Skrivar tú trygging verður eisini leitað eftir øðrum endingum av orðinum sum t.d. tryggingar og tryggingarvirksemi.
Skrivar tú ?trygging verður leitað eftir orðum sum t.d. lívstrygging og lívstryggingar.
Skrivar tú ”trygging” verður einans leitað eftir júst hesum sniðnum av orðinum.
23. oktober 2012Nr. 103
Kunngerð um virksemi Brúkaraumboðsins
Við heimild í § 21, stk. 5 í løgtingslóg nr. 19 frá 8. mai 2008 um marknaðarføring, sum seinast broytt við løgtingslóg nr. 50 frá 17. mai 2011, verður ásett:
§ 1. Brúkaraumboðið kann av sínum eintingum ella grundað á kærur taka mál upp til viðgerðar.
§ 2. Brúkaraumboðið skal kunna almenningin um mál, sum eru viðgjørd av Brúkaraumboðnum, ákæruvaldinum og dómstólinum, og sum hava almennan áhuga ella týdning eftir marknaðarføringslógini.
§ 3. Brúkaraumboðið kann, eftir vanligu reglunum í rættargangslógini, ganga inn í borgarlig rættarmál, undir hesum eisini rættarmál, sum viðvíkja borgararættarligum brúkaraverndarlógum, um hetta fer fram sum liður í almenna eftirlitinum við marknaðarføringslógini.
§ 4. Brúkaraumboðið letur á hvørjum ári landsstýrismanninum frágreiðing um virksemi sítt í farna ári. Frágreiðingin verður almannakunngjørd.
§ 5. Henda kunngerð kemur í gildi dagin eftir, at hon er kunngjørd.
Vinnumálaráðið, 23. oktober 2012
Johan Dahl (sign.)
landsstýrismaður
/ Gunnleyg Árnafjall (sign.)
