Skrivar tú trygging verður eisini leitað eftir øðrum endingum av orðinum sum t.d. tryggingar og tryggingarvirksemi.
Skrivar tú ?trygging verður leitað eftir orðum sum t.d. lívstrygging og lívstryggingar.
Skrivar tú ”trygging” verður einans leitað eftir júst hesum sniðnum av orðinum.
12. november 2025Nr. 9002
Rundskriv um listprýðing í byggiverkætlanum landsins
(Til øll stjórnarráð og stovnar undir landinum)
1. Heimild
1.1.Við heimild í § 19, stk. 2 í fráboðan nr. 164 frá 22. desember 2022 um býti av málsøkjum landsstýrisins millum landsstýriskvinnurnar og landsstýrismenninar, sum seinast broytt við fráboðan nr. 158 frá 17. oktober 2025, og eftir at hava fingið samtykki til tess á landsstýrisfundi, verður ásett:
1.2. Allar byggiverkætlanir hjá landinum skulu listprýðast, uttan so at annað er ásett í hesum rundskrivi. Listprýðingin er partur av byggiverkætlanini, og kann fevna um øll sløg av listaverkum, bæði innandura, uttandura og í økinum kring byggiverkætlanirnar.
1.3. Rundskrivið er galdandi fyri:
1.3.1. Allar byggiverkætlanir hjá landinum, herundir bygningar, skip og aðrar byggiverkætlanir, har samlaði kostnaðurin fyri byggiverkætlanina er 20 mió. kr. ella hægri. Ásetingar í rundskrivinum kunnu verða brúktar, verður avgerð tikin um at listprýða byggiverkætlanir, har kostnaðurin er minni enn 20 mió. kr.
1.3.2. Rundskrivið er galdandi fyri bæði nýbygging og umvælingar.
1.3.3. Eru atlit, ið tala fyri, at ein byggiverkætlan ikki skal listprýðast, so sum trygd ella brúk, kann verða vikið frá ásetingini um listprýðing. Landsstýrisfólkið ger av, um talan er um eina byggiverkætlan, har tað eftir umsókn kann verða vikið frá nr. 1.2.
1.3.4. Rundskrivið er eisini galdandi, verður avgerð tikin um at listprýða verandi ognir hjá landinum, ið ikki áður eru listprýddar.
1.3.5. Byggiverkætlanir hjá landinum, ið hýsa bústøðum, eru undantiknar ásetingunum í hesum rundskrivi. Tó kunnu ásetingar í rundskrivinum verða brúktar, um avgerð verður tikin um at listprýða byggiverkætlanina.
1.3.6. Byggiverkætlanir hjá landinum, ið eru gjørdar til fyribils brúk, sum ikki eru í regluligum brúki hjá fólki, goymslubygningar og aðrar líknandi byggiverkætlanir, eru ikki fevndar av rundskrivinum. Tó kunnu ásetingar í rundskrivinum verða brúktar, um avgerð verður tikin um at listprýða byggiverkætlanina.
2. Fígging
2.1. Tá farið verður undir eina byggiverkætlan hjá landinum, sum er fevnd av ásetingunum í nr. 1.2, skal ein upphædd setast av til listprýðing. Upphæddin skal í minsta lagi svara til 1,5% av mettum handverkaraútreiðslum, og verður fíggjað sum partur av játtanini til einstøku byggiverkætlanina, sbr. tó nr. 2.2 og 5.3.
2.2. Er talan um eina byggiverkætlan, har útreiðslurnar eru serliga stórar, ella har byggiverkætlanin ikki er serliga opin fyri almenninginum, kann upphæddin, ið verður sett av til listprýðing, vera lægri enn 1,5% av mettu handverkaraútreiðslunum. Landsstýrisfólkið ger av, um talan er um ein byggiverkætlan, har tað eftir umsókn kann verða vikið frá nr. 1.2.
2.3 Viðlíkahald og umvæling av listprýðingini verður fíggjað sum partur av játtanini hjá tí stovni, ið hevur brúksrættin til viðkomandi bygning, skip ella aðra byggiverkætlan.
3. Ognarviðurskifti
3.1. Listprýðingar, ið eru framdar sambært hesum rundskrivi, eru ogn landsins.
4. Umsiting av listprýðing
4.1. Landsstýrisfólkið skipar umsiting av listprýðing í byggiverkætlanum landsins á Listasavni Føroya.
4.2. Uppgávur hjá Listasavni Føroya í sambandi við umsiting av listprýðing í byggiverkætlanum landsins eru at:
4.2.1. Ráðgeva landsstýrisfólkinum í listprýðismálum.
4.2.2. Ráðgeva byggiánaranum um listprýðing.
4.2.3. Ráðgeva í málum um viðlíkahald og umvæling av listprýðingum hjá landinum.
4.2.4. Ráðgeva listprýðisnevndum sambært nr. 5, ið verða settar í sambandi við byggiverkætlanir hjá landinum.
4.2.5 Gera tilmæli til landsstýrisfólkið um víkjast skal frá meginregluni í einstøkum byggiverkætlanum sambært nr. 2.2.
4.3. Listasavn Føroya førir skrá yvir listprýðing í byggiverkætlanum hjá landinum.
5. Listprýðisnevndir
5.1. Til hvørja listprýðing sambært nr. 1.2 og 1.3 setur byggiánarin eina listprýðisnevnd, ið ger tilmæli til byggiánaran um listprýðing.
5.2. Í listprýðisnevndunum eru umboð fyri byggiánaran, byggiharran, arkitektin og brúkaran umframt ein listfrøðingur og eitt yrkislistafólk.
5.3. Útreiðslur hjá listprýðisnevndunum verða hildnar av játtanini til einstøku byggiverkætlanina.
6. Tilgongd
6.1. Áðrenn farið verður undir eina byggiverkætlan ella listprýðing hjá landinum, skal byggiharrin ráðføra seg við Listasavn Føroya um listprýðingina.
6.2. Í skipanaruppskoti fyri hvørja einstaka byggiverkætlan skal ætlanin fyri listprýðingina og fíggjartørvurin lýsast.
6.3. Listprýðingar skulu sum meginregla bjóðast út alment. Í einstøkum førum, eitt nú um upphæddin er lægri enn kr. 300.000, kunnu listprýðingar verða bodnar út til í minsta lagi trý útvald listafólk.
6.4. Tá ein listprýðisnevnd fer til verka, skal hon ráðføra seg við Listasavn Føroya um listprýðingina.
6.5. Áðrenn farið verður undir viðlíkahald ella umvæling av listprýðing hjá landinum, skal stovnurin, ið hevur brúksrættin til viðkomandi bygning, skip ella aðra byggiverkætlan, ráðføra seg við Listasavn Føroya um listprýðingina.
6.6. Listasavn Føroya ger vegleiðing um listprýðing í byggiverkætlanum hjá landinum, herundir um sáttmálar, samsýningar, rakstrarætlanir og viðlíkahaldsætlanir.
7. Handfaring
7.1. Tað er viðkomandi stovnur, har ið listprýðingin er, ið hevur ábyrgd av listprýðingini, undir hesum av viðlíkahaldi og umvælingum, og at listprýðingin verður handfarin á ein hátt, ið ikki er til skaða fyri listprýðingina, sbr. nr. 6.6.
7.2. Listprýðing, ið er partur av eini byggiverkætlan, og sum er fingin til vegar sambært hesum rundskrivi, kann ikki verða broytt ella flutt í annan bygning uttan við loyvi frá landsstýrisfólkinum eftir tilmæli frá Listasavni Føroya. Loyvi kann eitt nú verða givið, har vandi ikki er fyri, at listprýðingin ferst, og har annað hóskandi stað er til listprýðingina.
7.3. Søla ella onnur avhending av listprýðing, ið er partur av eini byggiverkætlan, og sum er fingin til vegar sambært hesum rundskrivi, kann bert fara fram við loyvi frá landsstýrisfólkinum eftir tilmæli frá Listasavni Føroya. Loyvi kann eitt nú verða givið í teimum førum, har tað verður mett, at tørvur ikki er á listprýðingini longur, ella har mett verður, at listprýðingin ikki er hóskandi á staðnum.
7.4. Listprýðing, ið er partur av eini byggiverkætlan, og sum er fingin til vegar sambært hesum rundskrivi, skal vera eyðmerkt og skrásett í skrá hjá Listasavni Føroya yvir listprýðing í byggiverkætlanum hjá landinum sambært nr. 4.3.
8. Gildiskoma
8.1. Hetta rundskriv kemur í gildi 1. juli 2026.
Almanna- og mentamálaráðið, 12. november 2025
Eirikur í Jákupsstovu (sign.)
landsstýrismaður
/ Eyðun Mohr Hansen (sign.)
