Løgtingslóg nr. 80 frá 25. mai 2009 um broyting í ymsum skatta-, avgjalds- og stuðulslógum

25. mai 2009Nr. 80

Løgtingslóg um broyting í ymsum skatta-, avgjalds- og stuðulslógum

(Bústaðapakkin)

Samsvarandi samtykt Løgtingsins staðfestir og kunnger løgmaður hesa løgtingslóg:

§ 1

Í løgtingslóg nr. 148 frá 30. desember 1996 um stuðul til rentuútreiðslur av lánum, sum seinast broytt við løgtingslóg nr. 45 frá 30. mars 2001, verða gjørdar hesar broytingar:

1)   Í § 1 verður sum nýtt stk. 2 sett:

“Stk. 2. Rætt til rentustuðul eftir hesi lóg hava eisini vanlig lutaíbúðafeløg, stovnsett sambært § 12 í løgtingslóg um lutaíbúðafeløg, og serstøk lutaíbúðafeløg, stovnsett sambært § 32 í løgtingslóg um lutaíbúðafeløg."

2)   Í § 2, nr. 2 verður sum nýtt litra b sett:

“b) keyp ella bygging, umvæling ella umbygging av bústaðaeindum í lutaíbúðafeløgum.”

Litra b og c verða hereftir litra c og d.

3)   Í § 2 verður sum nýtt stk. 2 sett:

“Stk. 2. Rentustuðul til lutaíbúðafeløg eftir § 3 í hesi lóg verður fyri vanlig lutaíbúðafeløg, sambært kapitli 2 í løgtingslóg um lutaíbúðafeløg, veittur fyri hvønn lutin, og fyri serstøk lutaíbúðafeløg, sambært kapitli 3 í løgtingslóg um lutaíbúðafeløg, veittur fyri hvørja bústaðaeind.”

4)   Í § 2 a, stk. 1 verður eftir orðið “hús” sett: “v.m.”

5)   Í §§ 6, stk. 4 og 7, stk. 3 verður eftir orðið “persónur” sett: “v.m.”

6)   § 8, stk. 1 verður orðað soleiðis:

“§ 8. Fær ein persónur v.m. endurgjald á annan hátt fyri rentuútreiðslur, hevur hesin persónur v.m. samstundis ikki rætt til rentustuðul eftir hesi lóg.”

§ 2

Í løgtingslóg nr. 58 frá 7. juni 2007 um stuðul til bygging og umvæling av egnum bústaði verður eftir § 1 sett:

“§ 1a. Vanlig lutaíbúðafeløg, sambært kapitli 2 í løgtingslóg um lutaíbúðafeløg, sum byggja ella umvæla egnar lutaíbúðir, hava rætt til stuðul eftir hesi lóg.

Stk. 2. Stuðul verður veittur fyri meirvirðisgjald av arbeiðsløn við í mesta lagi kr. 150.000 pr. lutin í felagnum.

Stk. 3. § 1, stk. 3 í hesi lóg er eisini galdandi fyri vanlig lutaíbúðafeløg.”

§ 3

Í løgtingslóg nr. 136 frá 8. september 1992 um meirvirðisgjald, sum seinast broytt við løgtingslóg nr. 66 frá 7. juni 2007, verður í § 3, stk. 2 eftir orðið “kommunur” sett: “og serstøk lutaíbúðafeløg, sbr. kap. 3 í løgtingslóg um lutaíbúðafeløg”.

§ 4

Í løgtingslóg nr. 87 frá 1. september 1983 um áseting av skatti, sum seinast broytt við løgtingslóg nr. 64 frá 10. juni 2008, verða gjørdar hesar broytingar:

1)   Í § 1 verður eftir § 8, stk. 2 sett:“og § 8 a, stk.1”

2)   Eftir § 8 verður sum nýggj grein sett:

“§ 8 a. Leiguinntøka, ið stavar frá útleigan av húsum v.m. til bústaðarendamál, verður bruttoskattað við 25%. Bert tann parturin av leiguinntøkuni, sum fer upp um kr. 24.000 árliga, verður skattaður. Leiguinntøka, skattað eftir hesum stykki, verður ikki tikin við í skattagrundarlagið í § 1. Skatturin verður býttur við 45% til avvarðandi kommunu og 55% til landskassan.

Stk. 2. Leiguinntøka kann í staðin fyri at verða skattað eftir stk. 1 verða skattað eins og onnur inntøka. Inntøkan verður tá tikin við í skattagrundarlagið í § 1 uttan botnfrádrátt.”

§ 5

Í løgtingslóg nr. 86 frá 1. september 1983 um landsskatt og kommunuskatt (skattalógin), sum seinast broytt við løgtingslóg nr. 64 frá 10. juni 2008, verða gjørdar hesar broytingar:

1)   Í § 29 verður eftir nr. 24 sett:

“25) stuðul sambært løgtingslóg um stuðul til bygging og umvæling av egnum bústaði.”

2)   § 83 a verður orðað soleiðis:

“§ 83 a. Afturberingin sambært § 63a verður borin av landskassanum.”

§ 6

Henda løgtingslóg kemur í gildi dagin eftir, at hon er kunngjørd. §§ 1-3 hava virknað frá 1. juli 2009, § 4 og § 5, nr. 2 hava virknað frá 1. januar 2009, og § 5, nr. 1 hevur virknað frá 1. juli 2007.

Tórshavn, 25. mai 2009

Kaj Leo Johannesen (sign.)

løgmaður

Lm. nr. 141/2008