrøðiliga skipan, sum hevur skyldu til at skráseta upplýsingar um veruligar eigarar í kt-skipan Skráseting Føroya, skal fyritøkan ella persónurin fáa til vegar skrásetingarprógv ella ein úrdrátt av upplýsingunum í kt-skipan Skráseting Føroya.”
17. Í § 14 verður “§ 13, stk. 5” broytt til: “§ 13, stk. 4”.
18. Aftan á § 14 verður sett:
“§ 14 a. Fær ein fyritøka ella persónur kunnleika til, at upplýsingarnar um veruligu eigararnar hjá kundanum, sum eru fingnar til vegar sambært hesum kapitli, ikki eru í samsvari við upplýsingarnar um veruligu eigararnar hjá kundanum, ið eru skrásettar í kt-skipan Skráseting Føroya, skal ósamsvarið og skjalprógv fyri hesum fráboðast Skráseting Føroya skjótast til ber.
Stk. 2. Fær ein skikkaður myndugleiki kunnleika til ósamsvar í upplýsingunum um veruligu eigararnar, ið eru skrásettar í kt-skipan Skráseting Føroya, og tær upplýsingar um veruligu eigaraviðurskiftini, ið eru tøkar hjá myndugleikanum, skal ósamsvarið og skjalprógv fyri hesum fráboðast Skráseting Føroya skjótast til ber. Hetta er tó ikki galdandi, um tað í óneyðugan mun ger inntriv í virksemið hjá myndugleikanum.
Stk. 3. Landsstýrismaðurin kann áseta nærri reglur um, hvussu tann tekniski parturin av fráboðanarskylduni verður lokin.”
19. § 16, stk. 2 verður orðað soleiðis:
“Stk. 2. Fyritøkur og persónar skulu gera herdar kundakunnleikamannagongdir, um kundin hevur heimstað í einum landi, sum stendur á yvirlitinum hjá Evropa-kommissiónini yvir triðjalond, har mett verður, at øktur vandi er fyri hvítvaski og fígging av yvirgangi. Tær herdu kundakunnleikamannagongdirnar skulu fevna um fylgjandi:
1) At fleiri upplýsingar verða útvegaðar um kundan og veruligar eigarar.
2) At fleiri upplýsingar verða útvegaðar um ætlaða slagið av handilssambandi.
3) At upplýsingar verða útvegaðar um, hvar peningurin og ognirnar stava frá, og hvar keldan til ognirnar hjá kundanum og veruliga eigaranum stava frá.
4) At upplýsingar verða útvegaðar um orsakirnar til tær ynsktu ella framdu transaktiónirnar.
5) At góðkenning við stovnan ella framhaldi av handilssambondum hjá tí persóni, ið er tilnevndur eftir § 6, stk. 2, verður útvegað.
6) At herða eftiransan við kundasambandinum við at økja um mongdina av kanningum og velja transaktiónsmynstur burturúr, sum tørva neyvari eftirkanning.”
20. Í § 16 verður aftan á stk. 2 sum nýggj stk. sett:
“Stk. 3. Afturat tiltøkunum, ið verða nevnd í stk. 2, skulu fyritøkur og persónar seta í verk eitt ella fleiri váðaavmarkandi tiltøk, tá likamligir persónar ella løgfrøðiligar eindir fremja transaktiónir, ið fata um lond, sum standa á listanum hjá Evropa-kommissiónini yvir triðjalond, har mett verður, at øktur vandi er fyri hvítvaski og fígging av yvirgangi. Hesi tiltøk skulu fevna um eitt ella fleiri av fylgjandi tiltøkum:
1) Nýta ískoytispartar av herdum kundakunnleikamannagongdum.
2) Seta í verk viðkomandi herdu fráboðanarmekanismur ella regluliga fráboðan av fíggjarligum transaktiónum.
3) Avmarka handilssambond ella transaktiónir við likamligar persónar ella løgfrøðiligar eindir í londum, ið eru eyðmerkt sum triðjalond, har øktur vandi er fyri hvítvaski og fígging av yvirgangi.
Stk. 4. Afturat tiltøkunum, ið verða nevnd í stk. 3, skulu fyritøkur og persónar, í sambandi við handilssambond ella transaktiónir, ið fata um lond, sum standa á listanum hjá Evropa-kommissiónini yvir triðjalond, har øktur vandi er fyri hvítvaski og fígging av yvirgangi, tá tað verður mett viðkomandi, tryggja, at fyrsta gjaldið verður framt gjøgnum eina kontu í navninum á kundanum í einum kredittstovni, ið skal lúka krøv um kundakunnleikamannagongdir, sum í minsta lagi svara til tær kundakunnleikamannagongdirnar, ið eru settar í hesi løgtingslóg.”
Stk. 3 verður eftir hetta stk. 5.
21. § 17, stk. 7 verður orðað soleiðis:
“Stk. 7. Listin hjá Fíggjareftirlitinum yvir persónar, sum eru fevndir av § 2, nr. 8 í anordning om ikrafttræden for Færøerne af lov om forebyggende foranstaltninger mod hvidvask og finansiering af terrorisme, er somuleiðis galdandi fyri persónar, sum eru fevndir av § 2, nr. 8, í hesi løgtingslóg.”
22. Í § 18, stk. 1 verður “korrespondentsambandi, sum fer um landamørk, við respondentar frá londum” broytt til: “korrespondentsambandi, sum fer um landamørk, ið umfatar gjaldingar við einum respondentstovni”.
23. Í § 21, stk. 3 verður aftan á “umframt onnur týðandi skjalprógv” sett: “og dátur”.
24. Heitið á kapitli 5 verður orðað soleiðis:
“Kanningarskylda, noteringsskylda, fráboðanarskylda, upplýsingarskylda og varðveitsluskylda”
25. § 24, stk. 1 verður strikað, og í staðin verður sett:
“Fyritøkur og persónar, fevnd av hesi løgtingslóg, skulu kanna bakgrundina fyri og endamálið við:
1) Øllum transaktiónum, sum:
a) eru torgreiddar,
b) eru óvanliga stórar,
c) verða framdar í einum óvanligum mynstri, ella
d) ikki hava eitt klárt fíggjarligt ella lógligt endamál.
2) Øllum óvanligum virksemi, sum ikki hevur eitt klárt fíggjarligt ella lógligt endamál.
Stk. 2. Fyritøkur og persónar skulu, har tað hevur týdning, víðka eftiransingina við kundanum við tí endamáli at staðfesta, um transaktiónirnar ella virksemið sýnast illgrunasom.”
Stk. 2 og 3 verða eftir hetta stk. 3 og 4.
26. Í § 24, stk. 3, sum verður stk. 4, verður “stk. 1 og 2” broytt til: “stk. 1-3”.
27. § 28 verður orðað soleiðis:
“§ 28. Hvidvasksekretariatet hjá National Enhed for Særlig Kriminalitet er fregnartænasta í málum eftir hesi løgtingslóg. Ásetingarnar um Hvidvasksekretariatet í § 29, stk. 1 og 2, í anordning om ikrafttræden for Færøerne af lov om forebyggende foranstaltninger mod hvidvask og finansiering af terrorisme eru somuleiðis galdandi í málum eftir hesi løgtingslóg.
Stk. 2. Hvidvasksekretariatet hevur í samstarvi við aðrar myndugleikar ábyrgdina av at gera og dagføra váðametingar á hvítvaskøkinum við atliti til at eyðmerkja, meta um, skilja og avmarka aktuellar vandar fyri hvítvask av peningi.
Stk. 3. Hvidvasksekretariatet kann krevja allar upplýsingar, ið eru neyðugar fyri at røkja uppgávurnar sambært stk. 1 við atliti til at fyribyrgja, uppdaga og munadygt stríðast ímóti hvítvaski og fígging av yvirgangi, frá fyritøkum og persónum, sum eru fevnd av hesi løgtingslóg, uttan so at fyritøkan ella persónurin sambært § 26, stk. 1-3 eru undantikin fráboðanarskylduni. Eftir áheitan frá Hvidvasksekretariatet skulu fyritøkur og persónar fevndir av hesi løgtingslóg beinanvegin geva Hvidvasksekretariatet allar neyðugar upplýsingar.
Stk. 4. Um atlit til rannsakanina ikki tala ímóti hesum, kann Hvidvasksekretariatet geva fyritøkuni, persóninum ella myndugleikanum, sum sambært § 25, stk. 1 ella § 27 hava latið inn fráboðan, boð um støðuna í málinum, heruppií um skuldseting er reist, um ein endalig avgerð er tikin, ella um málið er lagt til viks.
Stk. 5. Fráboðanir, sum eru móttiknar sambært stk. 4, mugu ikki latast víðari til óviðkomandi.”
28. Aftan á § 28 verður sett:
“§ 28 a. Hvidvasksekretariatet kann í sambandi við, at upplýsingar verða latnar víðari til fregnartænastuna á fíggjarliga økinum í einum ES-landi, áseta avmarkingar og treytir fyri nýtsluna av hesum upplýsingunum.
Stk. 2. Hvidvasksekretariatet skal beinanvegin svara og í mest møguligan mun ganga einari áheitan á møti frá einari fregnartænastu á fíggjarliga økinum í einum ES-landi um loyvi til at lata upplýsingar víðari til skikkaðar myndugleikar ella stovnar, sum viðkomandi fregnartænasta hevur fingið frá Hvidvasksekretariatet, uttan mun til slagið av undirliggjandi lógarbroti, ið er knýtt afturat. Hvidvasksekretariatet kann ikki í tí sambandi nokta at ganga einari slíkari áheitan á møti, uttan so at endamálið við at lata upplýsingarnar víðari liggur uttanfyri tær uppgávurnar, sum eru lýstar í § 29, stk. 2, í anordning om ikrafttræden for Færøerne af lov om forebyggende foranstaltninger mod hvidvask og finansiering af terrorisme, ella at ávísar orsakir eru til at halda, at tað kann hava við sær, at tað verður truplari at fyribyrgja, uppklára ella kanna revsiverdar gerðir ella fremja revsirættarlig tiltøk ella á annan hátt ikki er í samsvari við grundleggjandi meginreglur í føroyskum rætti.
Stk. 3. Ein hóskandi grundgeving skal fyriliggja, tá tað verður sýtt fyri at ganga áheitanum sambært stk. 2 á møti.
Stk. 4. Hvidvasksekretariatet skal yvirhalda møguligar ásettar avmarkingar og treytir fyri nýtslu av upplýsingum, sum Hvidvasksekretariatet fær frá einari fregnartænastu á fíggjarliga økinum í einum ES-landi. Hvidvasksekretariatet kann soleiðis bert nýta slíkar upplýsingar til tey endamál, sum upplýsingarnar eru útflýggjaðar til. Bert um fregnartænastan á fíggjarliga økinum í ES-landinum, sum hevur latið upplýsingarnar, frammanundan hevur givið samtykki til hetta, kann Hvidvasksekretariatet lata slíkar upplýsingar til skikkaðar myndugleikar ella stovnar ella nýta hesar upplýsingar til onnur endamál.”
29. Í § 29, stk. 1, nr. 3 verður “§ 24 stk. 1 og 2” broytt til: “§ 24, stk. 1 og 3”.
30. Í § 29 verður sum stk. 3 sett:
“Stk. 3. Upplýsingar, skjøl og skrásetingar, sum nevnd í stk. 1, skulu latast víðari, tá Hvidvasksekretariatet ella aðrir skikkaðir myndugleikar venda sær til fyritøkur og persónar, fevnd av løgtingslógini, fyri at fáa upplýst, um hesi hava, ella tey seinastu 5 árini áðrenn fyrispurningin, hava havt handilssambond við nærri tilskilaðar persónar, og hvar hesi sambond eru ella hava verið. Víðarilatanin skal fara fram gjøgnum tryggar rásir og á ein hátt, ið tryggjar fullan trúnað um kanningarnar.”
31. Aftan á § 30 verður sett:
“§ 30 a. Tann myndugleikin, ið hevur eftirlit við, at ein fyritøka ella persónur yvirheldur hesa løgtingslóg, kann nokta, at dótturfelag, deild ella umboðsstova hjá fyritøkum og persónum, ið hava heimstað í einum landi, ið stendur á listanum hjá Europa-kommissiónini yvir triðjalond, sum eru í øktum vanda fyri hvítvaski og fígging av yvirgangi, verður stovnað í Føroyum.
Stk. 2. Tann myndugleiki, ið hevur eftirlit við, at ein fyritøka ella persónur yvirheldur hesa løgtingslóg, kann áseta reglur um, at fyritøkur og persónar, ið hava heimstað í einum landi, ið stendur á listanum hjá Europa-kommissiónini yvir triðjalond, sum eru í øktum vanda fyri hvítvaski og fígging av yvirgangi, einans kunnu stovna eitt dótturfelag, deild ella umboðsstovu í Føroyum undir serligum treytum.
§ 30 b. Fyritøkur og persónar, fevnd av løgtingslógini, ið ynskja at stovna eina deild ella eina umboðsstovu í einum landi, ið stendur á listanum hjá Europa-kommissiónini yvir triðjalond, sum eru í øktum vanda fyri hvítvaski og fígging av yvirgangi, skulu geva tí myndugleika, ið hevur eftirlit við, at fyritøkan ella persónurin heldur hesa løgtingslóg, boð um hetta, umframt hesar upplýsingar:
1) Í hvørjum landi deildin ella umboðsstovan ynskir at verða stovnað.
2) Eina lýsing av virkseminum hjá deildini ella umboðsstovuni, undir hesum upplýsingar um bygnað og tað ætlaða virksemið.
3) Bústað hjá deildini ella umboðsstovuni.
4) Nøvnini á limunum í leiðsluni á deildini ella umboðsstovuni.
Stk. 2. Tann myndugleikin, ið hevur eftirlit við, at fyritøkan ella persónurin heldur hesa løgtingslóg, kann forbjóða fyritøkuni ella persóninum at stovna deildir ella umboðsstovur í einum landi, ið stendur á listanum hjá Europa-kommissiónini yvir triðjalond, sum eru í øktum vanda fyri hvítvaski og fígging av yvirgangi.
Stk. 3. Tann myndugleiki, ið hevur eftirlit við, at ein fyritøka ella persónur yvirheldur hesa løgtingslóg, kann áseta reglur um, at fyritøkan ella persónurin skal taka hædd fyri, at tann ávísa deildin ella umboðsstovan fer at halda til í einum landi, ið ikki hevur nøktandi skipanir til tess at fyribyrgja hvítvaski og fígging av yvirgangi.”
32. Aftan á § 32 verður í kapittul 6 sett:
“§ 32 a. Landsstýrismaðurin kann tilnevna ein myndugleika, sum hevur ábyrgdina av at almannakunngera nøvnini hjá likamligum og løgfrøðiligum persónum, bólkum ella eindum, ið eru sett á listar hjá ST yvir tiltøk. Nøvnini verða kunngjørd á heimasíðuni hjá myndugleikanum.
Stk. 2. Eitt navn, sum er almannakunngjørt sambært stk. 1, verður strikað av heimasíðuni hjá føroyska myndugleikanum, um navnið verður sett á eitt rættarskjal frá Evropeiska Samveldinum, sum er kunngjørt í ES-tíðindum, um avgerð verður tikin um, at navnið ikki skal verða sett á eitt slíkt ES-rættarskjal, ella um navnið verður strikað frá listanum hjá ST yvir tiltøk.
Stk. 3. Fyritøkur og persónar, fevnd av hesi løgtingslóg, hava skyldu til uttan óneyðugt drál at frysta ognir, sum eru ogn ella í varðveitslu hjá likamligum ella løgfrøðiligum persónum, bólkum ella eindum, hvørs nøvn eru almannakunngjørd á heimasíðuni hjá tí føroyska myndugleikanum sambært stk. 1. Skyldan at frysta ognir dettur burtur, um tann likamligi ella løgfrøðiligi persónurin, bólkurin ella eindin verða strikað av heimasíðuni.”
33. Í § 33, stk. 1, 1. pkt., og § 34, stk. 1 verður “nr. 5-9” broytt til: “nr. 5-10”.
34. Í § 33, stk. 1 verður aftan á 2. pkt. sum nýtt pkt. sett:
“Fyritøkur og persónar skulu syrgja fyri, at fráboðanir til skipanina verða fylgdar upp, og skrivligt kunna skjalprógva, hvussu fráboðanirnar eru fylgdar upp.”
35. Aftan á § 33 verður sett:
“§ 33 a. Ger ein fyritøka ella ein persónur, fevnd av § 1, stk. 1, nr. 5-9, eina avtalu við einari treyt um tagnarskyldu við eitt starvsfólk ella fyrrverandi starvsfólk, skal tað standa í avtaluni, at avtalan ikki er til hindurs fyri, at starvsfólkið ella fyrrverandi starvsfólkið gevur almennum myndugleikum fráboðan um upplýsingar um brot ella møgulig brot á hesa løgtingslóg ella reglur, ásettar við heimild í løgtingslógini.
Stk. 2. Hóast stk. 1, er einki til hindurs fyri, at starvsfólkið ella fyrrverandi starvsfólkið gevur almennum myndugleikum fráboðan um upplýsingar um brot ella møgulig brot á fíggjarligu lóggávuna, sjálvt um eitt slíkt forboð er partur av avtaluni millum starvsfólkið og fyritøkuna ella persónin. Sama er galdandi fyri fráboðan til skipanir eftir § 33.”
36. Í § 34, stk. 1 verður “Starvsfólk” broytt til: “Starvsfólk ella fyrrverandi starvsfólk”, og “starvsfólkið” broytt til: “starvsfólkið ella fyrrverandi starvsfólkið”.
37. Í § 34, stk. 1 verður aftan á 1. pkt. sum nýtt pkt. sett:
“Tað sama er galdandi fyri ásetan, tillutan og útgjaldi av skiftandi løn til starvsfólk ella fyrrverandi starvsfólk.”
38. Í § 34, stk. 2 verður “starvsfólki” broytt til: “starvsfólki ella fyrrverandi starvsfólki”, og “starvsfólkið” broytt til: “starvsfólkið ella fyrrverandi starvsfólkið”.
39. Í § 34, stk. 3, 1. pkt. verður “Starvsfólk” broytt til: “Starvsfólk ella fyrrverandi starvsfólk”.
40. Í § 34, stk. 3, 2. pkt. verður “starvsfólkið” broytt til: “starvsfólkið ella fyrrverandi starvsfólkið”.
41. Aftan á § 34 verður í kapittul 7 sett:
“§ 34 a. Tann dagliga leiðslan í fyritøkum, ið eru fevndar av § 1, stk. 1, skal uttan óneyðugt drál geva evstu leiðsluni í fyritøkuni fráboðan um ávaringar um hvítvask og fígging av yvirgangi, sum eru móttiknar frá øðrum, heruppií útlendskum myndugleikum, uttanhýsis grannskoðarum og ráðgevum umframt varskógvarum.
Stk. 2. Á sama hátt skulu lyklapersónar í fyritøkum, ið eru fevndar av § 1, stk. 1, uttan óneyðugt drál geva dagligu ella evstu leiðsluni fráboðan um ávaringar um hvítvask ella fígging av yvirgangi, sum eru móttiknar frá øðrum, heruppií útlendskum myndugleikum, uttanhýsis grannskoðarum og ráðgevum umframt varskógvarum. Fær dagliga leiðslan eina fráboðan frá starvsfólkum um eina móttikna ávaring, skal tann dagliga leiðslan geva fráboðanina um ávaringina víðari til evstu leiðsluna í fyritøkuni.”
42. Í § 36, stk. 1-6 verður “í verk eftir § 25, stk. 1” broytt til: “í verk eftir § 24, stk. 1”.
43. Aftan á § 36 verður í kapittul 8 sett:
“§ 36 a. Starvsfólk, ið virka innan almennu umsitingina, hava skyldu til undir ábyrgd eftir §§ 152-152 e í revsilógini at halda upplýsingar loyniligar, sum stava frá eini fráboðan eftir § 25.
Stk. 2. § 9 um partsinnlit, § 18 um partshoyring, § 23 um grundgevingarskyldu og §§ 27 og 30 um víðarilatan av upplýsingum millum fyrisitingarmyndugleikar í løgtingslóg um fyrisitingarlóg, eru ikki galdandi fyri upplýsingar, sum eru nevndar í stk. 1.”
44. Aftan á § 36 a verður sum kapittul 8 a sett:
“Kapittul 8 a
Trustur og líknandi løgfrøðilig skipan, ið eru stovnað sambært lóggávu í øðrum londum
§ 36 b. Umsitarin av einum trusti ella ein persónur, ið røkir eitt samsvarandi starv í einari líknandi løgfrøðiligari skipan, skal innheinta og varðveita upplýsingar um veruligu eigararnar hjá trustinum sambært § 36 d, heruppií upplýsingar um rættindini hjá veruligu eigarunum, tá umsitarin ella persónurin, ið røkir eitt líknandi starv, er stovnaður ella hevur bústað í Føroyum.
Stk. 2. Er umsitarin av einum trusti ella ein persónur, ið røkir eitt samsvarandi starv í einari løgfrøðiligari skipan, stovnaður ella hevur bústað uttan fyri ES, skal umsitarin ella persónurin, ið røkir eitt samsvarandi starv, innheinta og varðveita upplýsingar um veruligu eigararnar hjá trustinum ella teirri líknandi løgfrøðiligu skipanini, heruppií upplýsingar um rættindini hjá veruligu eigarunum, tá umsitarin hjá trustinum ella persónurin, ið røkir eitt samsvarandi starv í einari líknandi løgfrøðiligari skipan:
1) stovnar eitt handilssamband sambært § 2, nr. 3, í navninum á trustinum ella tí samsvarandi løgfrøðiligu skipanini, ella
2) ognar sær fastogn í navninum á trustinum ella teirri samsvarandi løgfrøðiligu skipanini.
Stk. 3. Umsitarin av einum trusti ella persónurin, ið røkir eitt samsvarandi starv í einari líknandi løgfrøðiligari skipan, skal skráseta upplýsingarnar eftir stk. 1 ella 2 í kt-skipan Skráseting Føroya, skjótast gjørligt eftir at umsitarin ella persónurin, ið røkir eitt samsvarandi starv, hevur fingið kunnleika til, at ein persónur er vorðin veruligur eigari. Ein og hvør broyting av teimum upplýsingum, sum eru skrásettar um teir veruligu eigararnar, skal skrásetast skjótast gjørligt, eftir at umsitarin av trustinum ella persónurin, ið røkir eitt samsvarandi starv í einari líknandi løgfrøðiligari skipan, hevur fingið kunnleika til broytingina.
Stk. 4. Eru umsitararnir av trustinum ella persónarnir, ið røkja eitt líknandi starv í einari líknandi løgfrøðiligari skipan, stovnaðir ella búsitandi í ymiskum ES-londum, ella stovnar ein umsitari ella ein persónur, ið røkir eitt samsvarandi starv, fleiri handilssambond í navninum á trustinum ella teirri líknandi løgfrøðiligu skipanini í ymiskum ES-londum, kann eitt skrásetingarprógv ella ein úrdráttur av upplýsingunum um veruligan eigaraskap frá skránni hjá einum ES-limalandi koma í staðin fyri skráseting av veruligu eigarunum hjá trustinum ella teirri líknandi løgfrøðiligu skipanini í kt-skipan Skráseting Føroya.
Stk. 5. Umsitarin av einum trusti ella persónurin, ið røkir eitt samsvarandi starv í einari líknandi løgfrøðiligari skipan, skal í minsta lagi einaferð árliga eftirkanna, um broytingar eru í teimum skrásettu upplýsingunum um veruligu eigararnar hjá trustinum ella teirri líknandi løgfrøðiligu eindini.
Stk. 6. Umsitarin av einum trusti ella persónurin, ið røkir eitt samsvarandi starv í einari líknandi løgfrøðiligari skipan, skal varðveita skjalprógv fyri teimum upplýsingunum, ið eru innheintaðar um veruligu eigararnar av trustinum ella teirri líknandi løgfrøðiligu skipanini, í 5 ár eftir, at tann veruligi eigaraskapurin heldur uppat. Umsitarin av einum trusti ella persónurin, ið røkir eitt samsvarandi starv í einari líknandi løgfrøðiligari skipan, skal harumframt varðveita skjalprógv fyri teimum upplýsingunum, ið eru innheintaðar um royndirnar at eyðmerkja veruligu eigararnar av trustinum ella teirri líknandi løgfrøðiligu skipanini, í 5 ár eftir royndina at eyðmerkja veruligu eigararnar.
Stk. 7. Umsitarin av einum trusti ella persónurin, ið røkir eitt samsvarandi starv í einari líknandi løgfrøðiligari skipan, skal eftir áheitan útflýggja Hvidvasksekretariatet upplýsingar um veruligu eigararnar av trustinum ella teirri líknandi løgfrøðiligu skipanini, heruppií um umsitaran ella persónin, ið røkir eitt samsvarandi starv, royndirnar at eyðmerkja veruligu eigararnar hjá trustinum ella teirri líknandi løgfrøðiligu eindini. Umsitarin av einum trusti ella persónurin, ið røkir eitt samsvarandi starv í einari líknandi løgfrøðiligari skipan, skal harumframt eftir áheitan útflýggja tær nevndu upplýsingarnar til aðrar skikkaðar myndugleikar, tá hesir myndugleikarnir meta, at upplýsingarnar eru neyðugar fyri at røkja teirra eftirlitsuppgávur og eftiransingaruppgávur.
Stk. 8. Hvidvasksekretariatet og aðrir skikkaðir myndugleikar kunnu uttan kostnað geva upplýsingar um veruligar eigarar, ið eru skrásettar sambært stk. 3, ella innheintaðar sambært stk. 7, víðari til skikkaðar myndugleikar og fíggarligar fregnartænastur í ES-londum.
Stk. 9. Landsstýrismaðurin ásetur nærri reglur um skráseting, atgongd og almannakunngerð av upplýsingum sambært stk. 1-4 og 6 í kt-skipan Skráseting Føroya, heruppií hvørjar upplýsingar umsitarin av einum trusti ella persónurin, ið røkir eitt samsvarandi starv í einari líknandi løgfrøðiligari skipan, skal skráseta í kt-skipanini.
§ 36 c. Sum veruligur eigari av einum trusti ella einari líknandi løgfrøðiligari skipan er at rokna tann ella teir likamligu persónarnir, ið beinleiðis ella óbeinleiðis hava ræði á trustinum ella teirri líknandi løgfrøðiligu skipanini ella á annan hátt hava heimildir, sum minna um eigaraskap, heruppií:
1) stovnarar,
2) umsitarar ella persónar, ið røkja eitt samsvarandi starv,
3) verjar, um hesir eru at finna, og
4) serliga njótunartilskilaðir persónar ella, um trusturin ella líknandi løgfrøðiliga skipanin ikki kenna teir einstaklingar, sum hava gagn av útlutanum hjá trustinum ella teirri líknandi løgfrøðiligu skipanini, tann bólkurin av persónum, í hvørs høvuðsáhuga trusturin ella løgfrøðiliga skipanin er stovnað ella virkar.
§ 36 d. Umsitarin av einum trusti ella persónurin, ið røkir eina samsvarandi støðu í einari líknandi løgfrøðiligari skipan, sum skal innheinta, varðveita og skráseta upplýsingar um veruligar eigarar sambært § 36 b, skal fráboða persónum og fyritøkum, sum sambært hesi løgtingslóg skulu gera kundakunnleikamannagongdir, um sína støðu og rættstundis geva upplýsingar um eigaraviðurskifti hjá trustinum ella líknandi løgfrøðiligu skipanini, tá ið umsitarin ella persónurin, ið røkir eitt samsvarandi starv, stovnar handilssambond ella útinnir hissini transaktiónir vegna trustin ella ta líknandi løgfrøðiligu skipanina, sum fara upp um støddarmørkini sambært § 9.
Stk. 2. Fær Skráseting Føroya fráboðan um ósamsvar í skrásettu upplýsingunum eftir § 14 a um veruligu eigararnar av einum trusti ella eini líknandi løgfrøðiligari skipan, setur Skráseting Føroya eina kanning í verk av hesum viðurskiftunum, sbr. § 36 b, stk. 7 og § 36 f, stk. 1.
Stk. 3. Skráseting Føroya kann samstundis sum kanningin eftir stk. 2 verður gjørd, almannakunngera eina frágreiðing um fráboðanina í kt-skipan Skráseting Føroya. Umsitarin ella persónurin, ið røkir eitt samsvarandi starv, skal hava møguleika til at mótmæla frágreiðingina, áðrenn hon verður almannakunngjørd, uttan so at endamálið við almannakunngerð av frágreiðingini um fráboðanina fer fyri skeytið.
§ 36 e. Skráseting er ikki loyvd, um tað, ið eftir ætlan skal skrásetast, ikki lýkur treytirnar eftir hesi løgtingslóg, eftir reglum, ið eru ásettar við heimild í hesi løgtingslóg ella eftir viðtøkunum hjá trustinum ella teirri líknandi løgfrøðiligu skipanini. Skráseting er heldur ikki loyvd, um avgerðin, ið er grundarlag fyri skrásetingini, ikki er tikin í samsvari við ásetingar í hesi løgtingslóg, við reglur, ásettar við heimild í hesi løgtingslóg ella við tað, sum ásett er í viðtøkunum hjá trustinum ella teirri líknandi løgfrøðiligu skipanini.
Stk. 2. Fráboðari, sum skrásetur viðurskifti í kt-skipan Skráseting Føroya, ella, sum letur inn fráboðan um hesi viðurskifti til kt-skipan Skráseting Føroya, stendur til svars fyri, at skrásetingin ella fráboðanin er lógliga framd, heruppií at hóskandi fulltrú er tøk, og at skjalprógvini í sambandi við skrásetingina ella fráboðanina eru galdandi.
Stk. 3. Stk. 1 og 2 eru eisini galdandi fyri skjøl o.a., sum verða almannakunngjørd í kt-skipan Skráseting Føroya, ella skjøl, sum verða latin Skráseting Føroya at almannakunngera o.a. eftir hesi løgtingslóg.
§ 36 f. Skráseting Føroya kann sum skrásetingarmyndugleiki krevja tær upplýsingar, ið eru neyðugar, til tess at taka støðu til, um løgtingslógin, reglur, ásettar við heimild í løgtingslógini, og viðtøkurnar hjá trustinum ella teirri líknandi løgfrøðiligu skipanini eru hildnar.
Stk. 2. Við skráseting og fráboðan eftir reglum, ásettar við heimild í hesum kapitli, kann Skráseting Føroya í upp í 5 ár eftir dagfestingina av skrásetingini krevja váttan fyri, at skrásetingin ella fráboðanin er lógliga framd. Verða treytirnar í 1. pkt. ikki loknar, ásetur Skráseting Føroya eina freist at vátta hesi viðurskifti.”
45. Í § 37, stk. 1 verður aftan á 1. pkt. sum nýtt pkt. sett:
“Hetta er tó ikki galdandi fyri § 34.”
46. Í § 38, stk. 1 verður aftan á 1. pkt. sum nýtt pkt. sett:
“Upplýsingar, sum hava stóran týdning fyri eftirlitið hjá Tryggingareftirlitinum, skulu latast beinanvegin og uttan at biðið er um tær frammanundan.”
47. Í § 38 verður aftan á stk. 1 sum nýtt stk. sett:
“Stk. 2. Fyritøkur og persónar, sum hava latið upplýsingar eftir stk. 1, skulu skjótast gjørligt rætta upplýsingarnar, sum eru latnar Tryggingareftirlitinum, um fyritøkan ella persónurin eftirfylgjandi staðfestir fylgjandi:
1) Upplýsingarnar vóru ikki rættar, tá tær vórðu latnar.
2) Upplýsingarnar eru seinni vorðnar misvísandi.”
Stk. 2-5 verða eftir hetta stk. 3-6.
48. Í § 38, stk. 5, sum verður stk. 6, verður “stk. 1 og 4” broytt til: “stk. 1 og 5”.
49. Í § 38 verður sum stk. 7 sett:
“Stk. 7. Tryggingareftirlitið kann áseta nærri reglur um innlating av upplýsingum, sum eru neyðugar, tá Tryggingareftirlitið skal gera váðametingar av fyritøkum og persónum, ið eru fevnd av hesi løgtingslóg.”
50. Aftan á § 40 verður sett:
“§ 40 a. Tryggingareftirlitið kann áleggja einari fyritøku ella persóni, ið er fevndur av § 1, stk. 1, nr. 1-4, ikki at fáa sær nýggj kundaviðurskifti, tá ið eitt álvarsamt brot á ásetingar í hesi lóg ella reglur ásettar sambært løgtingslógini er staðfest. Er brotið heilt ella partvís framt í einari útlendskari deild hjá einari fyritøku, kann áleggingin víðkast til at fevna um deildina.
Stk. 2. Ein álegging eftir stk. 1 heldur uppat, tá fyritøkan ella persónurin mótvegis Tryggingareftirlitinum skjalprógvar, at brotið er hildið uppat.”
51. Í § 43, stk. 1, 1. og 2. pkt. verður “stk. 5” broytt til: “stk. 6”.
52. Í § 43, stk. 1, 3. pkt. verður “stk. 2” broytt til: “stk. 3”.
53. Í § 43 verður aftan á stk. 1 sum nýtt stk. sett:
“Stk. 2. Almannakunngjørd tiltøk verða verandi á heimasíðuni hjá Tryggingareftirlitinum í 5 ár eftir almannakunngeringina. Persónsupplýsingar, fevndar av almannakunngeringini, mugu tó ikki verða verandi á heimasíðuni hjá Tryggingareftirlitinum í longri tíð enn neyðugt.”
Stk. 2-5 verða eftir hetta stk. 3-6.
54. Í § 43, stk. 4, 1. pkt., sum verður stk. 5, 1. pkt., verður “stk. 5” broytt til: “stk. 6”.
55. Í § 43, stk. 5, 1. pkt., sum verður stk. 6, 1. pkt., verður “stk. 1-4” broytt til: “stk. 1 og 3-5”.
56. Aftan á § 44, men áðrenn yvirskriftina yvir § 45, verður sett:
“§ 44 a. Starvsfólk hjá Tryggingareftirlitinum mugu ikki lata upplýsingar víðari um ein persón, tá hesin hevur latið Tryggingareftirlitinum fráboðan um eina fyritøku ella persón fyri brot ella møguligt brot á hesa løgtingslóg, reglur givnar sambært løgtingslógini ella lov for Færøerne om oplysninger, der skal medsendes om betaler ved pengeoverførsler, sbr. tó stk. 2.
Stk. 2. Stk. 1 er ikki til hindurs fyri, at persónsupplýsingar verða latnar víðari sambært § 44, stk. 3.
Stk. 3. Øll, sum sambært stk. 2 móttaka persónsupplýsingar, sbr. tó § 44, stk. 5, eru við atliti at hesum upplýsingum áløgd ta í stk. 1 umrøddu tagnarskyldu.”
57. Í § 45, stk. 1, § 47, stk. 1 og 2 og § 48 verður “nr. 5-8” broytt til: “nr. 5-8 og 10”.
58. Í § 45, stk. 1 verður aftan á 1. pkt. sum nýtt pkt. sett:
“Hetta er tó ikki galdandi fyri § 34.”
59. § 46, stk. 5 verður orðað soleiðis:
“Stk. 5. Skráseting Føroya kann taka aftur skrásetingina av eini fyritøku ella persóni eftir stk. 1, um nýggir limir í evstu ella dagligu leiðsluni í fyritøkuni ella nýggir veruligir eigarar av fyritøkuni ikki geva Skráseting Føroya tær upplýsingar, sum eru neyðugar fyri, at Skráseting Føroya kann meta um, hvørt hesar eru fevndar av stk. 2 ella 3.”
60. Í § 46 verður sum stk. 8 sett:
“Stk. 8. Skráseting Føroya kann taka aftur skrásetingina av eini fyritøku ella persóni eftir stk. 1, um fyritøkan ella persónurin ger seg sekan í grovum ella endurtakandi brotum á hesa løgtingslóg.”
61. Í § 50, stk. 1, 1. pkt. og stk. 4, 1. pkt. verður “stk. 5” broytt til: “stk. 6”.
62. § 50, stk. 1, 2. pkt. verður orðað soleiðis:
“Avgerðir um at lata løgregluni mál til eftirkanningar almannakunngerast sum samandráttur, sbr. tó stk. 6.”
63. Í § 50, stk. 1, 3. pkt. verður “stk. 2” broytt til: “stk. 3”.
64. Í § 50 verður aftan á stk. 1 sum nýtt sett:
“Stk. 2. Almannakunngjørd tiltøk verða verandi á heimasíðuni hjá Skráseting Føroya í 5 ár eftir almannakunngeringina. Persónsupplýsingar, fevndar av almannakunngeringini, mugu tó ikki verða verandi á heimasíðuni hjá Skráseting Føroya í longri tíð enn neyðugt.”
Stk. 2-7 verða eftir hetta stk. 3-8.
65. Í § 50, stk. 3, 3. pkt., sum verður stk. 4, 3. pkt., verður “Tryggingareftirlitinum” broytt til: “Skráseting Føroya”.
66. Í § 50, stk. 5, 1. pkt. og stk. 6, 1. pkt., sum verða stk. 6, 1. pkt. og stk. 7, 1. pkt., verður “stk. 1-4” broytt til: “stk. 1-5”.
67. Í § 50, stk. 6, 1. pkt., sum verður stk. 7, 1. pkt. verður “stk. 5, 1. pkt.” broytt til: “stk. 6, 1. pkt.”.
68. Í § 51, stk. 3 verður aftan á nr. 3 sum nýtt nr. sett:
“4) TAKS, tá víðarilating fer fram fyri at TAKS kann kanna møgulig brot á tolllóggávuna, avgjaldslóggávuna og skattalóggávuna.”
Nr. 4-14 verða eftir hetta nr. 5-15.
69. Í § 51, stk. 4 verður “stk. 3, nr. 14” broytt til: “stk. 3, nr. 15”.
70. Í § 51, stk. 5 verður “nr. 1-13” broytt til: “nr. 1-14”.
71. Í § 51, stk. 6 verður “stk. 3, nr. 1, 2, 7, 8, 10, 12, 13 og 14” broytt til: “stk. 3, nr. 1, 2, 8, 9, 11 og 13-15”.
72. Aftan á § 51 verður í kapittul 9 sett:
“§ 51 a. Starvsfólk hjá Skráseting Føroya mugu ikki lata upplýsingar víðari um ein persón, tá hesin hevur latið Skráseting Føroya fráboðan um eina fyritøku ella persón fyri brot ella møguligt brot á hesa løgtingslóg, reglur sambært løgtingslógini ella lov for Færøerne om oplysninger, der skal medsendes om betaler ved pengeoverførsler, sbr. tó stk. 2.
Stk. 2. Stk. 1 er ikki til hindurs fyri, at persónsupplýsingar verða latnar víðari sambært § 51, stk. 3.
Stk. 3. Øll, sum sambært stk. 2 móttaka persónsupplýsingar, sbr. tó § 51, stk. 5, eru við atliti at hesum upplýsingum áløgd ta í stk. 1 umrøddu tagnarskyldu.
TAKS
§ 51 b. TAKS kann hóast § 151 í skattalógini lata upplýsingar víðari til myndugleikar, sum luttaka í einum skipaðum samstarvi um fyribyrging av hvítvaski og fígging av yvirgangi, um upplýsingarnar kunnu hava týdning fyri uppgávuna hjá myndugleikunum at fyribyrgja og forða fyri hvítvask og fígging av yvirgangi.
Stk. 2. Biður ein myndugleiki, ið luttekur í einum skipaðum samstarvi um fyribyrging av hvítvaski og fígging av yvirgangi, um upplýsingar frá TAKS, skal TAKS hóast § 151 í skattalógini, lata víðari upplýsingarnar, um upplýsingarnar hava týdning fyri uppgávuna hjá myndugleikanum at fyribyrgja ella forða fyri hvítvaski og fígging av yvirgangi.”
73. Aftan á § 55 verður í kapittul 10 sett:
“§ 55 a. Persónar, ið virka innan almennu fyrisitingina, og sum luttaka í einum skipaðum samstarvi um fyribyrging av hvítvaski og fígging av yvirgangi, hava undir ábyrgd eftir §§ 152-152 e í revsilógini skyldu til at halda trúnaðarupplýsingar, sum verða móttiknar í sambandi við samstarvið, loyniligar, sbr. tó stk. 3.
Stk. 2. Tagnarskyldan í stk. 1 er eisini galdandi í mun til tann likamliga ella løgfrøðiliga persónin, sum upplýsingarnar viðvíkja, hóast eina møguliga rættarliga skyldu at lata upplýsingarnar víðari til viðkomandi sambært ásetingunum í fyristingarlóggávuni ella dátuverndarlóggávuni, sbr. tó stk. 3.
Stk. 3. Upplýsingar, fevndar av stk. 1, kunnu eftir samtykki frá tí myndugleikanum, sum hevur latið upplýsingarnar, verða partur av málsviðgerðini hjá tí móttakandi myndugleikanum. Fyriliggur eitt samtykki, eru ásetingarnar, sum vanliga eru galdandi fyri tann móttakandi myndugleikan, og sum vikið er frá sambært stk. 1 og 2, aftur galdandi.”
74. Í § 59, stk. 1, 1. pkt. verður “stk. 3, 1.-4. pkt.” broytt til: “stk. 4, 1.-4. pkt.”
75. § 59, stk. 1, 2. pkt. verður orðað soleiðis:
“Tilætlað brot ella brot framd av grovum ósketni á § 5, § 6, stk. 1 og 2, § 7, stk. 1-4 og 6, §§ 8 og 9, § 10, stk. 1 og 2, og stk. 3, 1., 3. og 4. pkt., § 11, § 13, stk. 1, stk. 2, 2. pkt., stk. 3, stk. 4, 2. pkt., og stk. 5, §§ 14 og 15, § 16, stk. 1-4, §§ 17-19, § 20, stk. 1, 2. pkt., § 21, stk. 2 og 3, § 24, stk. 1-3, § 25, stk. 1 og 3, 1. pkt., § 28, stk. 3 og 5, §§ 29 og 30, § 30, b, stk. 1, § 33, stk. 1, § 34, stk. 1 og 2, § 34 a, § 36, stk. 1, § 38, stk. 1, § 45, stk. 2, § 46, stk. 1 og § 47, stk. 1 verða revsað við sekt.”
76. § 59, stk. 2 verður orðað soleiðis:
“Stk. 2. Er talan um serliga grov ella umfatandi brot á § 5, § 8, stk. 2, § 9, § 10, stk. 1 og 2 og stk. 3, 2. og 3. pkt., § 11, § 13, stk. 1, stk. 2, 2. pkt., og stk. 3 og 5, § 16, stk. 1-4, §§ 17-19, § 20, stk. 1, 2. pkt., § 24, stk. 1, § 25, stk. 1 og stk. 3, 1. pkt., §§ 29 og 30 og § 38, stk. 2 kann revsingin vaksa til fongsul upp í 2 ár. “
77. Í § 59, stk. 5 verður aftan á 1. pkt. sum nýtt pkt. sett:
“Fyrningarfreistin er tó 10 ár fyri brot á § 6, stk. 1 og 2, § 9, § 10, stk. 1 og 2 og stk. 3, 1., 3., og 4. pkt., § 11, § 13, stk. 1, stk. 2, 2. pkt., stk. 3 og 4, § 14, § 16, stk. 1-4, § 17, stk. 1-6, §§ 18 og 19, § 21, stk. 2 og 3, § 23, stk. 1, 2. pkt., og stk. 2 og 3, § 24, stk. 1 og 2, § 25, stk. 1 og stk. 3, 1. pkt., §§ 29, 30 og 30 b, § 31, 1. pkt., §§ 34 a og § 38, stk. 1 og 2.”
78. Aftan á § 59 verður sett:
“§ 59 a. Um eitt brot á § 6, stk. 1 og 2, § 7, stk. 1-4 ella 6, § 8, stk. 1 ella 2, § 9, § 10, stk. 1, 2 ella 3, 1., 3. ella 4. pkt., § 11, § 13, stk. 1, stk. 2, 2. pkt., stk. 3, stk. 4, 2. pkt., ella stk. 5, § 14, § 16, stk. 1 ella 2, § 17, stk. 1-6, § 18, § 19, § 21, stk. 2 ella 3, § 23, stk. 1, 2. pkt., ella stk. 2 ella 3, § 24, stk. 1 ella 2, § 25, stk. 1 og 3, stk. 4, 1. pkt., og stk. 6, 1. pkt., §§ 29, 30 ella 46, stk. 1 ikki vildi ført til hægri revsing enn sekt, kann Skráseting Føroya ella Tryggingareftirlitið í einum sektaruppskoti boða frá, at málið kann verða avgjørt uttan rættarviðgerð, um likamligi ella løgfrøðiligi persónurin, ið hevur framt brotið, játtar seg sekan í brotinum og váttar at vera til reiðar at gjalda sektina sambært sektaruppskotinum innan nærri ásetta freist, sbr. tó stk. 2.
Stk. 2. Skráseting Føroya ella Tryggingareftirlitið skal, áðrenn eitt sektaruppskot verður handað, fáa eitt samtykki frá National Enhed for Særlig Kriminalitet, um Skráseting Føroya ella Tryggingareftirlitið metir, at eitt brot gevur høvi til eina ávísa meting, ella at tað kann verða vikið frá útgangsstøðinum fyri støddini á sektini. “
79. Í § 61, stk. 1 verður “stk. 1 og 4” broytt til: “stk. 1 og 5”.
80. Í § 61, stk. 2 verður “§ 46, stk. 5 og 7” broytt til: “§ 46, stk. 7”, og “dagligbøtur” broytt til: “dagbøtur”.
81. Í § 61 verður aftan á stk. 2 sum nýtt stk. sett:
“Stk. 3. Um ein umsitari av einum trusti ella ein persónur, ið røkir eina samsvarandi støðu í einari líknandi løgfrøðiligari skipan, ikki útinnir tær skyldur, sum tey eftir løgtingslógini hava sambært § 36 a, stk. 3, 4, 6 og 7, kann Skráseting Føroya sum tvingsilsráð áleggja umsitaranum ella persóninum, ið røkir eina samsvarandi støðu, dagbøtur ella vikubøtur.”
Stk. 3 verður eftir hetta stk. 4.
82. Í § 61 verður sum stk. 5 sett:
“Stk. 5. Um ein fyritøka ella persónur ikki útinnir tær skyldur, sum tey hava sambært § 28, stk. 3, kann Hvidvasksekretariatet sum tvingsilsráð áleggja persóninum, fyritøkuni ella ábyrgdarpersóninum hjá fyritøkuni dagbøtur ella vikubøtur.”
83. Í skjali 1, nr. 3 verður “Landafrøðiligir váðar:” broytt til: “Landsfrøðiligir váðar, heruppií skráseting, stovnan og bústaður í:”.
84. Í skjali 2, nr. 1 verður sum litra g sett:
“g) Viðskiftafólkið er ein triðjalandsborgari, ið søkir um uppihaldsloyvi ella statsborgaraskap innan fyri ríkisfelagsskapin ella einum øðrum ES-landi ella EBS-landi í býti fyri kapitalflutning, keyp av ogn ella ríkisskuldarbrøv ella íløgu í feløg í tí ávísa ES-landinum ella EBS-landinum.”
85. Í skjali 2, nr. 2 verður litra c orðað soleiðis:
“c) Handilssambond ella transaktiónir, uttan beinleiðis kontakt, uttan ávís trygdartiltøk sum t.d. elektronisk eyðmerkingaramboð, viðkomandi álitistænastur ella eitthvørt annað trygt slag av fjareyðmerkingargongd ella elektronisk eyðmerkingargongd, ið er skipað, viðurkend, góðkend ella góðtikin av teimum skikkaðu myndugleikunum í landinum”
§ 2
Stk. 1. Henda løgtingslóg kemur í gildi 1. juli 2023.
Stk. 2. Landsstýrismaðurin ásetur í kunngerð, nær § 1, nr. 18 kemur í gildi.
Stk. 3. § 1, nr. 77 er galdandi fyri lógarbrot, sum eru framd, áðrenn lógin kemur í gildi. Hetta er tó ikki galdandi, um lógarbrotið eftir higartil galdandi reglum er fyrnað.
Í Tinganesi, 22. mai 2023
Aksel V. Johannesen (sign.)
løgmaður
Lm. nr. 92/2022
